مَتَّ 16

ڢَرِسَعٜنْ عٜ سَدُکِعٜنْ ࢨَمِ عَلَامَ

(مَرْکُسْ 8‏:11‏-13؛ لُکَ 12‏:54‏-56)

1ڢَرِسَعٜنْ عٜ سَدُکِعٜنْ نغَرِ حَا عِيسَى نغَمْ جَرِّبَاغٛ مٛ؞ ࢡٜࢨَمِمٛ عٛوَنغِنَنَ ࢡٜ عَلَامَ عِوْکَ دِغَ عَسَمَ#مَتَّ 12‏:38؛ لُکَ 11‏:16؞؞ 2عِيسَى جَابِ ࢡٜ‏: «تٛ نَانغٜ مُتِ، عَسَمَ بٛو وٛوجِ، عٛنْ طٛنْ مبِعَ‏: جَنغٛ لَاࢡَنْ؞ 3ڢَجِرِ بٛو، تٛ عَسَمَ ࢩِࢡِّ، دُولٜ مبٛوجِ، عٛنْ طٛنْ مبِعَ‏: نَارْغٜوٛلْ عُمّٛتٛ حَنْدٜ‏! عٛنْ مبَاوِ ڢَسِّتِرْغٛ کٛ وَنغِ حَا عَسَمَ، عَمَّا عَلَامَاجِ لَاتِيطِ جٛنْتَ کَمْ، عٛنْ مبَاوَتَا ڢَسِّتِرْغٛ طِ؞ 4يِمْࢡٜ زَمَنُورُ ندُعُ، ࢡٜ حَلُّࢡٜ، زَمْبٛتٛوࢡٜ اَللَّه‏! ࢡٜنغٜلِ عَلَامَ، عَمَّا ࢡٜکٜࢡَتَا، سٛنَا عَلَامَ اَلنَّبِي يُونُسَ؞» ندٜنْ عٛعَشِّ ࢡٜ، عٛدِلِّ#مَتَّ 12‏:39؛ لُکَ 11‏:29؞؞

عُڢْنِرْطُمْ ڢَرِسَعٜنْ عٜ سَدُکِعٜنْ

(مَرْکُسْ 8‏:14‏-21)

5ݠُکَرَعٜنْ عٜىٰرِ وٜىٰندُ؞ ࢡٜنغٜجِّتِ حٛوعُغٛ تَمْسٜىٰجٜ؞ 6عِيسَى وِعِ ࢡٜ‏: «کَکِّلٜ، عَيْنٜ کٛعٜ مٛوطٛنْ عٜ عُڢْنِرْطُمْ ڢَرِسَعٜنْ عٜ سَدُکِعٜنْ#لُکَ 12‏:1؞؞» 7ݠُکَرَعٜنْ شَرْوٛوتِرِ، ࢡٜمبِعِ‏: «عٛوٛلْوِ بَنَ نٛنْ نغَمْ عٜنْ کٛوعَايْ تَمْسٜىٰجٜ؞» 8عِيسَى عَنْدِ کٛ ࢡٜنُمَتَ؞ عٛࢨَمِ ࢡٜ‏: «کٛنِ مبِعٛتٛنْ عٛنْ نغَلَا تَمْسٜىٰجٜ، عٛنٛنْ ڢَمْطَ-نُطِّنْکِعٜنْ؟ 9عٛنْ ݠَامَايْ تَوٛنْ نَ؟ عٛنْ شِڢْتٛرْتَا حَالَ تَمْسٜىٰجٜ جٛوِ طٜ مِسٜنْدَنِ يِمْࢡٜ عُجِنٜ نجٛوٛ عٜ لِمْغَلْ شِلَاجٜ طٜ عٛنْ عَدِ#مَتَّ 14‏:17‏-21؞ 10عٜ حَالَ تَمْسٜىٰجٜ جٛوٜىٰطِطِ طٜ مِسٜنْدَنِ يِمْࢡٜ عُجِنٜ نَيٛ عٜ لِمْغَلْ شِلَاجٜ طٜ عٛنْ عَدِ نَ#مَتَّ 15‏:34‏-38؞؟ 11کٛنِ عٛنْ ݠَامَتَا؟ مِوٛلْوَنَايْ عٛنْ حَالَ تَمْسٜىٰجٜ‏! کَکِّلَنٜ عُڢْنِرْطُمْ ڢَرِسَعٜنْ عٜ سَدُکِعٜنْ؞»

12ندٜنْ ݠُکَرَعٜنْ ݠَامِ عٛوِعَايْ ࢡٜعَيْنَ کٛعٜ مَࢡّٜ عٜ عُڢْنِرْطُمْ تَمْسٜىٰجٜ عَمَّا عٜکِّتِنٛلْ ڢَرِسَعٜنْ عٜ سَدُکِعٜنْ؞

ݠِيٜرْ سٜىٰدِ عِيسَى وٛنِ اَلْمَسِيحُ

(مَرْکُسْ 8‏:27‏-30؛ لُکَ 9‏:18‏-21)

13عِيسَى يٜحِ لٜسْدِ کَيْسَرِيَ-ڢِلِݠِّ؞ تٛنْ عٛࢨَمِ ݠُکَرَعٜنْ مَاکٛ‏: «يِمْࢡٜ طٛنْ مبِعَ، مِنْ، ࢡِي-نٜطّٛ، مِ مٛيْ؟» 14ࢡٜنجَابِمٛ‏: «وٛطْࢡٜ طٛنْ مبِعَ عَنْ وٛنِ يُحَنَّ بَطٛووٛ بَݠْتِسْمَ، وٛطْࢡٜ بٛو طٛنْ مبِعَ عَنْ وٛنِ إِلْيَاسُ؞ وٛطْࢡٜ بٛو طٛنْ مبِعَ عَنْ وٛنِ يٜرٜمِيَ مَلَّ غٛوتٛ اَلنَّبِعٜنْ#مَتَّ 14‏:1‏-2؛ مَرْکُسْ 6‏:14‏-15؛ لُکَ 9‏:7‏-8؞؞» 15عِيسَى ࢨَمِ ࢡٜ‏: «عٛنٛنْ بٛو، عٛنْ طٛنْ مبِعَ مِ مٛيْ؟» 16سِمٛنْ ݠِيٜرْ جَابِمٛ‏: «عَنْ وٛنِ اَلْمَسِيحُ، ࢡِطّٛ اَللَّه غٜىٰتٛ#يُحَنَّ 6‏:68‏-69؞؞» 17عِيسَى وِعِمٛ‏: «عَ بَرْکِطِنَاطٛ، سِمٛنْ ࢡِي يُونُسَ، نَا نٜطّٛ وَنغِنَنِ مَ غٛونغَ کَ، عَمَّا طُمْ بَابِرَاوٛ عَمْ مٛ عَسَمَ؞ 18مِطٛنْ وِعٜ‏: عَنْ وٛنِ ݠِيٜرْ وَاتٛ تَݠَارٜ؞ دٛوْ تَݠَارٜ مَنْ مِمَحَنْ جَمَعَارٜ نُطِّنْࢡٜ يَمْ؞ کٛو مَايْدٜ جَالَتَاکٛ ندٜ سَمْ؞ 19مِحٛکّٜتٜ مَࢡِّتِرْطُمْ لَامُ عَسَمَنْجِ؞ کٛ عَحَࢡِّ حَا دُنِيَارُ، طُمْ حَࢡَّامَ حَا عَسَمَ بٛو، کٛ عَڢِيسْتِ حَا دُنِيَارُ، طُمْ ڢِيسْتَامَ حَا عَسَمَ بٛو#مَتَّ 18‏:18؛ يُحَنَّ 20‏:23؞؞»

20ندٜنْ عِيسَى عُمْرِ ݠُکَرَعٜنْ مُوطُمْ تَا ࢡٜنغٜشَّ کٛو مٛيْ کَࢩُمْ وٛنِ اَلْمَسِيحُ؞

عِيسَى وَنغِنِ حَالَ مَايْدٜ مُوطُمْ عٜ عُمِّتِنٜىٰکِ مُوطُمْ

(مَرْکُسْ 8‏:31‏–9‏:1؛ لُکَ 9‏:22‏-27)

21دِغَ سَاعِ مَنْ عِيسَى ڢُطِّ ڢَامْتِنْغٛ ݠُکَرَعٜنْ مُوطُمْ، عٛوِعِ‏: «دٛولٜ مِيَحَ عُرُسَلِيمَ، مِيَرَ بٛنٜ طُوطُّمْ دِغَ ندٛتِّعٜنْ عٜ مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ، ࢡٜمبَرَمِّ، عَمَّا مِعُمِّتٛ دِغَ مَايْدٜ ࢩَلَادٜ تَتَࢡْرٜ؞» 22ݠِيٜرْ وِشِّتِمٛ سٜرَ، ڢُطِّ ڢٜلُغٛ مٛ، وِعِ‏: «کَيَّ، يَا جَوْمِرَاوٛ، اَللَّه حَطْ طُمْ‏! عِرِنْ مَنْ وَرَنْتَا مَ سَمْ‏!» 23عَمَّا عِيسَى يٜىٰسِتِ، وِعِ ݠِيٜرْ‏: «دَايَمْ، عَنْ سَيْطَانُ‏! عَلَاتَنِ يَمْ دَلِيلَ ڢٜرْغٜرٜ، نغَمْ نُمٛوجِ مَاطَ عِوَايْ حَا اَللَّه، عَمَّا حَا يِمْࢡٜ؞»

24ندٜنْ عِيسَى وِعِ ݠُکَرَعٜنْ مُوطُمْ‏: «تٛ غٛطّٛ يِطِ تٛکَّاغٛ يَمْ، سٜيْ عٛعَشَّ مُويٛ مَاکٛ، عٛرٛونْدٛ غَاڢَانغَلْ مَاکٛ، عٛتٛکّٛ يَمْ#مَتَّ 10‏:38؛ لُکَ 14‏:27؞؞ 25نغَمْ کٛو مٛيْ يِطِ حِسْنُغٛ يٛنغْکِ مُوطُمْ، مَجِّنَنْ کِ؞ عَمَّا مٛ مَجِّنِ يٛنغْکِ مُمْ نغَمْ عَمْ، حٜࢡْتَنْ کِ#مَتَّ 10‏:39؛ لُکَ 17‏:33؛ يُحَنَّ 12‏:25؞؞ 26تٛ نٜطّٛ حٜࢡِ دُنِيَارُ ڢُو، عَمَّا عٛحَلْکِ يٛنغْکِ مَاکٛ، طُمٜ طُمْ نَڢَتَ مٛ؟ مَلَّ وٛودِ کٛ غٛطّٛ وَاوَتَ حٛکُّغٛ نغَمْ سٛوتُّغٛ يٛنغْکِ مُوطُمْ نَ؟ وَلَا سَمْ‏! 27نغَمْ ࢡِي-نٜطّٛ وَرَنْ ندٜرْ تٜدُّنغَلْ بَابِرَاوٛ مُمْ بٜى مَلَاعِکَعٜنْ مُمْ، سَاعِ مَنْ عٛوَرْجٛتٛ کٛو مٛيْ دٜيْدٜيْ کُوطٜ مُوطُمْ#جَبُورَ 62‏:13؛ مَتَّ 25‏:31؛ رٛمَعٜنْ 2‏:6؞؞ 28غٛونغَ مبِعَنْمِ عٛنْ، ڢَکَتْ وٛطْࢡٜ شَکَ مٛوطٛنْ مَايَتَا، سٜيْ تٛ ࢡٜنغِعِ غَرْکِ ࢡِي-نٜطّٛ بٜى لَامُ مُوطُمْ؞»

Currently Selected:

مَتَّ 16: داَ

Highlight

Copy