مَتَّ 11
11
نٜلَاࢡٜ يُحَنَّ بَطٛووٛ بَݠْتِسْمَ
(لُکَ 7:18-35)
1ندٜ عِيسَى تِمِّنِ عُمْرُغٛ ݠُکَرَعٜنْ مُوطُمْ سَݠّٛ عٜ طِطٛ، عٛعُمِّ نٛکُّورٜ مَنْ، عٛدِلِّ نغَمْ حَا عٛعٜکِّتِنَ عٜ عٛوَازِنَ ندٜرْ بٜرْنِيجِ ڢُو؞
2سَاعِ مَنْ يُحَنَّ بَطٛووٛ بَݠْتِسْمَ طٛنْ ندٜرْ ڢُرْسِنَ#11:2 ڢُرْسِنَ مَلَّ يَنغَدَ؞، عٛنَنِ حَبَرُ کُوطٜ اَلْمَسِيحُ، عٛنٜلِ ݠُکَرَعٜنْ مَاکٛ وٛطْࢡٜ حَا عِيسَى، 3ࢡٜࢨَمِمٛ: «عَنْ وٛنِ مٛ مِنْ نَنِ وَرَنْ نَ؟ مَلَّ مِنْ ندٜىٰنَ غٛطّٛ ڢٜىٰرٜ؟» 4عِيسَى جَابِ ࢡٜ: «نجٜحٜ، مبِعٜ يُحَنَّ کٛ عٛنْ نَنِ، کٛ عٛنْ نغِعِ بٛو: 5وُمْࢡٜ طٛنْ نغِعَ، وٛوسْࢡٜ طٛنْ نجَحَ، کُتُرُعٜنْ لَاࢡِ، ڢَحْࢡٜ بٛو طٛنْ نَنَ، مَايْࢡٜ عُمِّتَامَ، تَلَکَعٜنْ بٛو نغَازِنَامَ کُبَرُوٛلْ شٜيْنٛووٛلْ#عٜسَايَ 35:5-6؛ 61:1؞؞ 6بَرْکَ لَاتَنْتٛ کٛو مٛيْ مٛ عَشَّايْ نُطِّنْغٛ يَمْ سَمْ؞»
7سَاعِ ݠُکَرَعٜنْ يُحَنَّ طٛنْ ندِلَّ، عِيسَى ڢُطِّ وٛلْوَنْغٛ مٛوࢡْرٜ حَالَ يُحَنَّ، عٛوِعِ: «طُمٜ عٛنْ نجٜحِ لَارٛيْغٛ ندٜرْ لَدّٜ حَمَادَارٜ؟ ࢨٛمْبَلْ نغَلْ حٜنْدُ دِمْبِنْتَ نَ؟ عَاعَ، نَا نٛنْ؞ 8طُمٜ عٛنْ نجٜحِ لَارٛيْغٛ کَدِ؟ غٛطّٛ ࢡٛرْنِيطٛ لِمْشٜ بٛوطّٜ نَ؟ عَمَّا ࢡٛرْنِيࢡٜ لِمْشٜ بٛوطّٜ، ندٜرْ شُوطِ لَامِيࢡٜ ࢡٜنغٛنِ؞ 9کَدِ طُمٜ عٛنْ نجٜحِ لَارٛيْغٛ؟ اَلنَّبِيجٛ نَ؟ عٛوحٛ! مِطٛنْ وِعَ عٛنْ: ڢَکَتْ، عٛࢡُرِ اَلنَّبِيجٛ؞ 10نغَمْ اَللَّه سٜىٰدِ دٛوْ يُحَنَّ ندٜرْ دٜڢْتٜرٜ، عٛوِعِ: ندَا، مِطٛنْ نٜلَ نٜلَاطٛ عَمْ يٜىٰسٛ مَاطَ، حَا عٛمٛعِّنَ لَاوٛلْ مَ يٜىٰسٛ مَاطَ#مَلَکِيَ 3:1؞؞ 11غٛونغَ مبِعَنْمِ عٛنْ: شَکَ ࢡِࢡّٜ عَادَمَ ڢُو وَلَا مٛ ࢡُرِ يُحَنَّ بَطٛووٛ بَݠْتِسْمَ مَنغُ، عَمَّا مٛ ࢡُرِ لٜىٰسُغٛ حَا لَامُ عَسَمَنْجِ، ࢡُرَنْ يُحَنَّ مَنغُ؞ 12دِغَ زَمَنُ يُحَنَّ بَطٛووٛ بَݠْتِسْمَ حَا وَرْغٛ حَنْدٜ، کٛنّٜعٜنْ طٛنْ کِݠّٛ لَامُ عَسَمَنْجِ، ࢡٜطٛنْ طَࢡَّ جَࢡْتُغٛ نغُ؞ 13تَوْرٜىٰتَ مُوسَى عٜ اَلنَّبِعٜنْ ڢُو مبَطِ عَنَّبَاکُ دٛوْ لَامُ عَسَمَنْجِ حَا يٛتِّ سَاعِ يُحَنَّ#لُکَ 16:16؞؞ 14تٛ عٛنْ نجَࢡِ کٛ مبِعَنْمِ کَمْ، يُحَنَّ وٛنِ إِلْيَاسُ مٛ تَمِّ وَرْغٛ#مَلَکِيَ 3:23؛ مَتَّ 17:10-13؛ مَرْکُسْ 9:11-13؞؞ 15مٛ وٛودِ نٛݠِّ ڢُو، نَنَ!
16«بٜى ࢡٜيٜ نَنْدِنَنْمِ يِمْࢡٜ زَمَنُورُ ندُعُ؟ ࢡٜنَنْدِ بٜى ࢡِکّٛيْ نجٛوطِيکٛيْ حَا لُوࢡٜ؞ کٛيْ طٛنْ نغٛوکَنَ ࢡِکّٛيْ نغٛطْکٛيْ، کٛيْ طٛنْ مبِعَ: 17مِنْ ݠُوڢَنِ عٛنْ عَلْغَيْتَارُ، عٛنْ نغَمَايْ، مِنْ نغِمَنِ عٛنْ غِمِ بٛجِّ، عٛنْ مبٛيَايْ؞ 18نغَمْ يُحَنَّ وَرِ، طٛنْ سُومٛ، ࢡٜمبِعِ: عٛوٛودِ غِنَّوٛلْ؞ 19ࢡِي-نٜطّٛ وَرِ، طٛنْ ࢩَامَ، طٛنْ يَرَ، ࢡٜمبِعِ: ندَارٜ غٛطّٛ عٛو، عٛطُوطَ-ࢩَامْطٜىٰجٛ عٜ غُيْکٛووٛ، عٛ سٛوبَاجٛ جٛمْنٛوࢡٜ عٜ حَکّٜعٜنْ؞ عَمَّا حِکْمَ اَللَّه غٛونغْطِنَامَ ندٜرْ کُوطٜ مَاکٛ؞»
بٜرْنِيجِ طِ شَلِ تُوبُغٛ
(لُکَ 10:13-15)
20ندٜنْ عِيسَى ڢُطِّ ڢٜلُغٛ بٜرْنِيجِ طِ عٛوَطِ کَايٜىٰڢِيجِ طُوطِّ تٛنْ، عَمَّا يِمْࢡٜ مَاجِ تُوبَايْ؞ عٛوِعِ: 21«بٛنٜ لَاتَنٛ مَ، عَنْ کٛرَجِنْ! بٛنٜ لَاتَنٛ مَ، عَنْ بَيْتِسَيْدَ! نغَمْ کَايٜىٰڢِيجِ بَطَاطِ ندٜرْ مٛوطٛنْ، تٛ طِ مبَطَانٛ ندٜرْ تِرُسْ عٜ سِدٛنْ کَمْ، يِمْࢡٜ مَاجِ تُوبَنّٛ لَوْ، ࢡٛرْنٛتٛنٛ بُحُوجٜ، ندُڢَنّٛ ندٛونْدِ دٛوْ کٛعٜ مُوطُمْعٜنْ#عٜسَايَ 23:1-18؛ عٜزٜکِيٜلْ 26–28؛ يٛوعٜلْ 4:4-8؛ عَمٛسْ 1:9-10؛ جٜکَرِيَ 9:2-4؞؞ 22نغَمْ مَاجُمْ مِطٛنْ عَنْدِنَ عٛنْ: ࢩَلَادٜ دَرْنغَلْ، کِيتَ تِرُسْ عٜ سِدٛنْ حٛيَنْ دٛوْ کِيتَ مٛوطٛنْ؞ 23عَنْ کَڢَرْنَحُمْ، عَطٛنْ تَمّٛ اَللَّه ࢡَنغْتٜتٜ حَا يٛتّٛ عَسَمَ نَ؟ کَيَّ! عٛسَکِّنْتٜ حَا جٛوندٜ مَايْࢡٜ؞ نغَمْ کَايٜىٰڢِيجِ بَطَاطِ ندٜرْ مَاطَ، تٛ طِ مبَطَانٛ ندٜرْ سٛدٛمَ، وُرٛ نغٛ لُتَّنّٛ حَا وَرْغٛ حَنْدٜ#لَاتَانٛوجِ 19:24-28؛ عٜسَايَ 14:13-15؞؞ 24نغَمْ مَاجُمْ مِطٛنْ وِعَ عٛنْ: ࢩَلَادٜ دَرْنغَلْ، کِيتَ سٛدٛمَ ࢡُرَنْ کِيتَ مَ حٛيُغٛ#مَتَّ 10:15؛ لُکَ 10:12؞؞»
عِيسَى وَدِّ سِوْتَارٜ
(لُکَ 10:21-22)
25سَاعِ مَنْ عِيسَى وِعِ: «يَا بَابِرَاوٛ، جَوْمُ عَسَمَ عٜ لٜسْدِ، مِيٜتِّ مَ نغَمْ عَوَنغِنَنِ ࢡِکّٛيْ ݠَمَرٛيْ کُوجٜ طٜعٜ عَمَّا عَسُوطِ طٜ حِکْمَعٜنْ عٜ مَرْࢡٜ ڢَامُ؞ 26نٛنّٛنْ يَا بَابِرَاوٛ، بَنَ نِي طُمْ ڢٛتَّنِ مَ؞»
27ندٜنْ عٛوِعِ: «بَابِرَاوٛ عَمْ حَلْڢِنِ يَمْ کُوجٜ ڢُو؞ وَلَا عَنْدُطٛ ࢡِطّٛ سٛنَا بَابِرَاوٛ، وَلَا عَنْدُطٛ بَابِرَاوٛ بٛو سٛنَا ࢡِطّٛ عٜ مٛ ࢡِطّٛ يِطِ وَنغِنَنْغٛ مٛ ڢُو#يُحَنَّ 1:18؛ 3:35؛ 10:15؞؞
28«عٛنٛنْ سٛمْࢡٜ عٜ رٛونْدِيࢡٜ دٛنغْلٜ#11:28 دٛنغْلٜ مَاجُمْ، طُمْ عُمْرٛوجٜ طٜ مٛودِࢡّٜ نجٛوَنِ ࢡٜ؞ تٜدُّطٜ ڢُو، نغَرٜ حَا عَمْ، مِحٛکَّنْ عٛنْ سِوْتَارٜ؞ 29ندٛونْدٜ کَࢡِّرْغَلْ عَمْ، عٜکِّتٜ حَا عَمْ، نغَمْ مِطٜلْمَ-غِکُّوجٛ، مِ جَنغْکِنِيطٛ؞ ڢَکَتْ، يٛنغْکِيجِ مٛوطٛنْ شِوْتٛتٛ#يٜرٜمِيَ 6:16؞؞ 30نغَمْ طُمْ کٛيْطُمْ رٛونْدَاغٛ کَࢡِّرْغَلْ عَمْ عٜ کٛ مِرٛونْدَتَ عٛنْ بٛو، طُمْ تٜدَّنْتَا عٛنْ؞»
Currently Selected:
مَتَّ 11: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
