غُرْتَاکِ 38

بَطْکِ حِرْسِرْدٜ عٜ دَارٛ

1عٛوَطِ حِرْسِرْدٜ ندٜ لٜغَّلْ غَوَرَلْ؞ نجُوتِرْکَ مَارٜ مٜىٰتِرْ طِطِ بٜى رٜىٰتَ، نجَاجِرْکَ مَارٜ بٛو مٜىٰتِرْ طِطِ بٜى رٜىٰتَ، وَاتٛ مَرْندٜ تٛلْطِ نَيِ ݠٛتَنْطِ، تٛوِرْکَ مَارٜ بٛو مٜىٰتِرْ غٛوتٜلْ بٜى رٜىٰتَ؞ 2عٛوَطِ لُوٜ حَا شٛࢡُّلِ مَارٜ نَيِ، لُوٜ مَنْ لَاتِ کُووَاطُمْ غٛوتُمْ بٜى حِرْسِرْدٜ؞ عٛسُدِّ ندٜ بٜى نجَمْندِ مبٛطٜىٰرِ؞ 3عٛوَطِ کُوجٜ حِرْسِرْدٜ ڢُو‏: ݠَيَنْطٜ عٜ ࢡٛڢْتِرْطٜ عٜ ݠٜحٜ بِشِّرْطٜ ࢨِيࢨَمْ عٜ تُڢِرْطٜ عٜ ݠٜحٜ غُلْدُطٜ؞ عٛوَطِ طٜ ڢُو بٜى نجَمْندِ مبٛطٜىٰرِ؞ 4عٛوَطَنِ حِرْسِرْدٜ کُووَاطُمْ جَمْطٜ بٛطٜىٰجٜ غَاڢِيطٜ، نَنْدُطُمْ بٜى زُبَاوٛلْ، لٜسْ مَارٜ تَارْنَاطُمْ، طُمْ يٛتِّ رٜىٰتَ تٛوِرْکَ مَارٜ؞ 5عٛوَطِ کَلَغَاجٜ نَيِ حَا سٜࢡَتّٛوجِ کُووَاطُمْ جَمْطٜ بٛطٜىٰجٜ غَاڢِيطٜ غٛ، نغَمْ جٛغَاغٛ شَبِّ؞ 6عٛوَطِ شَبِّ لٜغَّلْ غَوَرَلْ، عٛسُدِّ طِ بٜى نجَمْندِ مبٛطٜىٰرِ؞ 7عٛنَسْتِنِ شَبِّ مَنْ ندٜرْ کَلَغَاجٜ حَا بُتُّلِ حِرْسِرْدٜ نغَمْ رٛونْدَاغٛ ندٜ؞ عٛوَطِ ندٜ بٜى کَاتَاکٛوجٜ، وَلَا کٛو طُمٜ ندٜرْ مَارٜ؞

8عٛوَطِ دَارٛ نجَمْندِ مبٛطٜىٰرِ عٜ جٛعِّنِرْطُمْ مَاغٛ طُمْ نجَمْندِ مبٛطٜىٰرِ؞ عٛوَطِ نغٛ بٜى نجَمْندِ عٜ دَارٛرْطٜ رٜوْࢡٜ حُووٛوࢡٜ حَا دَمُّغَلْ لَيْمَارُ ڢٛتِّرْدٜ#غُرْتَاکِ 30‏:18؞؞

دَلْدَلْ جٛوطٛرْدٜ

9عٛوَطِ دَلْدَلْ جٛوطٛرْدٜ؞ حَا وُتُّدُ ڢٛمْبِنَ، عٛوَطِ وِيرْندَلّٛوجِ دَلْدَلْ بٜى غَارَاجِ لٜنغْ طِغُّطِ بَالَاطِ، مٜىٰتِرْ شَݠَّنْطٜ جٛوِ، 10بٜى دَنغْرَنغٜ مَارُ نٛوغَسْ عٜ کٛسْطٜ مَاجٜ نٛوغَسْ طٜ نجَمْندِ مبٛطٜىٰرِ عٜ ࢡِلْدُطٜ دَنغْرَنغٜ عٜ غَاڢٜ مَاجٜ طٜ شَرْدِ؞ 11حَا وُتُّدُ وٛيْلَ بٛو مٜىٰتِرْ شَݠَّنْطٜ جٛوِ، بٜى دَنغْرَنغٜ مَارُ نٛوغَسْ عٜ کٛسْطٜ مَاجٜ نٛوغَسْ طٜ نجَمْندِ مبٛطٜىٰرِ عٜ ࢡِلْدُطٜ دَنغْرَنغٜ عٜ غَاڢٜ مَاجٜ طٜ شَرْدِ؞ 12حَا وُتُّدُ حِيرْنَانغٜ بٛو وِيرْندَلّٛوجِ مٜىٰتِرْ نٛوغَسْ عٜ جٛوِ، بٜى دَنغْرَنغٜ مَارُ سَݠّٛ عٜ کٛسْطٜ مَاجٜ سَݠّٛ عٜ ࢡِلْدُطٜ دَنغْرَنغٜ عٜ غَاڢٜ مَاجٜ طٜ شَرْدِ؞ 13حَا وُتُّدُ ڢُونَانغٜ بٛو مٜىٰتِرْ نٛوغَسْ عٜ جٛوِ‏: 14وِيرْندَلّٛوجِ مٜىٰتِرْ جٛوٜىٰطِطِ بٜى رٜىٰتَ حَا وَکٜىٰرٜ وٛورٜ، بٜى دَنغْرَنغٜ مَارٜ تَتِ عٜ کٛسْطٜ مَاجٜ تَتِ؞ 15وَکٜىٰرٜ ندٜيَ بٛو، وَاتٛ بُتُّلِ دَمُّغَلْ طٛ بٜى تٛ، وِيرْندَلّٛوجِ مٜىٰتِرْ جٛوٜىٰطِطِ بٜى رٜىٰتَ، بٜى دَنغْرَنغٜ مَارٜ تَتِ عٜ کٛسْطٜ مَاجٜ تَتِ؞ 16وِيرْندَلّٛوجِ دَلْدَلْ ڢُو طِ غَارَاجِ لٜنغْ طِغُّطِ بَالَاطِ؞ 17کٛسْطٜ دَنغْرَنغٜ طٜ نجَمْندِ مبٛطٜىٰرِ؞ ࢡِلْدُطٜ دَنغْرَنغٜ عٜ غَاڢٜ مَاجٜ طٜ شَرْدِ؞ شُدُّطُمْ کٛعٜ مَاجٜ بٛو طُمْ شَرْدِ؞ دَنغْرَنغٜ دَلْدَلْ ڢُو کَوْرِتِ بٜى غَاڢٜ شَرْدِ؞ 18عٛوَطِ وِيرْندَلّٛ نغَمْ نَسْتِرْدٜ دَلْدَلْ بٜى غَارَاجِ لٜنغْ طِغُّطِ بَالَاطِ عٜ شَرْوِنَاطِ عٜ بٛطٜىٰجِ سٜطَّ عٜ بٛطٜىٰجِ شٛيْ، طُمْ تُݠِّتَاطُمْ؞ نجُوتِرْکَ مَاغٛ مٜىٰتِرْ سَݠّٛ، تٛوِرْکَ مَاغٛ بٛو مٜىٰتِرْ طِطِ بٜى رٜىٰتَ، کَلْ-کَلْ بٜى وِيرْندَلّٛوجِ دَلْدَلْ؞ 19عٛوَطِ دَنغْرَنغٜ مَاغٛ نَيِ بٜى کٛسْطٜ مَاجٜ نَيِ طٜ نجَمْندِ مبٛطٜىٰرِ، ࢡِلْدُطٜ مَاجٜ بٛو طٜ شَرْدِ، نٛنْ بٛو شُدُّطُمْ کٛعٜ مَاجٜ عٜ غَاڢٜ مَاجٜ؞ 20تِغِّرْطٜ جٛوطٛرْدٜ سٜنَاندٜ عٜ دَلْدَلْ ڢُو طٜ نجَمْندِ مبٛطٜىٰرِ؞

لِسَاڢِ کُوجٜ جٛوطٛرْدٜ سٜنَاندٜ

21ندَا لِسَاڢِ کُوجٜ جٛوطٛرْدٜ سٜنَاندٜ، نٛکُّورٜ نغَمْ سٜىٰدَمْکُ عَلْکَوَلْ؞ لٜوِعٜنْ مبَطِ طُمْ ڢٛدّٜ عُمْرٛورٜ مُوسَى دٛوْ عَرْدَانغَلْ عِتَمَرْ ࢡِي هَـٰرُونَ، لِمَنْجٛ؞

22بٜشَلٜىٰلْ ࢡِي عُورِ تَانِرَاوٛ حُورُ مٛ لٜࢩٛلْ يَحُودَ، کَنغْکٛ وَطِ کٛ جَوْمِرَاوٛ عُمْرِ مُوسَى ڢُو؞ 23کُووْدِطِّرَاوٛ مَاکٛ عٛحٛلِيَبُ ࢡِي عَحِسَمَکْ مٛ لٜࢩٛلْ دَنْ، عٛ شٜحٛووٛ کَاعٜ، عٛ تُݠِّتٛووٛ عٜ شَنْࢩٛووٛ لِمْشٜ لٜنغْ طِغُّطٜ شَرْوِنَاطٜ عٜ بٛطٜىٰجٜ سٜطَّ عٜ بٛطٜىٰجٜ شٛيْ؞

24مٛوࢡْغَلْ کَنغّٜىٰرِ ندِ ࢡٜکُووْتِنِرِ نغَمْ کُوطٜ سُودُ سٜنِيندُ ڢُو، وَاتٛ کَنغّٜىٰرِ دٛکَّلْ، وَطِ بَاکِنْ کِلٛ تٜىٰمٜطّٜ جٛوٜىٰتَتِ عٜ شَݠَّنْطٜ جٛوٜىٰطِطِ عٜ جٛوٜىٰطِطِ (877) ڢٛدّٜ عٜتِرْغَلْ سُودُ سٜنِيندُ؞ 25شَرْدِ دِغَ يِمْࢡٜ جَمَعَارٜ لِمَاࢡٜ ڢُو وَطِ بَاکِنْ کِلٛ عُجِنٜ تَتِ عٜ سَݠّٛ عٜ جٛوٜىٰتَتِ (3,018) ڢٛدّٜ عٜتِرْغَلْ سُودُ سٜنِيندُ؞ 26کٛو مٛيْ ڢُو حٛکِّ رٜىٰتَ شٜىٰدٜ شَرْدِ ڢٛدّٜ عٜتِرْغَلْ سُودُ سٜنِيندُ، وَاتٛ کٛو مٛيْ نَسْتُطٛ لِمْغَلْ لِمَاࢡٜ ڢُو مٛ دُوࢡِ نٛوغَسْ عٜ کٛ ࢡُرِ‏: وٛرْࢡٜ عُجِنٜ تٜىٰمٜطّٜ نجٛوٜىٰغٛ عٜ تَتٛ عٜ تٜىٰمٜطّٜ نجٛوٛ عٜ شَݠَّنْطٜ نجٛوٛ (603,550)#غُرْتَاکِ 30‏:11‏-16؞ #مَتَّ 17‏:24؞؞ 27کِلٛ شَرْدِ عُجِنٜ تَتِ (3,000) ࢡٛلِنَامَ نغَمْ کٛسْطٜ سُودُ سٜنِيندُ عٜ کٛسْطٜ وِيرْندَلّٛ، کٛسْطٜ تٜىٰمٜرّٜ بٜى کِلٛ عُجِنٜ تَتِ (3,000)، وَاتٛ کِلٛ شَݠَّنْطٜ تَتِ نغَمْ کٛسْنغَلْ غٛوتَلْ؞ 28بٜى شَرْدِ بَاکِنْ کِلٛ سَݠّٛ عٜ جٛوٜىٰتَتِ لُتُّندِ، عٛوَطِ ࢡِلْدُطٜ حَا دَنغْرَنغٜ، عٛسُدِّ کٛعٜ مَاجٜ، عٛحَوْرِتِ طٜ بٜى غَاڢٜ؞ 29دٛکَّلْ نجَمْندِ مبٛطٜىٰرِ وَطِ بَاکِنْ کِلٛ عُجِنٜ طِطِ عٜ تٜىٰمٜرّٜ عٜ نٛوغَسْ عٜ نَيِ (2,124)؞ 30بٜى مَارِ عٛوَطِ کٛسْطٜ دَمُّغَلْ لَيْمَارُ ڢٛتِّرْدٜ عٜ حِرْسِرْدٜ نجَمْندِ مبٛطٜىٰرِ بٜى کُووَاطُمْ جَمْطٜ غَاڢِيطٜ حَا مَارٜ عٜ کُوجٜ حِرْسِرْدٜ ڢُو 31عٜ کٛسْطٜ دَلْدَلْ ڢُو عٜ کٛسْطٜ نَسْتِرْدٜ مَاغَلْ عٜ تِغِّرْطٜ جٛوطٛرْدٜ سٜنَاندٜ عٜ تِغِّرْطٜ دَلْدَلْ ڢُو؞

Currently Selected:

غُرْتَاکِ 38: داَ

Highlight

Copy