غُرْتَاکِ 30

غُلْدُطُمْ عُورْلٜ

1«عَوَطَ غُلْدُطُمْ عُورْلٜ، بٜى لٜغَّلْ غَوَرَلْ مبَارَتَ طُمْ؞ 2نجُوتِرْکَ مَنْ رٜىٰتَ مٜىٰتِرْ عٜ نجَاجِرْکَ مَاجُمْ بٛو رٜىٰتَ مٜىٰتِرْ، وَاتٛ مَرْطُمْ تٛلْطِ#30‏:2 تٛلْطِ مَلَّ تَلْکُمٛوجٜ؞ نَيِ ݠٛتَنْطِ، تٛوِرْکَ مَنْ بٛو مٜىٰتِرْ غٛوتٜلْ؞ طُمْ لَاتٛ کُووَاطُمْ غٛوتُمْ بٜى لُوٜ مَنْ؞ 3سُدُّ طُمْ بٜى کَنغّٜىٰرِ لَاࢡْندِ، دٛوْ مَاجُمْ عٜ بُتُّلِ مَاجُمْ ڢُو عٜ لُوٜ مَاجُمْ؞ تَارْنُ سٜرَ مَاجُمْ بٜى ڢَوْنٜ کَنغّٜىٰرِ؞ 4وَطَنْ طُمْ کَلَغَاجٜ کَنغّٜىٰرِ طِطِ طِطِ لٜسْ ڢَوْنٜ سٜرَ مَاجُمْ؞ وَطْ طٜ حَا بُتُّلِ مَاجُمْ طِطِ، طٜ نجٛغٛ شَبِّ نغَمْ رٛونْدَاغٛ طُمْ؞

5«وَطْ شَبِّ غٛ بٜى لٜغَّلْ غَوَرَلْ، سُدُّ طِ بٜى کَنغّٜىٰرِ؞ 6جٛعِّنْ غُلْدُطُمْ يٜىٰسٛ وِيرْندَلّٛ وٛنْنغٛ يٜىٰسٛ سُنْدُکْرُ سٜىٰدَمْکُ بٜى جٛوطٛرْدٜ نغَمْ کٜڢٜرْغَلْ، نٛکُّورٜ حَا ݠٛتَّنْمِ بٜى مَاطَ؞ 7هَـٰرُونَ وُلَ دٛوْ مَاجُمْ عُورٜتٜىٰطُمْ ڢَجِرِ ڢُو، سَاعِ ندٜ عٛمٛعِّنْتَ ݠِتِّرْلَاجِ، عٛوُلَ طُمْ؞ 8نٛنْ بٛو ندٜ هَـٰرُونَ جَمْنَتَ ݠِتِّرْلَاجِ مَنغَرِبَ ڢُو، عٛوُلَ طُمْ؞ عٛوَطَ طُمْ يٜىٰسٛ جَوْمِرَاوٛ ڢٛرٛيْ، حَا غِدٜ مٛوطٛنْ ڢُو؞ 9تَا نغَدّٜ دٛوْ مَاجُمْ عُورْلٜ کَطَاطٜ مَلَّ غُلٜتٜىٰطِ مَلَّ دٛکّٜ ࢩَامْدُ؞ تَا ندُڢٜ دٛکّٜ دُڢٜتٜىٰطٜ دٛوْ مَاجُمْ بٛو؞ 10حِتَاندٜ ڢُو ندٜ وٛورٜ هَـٰرُونَ لَࢡِّنَ لُوٜ غُلْدُطُمْ بٜى ࢨِيࢨَمْ کِرْسٜتٜىٰنغَ نغَمْ عِتُّغٛ حَکّٜ؞ حِتَاندٜ ڢُو ندٜ وٛورٜ عٛوَطَ طُمْ، حَا غِدٜ مٛوطٛنْ ڢُو؞ غُلْدُطُمْ مَاجُمْ وٛنِ ࢡُرْطُمْ سٜنَاغٛ نغَمْ جَوْمِرَاوٛ؞»

شٜىٰدٜ شٛوتَّارِ

11جَوْمِرَاوٛ وِعِ مُوسَى‏: 12«تٛ عَطٛنْ لِمَ إِسْرَاءِيلَعٜنْ ڢٛدّٜ لِمٜتٜىٰࢡٜ مَࢡّٜ، کٛو مٛيْ مَࢡّٜ ڢُو حٛکَّ جَوْمِرَاوٛ شٛوتَّارِ يٛنغْکِ مُوطُمْ، نغَمْ تَا مَسِيبٛ وَطَ وَکَّتِ لِمْکِ؞ 13ندَا کٛ ࢡٜندٛکَّتَ‏: کٛو مٛيْ نَسْتِ لِمَاࢡٜ ڢُو رٜىٰتَ شٜىٰدٜ شَرْدِ بٜى عٜتِرْغَلْ سُودُ سٜنِيندُ، طُمْ لَاتٛ دٛکَّلْ نغَمْ جَوْمِرَاوٛ#غُرْتَاکِ 38‏:25‏-26؛ مَتَّ 17‏:24؞؞ 14کٛو مٛيْ نَسْتِ لِمَاࢡٜ ڢُو مٛ دُوࢡِ نٛوغَسْ حَا کٛ ࢡٜسْدِ، عٛحٛکَّ جَوْمِرَاوٛ دٛکَّلْ مَنْ؞ 15دِسْکُطٛ ࢡُرْنَتَا طُمْ، تَلَکَاجٛ بٛو نغَکِّنْتَا طُمْ، سَاعِ ندٛکّٛتٛنْ جَوْمِرَاوٛ دٛکَّلْ نغَمْ شٛوتَّارِ يٛنغْکِيجِ مٛوطٛنْ؞ 16حٛوعُ شٜىٰدٜ شٛوتَّارِ مَنْ حَا إِسْرَاءِيلَعٜنْ، حُووْتِنِرْ طٜ نغَمْ کُوغَلْ ندٜرْ لَيْمَارُ ڢٛتِّرْدٜ؞ طٜ شِڢْتِنٛرَنْ إِسْرَاءِيلَعٜنْ يٜىٰسٛ جَوْمِرَاوٛ نغَمْ شٛوتَّارِ يٛنغْکِيجِ مٛوطٛنْ؞»

دَارٛ نغَمْ لَࢡِّنٜىٰکِ

17ڢَحِنْ جَوْمِرَاوٛ وِعِ مُوسَى‏: 18«وَطْ دَارٛ نغٛ نجَمْندِ مبٛطٜىٰرِ عٜ جٛعِّنِرْطُمْ مَاغٛ طُمْ نجَمْندِ مبٛطٜىٰرِ نغَمْ لَࢡِّنٜىٰکِ؞ جٛعِّنْ نغٛ حَکُّندٜ لَيْمَارُ ڢٛتِّرْدٜ عٜ حِرْسِرْدٜ، لٛووْ ندِيَمْ ندٜرْ مَاغٛ#غُرْتَاکِ 38‏:8؞؞ 19هَـٰرُونَ عٜ ࢡِکّٛيْ مُمْ لٛوتِرَ جُوطٜ عٜ کٛسْطٜ مُوطُمْعٜنْ، 20حِدّٜکٛ ࢡٜنَسْتَ لَيْمَارُ ڢٛتِّرْدٜ عٜ ࢡٜࢡَدِتٛ حِرْسِرْدٜ نغَمْ وُلُغٛ غُلٜتٜىٰطِ نغَمْ جَوْمِرَاوٛ ڢُو، نغَمْ تَا ࢡٜمَايَ؞ 21سٜيْ ࢡٜلٛوتَ جُوطٜ مَࢡّٜ عٜ کٛسْطٜ مَࢡّٜ، نغَمْ تَا ࢡٜمَايَ؞ طُمْ لَاتَنٛ ࢡٜڢَرِلَّ ندُومِيکَ، کَمْࢡٜ عٜ دَࢩْغٛلْ مَࢡّٜ حَا غِدٜ مَࢡّٜ ڢُو؞»

نٜبَّمْ شٜنِرْطَمْ عٜ عُورْلٜ عُورٜتٜىٰطٜ#غُرْتَاکِ 37‏:29؞

22ڢَحِنْ جَوْمِرَاوٛ وِعِ مُوسَى‏: 23«حٛوعُ عُورْلٜ ࢡُرْطٜ عُورُغٛ‏: عُورْدِ بَطَادِ کِلٛ جٛوِ عٜ عُورْدِ سِنَمٛنْ مبٜلْندِ رٜىٰتَ مَنْ، وَاتٛ کِلٛ طِطِ بٜى رٜىٰتَ عٜ ࢨٛمْبَلْ عُورْنغَلْ کِلٛ طِطِ بٜى رٜىٰتَ 24عٜ عُورْدِ کَسِّيَ کِلٛ جٛوِ ڢٛدّٜ عٜتِرْغَلْ سُودُ سٜنِيندُ عٜ نٜبَّمْ جَيْتُنْجٜ لِيتِرْ نَيِ؞ 25وَطْ بٜى مَاجُمْ نٜبَّمْ شٜنِرْطَمْ، جِلِّندِرَاطَمْ عُورْلٜ بَنَ بَطٛووٛ عُورْلٜ جِلِّرْتَ طُمْ؞ طُمْ لَاتٛ نٜبَّمْ شٜنِرْطَمْ؞ 26حُووْتِنِرْ طَمْ نغَمْ سٜنُغٛ لَيْمَارُ ڢٛتِّرْدٜ عٜ سُنْدُکْرُ سٜىٰدَمْکُ 27عٜ تَابَلْ بٜى کُوجٜ مَاغَلْ ڢُو عٜ جٛعِّنِرْطُمْ ݠِتِّرْلَاجِ بٜى کُوجٜ مَاجُمْ ڢُو عٜ غُلْدُطُمْ عُورْلٜ 28عٜ حِرْسِرْدٜ عٜ کُوجٜ مَارٜ ڢُو عٜ دَارٛ بٜى جٛعِّنِرْطُمْ مَاغٛ؞ 29عَسٜنَ طُمْ ڢُو، طُمْ لَاتٛ ࢡُرْطُمْ سٜنَاغٛ؞ کٛو طُمٜ مٜىٰمِ طُمْ ڢُو، سٜنٛتٛ؞ 30رُڢْ طَمْ دٛوْ هَـٰرُونَ عٜ ࢡِکّٛيْ مُمْ؞ سٜنْ ࢡٜ حَا ࢡٜکُووَنَمِّ کُوغَلْ لِمَنْکُ؞ 31ࢡَاوٛطٛنْ عَوِعَ إِسْرَاءِيلَعٜنْ‏: کَنْجُمْ طُمْ لَاتَنٛ عٛنْ نٜبَّمْ شٜنِرْطَمْ حَا غِدٜ مٛوطٛنْ ڢُو؞ 32تَا نٜطّٛ وُجٛرٛ طَمْ؞ تَا مبَطٜ جِلِّنْدِرَاطُمْ ڢٜىٰرٜ عِرِنْ مَاجَمْ، نغَمْ طَمْ شٜنِيطَمْ، عٛنْ شَمْطِنَ طَمْ نغَمْ طَمْ شٜنَاطَمْ؞ 33کٛو مٛيْ جِلِّ عِرِنْ مَاجَمْ مَلَّ حٛکِّ طَمْ مٛ لَاتَاکِ لِمَنْجٛ، عٛ غُرْتِنْتٜىٰطٛ دِغَ جَمَعَارٜ مَاکٛ؞»

34ڢَحِنْ جَوْمِرَاوٛ وِعِ مُوسَى‏: «حٛوعُ عُورْلٜ عُورٛوجٜ‏: طَشّٜ سِتَکْتٜ عٜ غَلْبَنُمْ، نٛنْ بٛو عٛنِکَ عٜ عُورْلٜ دَنٜىٰجٜ لَاࢡْطٜ؞ طُمْ ڢُو طُمْ ڢٛتَ کَلْ-کَلْ؞ 35وَطْ بٜى مَاجُمْ عُورْدِ عُورٜتٜىٰندِ، جِلِّنْدِرَاطُمْ بَنَ بَطٛووٛ عُورْلٜ جِلِّرْتَ طُمْ، لَمِّنَاطُمْ بٜى مَنْدَ، لَاࢡْطُمْ، شٜنِيطُمْ؞ 36حٛوعُ حَا مَاجُمْ سٜطَّ، طِغِّنْ طُمْ؞ جٛعِّنْ طُمْ يٜىٰسٛ سُنْدُکْرُ سٜىٰدَمْکُ ندٜرْ لَيْمَارُ ڢٛتِّرْدٜ، حَا نٛکُّورٜ ندٜ ݠٛتَّنْمِ بٜى مَاطَ؞ سٜيْ عٛنْ شَمْطِنَ طُمْ، نغَمْ طُمْ ࢡُرْطُمْ سٜنَاغٛ؞ 37عُورْدِ عُورٜتٜىٰندِ ندِ مبَطَتَ طُمْ، تَا مبَطَنٜ کٛعٜ مٛوطٛنْ عِرِنْ مَارِ؞ ندِ لَاتَنٛ عٛنْ شٜنَاندِ نغَمْ جَوْمِرَاوٛ؞ 38کٛو مٛيْ جِلِّ عِرِنْ مَارِ نغَمْ عٛلُوࢡْنٛ ندِ، عٛ غُرْتِنْتٜىٰطٛ دِغَ جَمَعَارٜ مَاکٛ؞»

Currently Selected:

غُرْتَاکِ 30: داَ

Highlight

Copy