Zek. 6
6
Chioniso cheNgoro Murongomuna
1Ndakaringirazve mudenga nokuona, ringira, dzakabuda ngoro murongomuna kubva pakati pemitunhu miiri; nemitunhu yaiya mitunhu yethusi. 2Ngoro yokutanga yaiya nemahachi akatsvuka, ngoro yechipiri mahachi matema, 3ngoro yechitatu mahachi akachena, nengoro yechirongomuna mahachi akasvipirika neakatsvukuruka. 4Zvino ndakati kungirosi iyo yakaereketa neni, “Izvi zviinyi, mambo wangu?”
5Ngirosi yakandipingura, ikati kwendiri, “Izvi mweya mirongomuna yomudenga, inobuda kubanze, yapedza kuema pamberi paMambo wenyika yeshe.” 6Ngoro inemahachi matema inoenda kunyika yedera; ineakachena inoenda kunyika yokumabirirazuva; ineakasvipirika inoenda kunyika yokubani. 7Naapo mahachi anesimba abuda; aisundwa kuenda kuhambahamba munyika mweshe. Nayo yakati, “Endai, muhambehambe kuringira nyika. Ndizvo akahambahamba kuringira nyika.” 8Zvino yakadaidzira kwendiri, yakaereketa yechiti, “Ringira, avo vanoenda kunyika yedera vanyaradza mweya wangu munyika yedera.”
Kupanga Kupfekedza Joshua Dzungudza
9Izwi raMambo Mwari rakauya kwendiri rechiti, 10“Tora kubva kuvasungwa, kubva kuHeridhai, Thobhija, neJedhaia, avo vaguma kubva Bhabhuroni, nokupetuka ngezuva ririro, kupotera mumhatso yaJosia mukororo waZefania. 11Tora sirivha nomukore, unasire dzungudza, upfekese padera pesoro romupristi mukuru Joshua mukororo waJehosadhaki; 12uti kwaari, ‘Izvi ndizvo zvinoronza Mambo Mwari wehondo: Ringira, uwo munhu zina rake ndiNhai; naye unozoita nhai pandau yake; unozoaka temperi raMambo Mwari. 13Ndiye uwo unozoaka temperi raMambo Mwari; unozotwara kukudzwa kwoumambo, naye unozogara nokutonga padendemaro rake. Unozoapo mupristi pasinde pedendemaro rake; nokuzwisisa kwakanyarara pakati pavo vairi.’ 14Nemadzungudza anozongwarirwa ndiHeremu, #6:14 Heremu...Heni: MuchiHebheru mazina akasiyana, asi ndivo ndivo vetinoona muvhesi 10. Thobhija, Jedhaia, naHeni mukororo waZefania, kuita mukarakadziso mutemperi raMambo Mwari.”
15Naavo vari kuretu vanozouya nokudetsera kuaka temperi raMambo Mwari, nemwi munozozia kuti Mambo Mwari wehondo wandituma kwomuri. Izvi zvinozoitika, kudai mwechigwinyisira kupurutana izwi raMambo Mwari wenyu.
Currently Selected:
Zek. 6: Ndau
Highlight
Share
Copy
Want to have your highlights saved across all your devices? Sign up or sign in
