Mat. 2
2
Vazii Vanobva kuMabvazuva
1Kwakati apo Jesu abarwa muBhetherehema reJudhia ngemazuva aHerodhi mambo, penya, kwakauya vazii vaidzidza ngezvenyeredzi vechibva kumabvazuva vakaguma Jerusarema 2vechiti, “Uri pari uwo wakabarwa Mambo wavaJudha? Ngokuti takaona nyeredzi yake kumabvazuva, nesu tauya kuti timudire.” 3Kwakati Herodhi mambo azwa, wakatambudzika neveJerusarema veshe naye. 4Naapo aunganidza pamwepo vapristi vakuru veshe nevanyori#2:4 Vanyori:Ndivo vadzidzisi veMipango yevaJudha. vevanhu, wakavabvunza kuti, “Unozobarwa pari Kristu?” 5Navo vakati kwaari, “MuBhetherehema reJudhia; ngokuti kwakanyorwa ngomuprofeti kudai: 6‘Iwewe Bhetherehema, nyika yaJudha, auri mudoko akadi mukati mwevatongi vaJudha; ngokuti kwouri kunozobuda mutungamiriri uwo ndiye unozoita muushi wevanhu vangu vaIsuraeri.’ ” 7Naapo Herodhi adaidza vazii vaidzidza ngezvenyeredzi ngokufishika, wakanasa kubvunzisisa kwavari mukuwo weyakaoneka nyeredzi. 8Naye wakavatuma Bhetherehema, akati, “Endai munase kutsvakisisa uwo mwana mudoko; kuti mwamuona mundiunzire izwi, kuti neniwo ndiende ndimudire.” 9Navo, apo vazwa mambo, vakaenda, penya, nyeredzi iyo yevakaona kumabvazuva yakavatungamirira metsa yakaguma pandau apo paiya nemwana mudoko. 10Naapo vaona nyeredzi vakadakara ngokudakara kukurutu. 11Vapotera mumhatso, vakaona mwana mudoko naMaria mai ake; navo vakawa pashi, vakamudira; kwakati vabeura pfuma yavo vakamupa zvipo, mukore, makha nemhura. 12Navo vechipangwa mukurota kuti vasachahwirira kunaHerodhi, vakaenda ngenjira imweni kunyika yavo.
Josefa naMaria Vanotizira Egipite
13Naapo vaenda, penya, ngirosi yaMambo yakaoneka kunaJosefa mukurota yechiti, “Miruka, utore mwana mudoko namai ake, utizire Egipite, ugare apo metsa ndikuronzere, ngokuti Herodhi unozotsvaka mwana mudoko kumuuraya.” 14Naye wakamiruka, akatora mwana mudoko namai ake usiku, wakaenda Egipite, 15naye wakagareyo metsa kufa kwaHerodhi, kuti zvidzadzisike izvo zvakaereketwa ndiMambo kubudikidza ngomuprofeti echiti, “Ndakadaidza mukororo wangu kuti abude Egipite.”
Kuuraiwa kweVana ndiMambo Herodhi
16Naapo Herodhi aona kuti wakaitirwa jee ngevazii vaidzidza ngezvenyeredzi, wakatseneka kakurutu, wakatuma, akauraya vadoko veshe vevakomana vaiya vari muBhetherehema nenharaunda yaro yeshe, avo vaiya vaane makore mairi nevaiya pashi paawo, kudai ngomukuwo uwo waaiya akanasa kubvunzisisa vazii vaidzidza ngezvenyeredzi. 17Zvakazadzisika izvo zvakaereketwa kubudikidza ndiJeremia muprofeti echiti, 18“Izwi rakazwika muRama, kuchema nokutsumba kukurutu, Racheri echichemera vana vake, asikatendi kuembedzerwa, ngokuti vaiya vasisipo.”
Kupetuka kwaJesu kubva Egipite
19Asi apo Herodhi afa, penya, ngirosi yaMambo yakaoneka mukurota kunaJosefa ari muEgipite yechiti, 20“Miruka, utore mwana mudoko namai ake, uende munyika yeIsuraeri; ngokuti avo vaitsvaka kuuraya mwana mudoko vakafa.” 21Naye wakamiruka, akatora mwana mudoko namai ake, akauya munyika yeIsuraeri. 22Asi azwa kuti Akirausi waiya mambo weJudhia pandau yababa ake Herodhi, wakatya kuendayo; echinyowedzwa mukurota, wakapaukira kunyika yeGarire, 23wakauya akagara muguta rinozwi Nazaretha; kuti rizadzisike izwi rakaereketwa ngevaprofeti kuti, “Unozozwi muNazaretha.”
Currently Selected:
Mat. 2: Ndau
Highlight
Share
Copy
Want to have your highlights saved across all your devices? Sign up or sign in