ማዢንቲ ማፃኣፔ 49
49
ያይቆኦቤ ፔኤኮ ናኣቶ ዓንጃዖ ጌዔ ባኮ
1ያይቆኦቤ ፔኤኮ ናኣቶ ዔኤላዖ ሂዚ ጌዔኔ፦ «ቢያሢ ሙኪ ቡኪንቱዋቴ፥ ታ ዒንሢ ሃጊ ሄላንዳ ባኣዚ ኬኤዛንዳኔ፤»
2«ዒንሢ፥ ያይቆኦቤ ናኣታ
ፔቱሞና ሃኒ ዋይዙዋቴ፤
ዓዳሢ፥ ዒስራዔኤሌ ዒንሢም ኬኤዛ ባኮ ኮሺ ዋይዙዋቴ።»
3«ሮኦቤኤሌ፦ ኔኤኒ ታ ኔና ዼጋቶ ዎልቄና ዓኣዖ
ሾዔ ታኣኮ ኔ ናኣዚ ቶይዲኬ።
ታኣኮ ናኣቶይዳፓ ቢያ ቦንቺንታያና ዎልቄና
ኮሺ ባሼሢ ኔናኬ።
4ያኣዼ ማዔቶዋ ኔኤኒ ኩሜ ዲጲጉዲታሢሮ
ቢያሢኮ ዑፃ ማዒ ዎይሣያ ማዒሢ ኔኤም ኮይሱዋሴ፤
ዎይቲ ጌዔቴ ታና፥ ዓዶኮ ማዾ ማዻ ላኣሌሎ ኔ ዓርቂ
ዓርሶዋ ኔ ታኣኮ ዒኢሴኔ።»
5«ሲሞኦኔና ሌዊና ዎሊኮ ጌርሲንሢኬ፤
ፑርታ ማዾ ማዻኒ ዔያታ ዖልዚ ዓንጋሞ ዔካያኬ።
6ዔያታ ፔ ዻጎና ሚርጌ ዓቲንቄ ዎዼኔ፤
ጌማቶ ዔያታ ሚኢጪ ዓማላኒ ቲቂ ዎቢሴኔ፤
ዔያቶ ዞሮይዳ ታኣኒ ጌላዓ፤
ዔያቶኮ ቡኪንቶይዳኣ ታ ጴዻዓ።»
7ዼኤፖ ዔያቶኮ ዒጊቻ ዻጋ
ዼኤፖ ጎሪንታ ዔያቶኮ
ጋዳንቂንቴያ ማዖንጎ።
ታኣኒያ ዔያቶ ዒስራዔኤሌ ዓጮይዳ ቢያ ዜርቃንዳኔ፤
ዴሮ ባኣኮይዳኣ ታ ዔያቶ ላኣላንዳኔ።
8«ዪሁዳ! ኔና ኔ ጌርሲንሢ ጋላታያ ማዓንዳኔ፤
ኔ ሞርኮ ኔ ባሻያ ማዓንዳኔ፤
ኔኤኮ ጌርሲንሢ ሂርኪ ጌዒ
ቦንቾ ዔኤሊሢ ኔና ዔኤላንዳኔ።
9ዪሁዳ፥ ሃጊ ዲጫ ዓዴ ዞቢኬ፤
ሙዖንዶ ባኮ ኬሚ
ጌሊ ዎርቃ ዔቶ ባንሢ ማዓንዳኔ፤
ሃሣ ዒጊጩዋዖ ፔና ሃሺ ላሃንዳኔ፤
ዒዛ ዓጊሢ ጴቻኒ ጫርቃንዳያኣ ጴዻዓኬ። #ፓይ. ማፃ 24፡9፤ ዮሃ. ፆፔዻ 5፡5።
10ዴራ ቢያ ዒዛም ዓይሢንታያ ማዓንዳኔ፤
ናንጊና ዔያቶይዳ ካኣታዻንዳሢ ሙካንዳያ ሄላንዳኣና
ካኣቱሞ ቢታንቶ ዪሁዳ ማኣራፓ ኬስካዓኬ።
11ሃሮ ፔኤኮ ዒ ዎይኖ ሚፆኮ ፃጶይዳ
ሃሮ ናዖ ዎይኖኮ ባልጌ ኮዦ ካኣፖይዳ ቱካንዳኔ፤
ዓፒሎዋ ፔኤኮ ዒ ዎይኖ ዑዦና
ዒዚ ጊልዲማ ጊልዲሞዋ ሱጉሢጉዲ ዞቃ
ዎይኖፓ ጩኡጶና ዑዦና ማስካንዳኔ።
12ዓኣፓኣ ዒዛኮ ዎይኖ ዑዦይዳፓ ባሼ ዞቃንዳኔ፤
ዓጫ ዒዛኮ ዲኢቂዳፓ ዑሣ ዓኣዼ ቦኦራንዳኔ።»
13«ዛብሎኦኔ፥ ባዚ ዓቺዳ ናንጋንዳኔ፤
ዒዛኮ ባዞ ዓጮይዳ ዓኣ ቤዛ ዋኣሢ ካኣሚሌ ሙኪ ዔቃ ቤሲ ማዓንዳኔ፤
ዒዚ ናንጋንዳ ዓጮኮ ዛጳ ዴንዲ ሲዶና ሄላንዳኣናኬ።»
14«ዪሳኮኦሬ፥ ጫኣኖ ባኣካ#49፡14 ጫኣኖ ባኣካ ጋዓዛ፦ ዪሳኮኦሬኮ ዓጫ ላምዖ ዹካ ባኣካ ዓኣ ዶኦቺ ቤሲ ማዔሢ ዔርዛያኬ። ላሂ ሺራ ዶዲ ሃሬጉዴያኬ።
15ጋዓንቴ ዒዚ ሃውሻንዳ ቤዞና
ሳዖና ኮሺ ዎዛሳያ ማዔሢ ዴንቃዖ
ጫኣኖ ዔካኒ ጌኤቶ ፔኤሲ ሂርኪዳንዳኔ፤
ካራሚጉዲ ዶዲ፥ ዎልቄ ማዾዋ ማዻንዳኔ።
16ዳኣኔ፦ ዒስራዔኤሌ ፃጳፓ ፔቴሢ ማዒ ፔ ቶኦኮኮ ጌስቲ ዎጋያ ማዓንዳኔ።
17ዳኣኔ ጎይሢ ዓቺዳ ዓኣ ሾኦሺ ማዓንዳኔ፤
ባቁሎ ቶጊ ዓኣዻሢ ባቁሎይዳፓ ሎንሣኒ
ጎይሢ ፁኡቤ ካራይዳ ካቲ
ባቁሎኮ ሹቁሎ ዻዓ ዶርባ ሾኦሺ ማዓንዳኔ።»
18«ናንጊና ናንጋ ጎዳሢዮ!
ታ ኔኤኮ ዻቂሺፆ ካፓንዳኔ።»
19«ጋኣዴ፦ ቡራ ዓሲ ኮሺ ሜታሳንዳኔ፤
ዒዚያ ኮጲሲ ዓኣዺ
ዔያቶ ዳውሳንዳኔ።»
20«ዓሴኤሬ፦ ሳዖይዳፓ ሚርጌ ሃኣኮ ዴንቃንዳኔ፤
ካኣቶም ዒንጎንዶጉዴ ቃራ ካሣኣ ካሣንዳኔ።»
21«ኒፕታኣሌኤሜ፦ ሜታባኣያ ሃንቲ ሃንቲ ናንጋ
ሚርጌ ሚዛጲ ናይ ሾዓ
ጌንዖጉዴያ ማዓንዳኔ።»
22«ዮሴፔ፦ ዓልቃ ዋኣሢ ዓሽካ ቱኮናያ
ባልጊ ዴንዳ ካኣፓ ኮጬይዳ ባልጊ ዴንዲ ዓኣፓ ሚሢጉዲ ማዓንዳኔ።
23ዒዛኮ ሞርካ ዒዛ ዳውሲ ዳውሲ ሚርጌና ሜታሳንዳኔ፤
ሂኢሺናኣ ዔያታ ዒዛ ዱካንዳኔ።
24ጋዓንቴ ሚርጌ ዶዲ ማዔ ያይቆኦቤ ፆኦዛሢ ዎልቆና
ዒስራዔኤሌ ሄንቃሢና ካፓሢናኮ ዶዱሞና
ዒዛኮ ዓኣዛ ባሼ ዶዲ ማዓንዳኔ፤
ዎልቃኣ ዒዛኮ ዶዳንዳኔ።
25ኔኤኮ ዓዶ ፆኦዛሢ ኔና ማኣዳንዳኔ፤
ቢያ ባኮ ዳንዳዓ ፆኦዛሢ ጫሪንጫፓ ዒርዚ
ሳዖኮ ዴማፓ ዋኣሢ ኔኤም ዒንጊ ኔና ዓንጃንዳኔ፤
ሃሣ ሚርጌ ቆልሞና ናይና ኔኤም ዒዚ ዒንጋንዳኔ።
26ሚናፓ ዶዲ ማዒ ናንጋ ዹኮና
ናንጊና ናንጋያ ማዒ ዓኣ ጌሜሮናይዳፓ
ጴዻ ዎዛሳ ዓንጆ ቢያሢዳፓ፥ ኔ ዓንጃ ባሻያኬ።
ዓካሪ ሃይ ዓንጃ ቢያ ዮሴፔ ቶኦካ ማዖንጎ፤
ጌርሲንሢ ባኣካ ሱኡጌ ማዔ፥ ዮሴፔ ቶኦካ ኬዶንጎ።»
27«ቢኢኒያሜ፦ ቡሪ ዔካ ያኣዮጉዲኬ፤
ጉቴ ዓሚ ዒ ኬሚ ዴንቄ ባኮ ፔኤሮ ሙዓንዳኔ፤
ዋንቴ ኬሚ ዴንቄሢ ጋዓንቴ ዒዚ ጊሽካንዳኔ።»
28ዓካሪ ሃኣታ ታጶ ላምዓሢ ዒስራዔኤሌ ፃጶኬ፤ ዓዴ ዔያቶ ዓንጃዖ ፔቴ ፔቴሢም ኮይሳሢጉዴ ዓንጆ ዒንጌሢ ዬያይዲኬ።
ያይቆኦቤኮ ሃይቦና ዱኡቲፆና
29ዬካፓ ያይቆኦቤ ፔ ናኣቶ፦ «ታኣኒ ሃይቂ ታ ዒጊኖ ኮራ ዓኣዻንዳ ዎዳ ሄሌኔ፤ ዬያሮ ሄቴ ዓሢ ዔፕሮኦኔ ጎዦ ዓጫ ዔታ ዓኣ ቤዛሢዳ፥ ታ ዓዶንሢ ዱኡቴ ቤዛ ታናኣ ዎላ ዒኢካ ዱኡኩዋቴ፤ 30ዬይ ዴኖ ዔቶ ቤዛሢ ካኣናኔ ዓጮይዳ ሜሚሬ ጎዖ ቤዞኮ ዓባ ኬስካ ዛሎና ማክጴላይዳ ዓኣሢኬ፤ ዓብራሃሜ ዬያ ዴኖ ዔቶኮ ዓኣ ጎዦ ዱኡፒ ቤሲ ማሂ ሻንቄሢ ሄቴ ዓሢ ዔፕሮኔይዳፓኬ። #ማዢ. ማፃ 23፡3-20። 31ዓብራሃሜንታ ማቾ ሳኣራንታ ዪሳኣቄንታ ማቾ ዒርቢቃንታ ዱኡቴሢ ቢያ ዒኢካኬ፤ ታኣኒያ ታ ማቾ ሊያ ዒኢካ ዱኡኬኔ። #ማዢ. ማፃ 25፡9-10፤ 35፡29። 32ጎዦንታ ዴኖ ዔቶ ቤዞንታ ሻንቂንቴሢ ሄቴ ዓሶይዳፓኬ፤ ዬያሮ ታና ዒኢካ ዱኡኩዋቴ» ጌዒ ዓይሤኔ።
33ያይቆኦቤ ፔኤኮ ናኣቶ ዓይሢ ጋፔስካፓ፥ ጊንሣ ላሃማና ሼምፓሢ ዒዛኮ ዱጴኔ። #ዳኪ. ማዾ 7፡15።
Currently Selected:
ማዢንቲ ማፃኣፔ 49: ጌኤ.ማፃ
Highlight
Share
Copy
Want to have your highlights saved across all your devices? Sign up or sign in
Maale Full Bible © 2008 by The Word for the World International and The Bible Society of Ethiopia, 2008.
