ማዢንቲ ማፃኣፔ 42

ዮሴፔኮ ዒሾንሢ ጊብፄ ዓጮ ዓኣዼሢ

1ያይቆኦቤ ጊብፄ ዓጮይዳ ሃኣኮ ዓኣሢ ዋይዛዖ ናኣቶም፦ «ዎሊ ዛጊ ዴዖይዳፓ ፔቴ ባኣዚ ማዹዋቴ፤ 2ጊብፄ ዓጮይዳ ሃኣኮ ዓኣሢ ታ ዋይዜኔ፤ ኪሊንኮ ሉማሢ ኑና ኩርሱዋንቴ ዒኢካ ዓኣዺ ሃኣኮ ኑኡም ሻንቁዋቴ» ጌዔኔ። #ዳኪ. ማዾ 7፡12። 3ዬያሮ ታጶ ዮሴፔኮ ጌርሲንሢ ሃኣኮ ሻንቃኒ ጊብፄ ዓጮ ዓኣዼኔ። 4ጋዓንቴ ዮሴፔኮ ዒንዳ ሾዔ ናዓሢ፥ ቢኢኒያሜ ጌርሲንሢና ዎላ ጊብፄ ዓጮ ያይቆኦቤ ዳኪባኣሴ፤ ዓይጎሮ ጌዔቶ «ፑርታ ባኣዚ ዒዛ ሄላንዳኔ» ጌዒ ሂርጊ ዒጊጬሢሮኬ። 5ካኣናኔ ዓጮይዳ ሉማሢ ዶዴሢሮ ያይቆኦቤኮ ናኣታ ሃንጎ ሜሌ ዓሶና ዎላ ሃኣኮ ሻንቃኒ ጊብፄ ዓጮ ዓኣዼኔ።

6ዮሴፔ ጊብፄ ዓጫ ካኣቲኮ ዴማ ማዒ ዎይሣያ ማዔሢሮ ኮይላ ዓኣ ዓጮ ቢያይዳፓ ሙካ ዓሶም ሃኣኮ ዒ ሻንቻኔ፤ ዬያሮ ዮሴፔኮ ጌርሲንሢ ዒዛ ቤርታ ሙካዖ ባሊቶ ሳዖ ሄሊሲ ዚጊ ቦንቾ ዔኤሊሢ ዔኤሌኔ። 7ዮሴፔ ፔኤኮ ጌርሲንሢ ዴንቃዖ ዔሬኔ፤ ጋዓንቴ ዔያቶ ዔሩዋያ ማሊ ዻጋና፦ «ዓንካፓ ዒንሢ ሙኬይ?» ጌዒ ዔያቶ ዖኦጬኔ።

ዔያታ ማሃዖ፦ «ሃኣኮ ሻንቃኒ ካኣናኔ ዓጫፓ ኑ ሙኬኔ» ጌዔኔ።

8ዮሴፔ ፔኤኮ ጌርሲንሢ ዔሬያ ማዔቴያ ዔያታ ዒዛ ዔሪባኣሴ፤ 9ሚና ዔያቶ ዛሎ ዓውታዼ ዓውታ ዒዛም ጶቃዛ፦ «ዒንሢ ኑኡኮ ዓጪ ሙሪ ሙኬ ዓሲኬ፤ ዒንሢ ሙኬሢ ዓጮኮ ኑኡኮ ላቢፃ ዎኖ ዛሎናታቴ ሙራኒ ሙኬ ዓሲኬ» ዔያቶ ኮይላ ጋዓዛ፥ #ማዢ. ማፃ 37፡5-10። 10ዔያታ፦ «ኑ ጎዳሢዮ! ኑኡኒ ዓጪ ሙሪ ሙኬ ዓሲቱዋሴ፤ ኑ ኔኤኮ ዓይላ ሃይካ ኑ ሙኬሢ ሃኣኮ ሻንቃኒኬ» ጌዔኔ። 11«ኑኡኒ ቢያሢ ፔቴ ዓሲ ናይኬ፤ ኑኡኒ ሃሣ ጉሙርቂንታያኬ፤ ኑኡኒ ዓጪ ሙሪ ሙኬ ዓሲቱዋሴ» ጌዔኔ።

12ዮሴፔ ዔያቶ ኮይላ፦ «ዔይዔ! ዒንሢ ሙኬሢ ዓጮኮ ላቢፃ ዎኖ ዛሎና ማዔቴያ ዛጋኒ ሙሪ ሙኬ ዓሲኬ» ጋዓዛ፥ 13ዔያታ ማሃዖ፦ «ኑኡኒ ኔኤኮ ዓይላ ካኣናኔ ዓጮይዳ ናንጋ፥ ፔቴ ዓሲስኬያ ናይ ማዔያ ኑ ታጶ ላምዖኬ፤ ጋዓንቴ ፔቴ ኑ ጌኤዛሢ ሃይቄኔ፤ ጋፒንፆ ኑኡኮ ጌኤዛሢ ሃሢ ዓዶና ዎላ ማኣራ ዓቴኔ» ጌዔኔ።

14ዮሴፔ ጊንሣ ሂዚ ዔያቶም ጌዔኔ፦ «ሃይሾ፥ ታ ጌዔሢጉዲ ጎኔ ዒንሢ ዓጪ ሙሪ ሙኬ ዓሲኬ! 15ዓካሪ ዒንሢኮ ጎኑማ ዔርታንዳሢ ያዺኬ፤ ዒንሢኮ ጋፒንፆ ጌኤዛሢ ዒንሢ ዔኪ ሙካንዳያ ሄላንዳኣና ካኣቲ ሃይቆ! ታ ዒንሢ ሃሻዓኬ፤ 16ሃሢ ዒንሢዳፓ ፔቴ ዓኣዺ ዒንሢኮ ጌኤዛሢ ዔኪ ሙኮንጎ፤ ዒንሢ ኬኤዜ ባኮኮ ጎኑማ ዔርታንዳያ ሄላንዳኣና ሃንጎዋታ ዒንሢ ሃይካ ቱኡሲ ማርካ ዴዓንዳኔ፤ ዒንሢ ጌዔሢጉዴያ ማዒባኣያታቶ ጋዓንቴ ካኣቲ ሃይቆ! ጉቤሢ ዒንሢ ሙሪ ሙኬ ዓሲኬ» ጋዓዖ፥ 17ዔያቶ ዒ ሃይሦ ኪሊ ቱኪ ዴይሤኔ።

18ሃይሣሳ ኬሎና ዮሴፔ ዔያቶም ሂዚ ጌዔኔ፦ «ታኣኒ ፆኦሲ ዒጊጫ ዓሲታሢሮ ፔቴ ጎይሢና ታ ዒንሢኮ ሼምፖ ዓውሳኒ ማሌኔ፤ 19ዒንሢ ጎኔ ጉሙርቂንታ ዓሲ ማዔታቴ ዒንሢዳፓ ፔቴ ሃይካ ቱኡዞ ማኣራ ዓቶንጎ፤ ሃንጎዋታ ሃኣኮ ዔኪ ዒንሢኮ ናይዺንቴ ዒጊኖም ዓኣዹዋቴ። 20ዬካፓ ዒንሢኮ ጌኤዛሢ ዔኪ ታኣም ሙኩዋቴ፤ ያዺ ማዔቶ ዒንሢ ኬኤዜ ባካ ቢያ ጎኔ ማዔሢ ዔርታንዳኔ፤ ሃይቢፓኣ ዒንሢ ዓታንዳኔ» ጋዓዛ፥ ዔያታ ዬይ ጌኤዛ ኮሺኬ ጋዓዖ፥ 21ዎላ ሂዚ ጌዒ ጌስቴኔ፦ «ጎኔና ሚና ኑ ጌኤዛሢ ዑፆይዳ ኑ ማዼ ፑርቶ ባኮ ዛሎ ኮይሳ ሜቶ ሃሢ ኑ ዔኪዳ ዓኣኔ፤ ዒዚ ‹ታና ሃሹዋቴራ› ጌዒ ሜታዺ ሺኢቄያና ዒዛኮ ሺኢጲፆ ኑ ዋይዚባኣሢጉዲ ሃሢ ኑ ዑፆይዳ ሃይ ሜታሢ ሄላሢ ዬያ ዛሎናኬ።»

22ሮኦቤኤሌ ዔያቶም፦ «ታ ዒንሢም ‹ናዖ ዑፃ ፑርታ ባኣዚ ሄሊሲፖቴ› ጌዒ ኬኤዛኣና ዒንሢ ጋዓንቴ ታኣም ዋይዚባኣሴ፤ ሃኣዛጉዋይ፥ ሃሢ ኑ ዒዛ ዎዼሢሮ ኮማ ኑኡም ማሂንታሢ» ጌዔኔ። #ማዢ. ማፃ 37፡21-22። 23ዮሴፔ ዔያታ ዬያ ጋዓ ባኮ ቢያ ዋዋይዛኔ፤ ዔያታ ጋዓንቴ ዮሴፔና ጌስታሢ ዬኖ ዓጮ ሙኡጮ ዔራ ዓሲና ማዔሢሮ፥ ዔያታ ጋዓ ባኮ ዮሴፔ ዋይዛሢ ዔያታ ዔሪባኣሴ። 24ዮሴፔ ዒማና ዔያቶይዳፓ ዱማዺ ዴንዲ ዬኤኬኔ፤ ላሚ ሃሣ ዔያቶ ኮይላ ሙኪ ዔያቶና ጌስቴስካፓ ሲሞኦኔ ዔያቶ ባኣካፓ ዔኪ ቱኬኔ።

ዮሴፔኮ ጌርሲንሢ ካኣናኔ ዓጮ ማዒ ዓኣዼሢ

25ዮሴፔ ዒዛም ማዻ ዓሶ፦ «ሃንሢ ዓሶንሢም ዔያቶኮ ሱርባ ሃኣኮ ኩንሢጋፓ ሚኢሾ ዔያቶኮ ማሂ ሱርቦ ካራ ካራ ዖሺ ጌሢ፥ ጎይፆኮዋ ዔያቶም ጋላ ዒንጉዋቴ» ጌዒ ዓይሤኔ። ዓሳ ዬያ ዓይሢንቴ ጎይፆ ማዼስካፓ፥ 26ዮሴፔኮ ጌርሲንሢ ሻንቄ ሃኣኮ ሃሮና ጫኣኒ ዴንዶ ዔቄኔ።

27ጎይፆ ዔያታ ዓኣዺቤቃ ፔቴ ቤስካ ዎርቃኒ ቡኬ ቤዛ ዔያቶይዳፓ ፔቴ ፔኤኮ ሃኣኮይዳፓ ፔ ሃራሢ ሙኡዛኒ ሱርቦ ካሮ ቡላዛ ዒዚ ጪጌ ሚኢሻ ዒኢካ ዖሺንቲ ዓኣያ ዴንቄኔ። 28ዒዚ ጌርሲንሢም፦ «ታ ሚኢሻ ጊንሣ ማዔኔ፤ ሃኣዛጉዋቴ፥ ሱርባፓ ታ ዴንቄኔ» ጌዒ ኬኤዛዛ፥ ቢያሢ ዒጊጪ ዲቃታዖ፦ «ፆኦሲ ኑጊዳ ዓይጎ ባኣዚ ዔኪ ዬዓኒ ሃያ ማዼይ?» ዎሊ ኮይላ ጌዔኔ።

29ዬካፓ ካኣናኔ ዓጮይዳ ዓኣ ዓዶ ያይቆኦቤ ኮራ ዔያታ ሄሊ፥ ዔያቶይዳ ማዔ ባኮ ቢያ ሂዚ ጌዒ ኬኤዜኔ፦ 30«ጊብፄ ዓጮ ዎይሣ ሱኡጋሢ ‹ታኣኮ ዓጮ ዒንሢ ሙራኒ ሙኬ ዓሲኬ› ጌዒ ኑ ዑፃ ጎሪንቴኔ፤ 31ኑኡኒ ማሃዖ፦ ‹ኑ ጉሙርቂንታ ዓሲኬ፥ ዓጪ ሙሪ ሙኬ ዓሲቱዋሴ፤ 32ኑኡኒ ፔቴ ዓሲ ናይ ማዔ፥ ታጶ ላምዖ ናይኬ፤ ፔቴሢ ኑኡኮ ሃይቄኔ፤ ጋፒንፆ ጌኤዛሢ ኑኡኮ ሃሢ ዓዶና ዎላ ካኣናኔ ዓጫ ማኣራ ዓቴኔ›» ጌዔኔ። 33ዓሢ ኑኡም ሂዚ ጌዔኔ፦ «ዒንሢ ጉሙርቂንታ ዓሲ ማዔሢ ታ ዔራንዳሢ ታ ጋዓ፥ ፔቴ ባኣዚ ዒንሢ ማዼቶኬ፤ ዬናኣ ዒንሢዳፓ ፔቴ ሃይካ ታ ኮራ ዓቶንጎ፤ ዓቴዞንሢ ዒንሢኮ ናይዺንቴ ማኣሮ ዓሶም ሃኣኮ ዔኪ ዓጮ ማዑዋቴ፤ 34ዒንሢኮ ጋፒንፆ ጌኤዛሢ ዔኪ ታኣም ሙኩዋቴ፤ ያዺ ዒንሢ ማዼቴ ዒንሢ ጉሙርቂንታ ዓሲና ዓጪ ሙሪ ሙኪባኣ ዓሲታሢ ታ ዔራንዳኔ፤ ሃሢ ዒንሢኮ ሃካ ዓቴ ጌርሲያ ታ ማሂ ዳካንዳኔ፤ ሃያ ዓጮይዳኣ ዒንሢ ኮዔሢጉዲ ኮርማኒ ዳንዳዓኔ።»

35ዓዶም ዔያታ ዬያ ኬኤዚ ጋፒሴሢኮ ጊንፃ ሃኣኮ ዔያታ ሱርባፓ ማሃኣና ፔቴ ፔቴሢኮ ሱርቦ ጋራ ሚኢሾ ዖሺ ጌሦናሢ ጴዼኔ፤ ዬያሮ ዔያቶንታ ዔያቶኮ ዓዶንታ ማዔ ሚኢሾ ዛጋዖ ሚርጌና ዒጊጬኔ። 36ዬማና ዔያቶኮ ዓዳሢ፦ «ናኣቶ ቢያሢዳፓ ታና ዒንሢ ዓይሳኒ ኮዓ? ዮሴፔ ባኣሴ፤ ሃሢ ሲሞኦኔ ዒንሢ ዓይሴኔ፤ ሃሣ ቃሲ ዒንሢ ቢኢኒያሜ ዔኪ ዓኣዻኒ ኮዓኔ፤ ታ ዓይጎ ሜቶይዳ ኬዴይ!» ጌዔኔ።

37ዬያ ዋይዛዖ ሮኦቤኤሌ ዓዶም ሂዚ ጌዔኔ፦ «ቢኢኒያሜ ማሂ ታ ዔኪ ሙኪባኣቴ ታኣኮ ላምዖ ዓቲንቆ ናኣቶንሢ ዔኪ ዎዼ፤ ታና ዓርቄ፥ ታ ዒዛ ዔኪ ኔኤም ሙካንዳኔ።»

38ያይቆኦቤ ዒማና፦ «ዓይጎ ማዔቶዋ ዒንሢና ዎላ ታ ዳካዓኬ፤ ዒዛኮ ቶይዲ ቤርታ ሃይቄኔ፤ ዓቴሢ ሃሢ ዒዛ ሌሊኬ፤ ጎይፃ ዒዛ ዑፃ ፔቴ ባኣዚ ሄሌቶ ጋርቻቶና ታና ዒንሢ ኑኡናሲ ዎዺሻንዳኔ» ዔያቶም ጌዔኔ።

Currently Selected:

ማዢንቲ ማፃኣፔ 42: ጌኤ.ማፃ

Highlight

Copy