ዓሞፄ ማፃኣፖ 9
9
ናንጊና ናንጋ ጎዳ ዒስራዔኤሌይዳ ዓጋኒ ጊኢጌ ሜቶ
1ናንጊና ናንጋ ጎዳ ዒንጎ ባኮ ዒንጎ ቤዞ ኮይላ ዔቂ ዓኣንቴ ታ ዛጌኔ፤ ዒዚ ታና ሂዚ ጌይ ዓይሤኔ፦ «ፃጶ ሄሊ ዓጊፃንዳጉዲ ጌኤዦ ማኣሮኮ ቱርቱሮ ሙስኩሎ ጳርቄ፤ ሜቂ ዓሶኮ ሶፖይዳ ዶዓንዳጉዲ ጳርቂ ሜንሤ፤ ዬያይዳ ሃይቁዋዖ ቶሊ ዓቴ ዓሶ ታኣኒ ጬንቻ ዓራፖና ኩርሳንዳኔ፤ ዓይጎ ዓሲያ ጳሽኪ ቶሊ ዓታዓኬ። 2ሳዖ ቦኦኪ ጌሊ ዔያታ ዱኡቴቴያ ታ ዔያቶ ዒኢፓ ጎቺ ኬሳንዳኔ፤ ሌካ ጫሪንጮ ዔያታ ኬስኬቴያ ታ ዔያቶ ዒኢካፓ ኬይሳንዳኔ። 3ቄርሜሎሴ ዹኮኮ ቶኦኮ ኬስኪ ዒኢካ ዔያታ ፑኔቴያ ኬሚ ታ ዔያቶ ዒኢፓ ዑርዚ፥ ዓርቃንዳኔ፤ ታ ቤርታፓ ፑናኒ ዼኤፖ ባዞ ዔቶ ዔያታ ኬዴቴ ዒኢካ ዓኣ ሾኦዣ ዔያቶ ዻዓንዳጉዲ ታኣኒ ዓይሣንዳኔ። 4ሞርካ ዔያቶ ዲዒ ዔኪ ዴንዴቴያ ዒኢካ ዔያቶ ታኣኒ ዎዺሻንዳኔ፤ ታ ዔያቶ ፑርታ ዓኣፒና ዛጋንዳኔ፥ ኮሺ ዓኣፒና ዛጋዓኬ።»
5ዓጪ ማዔ ካራና ቢያ ዓባዬ ዎሮጉዲ
ሌካ ፖኦጊ ዔቂ፥ ጊንሣ ሳዓ ኬዲ ጌይ ጌይ ዓጊፃኔ፤
ናንጊና ናንጋ ጎዳ ማዔ ቢያ ባኮ ዎይሣ ጎዳሢ ሳዖ ካኣማዛ ዓልቃንዳኔ፤
ዒኢካ ናንጋ ዓሳኣ ቢያ ዬኤካንዳኔ።
6ፔኤኮ ናንጎ ማኣሮ ጫሪንጫ ማዤሢ
ሳዖኮ ዑፆይዳ ሌካ ዼጌ ቤዞ ኮሺ ዒኢካ ዶዲሼሢ
ዼኤፖ ባዞ ዋኣፆዋ ፔ ባንሢ ዔኤሊ
ሳዖይዳ ጊንሣ ሾኦቲሳሢ ዒዛኬ፤
ሱንፃኣ ዒዛኮ ናንጊና ናንጋ ጎዳኬ።
7ናንጊና ናንጋ ጎዳ ሂዚ ጋዓኔ፦ «ዒስራዔኤሌ ዴሬዮቴ! ታ ቤርቶይዳ ዒቶጲያ ዓሳ ዒንሢፓ ላኣፒ ጴዹዋሴ፤ ዒንሢ ታኣኒ ጊብፄ ዓጫፓ ኬሴሢጉዲ ፒሊስፄኤሜ ዓሶ ቄርፄኤሴፓ፥ ሶኦሪያ ዓሶ ቂኢሬፓ ዔኪ ታኣኒ ኬሲባኣዓዳ? ዔኪ ታኣኒ ኬሲናኣኮኬ። 8ታና፥ ናንጊና ናንጋ ጎዳ ማዔ ፆኦዛሢኮ ዓኣፓ ጎሞ ማዻ ዒስራዔኤሌ ካኣቶ ዓጮ ዴንቄኔ፤ ሳዖይዳፓ ጋፒሲ ታ ባይዛንዳኔ፤ ያዺ ማዔቴያ ያይቆኦቤ ዜርፆ ቲፅዲ ታኣኒ ባይዛዓኬ። ዬያ ጌዔሢ ታና፥ ናንጊና ናንጋ ጎዳኬ።
9«ዒስራዔኤሌ ዴራ ሜሌ ዴሮ ባኣካ ዜርቂንታንዳጉዲ ታኣኒ ዓይሣንዳኔ፤ ዔያታ ዜርቂንታንዳሢ ሶኦራ ዓንዳና ሃኣኮ ሶኦሪንታሢጎይፆኬ፤ ሶኦሮ ዓንዳ ዛላዻኣና ዲልባ ዴንዳንዳኣፓዓቴም ፔቴ ዓኣፒታዎ ፒንፂ ዴንዳዓኬ። 10‹ፔቴታዖ ፑርታ ባኣዚ ኑና ሄላዓኬ› ጋዓ ታ ዴሮ ባኣኮይዳ ዓኣ ጎሞ ዓሳ ቢያ ዖልዚና ሃይቃንዳኔ።»
ዒስራዔኤሌ ዴራ ፔ ዓጮ ጊንሣ ሙካንዳያ ማዒፆ
11ናንጊና ናንጋ ጎዳ ሂዚ ጋዓኔ፦ «ዳውቴ ማኣሮ ዶዔሢ ጊንሣ ታ ዔቂሳንዳኔ፤ ኬኤሎ ዲፆዋ ጊንሣ ታ ኮሻንዳኔ፤ ሻሂንቴሢያ ማሂ ታ ዓካሳንዳኔ፤ ሚና ቤርታ ዓኣ ጎይፆማጉዲ ማሂ ጊንሣ ታኣኒ ማዣንዳኔ። 12ዬያሮ ዔዶኦሜፓ ፒኢጫዺ ዓቴ ዓሶ፤ ጊንሣ ሃሣ ታ ሱንፆና ዔኤሊንቴ ሜሌ ዴሮ ቢያ ዔያታ ዻካላንዳኔ» ጋዓኔ ዬያ ባኮ ቢያ ማዺ ኩንሣንዳ፥ ናንጊና ናንጋ ጎዳ። #ዳኪ. ማዾ 15፡16-18።
13ናንጊና ናንጋ ጎዳ ሂዚ ጋዓኔ፦
«ሃኣኮ ጮኦራ ዓሳ ጮኦሪ ጋፒሱዋንቴ
ጎሽካ ዓሳ ጎሽኮሮ ዬዓንዳ ዎዴ፤
ዎይኖ ዓኣፖ ጩኡጳ ዓሳ ጩኡጲ ጋፑዋንቴ
ዎይኖ ቱካ ዓሳ ቱኮሮ ዬዓንዳ ዎዴ ሙካንዳኔ።
ዬኖ ዎዶና ዹካፓ ዓኣሢ ዎይኔ ዑሺ ዓልቃንዳኔ፤
ጌሜራፓኣ ቢያ ዎይኔ ዑሺ ጎዓንዳኔ።
14ታኣኮ ዴሮ፥ ዒስራዔኤሌ ፔ ዓጮ ማሂ ታ ዔኪ ዬዓንዳኔ፤
ዶዒ ሻሂንቴ ካታሞ ጊንሣ ዔያታ ማዢ ዒኢካ ናንጋንዳኔ፤
ዎይኔ ቱኪ ዬያ ዎይኖኮ ዓኣፖና ኮሾ ዑዦ ዔያታ ዑሽካንዳኔ፤
ሜሌ ዬያጉዲ ዱማ ዱማ ሚሢያ ቱኪ ዓኣፖ ዔያታ ሙዓንዳኔ።
15ታ ዴሮ፥ ዒስራዔኤሌ
ዔያቶም ታ ዒንጌ ዓጮይዳ ዾቂ ታኣኒ ፃጲ ዳኪሲሳንዳኔ፤
ላሚ ያፓ ዔያታ ቱጊንቲ ዴንዳዓኬ።»
ዬያ ጌዔሢ ናንጊና ናንጋ ጎዳ ማዔ ዒንሢኮ ፆኦዛሢ፥ ታናኬ።
Currently Selected:
ዓሞፄ ማፃኣፖ 9: ጌኤ.ማፃ
Highlight
Share
Copy
Want to have your highlights saved across all your devices? Sign up or sign in
Maale Full Bible © 2008 by The Word for the World International and The Bible Society of Ethiopia, 2008.
