ዓሞፄ ማፃኣፖ 1
1
1ዖኦዚያ ጎዖሢ ዪሁዳይዳ፤ ዮዓኣሴ ናኣዚ ዒዮርቢዓሜ ዒስራዔኤሌይዳ ካኣታዺ ዓኣ ዎዶና ቴቆዓ ጉርዶይዳ ቆልሞ ሄንቃ ዓሶፓ ፔቴ፥ ዓሞፄ ጌይንታስኬይ ዒስራዔኤሌ ዓሶ ዛሎ ፆኦሲ ማሊሢ ሂዚ ጌይ ኬኤዜኔ፤ ዬያ ዒ ኬኤዛንዳሢኮ ላምዖ ሌዔኮ ቤርታ ዒኢካ ሳኣ ዓጊፄኔ። #2ካኣቶ. ማ 15፡1-7፤ 14፡23-29፤ 2ፆኦሲ. ዓሃኬ 26፡1-23።
2ዓሞፄ ዒማና ሂዚ ጌዔኔ፦
«ናንጊና ናንጋ ጎዳ ፂዮኔ ዹኮይዳ ዴይ
ጉጉዻ ዞቢጉዲ ዒጊቻ ዑኡሲ ዋይዚሳኔ፤
ዒ ጋዓ ባካ ዬሩሳላሜፓ ማኣሚ ዋይዚንታኔ፤
ቆልሞ ሄንቃ ዓሳ ሄንቃ ቤዛ ዓኣ ማኣታ ቆልሞኮ ሹላንዳኔ፤
ቄርሜሎሴ ዹኮይዳኣ ዋርቂ ዓኣ ባካኣ ቢያ ሜላንዳኔ።» #ዒዩ. 3፡16።
ናንጊና ናንጋ ጎዳ ዒስራዔኤሌኮ ዓሺኒ ማዔ ዓጮይዳ ዓጌ ሜቶ
ሶኦሪያ
3ናንጊና ናንጋ ጎዳ ሂዚ ጋዓኔ፦ «ዴማስቆ ዴራ ማዼ ሃይማኬ ጌይንቱዋ ጎሞ ዛሎ ቲኢሩዋዖ ሜቶ ታኣኒ ዔያቶይዳ ዓጋንዳኔ፤ ዔያታ ዓቺ ማላ ሺራ ቶኪ ዓኣ ዓንጊና ሃኣኮ ሺርኮ ጎይሢ ጌሌዓዴ ዴሮኮ ጊዶ ሄርቂ ሃንቲ ሜቶ ቤኤዜኔ። #ዒሲ. 17፡1-3፤ ዔር. 49፡23-27፤ ዛካ. 9፡1። 4ካኣቲ ሃዛዔኤሌኮ ካኣቱሞ ባይዛንዳ ታሚ ታኣኒ ዓጋንዳኔ፤ ዬይ ታማ ካኣቲ፥ ቤንሃዳዴ ኬልቂ ኮሼ ዲፆ ሙዓንዳኔ። 5ዴማስቆ ካታሞ ጌሎ ካሮ ዎዾ ዓንጎ ታኣኒ ቢያ ሜንሣንዳኔ፤ ዓዌኔ ዶኦጮይዳ ናንጋ ዴሮንታ ቤትዔዴኔ ካኣቲንታ ታኣኒ ባይዛንዳኔ፤ ሶኦሪያ ዴራ ዲዒንቲ ቂኢሬ ዓጮ ዔውታንዳኔ።»
ፒሊስፄኤሜ
6ናንጊና ናንጋ ጎዳ ሂዚ ጋዓኔ፦ «ጋኣዛ ካታሞ ዴራ ማዼ ሃይማኬ ጌይንቱዋ ጎሞ ዛሎ ቲኢሩዋዖ ሜቶ ታኣኒ ዔያቶይዳ ዓጋንዳኔ፤ ዔያታ ዲዒ ዔካ ዴሮ ቢያ ዔዶኦሜ ዓሶም ሻንቼኔ። #ዒሲ. 14፡29-31፤ ዔር. 47፡1-7፤ ሂዚ. 25፡15-17፤ ዒዩ. 3፡4-8፤ ሶፖ. 2፡4-7፤ ዛካ. 9፡5-7። 7ዬያሮ ታኣኒ ጋኣዛ ካታሞኮ ኬኤሎ ዲፆይዳ ታሚ ዓጋንዳኔ፤ ዔያቶኮ ዬያ ዋርዲዮ ዬይ ታማ ሙዓንዳኔ። 8ዓሽዶዴይዳ ናንጋ ዴሮንታ ዓስቄሎና ካኣቲንታ ታኣኒ ባይዛንዳኔ፤ ዔቅሮኦኔ ካታማ ናንጋ ዴሮይዳኣ ታኣኒ ሜቶ ዓጋንዳኔ፤ ፒሊስፄኤሜፓ ቶሊ ዓቴ ዓሳኣ ሃይቃንዳኔ።»
ፂኢሮሴ
9ናንጊና ናንጋ ጎዳ ሂዚ ጋዓኔ፦ «ፂኢሮሴ ካታሞ ዴራ ማዼ ሃይማኬ ጌይንቱዋ ጎሞ ዛሎ ቲኢሩዋዖ ታኣኒ ሜቶ ዔያቶይዳ ዓጋንዳኔ፤ ዔያታ ዎላ ሳላዼ ዴሮ ቦንቹዋዖ ዲዒ ዔኬ ዓሶ ዔዶኦሜ ዓሶም ሻንቼኔ። 10ዬያሮ ፂኢሮሴ ካታሞኮ ኬኤሎ ዲፆይዳ ታሚ ታኣኒ ዓጋንዳኔ፤ ዔያቶኮ ዬያ ዋርዲዮ ዬይ ታማ ሙዓንዳኔ።» #ዒሲ. 23፡1-8፤ ሂዚ. 26፡1—28፡19፤ ዒዩ. 3፡4-8፤ ዛካ. 9፡1-4፤ ማቲ. 11፡21-22፤ ሉቃ. 10፡13-14።
ዔዶኦሜ
11ናንጊና ናንጋ ጎዳ ሂዚ ጋዓኔ፦ «ዔዶኦሜ ዴራ ማዼ ሃይማኬ ጌይንቱዋ ጎሞ ዛሎ ቲኢሩዋዖ ሜቶ ታኣኒ ዔያቶይዳ ዓጋንዳኔ፤ ዔያታ ፔኤኮ ዒጊኖ፥ ዒስራዔኤሌ ዓሶ ጬንቾ ዓራፖና ዎዺ ዎዺ ዳውሴኔ፤ ዔያቶ ዳውሲ ዓርቃዖዋ ሚጪንቲቃይዶ ዔያታ ዎዼኔ፤ ዔያቶይዳ ታኣኒ ዻጋዼ ዻጋ ታኣኮ ማዖ ዒፄኔ፤ #ዒሲ. 34፡5-17፤ 63፡1-6፤ ዔር. 49፡7-22፤ ሂዚ. 25፡12-14፤ 35፡1-15፤ ዓብዲ. 1-14፤ ሚል. 1፡2-5። 12ዬያሮ ቴማኣኔ ካታሞይዳ ታኣኒ ታሚ ዓጋንዳኔ፤ ዬይ ታማ ቦፂራ ዋርዲዮዋ ሙዓንዳኔ።»
ዓሞኦኔ
13ናንጊና ናንጋ ጎዳ ሂዚ ጋዓኔ፦ «ዓሞኦኔ ዴራ ማዼ ሃይማኬ ጌይንቱዋ ጎሞ ዛሎ ቲኢሩዋዖ ሜቶ ታኣኒ ዔያቶይዳ ዓጋንዳኔ፤ ዔያታ ፔኤኮ ዓጮ ዳልጊሻኒ ዖሌ ዖሎና ጌሌዓዴይዳ ናንጋ፥ ጎጶይንዳሢኮ ጎጶ ዔያታ ዳርዚ ዳርዚ ላኣሌኔ። #ዔር. 49፡1-6፤ ሂዚ. 21፡28-32፤ 25፡1-7፤ ሶፖ. 2፡8-11። 14ዬያሮ ታኣኒ ራኣባ ካታሞኮ ኬኤሎ ዲፆይዳ ታሚ ዓጋንዳኔ፤ ዬይ ታማ ዬያ ዋርዲዮ ሙዓንዳኔ፤ ያዺ ማዔስካፓ ዖሎ ዓቦና ሞርካ ዔያቶ ዎዺ ዎዺ ሜርቶ ሌሊ ሜርታያ ማዓንዳኔ፤ ዖሎ ዖላ ዓሳ ዓልጎ ዢባሬጉዲ ሩኡሪ ዔያቶይዳ ዬዓንዳኔ፤ 15ዔያቶኮ ካኣቲንታ ዼኤፖ ዼኤፖ ቢታንታ ዓኣ ዓሶንታ ዲዒንቲ ዔውታንዳኔ።» ጋዓኔ ናንጊና ናንጋ ጎዳሢ።
Currently Selected:
ዓሞፄ ማፃኣፖ 1: ጌኤ.ማፃ
Highlight
Share
Copy
Want to have your highlights saved across all your devices? Sign up or sign in
Maale Full Bible © 2008 by The Word for the World International and The Bible Society of Ethiopia, 2008.
