SAM 29

സർവേശ്വരന്റെ സ്വരം

ദാവീദിന്റെ ഒരു സങ്കീർത്തനം

1സ്വർഗശക്തികളേ, സർവേശ്വരനെ മഹത്ത്വപ്പെടുത്തുവിൻ,

അവിടുത്തെ മഹത്ത്വവും ശക്തിയും പ്രഘോഷിക്കുവിൻ;

2സർവേശ്വരന്റെ നാമം മഹിമയേറിയത് എന്ന് ഉദ്ഘോഷിക്കുവിൻ;

വിശുദ്ധവസ്ത്രാലങ്കാരത്തോടെ അവിടുത്തെ ആരാധിക്കുവിൻ.

3സർവേശ്വരന്റെ ശബ്ദം സമുദ്രങ്ങളുടെ മീതെ മുഴങ്ങുന്നു;

മഹത്ത്വത്തിന്റെ ദൈവമായ സർവേശ്വരൻ

പെരുവെള്ളത്തിൻ മീതെ ഇടി മുഴക്കുന്നു.

4അവിടുത്തെ ശബ്ദം ശക്തിയോടും ഗാംഭീര്യത്തോടും മുഴങ്ങുന്നു.

5അതു ദേവദാരുക്കളെ തകർക്കുന്നു;

ലെബാനോനിലെ കരുത്തുറ്റ ദേവദാരുക്കളെപ്പോലും തകർക്കുന്നു.

6അവിടുന്നു ലെബാനോൻ പർവതത്തെ വിറപ്പിക്കുന്നു,

അതു കാളക്കുട്ടിയെപ്പോലെയും ഹെർമ്മോൻമല കാട്ടുപോത്തിൻ

കുട്ടിയെപ്പോലെയും ഇളകിച്ചാടുന്നു.

7സർവേശ്വരന്റെ ശബ്ദം മിന്നൽപ്പിണരുകൾ ഉളവാക്കുന്നു.

8അവിടുത്തെ ശബ്ദം മരുഭൂമിയെ വിറപ്പിക്കുന്നു;

അവിടുന്നു കാദേശ് മരുഭൂമിയെ പ്രകമ്പനം കൊള്ളിക്കുന്നു.

9സർവേശ്വരന്റെ ശബ്ദം മാൻപേടകളെ പ്രസവിക്കുമാറാക്കുന്നു;

വനവൃക്ഷങ്ങളുടെ ഇലകൾ പൊഴിക്കുന്നു.

അവിടുത്തെ ആലയത്തിൽ എല്ലാവരും

ദൈവത്തിനു മഹത്ത്വം എന്നു ഘോഷിക്കുന്നു.

10സർവേശ്വരൻ ജലവിതാനത്തിൽ സിംഹാസനസ്ഥനായിരിക്കുന്നു;

അവിടുന്നു രാജാവായി എന്നേക്കും വാഴുന്നു.

11സർവേശ്വരൻ തന്റെ ജനത്തെ ബലപ്പെടുത്തുന്നു;

അവിടുന്ന് അവരെ സമാധാനം നല്‌കി അനുഗ്രഹിക്കുന്നു.

Currently Selected:

SAM 29: malclBSI

Highlight

Copy

Popular Bible Verses from
SAM 29