Rom 16

Mo Wala Ni Saediananga

1No ko sare unue oodoiꞌomu uri keni eesikaelu a Pibi nge ko hei raretaꞌi i laona soihaadaꞌinge wau aana huilume i Senkria, ingeie tohungei keni diana ni ngeena. 2Omu ke takuhie aana satana a Aalaha, oto mala tolahana mo iinoni a God. Na omu ke peꞌie aana taꞌena nga mei ola ko saetoꞌo aana mwaaniꞌomu, aena aana ingeie maraana ko peꞌi-peꞌi diana aana mwala hunge na ko peꞌi diana aaku noꞌone.

3Omu ke niie mei wala ni saediananga ineu hunie a Prisila na Akuila, e ro ola nge kirerue asu loko-loko peꞌieu nana Jisas Kraes. 4Na kirerue karaꞌi mae aana kirerue lauhieu. Oto no ko tohungei paalaherarue oto hiitoꞌo, na kaꞌa ike mola taꞌe ineu haliꞌite, taꞌe ahutana oto mo soihaadaꞌinge aana mo Aapoloa Aaopa noꞌone kire ko sare paalaherarue. 5No ko sare niie noꞌone mei wala ni saediananga ineu hunie mwala aana soihaadaꞌinge nge kire ko rururu i nume ikirerue.

Mei wala ni saediananga ineu noꞌone hunie aasiku maaꞌi a Epaenetas, iini e holaꞌi hiiwalaimoli aana Kraes wau i laona poꞌo ni henue i Esia.

6Na omu ke niie noꞌone mei wala ni saediananga ineu hunie a Meri, iini e asu aꞌailaꞌa huni peꞌilemiu.

7Na omu ke niie noꞌone mei wala ni saediananga ineu hunie a Andronikas na a Jiunia. A mwane ngeena na a keni ngeena, ikirerue ngaeta ro Jiu noꞌone mala ineu, na kirerue oꞌoꞌo kaꞌu peꞌieu i nume ni hoꞌo. Ikirerue ngaeta ro naꞌohai hurulaꞌaa, #16:7 Erenga ni Krik e kaꞌa tohungei matapwa ike i leu, na ohe mo wala ienini kire toꞌo aana mei neꞌisaenga uuri, “Mo hurulaꞌaa kire tohungei haꞌamaꞌu aadarue.” na ikirerue oto kire holaꞌi hiiwalaimoli aana a Kraes i naꞌoku.

8Mei wala ni saediananga ineu noꞌone hunie a Ampliatas, tohungei malahuku i lalo aana Aalaha.

9Mei wala ni saediananga ineu noꞌone hunie a Obanas, iini e asu tararuru peꞌikolu nana a Kraes.

Na mei wala ni saediananga ineu noꞌone hunie tohungei malahuku a Stakis.

10Mei wala ni saediananga ineu noꞌone hunie a Apelis, iini e haataꞌinie oto uri e lulu i sulie a Kraes toꞌohuu.

Na mei wala ni saediananga ineu noꞌone hunie mwala aana uluhe a Aristobiulas.

11Mei wala ni saediananga ineu noꞌone hunie a Herodion, ngaeta iinoni ni Jiu mala ineu.

Na mei wala ni saediananga ineu noꞌone hunie maeni mwaasine maaꞌi aana uluhe a Nasisas.

12Mei wala ni saediananga ineu noꞌone hunie a Traefina na Traefosa, e ro keni kire asu aꞌailaꞌa nana Aalaha, na hunie tohungei malahuku a Pesis, ngaeta keni loꞌu e asu aꞌailaꞌa nana Aalaha.

13Mei wala ni saediananga ineu noꞌone hunie a Rufas, ingeie tohungei mwane diana hunie asunge nana Aalaha, na hunie a nikana nge e lio i sulieu oto mala nga kalena.

14Na omu ke niie mei wala ni saediananga ineu noꞌone hunie a Asinkritas na a Fligon na a Hemes na a Patrobas na a Hemas na mo eesikaelu aana hiiwalaimolinge nge kire ko oꞌoꞌo peꞌire.

15Mei wala ni saediananga ineu noꞌone hunie a Filologas peꞌie a Jiulia, na a Nerias peꞌie a keni eesine, na hunie a Olimpas na ahutana mwala a God nge kire ko oꞌoꞌo peꞌire.

16Oto saeku hunie omu ke mani hele kiꞌi heiliu#16:16 Erenga ni Krik e unue uri kire ke “nono peꞌire hailiu” oto mala tolahada, taꞌe aana mo henue hunge siꞌiri tolaha ni hele-kiꞌinge e oolisie oto tolaha ni nononga ngeena. Maꞌalana e urine, taꞌe tolaha ni nononga ngeena e iiꞌo ue hule siꞌiri aana ngaeta mo henue karaꞌinie i Israel. mala mo heꞌimalahune maaꞌi, na omu ke saie uri ahutana mo soihaadaꞌinge a Kraes ko niie saediananga ikire huniꞌomu.

Suꞌuri Toliꞌaasie Nga Iini Ke Oopaa Soihaadaꞌinge

17Oto no ko eitanaiꞌomu, maeni eesiku maaꞌi, uri omu ke lio talamiu mwaanie mwala nge kire ko sare oopaa soihaadaꞌinge, na kire ko waelie hiiwalaimolinge iꞌomu peꞌie haꞌa-uusulinge nge ko lae aaopa mwaanie nga taa haꞌa-uusulilemiu e lae oto aana. Oto omu ke suꞌuri rorongo hunire. 18Mwala urine, kire kaꞌa asu ike nana a Kraes Aalaha ikie, taꞌe kire ko lae mola i sulie mo heri-huninge aaela aana sape. Kire ko eero aani lahenga huni haꞌa-olaa mola saena mwala nge kire kaꞌa lio saie ike mo neꞌisaenga aaela ikire. 19Nou saie uri iꞌomu, omu saꞌa rongo ike hunire, aana ahutana mwala kire mani rongoa oto uri omu ko totola i sulie mola a Aalaha, na aena mei olana nge no ko tohungei ilenimwaꞌe haahiꞌomu. Taꞌe saeku uri omu ke tohungei saenanau i sulie walu ola diana, na omu ke iiꞌo haꞌatau loꞌu mwaanie walu ola aaela. 20Oto urine a God ikie nge ko niie hanuelamanga hunikie, kei peꞌiꞌomu mola lau-leu hunie omu ke uuri puli-pulisie a Pwelu Eero-eero aana aeꞌaemiu mwaanie omu rongo hunie mo malaahonga ingeie. Na no ko aarengaꞌi hunie uri hahuꞌana manata-diananga a Aalaha ikie a Jisas ke iiꞌo peꞌiꞌomu.

Mo Wala Ni Saediananga Mwaanie Mo Malahune A Pol

21Oaku a Timoti nge mere ko esu tararuru, ko niie loꞌu mei wala ni saediananga wau huniꞌomu.

Na a Lusias na Jeson na a Sosipata nge ikire ngaeta oolu mwane ni Jiu noꞌone mala ineu, kire ko meni niie mei wala ni saediananga noꞌone wau huniꞌomu.

22Ineu a Tetias, iini nou uusue nga taa a Pol e unue hunie ne ke uusue i laona uusu-uusu ienini, ineu noꞌone no ko hiiwalaimoli aana Kraes na no ko niie noꞌone wau mei wala ni saediananga huniꞌomu.

23-24A Gaeas noꞌone ko niie wau mei wala ni saediananga huniꞌomu. Ingeie oto e tola konieu a Pol i nume ingeie aana maholo ienini, na e toliꞌaasie noꞌone nume ingeie hunie mwala aana soihaadaꞌinge ke loko aana.

A Erastas iini lio-lio i suli toꞌoha aana huilume ienini, na aasikaelu a Kuotas kirerue ko niie noꞌone mei wala ni saediananga huniꞌomu.

Aarengaꞌinge Ooreta A Pol Huni Haꞌamangoa Uusu-uusu

25!Kie ke soi haꞌamanikuluꞌaa God! Ingeie ni e si da hunie omu ke uure maꞌutaꞌa mala mo kalena, aena aana omu hiiwalaimoli aana Tataroha Diana nge nou tarohaꞌinie i sulie a Jisas Kraes. Uure oto wau i naꞌo, mei wala ienini i sulie a Kraes na oalaꞌinge a God huni haꞌa-uurie noꞌone mo Aapoloa Aaopa, e iiꞌo mumuni mola. 26Taꞌe mala mo propet kire ere lalai aana, na mala a God Mau-meuriꞌe e unue, mei wala ienini ko lae oto hunie mo Aapoloa Aaopa aana taꞌena nga leu hunie uri kire ke hiiwalaimoli aana God na kire ke lulu i sulie. 27A God maraana oto e toꞌo aana ahutana mo saenanaunge, na aena aana nga taa a Jisas Kraes e asuie hunikie, kie ke soi haꞌamanikuluꞌaa God oto di, na oto di. !Iau, ke urine oto!

Currently Selected:

Rom 16: apbNT

Highlight

Copy