Rom 12

Kie Ke Niie Sapeka Mala Uunu-olanga Mauri Hunie A God Aani Esunge Nana Suli Dinge

1Oto aena urinena, maeni eesiku maaꞌi, aena aana mei sae ni aamasinge a God hunikie, no ko eitanaiꞌomu hunie omu ke niiꞌomu maraamiu mala nga uunu-olanga e mauri hunie a God aani niilana sapemiu suli dinge huni esuie mo esunge e oodo i maana God. Mala maurihaꞌamiu ke urine, nge omu kei urihana nga uunu-olanga e maaꞌi na a God e sai ilenimwaꞌe haahie. Taꞌa-taꞌa tohungei tala hunikie mo iinoni kie ke palo-paloa God aana ni otona. 2Na mwaanie omu toliꞌaasiꞌomu maraamiu mola huni lae i sulie tolahana walumalau ie, taꞌe omu ke toliꞌaasie a God ke oolisie saemiu, na ke niie nga mo neꞌisaenga haalu nemiu. Aana tolahai ola urine haꞌalaa omu ko lio saie nga taa a God e saetoꞌo aana. Oto omu kei saie nga moi taa kire diana na kire oodotaꞌi nge a God ko ilenimwaꞌe haahiꞌi.

3Aana a God e manata diana mone hunieu, nge e lio hilisieu mala Hurulaꞌaa ingeie huniꞌomu mo Aapoloa Aaopa, na e niie noꞌone mei wala ienini hunie ne ke unue huniꞌomu uri nga iini eemiu ke suꞌuri neꞌi-neꞌisae toohaꞌinie maraana, taꞌe omu ke neꞌi-neꞌisae toꞌohuu mola, na omu ke totohoꞌomu maraamiu mola aana hiiwalaimolinge nge a God e niie huniꞌomu e paine uri taa. 4Ahutaka, kie mani toꞌo aana mola e taꞌa-taꞌa mei sape nge mo sasarai ola hai aaopaꞌi kire iiꞌo aana. Na mo sasarai ola ngeena kire mani toꞌo aana mo taungei esunge hai aaopaꞌi noꞌone. 5Oto e urine noꞌone aana soihaadaꞌinge, aana maꞌalana uri ikie mwala hunge, taꞌe kie neꞌie taꞌa-taꞌa mei sape mola aana a Kraes ni ngeena, na ahutaka kie mani lado mola peꞌie ngaeta mwala aana taꞌa-taꞌa mei sape ngeena.

6Ahutaka, kie mani toꞌo aana mo taungei niinge hai aaopaꞌi nge a God e niiꞌi hunikie i tehulaꞌana hahuꞌana manata-diananga ingeie hunikie. Oto kie ke mani esu aana mo niinge ngeena huni peꞌikie hailiu. Mala uri niinge a God ko lae oto huniꞌo hunie o ke tarohaꞌinie walana mala mo propet, nge o ke tarohaꞌinie oto ahutana mo wala nge o hiiwalaimoli uri a God e niiꞌi huniꞌo toꞌohuu. 7Na mala uri niinge a God ko lae oto huniꞌo hunie o ke sasare peꞌie mwala, nge o ke asu diana oto urine. Na mala uri niinge a God ko lae oto huniꞌo huni haꞌa-uusuli diana aana mwala, nge o ke haꞌa-uusuli diana oto. 8Mala uri niinge a God ko lae oto huniꞌo huni ere haꞌasusue saena mwala, nge o ke asu diana oto urine. Na mala uri niinge a God ko lae oto huniꞌo huni peꞌie mwala aani niilana mo ola hunire, nge o ke nii mwaakule oto hiitoꞌo hunire. Na mala uri niinge a God ko lae oto huniꞌo huni naꞌona mwala, nge o ke asu peꞌi lio i sulinge waaꞌiniꞌini oto toꞌohuu. Na mala uri niinge a God ko lae oto huniꞌo huni hei-hei-aamasi, nge o ke aama-aamasie mwala oto peꞌie ilenimwaꞌenga.

9Mwaanie omu lupweꞌi deu-deu aani manata-diananga, taꞌe omu ke manata diana toꞌohuu. Omu ke leledie aaelanga, na omu ke hele maꞌutaꞌa aana nga taa e diana. 10Omu ke manata diana huniꞌomu heiliu oto mala mo mwaasine, na omu ke haꞌamaꞌu eemiu heiliu liutaa aana o haꞌamaꞌu eemu maraamu. 11Omu ke suꞌuri lalawa, taꞌe omu ke asu aꞌailaꞌa mola i suli maholo, na omu ke toliꞌaasie ahutana maurihaꞌamiu ke aꞌailaꞌa aani esunge nana Aalaha. 12Omu ke ile-ilenimwaꞌe tarau haahie mo heiholotaꞌinge a God huniꞌomu. Maholo siꞌohaꞌanga ko hite aamiu, omu ke hele maꞌutaꞌa mola aana hiiwalaimolinge, na omu ke iiꞌo peꞌi aarengaꞌinge mola tarau. 13Omu ke peꞌie mo iinoni a God aana maholo kire ko lae oodoie aasanga, na omu ke tola konie mo awataa i laona mo nume iꞌomu.

14Omu ke aitanaie mola a God hunie ke haꞌadianaꞌaa mwala ko teungeꞌiniꞌomu. Iau, omu ke haꞌadianaꞌara mola na mwaanie omu ere aaelasire. 15Omu ke ilenimwaꞌe peꞌie mo iini ko ilenimwaꞌe, na omu ke saehuu peꞌie mo iini ko saehuu. 16Omu ke iiꞌo diana mola peꞌie ahutana mwala. Mwaanie omu too-toohaꞌiniꞌomu, taꞌe omu ke mwaꞌe-mwaꞌe mola ni deu i sulie taꞌena nga mei esunge wa huni heꞌimalahune peꞌie taꞌena nga iini. Na mwaanie omu loꞌo-loꞌongaꞌinie uri iꞌomu oto omu saenanau.

17Mala uri nga iini ko deu aaelasie nga mei ola takoiꞌomu, omu ke suꞌuri oolisie loꞌu eelihoꞌi hunie. Suli maholo omu ke asuie mola nga taa e oodo na e lio diana i maana ahutana mwala. 18Mala uri leu i sapemiu hunie omu ke iiꞌo ni henuelama peꞌie ahutana mwala, nge omu ke asuie oto. 19Maeni eesiku, maholo nga mwala ko deu huꞌisiꞌomu, mwaanie omu suꞌu eelihoꞌi aana loꞌu hunire, taꞌe toliꞌaasie mola a God ke si haꞌaloire. Aana a Aalaha e unue i laona mo Uusu-uusu Maaꞌi uuri, Leu oto i sapeku hunie suꞌu-olanga. Ineu ni ne ke si oolisie mo aaelanga mwala ko deu huꞌisiꞌomu eeni. Diutronomi 32:35 20Oto mwaanie omu suꞌu-suꞌue aaelanga, taꞌe omu ke haꞌadianaꞌaa mola mo maelonga iꞌomu, aana mo Uusu-uusu Maaꞌi e unue noꞌone uuri, Mala uri maelonga iꞌoe ko hiolo, o ke nii ngeulaa ana. Na mala uri ko maarou, o ke nii wei ana. Mala uri o kei deu urine hunie, nge o kei kumwaa saewasunge ingeie. Provebs 25:21 21Mwaanie omu toitoliꞌaasie aaelanga ke aꞌailaꞌasiꞌomu, taꞌe iꞌomu ni omu ke aꞌailaꞌa taraꞌasi aani esuilana mo tolahai ola diana hunie omu ke aꞌailaꞌasie aaelanga.

Currently Selected:

Rom 12: apbNT

Highlight

Copy