San Juan 1
1
Ti itan kꞌóna chojni
1Ti xránkíxixín na̱xa̱ kꞌónahña chjasintajni, mé xráxín itjen ti itan, la ti itan mé kjuákꞌeko Díos, la ti tan mé Díos tíha. 2Ti nkexro a mé kjuákꞌeko Díos, 3Kaín ti nkehe siín ijie la ti nkexro a mé kꞌónaxín. A̱ndá ti chrókójehya ti nkexro la ninkehó ti nkehe siín ijie la chrókꞌónahña. 4Ti nkexro a mé kjuajon kjuachaxin kixin tjejóchón kaín nkehe, la ti kjuachón mé ti xrohi tsꞌinkaséñexín kaín chojni chjasintajni. 5Ti xrohi í mé tꞌinkaséñaxín ti sítie. A̱ndá ti sítie la tjinkaon chrókókꞌanka, kjánchó kjuachahya.
6 #
Mt. 3:1; Mr. 1:4; Lc. 3:1, 2. *Kjuákꞌe ijnko nkexro ichrꞌán Díos, mé kuékꞌin Juan. 7Jehe chꞌan mé ikui chꞌan kixin tsochronka chꞌan nkexrín itjen ti xrohi la kaín chojni chrókuitekaon sin ti nkehe tsochronka chꞌan. 8Kjánchó jehe chꞌan la jehya ti xrohi. Jehó ikui chꞌan kixin tsochronka chꞌan nkexrín itjen ti xrohi. 9A̱ndá ti xrohi chaxín tsꞌinkaséñaxín kaín chojni chjasintajni la ó ikui.
10Kjuákꞌe chꞌan ntihi la kjónté jehe chꞌan kjuíchꞌénaxín Díos ti chjasintajni, la kjuátso̱anhña chojni ti jehe chꞌan. 11Ikui chꞌan chjasintajni, la ti sin chjasin kuènté chꞌan la kuitekakuenhña sin ti jehe chꞌan. 12Kjánchó kaín ti nkexro kuitekaon ti jehe chꞌan, mé kjuajon chꞌan kjuachaxin kixin tsꞌóna sin xje̱en Díos. 13Mé tíhi la jehya éxi ti chojni tꞌaxrjeníxin itꞌé chjasintajni, la ko jehya éxi ti tjenka̱yáxin chojni chjasintajni. Náhí. Kꞌóna sin xje̱en Díos kixin xi̱kaha tjinkaon Díos.
14A̱ndá ti nkexro a mé kꞌóna éxi ijnko chojni chjasintajni la kjuákꞌenkákjan chꞌan ti jeheni, la kꞌuíkoni ti kjuachaxin ijié chónta chꞌan, kixin jehe chꞌan ti nkoko̱axón Xje̱en Díos, la ko jehe chꞌan imá tjue̱hé chꞌan chojni la ko chaxín ndoá nixja chꞌan.
15Chꞌin Juan mé chrónka kuènté ti nkexro a, la itsen ndáchro chꞌan:
―Ti nkexro i, mé ti kꞌuéndáxrja̱n: “Ti nkexro itsi chrꞌéxi̱n mé a̱ntsí tꞌe̱to̱an ke janhan, kixin jehe chꞌan la ó xráxín itjen chꞌan ti na̱xa̱ kohya janhan.”
16Kaíni ó kꞌuáyéhe̱ni ti kjuachaxin ijié kjuajon chꞌan la ko nkochríxín tjencheñao chꞌan ti jeheni. 17Ti nkehe tsíkꞌe̱to̱an Díos mé tsíkꞌayéhe̱ Moisés kixin tsochronka. A̱ndá Ìnchéni Jesucristo mé kjuako nkexrín tjue̱he Díos ti jeheni la ko ti nkehe chaxín ndoá. 18Ninkexró kꞌuíkonhña nkexrín itjen Díos. A̱ndá ti nkoko̱axón Xje̱en chꞌan nkoko̱a tjenka̱yáxinko chꞌan, mé kjuínchenohe chꞌan ti jeheni nkexrín itjen ti Itꞌé chꞌan.
Chꞌin Juan chrónka kuènté chꞌin Jesús
(Mt. 3:11-12; Mr. 1:7-8; Lc. 3:15-17)
19Ti sin judío kꞌuejó chjasin Jerusalén mé ichrꞌán sin iso ncha̱tꞌá la ko iso ti sin tjako ley, ikui sin kjuanchankíhi sin chꞌin Juan, ndáchro sin:
―¿Nkexro ti jaha?
20Ndá kjuínchemáhña chꞌan, ndoá chrónka chꞌan:
―Janhan la jehya ti Cristo.
21 #
Mal. 4:5;
Dt. 18:15, 18. *Ndá xíkjanchankí sin ínaá, ndáchro sin:
―¿Ndá nkexro ti jaha? ¿Á jaha ti profeta Elías ní?
Ndá chꞌin Juan ndáchro:
―Náhí. Janhan la jehya Elías.
Ndá xíkjanchankí sin ínaá ndáchro sin:
―¿Á jaha ti nkexro tjejóchóheni itsi tsochronka itén Díos ní?
La chꞌin Juan ndáchro:
―Náhí, janhña.
22Ndá kjuanchankí sin ínaá:
―¿Ndá nkexro ti jaha? Ticháxi̱n tso̱noheni kixin tsochenkani ti sin ichrꞌán ti jeheni ikuini. Chro̱nka, ¿nkexro ti jaha?
23 #
Is. 40:3. *Ndá kjuáte̱he chꞌin Juan ndáchro:
―Janhan mé ti nkexro tsjakꞌe nte̱je̱ tsꞌèya tsondáchro: “Takitjéhéra ijnko nti̱a ndoí tsi̱xi̱n Ìnchéni” ―éxi ndáchro ti profeta Isaías.
24A̱ndá ti sin kjuanchankíhi chꞌin Juan tíha, la ti sin fariseo a tsíchrꞌán, 25ndá kjuanchankí sin:
―Ó ndáchrua kixin jahya ti Cristo, la ko jahya ti profeta Elías la ko jahya ti nkexro kꞌuéchronka itén Díos ósé. ¿Ndá nkekuènté tíki̱te chojni ti xi̱kaha?
26Ndá ndáchro chꞌin Juan:
―Janhan mé ìnta̱ ó tíki̱texián chojni. Kjánchó chríkjan ti jahara mé tjenkákjan ijnko nkexro na̱xa̱ tjátso̱anhñara. 27Kjónté sa̱o janhan kꞌuinka la jehe chꞌan ti a̱ntsí tꞌe̱to̱an chꞌan. Méxra̱ hasta tósuàna chrókjuasinta̱nka̱ ti correa to̱ka̱té chꞌan.
28Kaín tíha mé tsíkóhen ti chjasin itꞌin Betania, ti tóhe nda̱río Jordán, ti kjuákꞌe chꞌin Juan kui̱ki̱te chojni.
Ti Kolélo kuènté Díos
29A̱ndá ti ña̱o chrꞌéxi̱n mé kꞌuíkon chꞌin Juan kixin ikui chꞌin Jesús. Ndá nixje̱he̱ chꞌan ti sin tsíkóchjina, ndáchro chꞌan:
―Tsjehéra, tíhi ti Kolélo kuènté Díos, tsakjìin iji̱é kaín chojni chjasintajni. 30Janhan mé kꞌuéxrja̱nka, kixin iton ti janhan mé tsichréhe̱ ijnko nkexro a̱ntsí tꞌe̱to̱an, kixin ti na̱xa̱ kjuakꞌéhya janhan, la jehe chꞌan ó xráxín itjen chꞌan. 31Janhan la na̱xa̱ kꞌuéchoxínhña nkexro ti jehe chꞌan. Kjánchó kꞌuinka kuíki̱texián chojni ìnta̱ kixin ti sin chjasin Israel mé tsochóxin sin nkexro tíha ―ichro chꞌin Juan.
32Kja̱xin ndáchro chꞌan:
―Janhan kꞌuíkua̱n kixin ti Ncha̱kuén Díos kꞌuínkaji̱nxi̱n nka̱jní éxi ijnko kontóá la kjuákꞌekjen va ti jehe chꞌan. 33Janhan kja̱xin na̱xa̱ kꞌuénonahña nkexro tíha. Kjánchó ti nkexro ichrꞌán ti janhan kixin tsíki̱texián chojni ìnta̱, mé chrónka kixin ti tsꞌikuan itsi Ncha̱kuén Díos tsꞌinkajin, tsjakꞌe ti itjen ti nkexro, la tíha mé ti nkexro tsi̱ki̱texín chojni Ncha̱kuén Díos. 34A̱ndá ijie janhan kꞌuíko̱nxinkua̱n kixin xi̱kaha kóhen, méxra̱ ndáxrja̱n kixin tíhi mé Xje̱en Díos.
Ti sin sa̱oxín kjueyá Jesús
35A̱ndá ti ña̱o chrꞌéxi̱n kjuákꞌe chꞌin Juan la ko yaá ti sin kꞌuájiko chꞌan, 36ndá xrína̱hña kꞌuíkon sin kꞌuatsínka chꞌin Jesús chjinaxón ntiha, la ndáchro chꞌin Juan:
―Tsjehéra ti nkexro i mé ti Kolélo kuènté Díos.
37A̱ndá ti ó kuíhin yóí ti sin kꞌuájiko chꞌin Juan xi̱kaha, la sákjuichréhe̱ sin chꞌin Jesús. 38Ndá kuinkátjíá chꞌin Jesús la kꞌuíkon chꞌan kixin tinkáchréhe̱ sin, ndá kjuanchankí chꞌan ndáchro chꞌan:
―¿Xá nkehe tjinkaonra?
Ndá jehe sin ndáchro sin:
―Maestro, ¿xá nke nchia itjen?
39Ndá kjuáte̱he chꞌin Jesús ndáchro:
―Xrákira, tsjehéra nketí.
Ndá chréhe̱ sin sákjuí sin la kꞌuíkon sin nketí itjen ti nchia kjuákꞌe chꞌin Jesús, a̱ndá ti ó kjuíji sin ntiha la ó ndá kójín, éxi las cuatro xi̱kaha, la ntahó kꞌuéjóko sin chꞌan.
40Ijnko ti iyó sin kuíhin ti nkehe tsíchronka chꞌin Juan, ndá chréhe̱ ti chꞌin Jesús, mé itꞌin Andrés, kícho chꞌin Simón Pedro. 41Ndá jehe chꞌan tuénxín sákjuikjeyá chꞌan ti sa̱vé chꞌan Simón, la ndáche chꞌan:
―Ó kꞌuitjani ti nkexro Mesías (mé tíha tꞌaxrjexín Cristo).
42La kjui̱ka̱o chꞌan ti itjen chꞌin Jesús. Ndá chꞌin Jesús mé komá chꞌan ti chꞌin Simón, la ndáchro chꞌan:
―Jaha mé Simón, xje̱en chꞌin Jonás. Ndá ijie si̱ntakꞌian Cefas. (Cefas mé tꞌaxrjexín Pedro.)
Chꞌin Jesús kꞌuéye̱he̱ Felipe la ko Natanael
43A̱ndá ti ña̱o chrꞌéxi̱n mé sáchrokjui chꞌin Jesús Galilea. Ndá xéta chꞌan ti chꞌin Felipe, la ndáche chꞌan:
―Chréhé ti janhan.
44Chjasén chꞌin Felipe mé itꞌin Betsaida, ti chjasén chꞌin Andrés la ko Pedro. 45A̱ndá chꞌin Felipe mé sákjuikjeyá chꞌan ti chꞌin Natanael la chenka chꞌan:
―Ó kꞌuitjani ti nkexro itsi éxi chrónka ti xroon tsíkjin chꞌin Moisés ti nkehe tsíkꞌe̱to̱an Díos, la ko kja̱xin chrónka ti xroon tsíkjin ti sin kꞌuéchronka itén Díos kixin itsi ti nkexro a. Ndá ijie ó kꞌuitjani chꞌan, mé itꞌin chꞌan Jesús, xje̱en chꞌin José, la chjasén chꞌan mé Nazaret.
46Ndá ndáchro chꞌin Natanael:
―¿Xá ti chjasin Nazaret la chrókꞌuaxrjexín ijnko nkehe jína ní?
Ndá kjuáte̱he chꞌin Felipe, ndáchro:
―Xrákiá tsjehé.
47Ndá kꞌuíkon chꞌin Jesús kixin ó tinkákóchjina ti chꞌin Natanael, la ndáchro chꞌan:
―Ó tekjui ijnko nkexro chaxín israelita, la chóntahya ninkehó kjuachꞌia.
48Ndá chꞌin Natanael kjuanchankíhi chꞌin Jesús ndáchro:
―¿Xá nkexrín kixin choxián ti janhan?
Ndá kjuáte̱he chꞌin Jesús, ndáchro:
―Ti na̱xa̱ níxjahya Felipe, la kꞌuíkua̱n ti jaha tjenka̱nkiá ti inta tꞌóna tohigo.
49La ndáchro chꞌin Natanael:
―Maestro, jaha mé ti Xje̱en Díos itjen nkaya nka̱jní; jaha mé ti Rey kuènté Israel.
50Ndá kjuáte̱he chꞌin Jesús, ndáchro:
―¿Á kuítekaoan kixin ndáxrja̱n kixin kꞌuíkua̱n tjenka̱nkiá ti inta tꞌóna tohigo ní? Jehya tíhó chrókuitekákonxian. Chrꞌéxi̱n la tsꞌikuan íso kjuaxroan a̱ntsí ijié.
51 #
Gn. 28:12. *Kja̱xin ndáchro chꞌin Jesús:
―Ijnko nkehe chaxín tso̱xrja̱nka kixin tsꞌikonra tsoxitje̱he̱ nka̱jní la itsi itsjé sin ángel kuènté Díos, tsi̱tꞌótjen la ko tsꞌinkajin sin ti itjen ti Xje̱en Díos kꞌóna chojni.
Currently Selected:
San Juan 1: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.