Apocalipsis 19

Tjejótsje sin nkaya nka̱jní

1Ndá chrꞌéxi̱n kui̱ha̱n itén nchónhña nkexro tjejó nkaya nka̱jní itsen nixja, ndáchro:

¡Kjuasáya! Ti tsaáxini, kaín ti kjuasàya la ko ti kjuachaxin mé kuènté Itꞌéni Díos.

2 # Dt. 32:43; 2Rs. 9:7. *Chaxín ndoá nchekito̱exín chꞌan kaín ijie̱,

kixin jehe chꞌan kjuínchekito̱exín chꞌan iji̱é ti tjan kꞌuékjasiko ijie̱ itsjé chojnindoa,

la kjuachròe tjan kaín ti chojni siín chjasintajni, kjuíchꞌe tjan itsjé nkehe jínahña.

Jehe chꞌan kjuínchekjasóte chꞌan ti tjan a kixin jehe tjan kꞌóñá tjan ti sin kꞌuékjichꞌehe ixra̱ Díos.

3 # Is. 34:10. *La chrꞌéxi̱n ndáchro sin ínaá:

―¡Kjuasáya! Ndá ti ihnchi sítꞌáya tjan la titoéhya chrìin nkochríxín.

4A̱ndá ti veinticuatro ti sin táda la ko ti noó ti nkexro tjejóchón#19:4 noó ti nkexro tjejóchón los cuatro seres vivientes kꞌuejóxin tochꞌin sin hasta nkéhe̱ ikja sin nonte la kjuíkosáyehe sin Díos, ti nkexro tjetja̱xi̱n ti trono, la ndáchro sin:

―¡Mé xi̱kaha tso̱hen! ¡Kjuasáye Díos!

5 # Sal. 115:13. *Ndá kui̱ha̱n íjnko itan kui̱xi̱n ti itjen ti trono ndáchro:

Tjikosayehéra ti Díos kuènténi

kaínra chꞌehéra chꞌan ixra̱

la titekákohénra chꞌan,

ti chojni nte̱to la ko chájan.

Ti kia kuènté ti Kolélo

6 # Ez. 1:24; Sal. 93:1; 97:1; 99:1. *Kja̱xin kui̱ha̱n éxi itén nchónhña chojni o̱ éxi ti ndáchro nchónhña nda̱río o̱ éxi ti itsen tjonta mé ndáchro:

¡Kjuasáya!, kixin Ìnchéni Díos chónta kaín kjuachaxin mé tꞌe̱to̱an.

7Tso̱chéhe̱ni la tsjikosáyeheni Itꞌéni Díos,

kixin ó kjuixraká ti ña̱o tsꞌixin kia kuènté ti Kolélo.

La ti tjan tso̱te̱he chꞌan la ó tsíkóyaxíhin tjan, tjechóhen tjan,

8kixin jehe tjan mé kꞌuáyéhe̱ tjan kjuachaxin tsꞌítsa tjan ti ika lino tjóá na̱jni, tjáki̱ni tsjehe.

Ti ika lino tjóá mé tꞌaxrjexín ti nkexro jína kꞌuejó kuinkáchónki Díos.

9 # Mt. 22:2, 3. *A̱ndá ti ángel mé ndáchro:

―Ikjian tíhi: “Náxrjón chéhe̱ ti nkexro chónta kjuachaxin itsji ti kia kuènté ti Kolélo.”

La ínaá ndáchro:

―Ti itan i mé chaxín itén Díos.

10Ndá janhan kjuakꞌéxian to̱chꞌia̱n to̱té ti ángel kixin chrókjuikosáya̱ha̱, a̱ndá ti ángel ndáchro:

―Náhí. Tjakꞌéxi̱nhña tóchꞌian kixin janhan kja̱xin tꞌa̱ha̱ ixra̱ Díos éxi jaha la ko éxi ti sin kichua titekaon ti itan jína chrónka Jesús. Jehó Díos mé tjikosayéhé.

Ti nkehe kꞌuéchronka Jesús kjua̱ko̱he̱ kaín chojni mé ti nkehe chrónka ti sin profeta.

Ti nkexro tjekjen ti koka̱te̱ tjóá

11 # Ez. 1:1; Sal. 96:13; Is. 11:4. *A̱ndá kꞌuíkua̱n kixin ti nka̱jní mé tjexrankehe̱ la ntiha kui̱xi̱n ijnko koka̱te̱ tjóá la ti nkexro tjekjen ti koka̱te̱ mé itꞌin Jína la ko Chaxín, la ndoá nchekito̱exín iji̱é chojni la ko chaxín jína kjuajo̱nko ti jínahña. 12#Dn. 10:6.*Ti ikon chꞌan mé tjáki̱ni tsjehe éxi xrohi síchrꞌákjen, la ti ikja chꞌan mé chónta itsjé corona la ntiha tjenixín ihni̱é ijnko nkexro ninkexró noehña; jehó chꞌan mé nohe chꞌan nkehe tꞌaxrjexín tíha. 13La tjechrꞌinkáya chꞌan ijnko ika síkjajin ijni̱ la ti ihni̱é chꞌan mé itꞌin Itén Díos. 14A̱ndá ti soldado kuènté nka̱jní la chréhe̱ ti jehe chꞌan. Chrꞌinkáya sin ika lino na̱jni tjóá la tjejókjen sin koka̱te̱ tjóá. 15#Sal. 2:9; Is. 63:3; Jl. 3:13; Ap. 14:20.*A̱ndá ti irꞌua chꞌan mé tꞌaxrjexín ijnko espada imá taté kixin tíha sincheníexín chꞌan kaín nación la ko tsꞌe̱to̱anxín chꞌan ijnko vara tsíkꞌónaxín chika. Jehe chꞌan sinchekito̱exín chꞌan iji̱é sin éxi ti nkexro tꞌenxín ito uva to̱té, xi̱kaha tsꞌe̱to̱an chꞌan tsjasóte sin kixin ti kjuanínkaon kuènté Díos, chónta kaín kjuachaxin. 16Ti iké chꞌan la ko chritaón tochꞌin chꞌan mé tjenixín ijnko nkehe ndáchro:

“Rey kuènté kaín ti sin rey la ko Ìnché kaín chojni.”

17 # Ez. 39:17-20. *A̱ndá chrꞌéxi̱n kꞌuíkua̱n ijnko ángel tjexín to̱té chritaón ti ña̱o mé itsen ndáche ti iko xritjaká nkosiñe nka̱jní:

―Xrákira, tónkotséra ntihi kixin Díos tsjajon nkehe sintera. 18Sintera ti into kuènté sin rey, into kuènté ti sin tꞌe̱tue̱hen sin soldado, into kuènté ti chojni jie̱he, into kuènté koka̱te̱ la ko ti sin tjejókjen koka̱te̱, ti into kuènté kaín chojni tꞌe̱to̱an, into kuènté chojni chꞌexón ixra̱ la ko ti into kuènté chájan la ko chojni nte̱to.

19A̱ndá kꞌuíkua̱n ti iko ijié la ko ti sin rey tꞌe̱to̱an kuenté chjasintajni la ko ti soldado kuènté, mé tsíkónkotsé sin kixin tsjajo̱nko sin ti nkexro tekjen ti koka̱te̱ la ko kaín ti sin soldado kuènté nka̱jní. 20#Ap. 13:1-18.*A̱ndá itsé sin ti iko ijié la ko kja̱xin ti profeta nduáhya kꞌuékjako mé kꞌuékjasixín kjuaxroan nkayakon ti iko ijié. Ti chojni nduáhya kꞌuékjako, mé kjuasin kjuaxroan kjuíchꞌiyexín ti chojni tsíka ti xro̱ye kuènté ti iko ijié la ko kjuíkosáyehe ti nkehe tsíkjano̱ña kuènté. Ndá ti iko ijié la ko ti nkexro nduáhya chrónkaxín itén Díos mé tjejótsjehí sin ichrꞌán Díos ti siín xrohi la ko azufre kixin tsoche sin. 21A̱ndá ti íso sin la kꞌuénxin sin ti espada tꞌaxrjexín irꞌua ti nkexro tekjen ti koka̱te̱ tjóá, la kaín ti iko xritjaká la hasta kjuachahya va kjónie va ti into kuènté ti sin a.

Currently Selected:

Apocalipsis 19: poeNTplus

Highlight

Copy