San Lucas 9
9
Jesús kuetuꞌen xra sincheꞌe ni theyoo kuinchieꞌe
(Mt. 10:5-15; Mr. 6:7-13)
1Jesús baye̱e ni theyoo bakao, ko chjee na̱ juachaxin ixin nchao sengixin na̱ ngain chujni kain espíritu jianꞌa, ko sinchexrueꞌen chujni chunda kexeꞌon chin. 2Ko jeꞌe ruaꞌan na̱ ixin bindache na̱ chujni ixin thi thetuꞌan Ndo Dio, ko sinchexrueꞌen na̱ ni niꞌi. 3Ko ndachro ngain na̱:
—Xruꞌin thjiꞌo ra ixin sundaꞌa ra ngatja nthiꞌá, thjioꞌa ra ntha kutho, thi tamexin ra, niuthja, tumi ko thjioꞌa ra yoo luntho, jeꞌo luntho tengaꞌa ra. 4Ko ngain kexeꞌo nchia saso ra, nthi̱ꞌa̱ dithuꞌa ra kain nchaꞌon tsunchrjaꞌan ra ngain rajna yaa. 5Ja̱ chrujan rajna sinaoꞌa na̱ tsiꞌin na̱ thi jian juajna jaꞌa ra tsjiꞌo ra, sathjixin ra nthi̱ꞌa̱ ko tuntsjenga ra ruthea ra ixin singo jinche jiyaa ruthe, ko mee ruchro ixin bithikaonꞌa ra na̱.
6Kuthimejan sakjui na̱ rajna ko rajna ixin bindache na̱ chujni thi jian juajna ko binchexrueꞌen na̱ chujni teniꞌi.
Guen na̱ Juan, thi banchegithe chujni
(Mt. 14:1-12; Mr. 6:14-29)
7Ko Herodes, thi baketuꞌan nthi̱ꞌa̱ Galilea, are kunuꞌe kain thi jian bancheꞌe Jesús, jeꞌe anto xraon, ko ibenueꞌa keꞌe ruxraxaon ixin kanxion chujni bandachro na̱ ixin jeꞌe Juan, thi banchegithe chujni, uxechon. 8Ikanxion na̱ bandachro na̱ ixin kununxin profeta Elías, ko ikanxion na̱ bandachro na̱ ixin uxechon chrujan ni bagayee juajnee Ndo Dio are usee. 9Aro Herodes ndachro:
—Jaꞌan kuetuꞌan chrijin jaa Juan, thi banchegithe chujni. Mexinxin, ¿kexeꞌe xii jiꞌi ixin chujni thekin na̱ ixin anto jian ncheꞌe xa?
Ko Herodes anto kjuee kexreen rugikon Jesús.
Jesús bajon bine naꞌo no̱ xii
(Mt. 14:13-21; Mr. 6:30-44; Jn. 6:1-14)
10Are ni theyoo kjanxin na̱ thi kjui na̱, kuekin na̱ kain thi bincheꞌe na̱. Kuthimejan Jesús sabikao na̱ ngain thi xruꞌin chujni te, chiaon rajna Betsaida. 11Ko are chujni kunuꞌe na̱ thinoo sakjui Jesús, jeꞌe na̱ ruee na̱. Kuthimejan jeꞌe ndachro ngain na̱ ixin kexreen siketuꞌan Ndo Dio ngain anseen na̱, ko kai binchexrueꞌen kain ni beniꞌi.
12Ko are undakutsukjin, kunchieꞌen thi ni theyoo bakao Jesús ko ndachro na̱ ngain jeꞌe:
—Dindache kain chujni satsji na̱, ixin sikjee na̱ thi sine na̱ ko thi sinchejugaꞌa na̱, ixin nthiꞌi thi te na̱ xruꞌin jii.
13Aro Jesús ndachro ngain na̱:
—Jaꞌa ra dajon ra thi sine na̱.
Jeꞌe na̱ binthendachro na̱:
—Jaꞌan ná xruꞌin chunda ná, jeꞌo naꞌo niuthja ko yoo kuchee, ko ja̱ ruchjaꞌa ná sine kain chujni teꞌi, jaꞌan ná rugunda sikeꞌna ná thi sine na̱.
14Ko nthi̱ꞌa̱ beꞌe inchin naꞌo no̱ xii. Ko Jesús ndachro ngain ni theyoo bakao:
—Ndache ra chujni ruchjeeya na̱ ko siginthe na̱ yoo kan ko the na̱.
15Ko jañaa bincheꞌe ni bakao Jesús, ko kainxin chujni tabinthe na̱. 16Kuthimejan Jesús kuaa thi naꞌo niuthja ko thi yoo kuchee, ko tsjeꞌe ngajni ko binchenchaon niuthja ko kuchee. Kuthimejan kunchjenga ko bajon ngain thi chujni bakao ko jeꞌe na̱ kunchjeyeꞌe na̱ kainxin chujni. 17Ko kain na̱ juine na̱ ko jian kujeꞌe na̱. Ko thi xexin juine na̱ xra binchekaon na̱ theyoo nthaxra.
Pedro ndachro ixin Jesús thi Cristo
(Mt. 16:13-19; Mr. 8:27-29)
18Naa nchaꞌon Jesús bachrjenda ixin nichjee Ndo Dio, ko are juexin nichjee ndo banchiangi ngain chujni bakao ko ndachro:
—¿Keꞌe ndachro chujni ixin kensen na jaꞌan?
19Jeꞌe na̱ ndachro na̱:
—Kanxion na̱ ndachro na̱ ixin suixin Juan, thi banchegithe chujni, ko ikanxion na̱ ndachro na̱ ixin suixin Elías; ko ikanxion na̱ ndachro na̱ ixin suixin naa thi bagayee juajnee Ndo Dio, ko beꞌe are usee.
20Kuthimejan Jesús banchiangi ko ndachro:
—Ko jaꞌa ra, ¿keꞌe ndachro ra ixin kensen na jaꞌan?
Ko Pedro ndachro ngain Jesús:
—Suixin thi Cristo, thi juixin ngain Ndo Dio.
Jesús ndachro ixin jeꞌe ndaseꞌen
(Mt. 16:20-28; Mr. 8:30—9:1)
21Ko Jesús kuetuꞌen na̱ ixin xruꞌin chujni rundache na̱ ixin kensen jeꞌe. 22Ko kai ndachro:
—Jaꞌan, thi Xii juixin ngajni, rugunda tangi tsunna, ko kain xi thetuꞌan ngain niꞌngo, ko kain xi daana thetuꞌan ngain icha xi daana ko kain xi tjaago ley runingakunna xa ko nasuenxon na na̱, aro ngain nchaꞌon ninxin jaꞌan ruxechon na.
23Kuthimejan jeꞌe ndachro ngain kain chujni te nthi̱ꞌa̱:
—Ja̱ chrujan thi rinao rurueꞌe na, rugunda rutjañeꞌe kain thi jixraxaon sincheꞌe, maski anto tangi tsuꞌen ko ja̱ rugunda seꞌen, ruxrajon seꞌen, ko rurueꞌe na. 24Ixin thi rinao xruꞌin tsuꞌen, chujni jiꞌi icha daka ndasitjaan. Aro thi ruxrajon tangi tsuꞌen ko ruxrajon seꞌen ixin tjaago thi jaꞌan nthaꞌa, chujni mee rukjan inaa chujni narua ko xruꞌin nchaꞌon seꞌen. 25Ixin xruꞌin xree ja̱ naa chujni sacha kainxin thi jii ngain nunthe jiꞌi ko ndasinchetjaan almee. 26Ko ja̱ chrujan chujni tusuee runichja ixin jaꞌan ko ixin thi jian juajnana, kai jaꞌan, thi Xii juixin ngajni, tsusuaꞌna ixin chujni mee are siꞌi kunixin juachaxiin Ndudana ko kain angeel ndo jii nthi̱ꞌa̱ ngajni. 27Ndua thi rindathjo ra, ixin thuꞌa ra xro te ra nthiꞌi jai, xra senꞌa ra sikunja ra thi thetuꞌan Ndo Dio.
Bikon na̱ Jesús anto ujee
(Mt. 17:1-8; Mr. 9:2-8)
28Batho inchin jni nchaꞌon, kuthimejan Jesús kuani naa jna ixin nichjee Ndo Dio, ko bikao Pedro, Jacobo ko Juan. 29Ko are Jesús jinichjee Ndo Dio, ngakon ndabituxiꞌin ko lunthue kurua luntho xraa thee nchaꞌon. 30Kuthimejan kununxin yoo xii jitjao Jesús, ko xii mee, Moisés ko Elías. 31Ko nguixin ngandajin na̱ chrjuin jidingasaan, ko tetjao na̱ ixin kexreen seꞌen Jesús, ko jiꞌi rukuꞌen nthi̱ꞌa̱ Jerusalén. 32Ko Pedro ko thi iyoo ni beꞌe ngain anto chjee na̱ kuthachrin, aro tabinthetsjeꞌe na̱ ko bikon na̱ thi chrjuin jidakima ngandajin Jesús ko kai bikon na̱ thi yoo xii juii ngain jeꞌe. 33Are kayui xii teꞌi takunkjínxin ngain Jesús, Pedro ndachro ngain Jesús:
—Suixin ke tjaago, ¡atho nchao ixin jaꞌan ná te ná nthiꞌi! Sinthachjian ná nii nchiachjan, naa ixin suixin, inaa ixin Moisés ko inaa nchiachjan ixin Elías.
Aro Pedro benueꞌa keꞌe jindachro. 34Ko Pedro xra jañaa jinichja are juii naa thjui ngain na̱ ko ndabithuꞌe na̱ ngakjan thjui. Ko anto binthexraon na̱ ixin bithuꞌe na̱ ngakjan thjui. 35Kuthimejan ngakjan thjui mee kuinxin ni naa tha ko ndachro:
—Jiꞌi thi Xanꞌna, xan anto thjuaa. Dithikaon ra thi rundathjo ra xan.
36Ko are ujuexin nichja tha mee, jeꞌo Jesús bithuꞌe nthi̱ꞌa̱. Aro kanio ni tatetsjeꞌe, ko jeꞌo kainxion nchaꞌon kuexiꞌin na̱ ixin xruꞌin chujni kuekiin na̱ thi bikon na̱.
Jesús binchexrueꞌen xan xii bechunda espíritu jianꞌa
(Mt. 17:14-21; Mr. 9:14-29)
37Nduexin are banianxin na̱ ngain jna mee, anto tsjé chujni bigetanxin na̱ ngatja nthiꞌá. 38Ko ngayee kain chujni mee, naa thi xii nichja seen ko ndachro ngain Jesús:
—Suixin ke tjaago, nthatsaꞌan ñao, thjengijna xanꞌna ixin jeꞌo xan jiꞌi richunda 39ixin naa espíritu jianꞌa tse xan ko nchekuyao xan, ko tadetsinga xan xraa ndadeꞌen xan ko tuxro thixin ruꞌa xan. Ko anto nchegetan xan tangi ko tanchrjandaꞌa xan. 40Jaꞌan ubinthatsaan ñao chujnia chrjiꞌo ixin rugantsjeꞌe na̱ xan espíritu jianꞌa chunda xan, aro chroꞌa bantsjeꞌe na̱.
41Jesús ndachro:
—¡Jaꞌa ra xro thinxinꞌa ra ko chunthiaꞌa ra! ¿Xra kensa rugunda sariꞌi ko xra tsixinna ngajin ra? ¡Sikuꞌna xaꞌan nthiꞌi!
42Ko are xan xii mee jitunchieꞌen xan ngain Jesús, espíritu jianꞌa banka xan suji ngataꞌa nunthe, aro Jesús binchesatheꞌe espíritu jianꞌa ko binchexrueꞌen xan xii mee, ko jeꞌe bajon xan ngain ndudee xan. 43Ko kainxin chujni te nthi̱ꞌa̱ kuiseꞌen na̱ ixin bikon na̱ thi jié juachaxiin Ndo Dio.
Jesús ndachro inaa ixin seꞌen
(Mt. 17:22-23; Mr. 9:30-32)
Ko are chujni xra texraxaon na̱ thi jian bincheꞌe Jesús, jeꞌe ndachro ngain thi chujni bakao:
44—Thiꞌin ra jian thi jaꞌan rundathjo ra ixin jaꞌan, thi Xii juixin ngajni, chujni sajon na ngain raa chujni ningakunna.
45Aro chujni bakao kuinxinꞌa na̱ thi ndachro jeꞌe, ixin xra xruꞌin juachaxin bechunda na̱ ixin rukinxin na̱. Ko xraunka na̱ ruganchiangiꞌi na̱ Jesús ixin keꞌe ruchro thi ndachro jeꞌe.
Kensen thi icha renthe
(Mt. 18:1-5; Mr. 9:33-37)
46Kuthimejan thi chujni bakao Jesús, kuexiꞌin kjuao choo na̱ ixin kensen thi icha renthe, 47aro Jesús bechunxin juaxraxauen na̱ ko ubenuꞌe keꞌe tendache choo na̱. Kuthimejan jeꞌe kjuua naa xan nchinchjan ko bakeꞌe xan ngaka jeꞌe, 48Ko ndachro ngain na̱:
—Thi chujni sayée naa xan nchinchjan ixin dithikaon na jaꞌan, kai sayéꞌna jaꞌan, ko chujni sayéꞌna na̱ jaꞌan kai sayée thi ruaꞌan na jaꞌan. Ixin thi icha rentheꞌa ngayaꞌa ra yaa thi rukjan icha renthe ngathexin kon Ndo Dio.
Thi chujni ningakuanꞌa ná, chujni mee jii ngajin ná
(Mr. 9:38-40)
49Kuthimejan Juan ndachro ngain Jesús:
—Suixin ke tjaago, jaꞌan ná bikon ná naa thi jidengi espíritu jianꞌa kunixin juachaxian; ko jaꞌan ná ndathjan ná ixin isincheꞌa jamee, ixin jeꞌe chrjiꞌa ngajin ná.
50Aro Jesús ndachro:
—Kayakuenꞌa ra chujni mee ixin thi chujni ningakuanꞌa ná, chujni mee jii ngajin ná.
Jesús binchesatheꞌe Jacobo ko Juan
51Are ubikunchiaon nchaꞌon ixin Jesús sarukajiin ngajni, jeꞌe ndachro ngathe anseen ixin tsji rajna Jerusalén. 52Jeꞌe ruaꞌan kanxion chujni ixin bitaon na̱ nthiꞌá ko bikao na̱ juajnee, ko chujni mee kjui na̱ ngain naa rajnee nuntheꞌe Samaria ixin bikjee na̱ naa nchia thi rugithuꞌe na̱ jeꞌe na̱ kunixin Jesús. 53Aro chujni samaritano chroꞌa na̱ bayée na na̱ nthi̱ꞌa̱ ixin kunuꞌe na̱ ixin Jesús ko chujnii satethji na̱ Jerusalén. 54Are Jacobo ko Juan kunuꞌe na̱ ixin ni samaritano chroꞌa na̱ bayée na na̱, jeꞌe na̱ ndachro na̱ ngain Jesús:
—¿Arinao suixin ixin jaꞌan ná tsetuꞌan ná ruxinkajinxin ngajni xruꞌi ixin suen kain chujni yaa, inchin bincheꞌe profeta Elías?
55Kuthimejan Jesús ngaria tsjeꞌe na̱ ko binchesatheꞌe na̱ ko ndachro:
—Jaꞌa ra nuaꞌa ra keꞌe espíritu chunda ra. 56Ixin jaꞌan, thi Xii juixin ngajni, juiꞌa ixin nasuenxon chujni, juiꞌi ixin sinthakjan na̱ inaa chujni narua.
Kuthimejan sakjui na̱ ngain inaa rajna.
Thi chujni binao rugakao Jesús
(Mt. 8:19-22)
57Are tethji na̱ ngatja nthiꞌá, naa xii ndachro ngain Jesús:
—Jaꞌan rinaꞌo tsji kain rajna suixin sekji.
58Jesús ndachro ngain thi xii mee:
—Kain kuntha chunda ba thjaue ba dixiꞌin ba, ko kain kunthua chunda ba kakee ba, aro jaꞌan, thi Xii juixin ngajni, chundaꞌa thinoo tsenkjon jana.
59Jesús ndachro ngain inaa thi xii:
—Jaꞌa rueꞌna.
Aro thi xii mee ndachro:
—Nthatsaꞌan ñao, chunna saꞌo ndasenja ndudana ixin jaꞌan thi tsjabaa ndo.
60Jesús ndachro:
—Tanchrjanda thi chujni dithikaonꞌa na̱, ni yaa tsjabaa choo na̱, aro jaꞌa thji ko dindache chujni ixin Ndo Dio usiketuꞌan ngain anseen na̱.
61Kuthimejan inaa thi xii ndachro ngain Jesús:
—Jaꞌan rinaꞌo satsji na, aro chunna tsji sinthanua ni nchiania.
62Aro Jesús ndachro:
—Thi jitse niꞌnge, kuthimejan jichuntaunxin ton, chujni mee xruꞌin xree ngain thi thetuꞌan Ndo Dio.
Currently Selected:
San Lucas 9: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
