Hebreos 2

Sayakuꞌen ni thi ukjan ni inaa chujni narua

1Mexinxin jaꞌan ná icha rugunda tsinxin ná ko rutsjeꞌe ná jian ngain juajna ukuiꞌin ná ixin jañaa sachrjendeꞌa ná thi nthiꞌá jian. 2Thi juajna Ndo Dio kuetuꞌen ángel ixin bajon ngain ni xrachrjeꞌan ná are saꞌo, juajna mee suji kjui juajna. Ko thi chujni bincheꞌa inchin kuetuꞌan juajna mee, gueꞌen na̱ jie̱ inchin bikininxin. 3Mexinxin jaꞌan ná, ¿kexreen satsingeꞌe ná jie̱, ja̱ dithikaonꞌa ná juajna nthakjan ná inaa chujni narua? Ixin Nchaa ná Jesús thi saꞌo bindachro thi jian juajna nthakjan ná inaa chujni narua, kuthejan ni kuiꞌin ngain Jesús, ni mee kjuaago na̱ ixin jaan, ndua. 4Ko Ndo Dio xrakjuaago ixin juajna jiꞌi, jaan, ndua ixin tsjé thi xranaꞌa dikunxin ni bincheꞌe ndo, ko binchexingameꞌe ndo ni niꞌi ko icha thi bakisenxin chujni. Ko kai ruaan ná ndo Espíritu Santo, thi chjaa ná jejee juachaxin inchin jeꞌe ndo juinao ndo.

Jesucristo thi nthakjan ná inaa chujni narua

5Ndo Dio, xruꞌin ángel binchegayée ndo juachaxin ixin tsetuꞌan ngain thi nunthe tsii, thi nunthe jaꞌan ná tenichja ná. 6Ko inchin chro ngain Xruen Ndo Dio:

¿Keꞌe renthe chujni, ixin Suixin dixraxaon ixin jeꞌe na̱?

O, ¿unda Suixin anto ta juachjaon ixin chujni ngataꞌa nunthe nthiꞌi?

7Ko tsjéꞌa nchaꞌon, Suixin chjeꞌe icha tsjéꞌa juachaxin ke kain ángel,

aro kuthimejan chjeꞌe jié juachaxin ko binchesayeꞌe,

ko chjeꞌe juachaxin thetuꞌen kain thi Suixin binchechjian.

8Ko Suixin chjeꞌe juachaxin tsetuꞌen kain.

Ja̱ Ndo Dio bajon juachaxin tsetuꞌan kain, mee ruchro ixin xruꞌin kensen rundachro ixin sithikaonꞌa ngain. Aro maski jamee, xradikon ni ixin kain thi binchechjian ndo, xradithikaonꞌa ngain. 9Aro jaꞌan ná chunxin ná Jesús, thi kanxion nchaꞌon tsjéꞌa juachaxin binchegayee Ndo Dio ke kain ángel. Ko Ndo Dio ixin anto thjuaa ná ndo bajon ndo Jesús beꞌen ixin kainxin ná. Ko jai chjee ndo jié juachaxin ko binchesayeꞌe ndo ixin tangi bathuꞌe ko beꞌen.

10Kainxin thi juinchechjian Ndo Dio jii ixin jañaa juinao ndo; ko jeꞌe ndo rinao ndo ixin kainxin ni ukjan chujnii ndo sinthe na̱ nthi̱ꞌa̱, thi thetuꞌan ndo. Ko ixin nchao rukuꞌen jiꞌi, Ndo Dio binchegato Xeꞌen ndo tangi ko beꞌen xan, ko jañaa kjuaguxin xan ixin anto jian xan ko nchao kjuengijna ná xan kjan ná inaa chujni narua. 11Ixin kain ná xro kjan ná chujni jian, ko thi binthakjan ná chujni jian, nakua Ndudaa ná chunda ná. Mexinxin Jesucristo, Xeꞌen Ndo Dio, tusueꞌa xan ndachro xan ixin jaꞌan ná xan choo xan. 12Inchin ndachro ngain Xruen Ndo Dio:

Jaꞌan runichja ixin Suixin ngain xan chian,

ko rutsjethaꞌa ngayee ni xrathe ngain niꞌngo.

13Ko kai ndachro ngain Xruen Ndo Dio:

Jaꞌan ruchunthia ngain ndo.

Ko kai ndachro:

Jaꞌan riꞌi nthiꞌi, ngain kain chjan ke Ndo Dio chjana.

14Ko chjan teꞌi, chujni chunda nthao ko jni. Mexinxin Jesús kai kjui chujni chunda nthao ko jni, ko jañaa beꞌen ixin binchexanthe juachaxiin thi duen chujni, ko mee nchiijin. 15Ko jañaa Jesús bantsjeꞌe juaxraon kain chujni anto xraon ixin ndaseꞌen na̱, ko ixin didoꞌo anseen na̱ juaxraon ixin seꞌen na̱, te na̱ inchin ni nchexree juaxraon ixin kainxin nchaꞌon xraon na̱ ko jañaa techon na̱. 16Ko ndua Jesús juiꞌa ixin bikjengijna kain ángel, jeꞌe juii ixin bikjengijna kain ni chujnii Abraham. 17Mexinxin Jesús kjan inchin kain xan choo, ko jañaa jeꞌe bigeꞌe thi daana thetuꞌen icha xi daana, ko jeꞌe thiakunueꞌe chujni ko nchao ruchunthia ná ngain jeꞌe, ko jeꞌe ncheꞌe xree Ndo Dio. Ko are jeꞌe beꞌen, kjuenga ꞌna ko bindatjañaa ná kain thi jianꞌa binthoꞌo ná. 18Ko ixin jeꞌe tangi kuꞌen ko bitaꞌa ixin runcheꞌe thi jianꞌa ngain nunthe jiꞌi, mexinxin jai Jesús thjengijna kain chujni ditaꞌa sincheꞌe thi jianꞌa.

Currently Selected:

Hebreos 2: plsNT

Highlight

Copy

Compare