Hebreos 10

1Thi ley bayée Moisés kjui jeꞌo inchin naa sauen thi chrjuin tsii aro xra xraguꞌa jian kexreen sinthe kain mee. Mexinxin maski chujni bakunchieꞌen na̱ ngain Ndo Dio ixin tsjé kuxiigo baguen na̱ ko banchendusen na̱, aro ley jiꞌi chroꞌa banchejian anseen chujni, maski nano ko nano xrajeꞌo bagajon na̱. 2Ko ja̱ nduaxin ley jiꞌi nchao runchejian anseen na̱, kain thi bagajon na̱ ngain Ndo Dio, irugajonꞌa na̱ nanao ixin are bagajon na̱ kain mee ixin bakuruaxin na̱ kain thi jianꞌa bincheꞌe na̱, jeꞌe na̱ ijianꞌa rukunueꞌa na̱ ngathe anseen na̱ ixin thi jianꞌa bincheꞌe na̱. 3Aro thi bakuꞌen are banchendusen na̱ kain thi bagajon na̱ nano ko nano, jeꞌo banchexraxaon na̱ kain thi jianꞌa bincheꞌe na̱, 4ixin jnii kuxinthaa ko jnii kuchibatuchjan chroꞌa ruxengaxin ꞌna kain thi jianꞌa ncheꞌe chujni.

5Mexinxin are Jesucristo juii ngataꞌa nunthe jiꞌi, jeꞌe ndachro ngain Ndo Dio:

Suixin irinaoꞌa thi nthauꞌe kuxiigo ko kain thi banchendusen chujni,

mexinxin Suixin binchechjian nthauꞌna.

6Suixin banthaxruxianꞌa nthauꞌe kuxiigo che ngataꞌa xruꞌi ko thi nchendusen chujni ixin Suixin sinchetjañenxin na̱ thi jianꞌa ncheꞌe na̱.

7Mexinxin jaꞌan ndachrjan: “Nthiꞌi riꞌi jaꞌan ixin sinthaꞌa inchin Suixin rinao,

jañaa inchin jitaxin ngain Xruen Moisés ixin jaꞌan.”

8Cristo saꞌo ndachro ixin Ndo Dio binchexruxinꞌa kain thi bagajon chujni, inchin kuxiigo bagajon chujni, kai binchexruxinꞌa nthauꞌe kuxiigo bakjaaga chujni ngain Ndo Dio, ixin banchetjañenxin ndo na̱ thi jianꞌa ncheꞌe na̱, maski ley bayée Moisés baketuꞌan ixin rugajon na̱. 9Kuthimejan Cristo ndachro: “Nthiꞌi riꞌi jaꞌan ixin sinthaꞌa thi Suixin rinao.” Ko jiꞌi ruchro ixin jeꞌe juii ixin binthjian kain thi bagajon chujni, ko jeꞌe bajon inaa thi icha jian. 10Ndo Dio ubinthajian ná ndo ixin Jesucristo bincheꞌe inchin rinao Ndo Dio, ko jiꞌi kuꞌen are Jesucristo xrajon beꞌen ngain ndo. Ko jeꞌe bincheꞌe jiꞌi nakua nthiꞌa ko irugundaꞌa sincheꞌe inaa.

11Kain xi daana judío bancheꞌe xa xree xa nchaꞌon ko nchaꞌon, ko tsjé nthiꞌa xrajeꞌo bagajon xa ngain Ndo Dio, maski kain mee chroꞌa kjuenga ꞌna kain thi jianꞌa bincheꞌe chujni. 12Aro Jesucristo nakua nthiꞌa binchendusen thi bajon ngain Ndo Dio ixin bithjañexin chujni kain thi jianꞌa bancheꞌe na̱ ko ixruꞌin nchaꞌon rugunda sajon inaa. Kuthimejan Jesucristo sabigeꞌe ngain rajianxiin Ndo Dio. 13Ko nthi̱ꞌa̱ jichuꞌen Jesucristo sithjaja thi nchaꞌon ixin Ndo Dio sinchegacha jeꞌe ngain kain thi ningakuꞌen. 14Ko ixin thi nakuaxinxon nthiꞌa jeꞌe xrajon beꞌen ngain Ndo Dio, jeꞌe binchejian kain chujni kainxin nchaꞌon, ni tekininxin seꞌe ngain ndo. 15Ko Espíritu Santo ndathjo ná jian kain jiꞌi. Saꞌo ndachro:

16Jaꞌin seꞌe thi rukjan tsjauthexin inaa ngain chujni sinthe ngain nchaꞌon tsii:

Sakee thi thetuꞌan jaꞌan ngain anseen na̱,

ko thi jaꞌan thetuꞌan ndasithuꞌe ngain juaxraxauen na̱.

17Kuthimejan ndachro:

Ixruꞌin nchaꞌon jaꞌan ruxraxaꞌon kain thi jianꞌa jeꞌe na̱ ncheꞌe na̱.

Jañaa chro Nchaa ná.

18Mexinxin are kain thi jianꞌa ubitjañeꞌe na̱, irugundaꞌa sajon na̱ icha ngain Ndo Dio ixin sitjañenxin na̱ thi jianꞌa bincheꞌe na̱.

Rugunda tsunchieꞌen ná ngain Ndo Dio

19Mexinxin jaꞌa ra xro choo ná, jai xruꞌin kensen rukayakuan ná ko nchao suxiꞌin ná ngaxiꞌin thi Lugar Santísimo nthi̱ꞌa̱ ngajni ixin Jesucristo ukuinthji jnii ixin jaꞌan ná. 20Are Jesucristo bajon nthauꞌe ixin ndabeꞌen, mee ruchro ixin thi manta beree ngain Lugar Santísimo xiree ixin jaꞌan ná nchao satho ná ko suxiꞌin ná thi nthiꞌá narua thi nthakjan ná inaa chujni narua ko xruꞌin nchaꞌon tsjexin. 21Ko Jesús, thi daana icha renthe, thi thjengijna ná nthi̱ꞌa̱ thi thjen Ndo Dio. 22Mexinxin jaꞌan ná rugunda tsunchieꞌen ná ngain Ndo Dio kunixin ansean ná jian ko tsjaago ná ixin chunthia ná jian ngain ndo. Ixin Jesucristo ubincherua ansean ná ko jaꞌan ná tsunua ná jian ixin ixruꞌin teka ná ixin kain thi jianꞌa binthoꞌo ná, ko Ndo Dio xraa ubincherua nthauꞌa ná mexinxin nchao tsunchieꞌen ná ngain ndo. 23Ko jaꞌan ná sinthoꞌo ná ixin tsinthueꞌa ná thi chunthia ná ngain Ndo Dio ko xruꞌin nchaꞌon sasingixin ná thi duthikaon ná ixin Ndo Dio, jaan, dajon ndo thi jeꞌe ndo ndachro ndo. 24Ko rutsjeꞌe ná kexreen sinthoꞌo ná ixin tsjengijna choo ná ixin ruthjueꞌe choo ná ko ixin sinthoꞌo ná thi jian. 25Ko tsinthueꞌa ná thi ruxrathe ná ixin jii chujni kuinthuꞌe na̱ thi xrathe na̱ ixin inchesayeꞌa na̱ Ndo Dio. Icha jian jaꞌan ná nthusuji ná na̱ ixin ruxrathe na̱, ko icha jai ixin ujitunchiaon thi nchaꞌon are Jesucristo tsii inaa.

26Ixin ja̱ jaꞌan ná xra sinao ná sinthoꞌo ná thi jianꞌa, ko jaꞌan ná ubatsuan ná thi ndua, ixruꞌin thi renthe seꞌe ixin sinthundusen ná ngain Ndo Dio ixin sinthatjañaa ná ndo thi jianꞌa nthoꞌo ná. 27Ko ja̱ jamee sinthoꞌo ná, jeꞌo sithua ná ruchuꞌen ná thi anto suji jie̱ suan ná ko thi xruꞌi jiche ixin ruchexin kain thi ningakuꞌen Ndo Dio. 28Are chrujan chujni bincheꞌa inchin kuetuꞌan ley bayée Moisés ko beꞌe yoo o nii chujni kjuangi ixin ndua bincheꞌa inchin kuetuꞌan ley mee, chujni mee duꞌen jie̱ ko xruꞌin kensen thiakunuꞌe ko naduenxon na̱. 29Anchee xraxaon ra, ¡kexreen icha suji jie̱ suꞌen chujni ningakuꞌen ko xraxaon ixin xruꞌin renthe jni kuingo Xeꞌen Ndo Dio, ko xra chrjuinꞌa nichja na̱ ixin Espiritue Ndo Dio, thi Espíritu Santo thjueꞌe na̱! Ko jeꞌe jnii Cristo, thi dijexin thi narua kjuauthexin ndo, ko jiꞌi thi nchao runchejian chujni teꞌi. 30Jaꞌan ná nua ná ixin Nchaa ná Dio ndachro: “Jaꞌan thi sinthaꞌa jie̱ ngain chujni ncheꞌe jianꞌa ko jaꞌan thi tsjengaa na̱ ꞌna inchin tekininxin na̱.” Ko kai ndachro: “Ixin Nchaa ná Dio sincheꞌe jie̱ ni chujnii.” 31¡Anto tangi tsuꞌen chujni setsingaa raa Ndo Dio, ndo jichon!

32Aro xraxaon ra ixin are nakuexinxion ra bithikaon ra Jesucristo, ko are kuexiꞌin bingasañeꞌe juaxraxauan ra, are mee jaꞌa ra kuixiꞌan ra bathueꞌe ra thi anto tangi. 33Are mee kanxion ra chrjuinꞌa ndathjo ra na̱ ko chrjuinꞌa bincheꞌe na̱ ngajin ra ngathexin kon icha chujni. Ko ikanxion ra kai tangi kunuꞌa ra ko xrakeꞌe ra ni betan tangi kai. 34Ko kai kuiakunueꞌe ra chujnii Jesucristo, ni biaxiꞌin ngain nduꞌa xiiso, ko kai are bantsjaꞌa ra na̱ thi binthechunda ra, jaꞌa ra chaꞌa ra ixin unuꞌa ra ixin nthi̱ꞌa̱ ngajni chunda ra thi icha jian ke thi jii nthiꞌi ngataꞌa nunthe, ko thi jii nthi̱ꞌa̱ ngajni tsunchrjeꞌen kainxin nchaꞌon. 35Mexinxin thinthueꞌa ra thi chunthia ra ngain Ndo Dio ixin yaa thi tsiaꞌo naa thi chrjuin tekininxin ra sayéꞌe ra. 36Ko kai rugunda tsixiꞌan ra ko sinthe ra suji ixin sincheꞌe ra inchin rinao Ndo Dio ko ixin sayéꞌe ra thi ndachro ndo ixin sajon ndo. 37Ixin ngain Xruen Ndo Dio ndachro:

Uchiaon ko utuin,

tsii jeꞌe thi jikininxin tsii, ko itsunchrjenꞌa.

38Aro thi chujni jaꞌan rundachrjan ixin jeꞌe jian, chujni mee sechon na̱ ixin chunthia na na̱ jaꞌan,

aro ja̱ jeꞌe na̱ isithikaonꞌa na na̱ jaꞌan, jaꞌan tsuñaꞌo ngain na̱.

39Aro jaꞌan ná jeꞌa xraa chujni thinthuꞌe thi bithikaon ko sitjaan, thi icha chrjuin ixin jaꞌan ná thi chujni chunthia kain nchaꞌon ko jañaa jichjian thi techunxin ná ixin kjan ná inaa chujni narua.

Currently Selected:

Hebreos 10: plsNT

Highlight

Copy

Compare