2 Tesalonicenses 3
3
Nchetseꞌen ra ñao Ndo Dio ixin kain chujni tsiꞌin na̱ thi jian juajna
1Ko xra rundathjo ra jaꞌa ra xan chian ixin dithikaon ra Jesucristo, nchetseꞌen ra ñao Ndo Dio ixin jaꞌan ná nchao tsjiꞌan ná juajnee Nchaa ná nguixin nunthe, ko chujni sayée na̱ ko sithikaon na̱ juajna, jañaa inchin bithikaon ra jaꞌa ra. 2Kai nchetseꞌen ra ñao ndo ixin xruꞌin sinchena ná chujni ndakuaꞌa ko jianꞌa ncheꞌe ixin kainxinꞌa chujni chunthia thi jian juajna. 3Aro Nchaa ná Jesucristo ncheꞌe thi ndachro ko sinthasuji ra ixin icha sithikaon ra ko tsjengijna ra ixin thi jianꞌa xruꞌin sinthaꞌa ra. 4Ko chunthia ná jian ngain Nchaa ná Jesucristo ixin jaꞌa ra, jaan, tencheꞌe ra ko xra sincheꞌe ra kain thi jaꞌan ná kuethuꞌan ra. 5Ko Nchaa ná tsjengijna ra ruthjueꞌe ra kain chujni inchin Ndo Dio thjuaa ná. Ko tsixiꞌan ra kainxin thi tangi inchin Nchaa ná Jesucristo kuexiꞌin.
Kain chujni rugunda sincheꞌe na̱ xra
6Jaꞌa ra xro dithikaon ra, jaꞌan ná thetuꞌan ra kunixin juachjaxin chjana ná Nchaa ná Jesucristo ixin tatoꞌa ra xan choo ná ncheꞌa xra ko dithikaonꞌa xan thi kjuaguꞌa ra. 7Ko jaꞌa ra unuꞌa ra kexreen sincheꞌe ra, rugunda sincheꞌe ra inchin jaꞌan ná nthaꞌa ná. Jaꞌa ra bikonꞌa ra juaseꞌe ngajin ná are binthe ná ngajin ra. 8Ko banekuaꞌa ná niuthjee inaa chujni ixin jaꞌan ná nchaꞌon ko thie suji banthaꞌa ná xra bagachaxin ná niuthja, ko jañaa rukunuaꞌa ra tangi ixin ruchjana ni ra thi rugundana ná. 9Ixin jaꞌan ná jikininxin ná rukjengijna ni ra aro jaꞌan ná binthaꞌa ná xra, ixin jañaa rukangi ra ko runcheꞌe ra inchin jaꞌan ná. 10Ixin are jaꞌan ná binthe ná ngajin ra, kuetuꞌan ra jiꞌi: thi rinaoꞌa sincheꞌe xra, kai sineꞌa. 11Ko jai jaꞌan ná kuian ná ixin ngayaꞌa ra jii chujni dithikaonꞌa thi kuangi ra, ko xruꞌin xra ncheꞌe na̱ ko dixinthe na̱ thi ndusenꞌa na̱. 12Ko kain chujni teꞌi, thetuan ná na̱ ko nthatsaan ná ñao na̱ kunixin juachaxiin Nchaa ná Jesucristo ixin rugunda sincheꞌe na̱ xra ixin jañaa sacha na̱ thi sine na̱.
13Ko jaꞌa ra, xro dithikaon ra, kain nchaꞌon ncheꞌe ra thi jian ko tunchrjenꞌa ra. 14Ko are chrujan ni sithikaonꞌa thi ritjaguꞌa ra ngain xroon jiꞌi, tjaago ra kexeꞌe ni mee ko tatoꞌa ra na̱ ixin jañaa tsusuee na̱. 15Aro ningakuenꞌa ra na̱, icha jian nichjeꞌe ra na̱ ixin sasingixin na̱, ixin dithikaon na̱ Jesucristo kai.
Pablo juexin kji̱n xroon ko ruaꞌan juajna
16Nchaa ná Jesucristo, thi dajon thi chrjuin tunuꞌe anseen ni, kain nchaꞌon ruchjaa ra thi chrjuin tsunuꞌe ansean ra ko seꞌe ndo ngajin ra kain nchaꞌon.
17Jaꞌan Pablo na, ruaꞌan juajna jiꞌi ko kji̱n na xroon kunixin rana ixin jañaa tsunuꞌa ra ixin jaꞌan kji̱n na. 18Ko Nchaa ná Jesucristo sinthanchaon ra kainxin ra. Jañaa tsuꞌen.
Currently Selected:
2 Tesalonicenses 3: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
