2 Corintios 2

1Mexinxin jaꞌan ibasutsjaꞌa ra, ja̱ jeꞌo juachjaon ruchjaꞌa ra. 2Ixin ja̱ ruchjaꞌa ra juachjaon ¿Kensen sincheꞌe ixin ruchaꞌna jaꞌan? Xruꞌin inaa chujni, jeꞌo jaꞌa ra chananxin. 3Mexinxin jaꞌan kji̱ꞌan ra ixin binaoꞌa rugaso ixin jeꞌo rugarichiꞌin ixin chujni chananxin, ko jaꞌan chunthia jian ixin thi chaꞌa ra jaꞌa ra, kai jaꞌan chananxin. 4Are jaꞌan kji̱ꞌan ra, ko anto juachjaon barichunda ko tsjanga. Aro kji̱nꞌa ra ixin sinthechiꞌin ra, jeꞌo ixin tsunuꞌa ra ixin anto thjuaꞌa ra.

Pablo nchetjañeꞌe chujni banchegetan tangi

5Jaꞌan rinaoꞌa sinthangi thi kuꞌen jiꞌi aro ja̱ chrujan chujni bincheꞌe jianꞌa ko jidajon juachjaon, chujni mee jeoꞌa jaꞌan jichjana juachjaon, kai jaꞌa ra jichjaa ra juachjaon. 6Aro jie̱ bincheꞌe ra ngain chujni mee kunixin jeꞌo yaa, incheꞌa ra icha jie̱ ngain. 7Jai icha nchao nchetjañeꞌe ra chujni mee, ko dantsjeꞌe ra juachjaon ngain anseen ixin ja̱ naꞌi, jeꞌe itsixinꞌa ixin juachjaon. 8Mexinxin jaꞌan rinthatsaꞌan ñao ra ixin tjaguꞌe ra ixin, jaan, ndua thjueꞌe ra. 9Ko icha saꞌo kji̱ꞌan ra ixin sikunxin a ndua rugithikaon ra kain thi ndathjo ra. 10Ko chujni jaꞌa ra sinchetjañeꞌe ra, kai jaꞌan sinthatjañaa. Ko jaꞌan binthatjañaa ngathexin kon Jesucristo ixin jaꞌa ra kai binchetjañeꞌe ra, 11ixin jañaa nchiijin tsixinꞌa sinthayaa ná, ixin jaꞌan ná chunxin ná jian thi jeꞌe rinao sincheꞌe.

Pablo chrjuinꞌa bakunuꞌe ngain rajna Troas

12Are jaꞌan baso rajna Troas ixin bandathjan chujni juajnee Jesucristo, kuexruxian Nchaa ná ixin chjana anto jié juachaxin ixin ndathjan chujni juajnee jeꞌe. 13Aro jaꞌan chrjuinꞌa bakunuꞌe ngain ansenna ixin bithjaꞌa xan chian Tito. Mexinxin jeꞌo chjaꞌa na̱ juajna ko sakjui ngain nunthe Macedonia.

Pablo kuexruxiꞌin Ndo Dio

14Aro jaꞌan kuexruxian ngain Ndo Dio ixin kain nchaꞌon jeꞌe thjengijna ná dacha ná kunixin juachaxiin Jesucristo ko ixin jaꞌan ná, Ndo Dio tjaago juajnee xraa naa thi anto chrjuin xrajni nguii thi thji ná. 15Ixin jaꞌan ná inchin tsjuka tjaaga Cristo ixin Ndo Dio, ko tuxrajniꞌi chujni kjan inaa chujni narua ko ngain ni ndaditjaan. 16Ko ixin chujni ndaditjaan, thi xrajni jiꞌi xraa naa thi duen chujni, ko ixin chujni kjan inaa chujni narua, thi xrajni jiꞌi xraa naa thi nchegechon ni. Ko, ¿kexeꞌe chujni nchao sincheꞌe xra jiꞌi? 17Jaꞌan ná jeꞌa chujni tjaago ná juajnee Ndo Dio ixin dachaxin ná tumi. Jaꞌan ná nichja ná thi ndua inchin chujni ruaꞌan Ndo Dio, ko ngathexin kon ndo nichja ná thi ndua inchin chujni ncheꞌe xree Jesucristo.

Currently Selected:

2 Corintios 2: plsNT

Highlight

Copy

Compare