San Marcos 12

Jesús okixtij sen ejemplo de on xkuajkualtin tlakamej yejuan okitekitiltijkej on tlajli

(Mt. 21.33-46; Lc. 20.9-19)

1Kemaj Jesús opeu kinkixtilia ejemplos, niman okinmijlij:

—Sen tlalejketl okitôkak miyek uvas. Kemaj ocorraltij niman okichijchiu sen pila kampa kipatskaskej on uvas. Niman no okichijchiu sen torre para uelis cuidaroskej on itlal. Niman kemaj okintlalij sekimej medieros yejuan teuan tlaxelouaj para cuidaroskej on uvas. Kemaj on tlalejketl onejkuanij niman oyaj ipan okse país. 2Ijkuak oyejkok on tonaltin para kitekiskej uvas, on tlalejketl okititlan sen itekitkau para ma kintlajtlaniliti on medieros on kech yejua kitocaroua kiselis. 3Pero yejuamej okajsikej, niman okimajmailijkej on tekitketl. Okontitlankej niman xitlaj* okimakakej. 4Kemaj on tlalejketl okititlan okse itekitkau, niman on tlakamej okuajtemojmotlakej niman okipijpinajtijkej. 5Kemaj on tlalejketl okititlan okse itekitkau, niman on medieros okimiktijkej. Sakin oksekimej okintitlan. No ijki okinchiuilijkej. Sekimej okinmajmailijkej, niman sekimej okinmiktijkej.

6’On tlalejketl sa ikoneu itech yonokajka yejuan sanoyej* kitlajsojtlaya*. Kemaj sa ye ika kej yejua okititlan. On tlalejketl kinemiliaya: “In nokoneu kemaj kitlakaitaskej.” 7Pero ijkuak on tekoneu oajsik ipan on tlatokyoj ikan uvas, on medieros okijtojkej: “In yejua ikoneu on tlalejketl. Ijkuak mikis itataj, yejua iyaxka* yes nochi in tlajli. Aman ma tikmiktikan ikoneu niman in tlajli toyaxka yes.” 8Kemaj okajsikej, okimiktijkej, niman itlalnakayo okixtijkej ipan on tlatokyoj ikan uvas.

9Kemaj Jesús okintlajtoltij:

—Aman tej, iteko on tlatokyoj ikan uvas, ¿tlinon kinchiuilis on xkuajkualtin medieros? Yejua tej, yas niman kinmiktis on medieros, niman on tlatoktli oksekimej kinmakas.

10Nemejuamej kuajli nenkimatij kenijki kijtoua on tiotlajtojli:

On tetl yejuan on tepanchijkej xokiselijkej,

aman yejua yonochiu ken esquinero.

11In toTEKO okichiu,

niman sanoyej techtlatlachaltia on tlen tikitaj.

12On tlayekankej intech on hebreos* kinekiyaj kajsiskej Jesús para kitsakuaskej, pampa kimatstikatkaj ika on ejemplo okinteneuilij yejuamej. Pero xokajsikej, pampa nomojtiayaj kinkualaniskej on tlakamej. Yejua ika okajtejkej niman xitlaj* okichiuilijkej.

Kitocaroua kimakaskej on tekiuaj tlen yejua iyaxka* niman kimakaskej Dios on tlen yejua iyaxka

(Mt. 22.15-22; Lc. 20.20-26)

13Kemaj okintitlankej sekimej fariseos* niman sekimej herodianos para kichiualtiskej Jesús kijtos itlaj yejuan uelis ika kiteixpanuiskej. 14Yejuamej oualajkej, niman okijlijkej Jesús:

—Temachtijketl, tikmatstokej ika nochipa tikijtoua on tlen melauak. Tejua xtikchiuilia cuenta on tlen kijtouaj motechkopa on tlakamej, yej melauak tikteititia ken Dios kineki ma titouikakan. Xtechijli, ¿itlanauatil Moisés techkauilia titlatlaxtlauaskej ikan impuestos itech César yejuan itekiuaj on país de Roma? ¿Tiktlatlaxtlauaskej, noso ka?

15Jesús okitak inyojlo ika omexayakyejkej. Yejua ika okinmijlij:

—¿Tline* nennechchiualtisnekij ma nemechijli itlaj yejuan ika uelis nennechteixpanuiskej? Xnechajkuilikan sen tomin para ma nikita.

16Yejuamej okuajkikej sen tomin, niman Jesús okintlajtoltij:

—¿Akinon ixayak yejua in, niman akinon itoka in nikan tlajkuilolnestikaj ipan in tomin?

Yejuamej okinankilijkej:

—On tekiuaj César yejuan kimandaroua on país de Roma.

17Kemaj Jesús okinmijlij:

—Tla ijkon, xmakakan César on tlen yejua iyaxka, niman xmakakan Dios on tlen yejua iyaxka.

Yejuamej sanoyej okintlatlachaltij ika on ken okinnankilij.

Maski totlalnakayo mikis oksejpa yoliuis*

(Mt. 22.23-33; Lc. 20.27-40)

18Niman okitatoj Jesús sekimej saduceos yejuan kijtouaj ika xuelis yoliskej* on mikatsitsimej. Kemaj okijlijkej:

19—Temachtijketl, Moisés okijtoj ika tla miki sen tlakatl yejuan xokipix ikoneuan, ikniu on tlakatl ika onkaj nonamiktis iuan on siuakauajli*, niman iuan tlaskaltis para on kokonej nemiskej ken ikoneuan yeskia on ikniu yejuan omik. 20Aman tej, nemiyaj chikomemej iknijtin yejuan tlakamej. On yejuan yenkuiyotl ononamiktij, pero omik niman xitlaj* ikoneu okajteu. 21Yejua ika on ika ome teikniu no iuan ononamiktij on siuatl, niman no omik. Nion yejua xokajteu ikoneu. No ijki opanok on ika yeyi teikniu. 22Niman no ijki onochiu inuan on oksekimej hasta ijki otlankej on chikomemej. Niman nochimej iuan ononamiktijkej, pero xokipixkej inkoneu. Niman kemaj on siuatl no omik. 23Xtechijli, ijkuak yoliuiskej* on mimiktsitsimej, ¿katlejua itech tesiuau yes de on chikomemej iknijtin, pampa nochimej okipixkej ken insiuau?

24Jesús okinmijlij:

—Nemejuamej nenmopopolouaj pampa xnenkimatij tlinon kijtoua on Yektlajkuilojli, nion nenkimatij ika Dios nochi ueli kichiua. 25Ijkuak on mikatsitsimej yoliskej*, xakaj nonamiktis nion on tatajtin kintemakaskej imichpochuan para ma nonamiktikan. Ijkuakon nemiskej ken iángeles Dios yejuan nemij ne iluikak. 26Niman on ika yoliskej* niman noketsteuaskej on mikatsitsimej, ¿xe nenkimomachtiaj iamamox Moisés kampa okijkuiloj ika Dios nemiya ijtik on tlakotepajsojli, niman okinots Moisés? Ijkin okijlij: “Nejua niiDios Abraham, niiDios Isaac, niman niiDios Jacob.” 27Dios ijkin okijtoj sakin* ijkuak yomikkej yejuamej on tlakamej, pero Dios xejua iminDios on mikatsitsimej. Yejua iminDios on yoltokej. Yejua ika nemejuamej sanoyej nenmopopolouaj.

Jesús okijtoj katlejua tlanauatijli más ueyi kijtosneki

(Mt. 22.34-40)

28Sen temachtijketl ikan itlanuatil Dios okak ika Jesús kuajli otlanankijlij. Yejua ika, okitlajtoltij Jesús:

—¿Katlejua de nochi tlanauatiltin más ueyi kijtosneki?

29Jesús okinankilij:

—In yejua tlanauatijli yejuan más ueyi kijtosneki: “Xkakikan tlakamej de Israel. ToTEKO Dios, san yejua Dios. 30Xtlajsojtla* moTEKO Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis.” In yejua tej, tlanauatijli yejuan más ueyi kijtosneki. 31Niman on ika ome tlanauatijli no ijkin kijtoua: “Xkintlajsojtla oksekimej no ijki ken tejua timotlajsojtla.” Xitlaj okse tlanauatijli yejuan más ueyi kijtosneki ken yejua in ome.

32On temachtijketl ikan itlanauatil Dios okijlij Jesús:

—Temachtijketl, kuajli ken otikijtoj. Melauak, san se Dios nemi, niman xakaj okse Dios. 33Tla tiktlajsojtlaskej Dios ikan nochi toyojlo, ikan nochi totlamachilis, ikan nochi toalma niman ikan nochi tochikaualis, niman tla tiktlajsojtlaskej nochi tlakatl ijkon ken tejuamej titotlajsojtlaj, on yejua más kipaktia Dios, xken itlaj uentli yejuan nochi tlatla noso okseki tlajtlamach uentli.

34Ijkuak Jesús okitak ika kuajli okinankilij, okijlij:

—Sa achijtsin poliui para timotemakas itech Dios para yejua mitsmandaros.

Niman xok yakaj onoyolchikau para itlaj kitlajtoltis.

Jesús más ueyixtikaj xken David

(Mt. 22.41-46; Lc. 20.41-44)

35Kemaj ijkuak Jesús temachtiaya ne ipan on ueyitiopan, kijtouaya:

—¿Tline on temachtijkej ikan itlanauatil Dios kijtouaj ika Cristo, yejuan Dios okitlapejpenij para tlamandaros, yejua tekoneu itech David? 36Sano yejua David okimelajkaijtoj itechkopa on Espíritu Santo:

NoDios okijlij noTEKO:

“Xmotlali nikan ipan noyekma

hasta kaman nimitstlalis tlayekanketl intech motlauelikniuan.”

37Tla David ijkon okijtoj itechkopa Cristo ika yejua iTEKO, tla ijkon tej, ¿kenijki Cristo ueli teuejkakoneu itech David?

On tlakamej yejuan sanoyej miyekej katkaj kikakiyaj Jesús ikan paktli.

Jesús okijtoj maka titouikaskej ken nouikaj on temachtijkej ikan itlanuatil Dios

(Mt. 23.1-36; Lc. 11.37-54; 20.45-47)

38Yejua kinmachtiaya, niman ijkin okinmijliaya:

—Xmotakan sano nemejuamej intech on temachtijkej ikan itlanauatil Dios yejuan kuelitaj tlakenueueyakej kistinemij para nochi tlakatl kintlajpalouaj ikan tetlakaitalistli ipan plaza. 39Yejuamej no kinekij on más kuajkualtin sietas, ne ipan on sinagogas*. Niman kinekij kipiyaskej on yejuan más uejueyixtokej sietas kampa iluipan. 40Niman kinchankuiliaj on siuakaualtsitsimej*. Yejua ika uejkaui kichiuaj oración para on tlakamej ma kuajli tlanemilikan intechkopa. Yejuamej tej, kiseliskej más ueyi castigo.

Sen siuakaualtsintli okimakak Dios iuentomin

(Lc. 21.1-4)

41Jesús yeuatikatka nisiu itech on caja ipan on ueyitiopan kampa kontlaliaj on uentomin. Ompa okintak on tlakamej konkajtikatkaj inuentomin. Miyekej yejuan ricos konxinijtikatkaj miyek tomin. 42No ouajlaj sen siuakaualtsintli* mayanki. Okauako ome centavito de cobre, sanoyej achijtsin tomin. 43Kemaj Jesús okinnots on inomachtijkauan*, niman okinmijlij:

—Ika tlen melauak nemechijlia ika in mayanki siuakaualtsintli más ueyi okitlalij iuentomin xken nochimej on oksekimej yejuan yokauakoj intomin ipan on caja. 44On yejuan ricos kitemakaj san on tlen kinsobraroua. Pero in siuatl, yejuan mayanki, okitemakak nochi hasta on tlen sa ika nochi kipiyaya para nopanoltis.

Currently Selected:

San Marcos 12: nguNT

Highlight

Copy

Compare