मीका 5
5
बैतलहम ले एक परतिगियां करे गे सासन करइया
# 5: इबरानी म 5:1 ला 4:14, अऊ 5:2‑15 ला 5:1‑14 गने गे हवय 1हे सैनिक दलमन के सहर, अपन सैनिकमन ला कतार म कर ले,
काबरकि हमर बिरूध एक घेरा डाले गे हवय।
ओमन इसरायल के सासक के गाल म
लउठी ले मारहीं।
2“पर तेंह, हे बैतलहम एपराता,
हालाकि तेंह यहूदा के बंसमन#5:2 या सासकमन म छोटे अस,
तभो ले तोर म ले ही मोर बर एक झन निकलके आही
जऊन ह इसरायल ऊपर सासन करही,
जेकर आरंभ पुराना समय ले,
प्राचीन समय ले होय हवय।”
3एकरसेति इसरायल ला ओ समय तक तियाग दिये जाही,
जब तक ओ जऊन ह छेवारी होय के पीरा म हवय, एक बेटा ला नइं जनमे,
अऊ ओकर बाकि भाईमन
इसरायलीमन संग मिल जाय बर लहुंटके नइं आ जावंय।
4यहोवा के सक्ति ले,
यहोवा अपन परमेसर के नांव के परताप ले
ओह ठाढ़ होही अऊ अपन झुंड के देखरेख करही।
अऊ ओमन निरभय रहिहीं, काबरकि तब
धरती के छोर तक मनखेमन ओकर महानता ला जानहीं।
5अऊ ओह हमर सांति होही
जब अस्सूरीमन हमर देस ऊपर हमला करहीं
अऊ हमर गढ़मन म हमाहीं।
हमन ओमन के बिरूध सात चरवाहा,
बरन आठ सेनापति ठाढ़ कर देबो,
6जऊन मन अस्सूर देस ऊपर,
निमरोद के देस ऊपर तलवार ले सासन करहीं।
ओह हमन ला अस्सूर के निवासीमन ले छोंड़ाही
जब ओमन हमर देस ऊपर हमला करहीं
अऊ हमर सिवाना ला पार करहीं।
7याकूब के बांचे भाग
बहुंत मनखेमन के बीच म होही।
ओह यहोवा के पठोय ओस सहीं,
कांदी ऊपर पड़ोइया बारिस सहीं होही,
ओह काकरो इंतजार नइं करय
या कोनो मनखे ऊपर निरभर नइं रहय।
8याकूब के बांचे भाग ह जाति-जाति के बीच
अऊ मनखेमन के बीच म अइसने होही,
जइसने एक सिंह ह जंगल के पसुमन के बीच म होथे,
अऊ एक जवान सिंह भेड़मन के झुंड के बीच होथे,
अऊ ओह ओमन के बीच ले जावत ओमन ऊपर झपटके ओमन ला चीर देथे,
अऊ कोनो ओमन ला बचा नइं सकंय।
9तुम्हर हांथ ह अपन बईरीमन ऊपर जय पाय के खुसी म ऊपर उठही,
अऊ तुम्हर जम्मो बईरीमन नास करे जाहीं।
10यहोवा ह घोसना करत हे,
“ओ दिन मेंह तुम्हर घोड़ामन ला तुम्हर बीच म ले नास कर दूहूं
अऊ तुम्हर रथमन ला घलो नास कर दूहूं।
11मेंह तुम्हर देस के सहरमन ला नास कर दूहूं
अऊ तुम्हर जम्मो गढ़मन ला टोर दूहूं।
12मेंह तुम्हर जादू-टोना ला खतम कर दूहूं
अऊ तुमन फेर कभू जादू-टोना के बात नइं करहू।
13मेंह तुम्हर मूरतीमन ला
अऊ तुम्हर बीच ले तुम्हर पबितर पथरामन ला नास कर दूहूं;
तुमन फेर कभू अपन हांथ ले बनाय
चीजमन के अराधना नइं करहू।
14जब मेंह तुम्हर सहरमन ला बिनास करहूं
त मेंह तुम्हर बीच ले तुम्हर असेरा नांव के खंभामन#5:14 असेरा देवी के लकरी के प्रतीक ला उखान फेंकहूं।
15मेंह गुस्सा अऊ कोरोध म ओ जातिमन ले बदला लूहूं
जऊन मन मोर बात ला नइं माने हवंय।”
Currently Selected:
मीका 5: एस सी ए
Highlight
Share
Copy
Want to have your highlights saved across all your devices? Sign up or sign in
पबितर बाईबल, समकालीन छत्तीसगढ़ी अनुवाद™ एस सी ए™
कापीराईट © 2012, 2016, 2021, 2024 Biblica, Inc.
Biblica, Inc. के अनुमति के दुवारा उपयोग। पूरा संसार म जम्मो अधिकार सुरछित।
Holy Bible, Chhattisgarhi Contemporary Version™ SCA™
Copyright © 2012, 2016, 2021, 2024 by Biblica, Inc.
Used by permission of Biblica, Inc. All rights reserved worldwide.
