यहेजकेल 24

रांधे के बरतन के रूप म यरूसलेम

1हमर बंधुवई म रहे के नौवां बछर के दसवां महिना के दसवां दिन, यहोवा के ये बचन मोर मेर आईस: 2“हे मनखे के बेटा, आज के दिन, आज के तारिख ला लिख ले, काबरकि आजेच के दिन बेबिलोन के राजा ह यरूसलेम के घेराबंदी करे हवय। 3ये बिदरोही मनखेमन ला एक पटंतर सुनाके कह: ‘परमपरधान यहोवा ह ये कहत हे:

“ ‘रांधे के बरतन ला मढ़ा; येला चूल्हा म मढ़ा

अऊ येमा पानी डाल दे।

4तब येमा मांस के कुटामन ला डाल,

जम्मो बने-बने कुटामन ला—जांघ अऊ कंधा।

ये हाड़ामन के बढ़िया भाग ले येला भर दे;

5झुंड म के सबले बने पसु ला ले।

ओ हाड़ामन बर बरतन के तरी म लकरी ला बार;

ओला डबकन दे

अऊ येमा हाड़ामन ला चुरन दे।

6“ ‘काबरकि परमपरधान यहोवा ह ये कहत हे:

“ ‘खून बहइया सहर ऊपर हाय,

मुर्चा लगे ओ बरतन ऊपर हाय,

जेकर मुर्चा ह नइं छूटही!

मांस ला एक-एक कुटा करके निकालव

कोनो भी क्रम म कुटामन निकलथें, ओमन ला निकालव।

7“ ‘काबरकि ओ नगर ह अपन ही बीच म खून बहाय हवय:

ओह खाली चट्टान म येला रितोय हवय;

ओह येला भुइयां म नइं रितोय हवय,

जिहां धुर्रा ह येला तोप लेतिस।

8कोप ला भड़काय अऊ बदला लेय बर

मेंह ओकर खून ला खाली चट्टान ऊपर रखें,

ताकि येला झन तोपे जावय।

9“ ‘एकरसेति परमपरधान यहोवा ह ये कहत हे:

“ ‘खून बहइया सहर ऊपर हाय!

मेंह घलो लकरी के कुढ़ा ला बड़े करहूं।

10एकरसेति लकरी के कुढ़ा लगावव,

अऊ ओमा आगी लगावव।

मांस म मसाला मिलाके,

ओला बने करके पकावव;

अऊ हाड़ामन ला हल्का जलन दव।

11तब खाली बरतन ला अंगरामन ऊपर मढ़ावव

जब तक कि येह गरम होके येकर तांबा ह लाल नइं हो जावय,

ताकि येकर असुधता ह गलके निकल जावय

अऊ ओकर मुर्चा ह जल जावय।

12येह जम्मो मेहनत ला बेकार कर दीस;

येमा लगे भारी मुर्चा ह नइं छूटे हवय,

आगी ले घलो नइं छूटे हवय।

13“ ‘तोर असुधता ह काम-वासना ए। मेंह तोला साफ करे के कोसिस करेंव, पर तेंह अपन असुधता ले साफ नइं होय, अब तोला तब तक साफ करे नइं जावय, जब तक कि तोर बिरूध मोर कोप ह सांत नइं हो जाही।

14“ ‘में यहोवा ह कहे हवंव। मोर बर काम करे के बेरा आ गे हवय। मेंह नइं छोड़ंव; मेंह तोर ऊपर दया नइं करंव, अऊ न ही नरम पड़ंव। तोर चालचलन अऊ तोर काम के मुताबिक तोर नियाय करे जाही, परमपरधान यहोवा ह घोसना करत हे।’ ”

यहेजकेल के घरवाली के मऊत

15यहोवा के ये बचन ह मोर मेर आईस: 16“हे मनखे के बेटा, मेंह एकेच चोट म तोर आंखी के खुसी ला छीननेवाला हंव। तभो ले तें न तो सोक मनाबे, न रोबे अऊ न ही आंसू बोहाबे। 17चुपेचाप कलहरबे; मरे मनखे बर बिलाप झन करबे। अपन पगड़ी ला बांधे रख अऊ गोड़मन म पनही ला पहिरे रह; अपन दाढ़ी अऊ मूंछ ला झन ढांपबे या सोक करइयामन बर ठहिराय जेवन झन करबे।”

18एकरसेति बिहनियां मेंह मनखेमन ले बात करेंव, अऊ सांझ के बेरा मोर घरवाली ह मर गीस। ओकर दूसर दिन बिहनियां, मेंह वइसने करंय, जइसने मोला हुकूम देय गे रिहिस।

19तब मनखेमन मोर ले पुछिन, “का तेंह हमन ला नइं बतावस कि ये चीजमन के हमर से का लेना-देना हे? तेंह काबर अइसने करत हस?”

20तब मेंह ओमन ला जबाब देंव, “यहोवा के ये बचन मोर मेर आईस: 21इसरायल के मनखेमन ले कह: ‘परमपरधान यहोवा ह ये कहत हे: मेंह अपन पबितर-स्थान ला अपबितर करनेचवाला हंव—ओ गढ़ जेकर ऊपर तुमन घमंड करथव, जेकर ले तुमन ला खुसी मिलथे, जेह तुम्हर मया के चीज अय। जऊन बेटा-बेटीमन ला तुमन अपन पाछू छोंड़ गे हव, ओमन तलवार ले मारे जाहीं। 22अऊ तुमन वइसनेच करहू, जइसने मेंह करे हवंव। तुमन अपन दाढ़ी अऊ मूंछ ला नइं ढांपहू या सोक करइयामन बर ठहिराय गे जेवन नइं खाहू। 23तुमन अपन मुड़ म अपन पगड़ी ला बांधे रखहू अऊ गोड़ म अपन पनही ला पहिरे रहिहू। तुमन न तो सोक मनाहू अऊ न ही रोहू, बरन अपन पाप अऊ अपनेच बीच म कलहरे के कारन, तुमन बेकार हो जाहू। 24यहेजकेल ह तुम्हर बर एक चिनहां ठहिरही; तुमन वइसने ही करहू, जइसने ओह करे हवय। जब येह होही, तब तुमन जानहू कि मेंह परमपरधान यहोवा अंव।’ ”

25“अऊ हे मनखे के बेटा, जऊन दिन मेंह ओमन के मजबूत गढ़, ओमन के आनंद अऊ महिमा, ओमन के आंखी के खुसी, ओमन के हिरदय के ईछा, अऊ संग म ओमन के बेटा-बेटीमन ला लूट लूहूं— 26ओही दिन एक भगोड़ा मनखे ह आके तोला खबर दीही। 27ओ बेरा तोर मुहूं ह खुल जाही; तेंह ओ मनखे ले गोठियाबे अऊ फेर तें चुप नइं रहिबे। ये किसम ले तें ओमन बर एक चिनहां ठहिरबे, अऊ ओमन जानहीं के मेंह यहोवा अंव।”

Currently Selected:

यहेजकेल 24: एस सी ए

Highlight

Copy