निरगमन 31

बसलेल अऊ ओहोलीआब

1फेर यहोवा ह मूसा ला कहिस, 2“देखव, मेंह यहूदा के गोत्र ले हूर के नाती, ऊरी के बेटा बसलेल ला चुने हंव, 3अऊ मेंह ओला परमेसर के आतमा, बुद्धि, समझ, गियान अऊ जम्मो किसम के हुनर ले भर दे हंव— 4ताकि ओह सोन, चांदी अऊ कांसा के कलात्मक नमूना बनावय, 5पथरामन ला काटे अऊ मढ़ाय, लकड़ी के काम करय, अऊ जम्मो किसम के सिल्पकारी करय। 6येकर अलावा, मेंह दान के गोत्र ले अहीसामाक के बेटा ओहोलीआब ला नियुक्त करे हंव कि ओह बसलेल के मदद करे।

“मेंह जम्मो कुसल कारीगरमन ला ओ जम्मो चीज बनाय के योग्यता दे हंव, जेमन ला बनाय के हुकूम मेंह तोला दे हंव:

7“मिलापवाला तम्बू,

करार कानून के सन्दूक अऊ ओकर पछताप के ढकना,

अऊ तम्बू के आने जम्मो चीज—

8मेज अऊ ओकर जम्मो चीज,

चोखा सोन के दीवट अऊ ओकर जम्मो चीज,

धूप के बेदी,

9होम-बलिदान के बेदी अऊ ओकर जम्मो बरतन,

तसला अऊ ओकर खुरा—

10अऊ बुने गय पहिरावामन घलो,

हारून पुरोहित के पबितर पहिरावा

अऊ ओकर बेटामन के ओ पहिरावा, जब ओमन पुरोहित के रूप म सेवा करत बेरा पहिरहीं,

11अऊ अभिसेक के तेल अऊ पबितर स्थान बर सुगंधित धूप।

“ये जम्मो चीजमन ला ओमन वइसने ही बनावंय, जइसने मेंह तोला हुकूम दे हंव।”

बिसराम दिन

12फेर यहोवा ह मूसा ला कहिस, 13“तेंह इसरायलीमन ला ये कहिबे, ‘तुमन मोर बिसराम दिन ला जरूर मानव। येह अवइया पीढ़ी-पीढ़ी तक मोर अऊ तुम्हर बीच म एक ठन चिनहां होही, ताकि तुमन जानव कि मेंह यहोवा अंव, जऊन ह तुमन ला पबितर करथे।

14“ ‘बिसराम दिन ला मानव, काबरकि ये दिन ह तुम्हर बर पबितर अय। जऊन कोनो येला अपबितर करथे, ओह मार डारे जावय; जऊन कोनो ओ दिन कोनो बुता करय, ओह अपन मनखेमन के बीच ले अलग करे जावय। 15काबरकि हर हप्ता छै दिन काम-बुता करे जावय, पर सातवां दिन बिसराम के दिन अऊ यहोवा बर पबितर अय। जऊन कोनो बिसराम दिन म कुछू बुता करय, ओह मार डारे जाय। 16इसरायलीमन बिसराम दिन ला मानंय; ओमन येला अवइया पीढ़ी-पीढ़ी तक हमेसा के एक करार के रूप म मानंय। 17येह मोर अऊ इसरायलीमन के बीच म सदाकाल बर एक चिनहां ठहिरही, काबरकि छै दिन म यहोवा ह अकास अऊ धरती ला बनाईस, अऊ सातवां दिन ओह बिसराम करिस अऊ तरो-ताजा होईस।’ ”

18जब यहोवा ह सीनय पहाड़ ऊपर मूसा ले बात कर चुकिस, त ओह मूसा ला करार कानून के दू ठन पटिया ला दीस, येमन पथरा के ओ पटियामन रिहिन, जेमा परमेसर ह अपन अंगठी ले लिखे रिहिस।

Currently Selected:

निरगमन 31: एस सी ए

Highlight

Copy