ब्यवस्था 33
33
मूसा ह इसरायलीमन ला आसीस देथे
1परमेसर के जन मूसा ह अपन मिरतू के पहिले इसरायलीमन ला जऊन आसीस दीस, ओह ये अय। 2ओह कहिस:
“यहोवा ह सीनय पहाड़ ले आईस
अऊ सेईर पहाड़ ले ओमन ऊपर सूरज के सहीं परगट होईस;
ओह पारान पहाड़ ले अपन अंजोर के चमक देखाईस।
ओह हजारों पबितर जन के संग#33:2 या म ले
दक्खिन ले, अपन पहाड़ के ढाल म ले आईस।#33:2 इबरानी म येकर मतलब ह साफ नइं ए
3खचित येह तें अस, जऊन ह अपन मनखेमन ले मया करथस;
जम्मो पबितर जन तोर हांथ म हवंय।
तोर गोड़ म ओ जम्मो झन मुड़ नवाथें,
अऊ तोर ले ओमन ला हुकूम मिलथे,
4ओ कानून जेला मूसा हमन ला दीस,
अऊ याकूब के सभा के अधिकार घलो मिलथे।
5जब मनखेमन के अगुवामन
इसरायल के गोत्रमन के संग जूरे रिहिन,
तब ओह यसूरून#33:5 यसूरून के मतलब ईमानदार मनखे याने कि इसरायल; देखव पद 26 म घलो के राजा रिहिस।
6“रूबेन#33:6 रूबेन के गोत्र ह जीयत रहय अऊ ओह झन मरय,
अऊ ओकर मनखेमन कम झन होवंय।”
7अऊ मूसा ह यहूदा के बारे म ये कहिस:
“हे यहोवा, यहूदा के बिनती ला सुन;
ओला ओकर मनखेमन करा लान।
अपन खुद के हांथ ले ओह अपन मामला के बचाव करथे।
ओकर बईरीमन के बिरूध ओकर मदद कर!”
8लेवी के बारे म ओह कहिस:
“तोर तुम्मीम अऊ ऊरीम#33:8 देखव निर 28:30; लैव्य 8:8; 1 समू 14:41‑42
तोर बिसवासयोग्य सेवक के अंय।
तेंह ओला मस्सा करा परखय;
तेंह मरीबा के सोता करा ओकर संग बाद-बिबाद करय।
9ओह अपन दाई अऊ ददा के बारे म कहिस,
‘ओमन बर मोर मन म कोनो आदर नइं ए।’
ओह अपन भाईमन ला नइं पहिचानिस
अऊ न ही अपन लइकामन ला स्वीकार करिस,
पर ओह तोर बचन के पालन करिस
अऊ तोर करार के रखवारी करिस।
10ओह याकूब ला तोर नियम
अऊ इसरायल ला तोर कानून के सिकछा देथे।
ओह तोर आघू म धूप जलाथे
अऊ तोर बेदी म पूरा होम-बलिदान चघाथे।
11हे यहोवा, ओकर जम्मो कुसलता ऊपर आसीस दे,
अऊ ओकर हांथ के सेवा ला गरहन कर।
जेमन ओकर बिरूध ठाढ़ होथें, ओमन ला अऊ ओकर बईरीमन ला
अइसे मार कि ओमन फेर ठाढ़ झन हो सकंय।”
12बिनयामीन के बारे म ओह कहिस:
“यहोवा के मयारू ह ओकर सुरकछा म रहय,
काबरकि यहोवा ह दिन भर ओकर सुरकछा करथे,
अऊ जेला यहोवा ह मया करथे, ओह ओकर दूनों कंधा के बीच म रहिथे।”
13यूसुफ के बारे म ओह कहिस:
“यहोवा ह ओकर देस ला
ऊपर अकास के कीमती ओस ले
अऊ खाल्हे के गहिरा पानी ले आसीस देवय;
14सूरज के परभाव ले उपजे सबले बने चीज
अऊ चंदा के दुवारा दिये उत्तम चीज;
15पुराना पहाड़मन के मनपसंद ईनाम
अऊ सदाकाल तक बने रहइया पहाड़ीमन के फर;
16धरती अऊ येकर भरपूरी म ले सबले उत्तम चीजमन के आसीस यहोवा देवय
अऊ ओकर किरपा बने रहय, जऊन ह बरत झाड़ी म रिहिस।#33:16 देखव निर 3:1‑6
ये जम्मो चीज यूसुफ के मुड़ म
याने कि ओकर भौंह म उतरय, जऊन ह अपन भाईमन के बीच राजकुमार रिहिस।
17वैभव म ओह एक पहिलांत सांड़ के सहीं अय;
ओकर सींगमन जंगली बईला के सींग के सहीं अंय।
ओमन के दुवारा ओह जाति-जाति के मनखे,
इहां तक कि धरती के छोर के मनखेमन ला घायल करही।
अइसने अंय एपरैम के दस हजार;
अइसने अंय मनस्से के हजारों-हजार।”
18जबूलून के बारे म ओह कहिस:
“हे जबूलून, अपन बाहिर जवई म,
अऊ हे इस्साकार, तेंह अपन तम्बू म आनंद मना।
19ओमन मनखेमन ला पहाड़ ऊपर बलाहीं
अऊ उहां धरमीपन के बलिदान चघाहीं;
ओमन समुंदर के बहुंत चीज,
अऊ बालू म छुपे खजाना म ले लाभ उठाहीं।”
20गाद के बारे म ओह कहिस:
“धइन अय ओ, जऊन ह गाद के इलाका ला बढ़ाथे!
गाद ह उहां एक सिंह के सहीं रहिथे,
अऊ बाहां या मुड़ ला चीर देथे।
21ओह अपन बर सबले बढ़िया भुइयां ला चुनिस;
अगुवा के भाग ह ओकर बर रखे गे रिहिस।
जब मनखेमन के मुखियामन जूरिन,
त ओह यहोवा के धरमी ईछा
अऊ इसरायल के बारे म ओकर नियाय ला पूरा करिस।”
22दान के बारे म ओह कहिस:
“दान ह बासान के उछलत-कूदत
सिंह के एक पीला ए।”
23नपताली के बारे म ओह कहिस:
“नपताली के ऊपर यहोवा के बहुंत किरपा हवय
अऊ ओह यहोवा के आसीस ले भरे हवय;
ओला समुंदर कोति दक्खिन के भाग उत्तराधिकार म मिलही।”
24आसेर के बारे म ओह कहिस:
“बेटामन म आसेर ह सबले जादा आसीसित अय;
ओकर ऊपर ओकर भाईमन के किरपा होवय,
अऊ ओकर पांव ह तेल म नहावय।
25तोर दुवार के छड़मन लोहा अऊ कांसा के होहीं,
अऊ तोर बल ह तोर उमर के बराबर होही।
26“यसूरून के परमेसर के सहीं कोनो नइं अंय,
जऊन ह अकास के ओ पार ले
अपन वैभव म बादर ऊपर सवार होके तोर मदद करे बर आथे।
27अनादि परमेसर ह तोर सरन-स्थान ए,
अऊ तोर खाल्हे म सदा बने रहइया बाहांमन हवंय।
ओह तोर आघू ले तोर बईरीमन ला ये कहिके भगा दीही,
‘ओमन ला नास कर दव!’
28एकरसेति इसरायल ह निडर होके रहिही;
याकूब ह अनाज अऊ नवां अंगूर के मंद के देस म
सुरकछित निवास करही,
जिहां अकास ले ओस गिरथे।
29हे इसरायल, धइन अस तें!
यहोवा ले उद्धार पाय मनखे,
तोर सहीं कोन हवय?
ओह तोर ढाल अऊ मददगार
अऊ महिमामय तलवार ए।
तुम्हर बईरीमन तुम्हर आघू म झुकहीं,
अऊ तुमन ओमन के ऊंच जगहमन ला रऊंद डालहू।”
Currently Selected:
ब्यवस्था 33: एस सी ए
Highlight
Share
Copy
Want to have your highlights saved across all your devices? Sign up or sign in
पबितर बाईबल, समकालीन छत्तीसगढ़ी अनुवाद™ एस सी ए™
कापीराईट © 2012, 2016, 2021, 2024 Biblica, Inc.
Biblica, Inc. के अनुमति के दुवारा उपयोग। पूरा संसार म जम्मो अधिकार सुरछित।
Holy Bible, Chhattisgarhi Contemporary Version™ SCA™
Copyright © 2012, 2016, 2021, 2024 by Biblica, Inc.
Used by permission of Biblica, Inc. All rights reserved worldwide.
