आमोस 6
6
आत्म-संतुस्ट मनखेमन ला धिक्कार
1हाय तुमन ऊपर, जेमन सियोन म संतुस्ट हवव,
हाय तुमन ऊपर, जेमन सामरिया नगर के पहाड़ म अपनआप ला सुरकछित मानथव,
तुमन, जेमन सबले उत्तम देस के नामी आदमी अव,
जेमन करा इसरायल के मनखेमन आथें!
2कलने नगर जाके ओला देखव;
उहां ले हमात नांव के बड़े सहर म जावव,
अऊ तब खाल्हे पलिस्ती के गत नांव के सहर म जावव।
का येमन तुम्हर दूनों राजमन ले जादा बढ़िया हवंय?
का तुम्हर देस ले ओमन के देस ह बड़खा हवय?
3तुमन संकट के दिन ला दूरिहा कर देथव,
अऊ आतंक के राज ला लकठा म ले आथव।
4तुमन हाथी-दांत ले सजे पलंग ऊपर लेटथव
अऊ अपन सोफा म अराम करथव।
तुमन मनपसंद भेड़
अऊ चरबीदार बछवामन ला खाथव।
5तुमन दाऊद सहीं अपन बीना ला बजाथव
अऊ बाजामन ला तुरते बजाथव।
6तुमन कटोरा भरके अंगूर के मंद पीथव
अऊ सबले बढ़िया तेल ला देहें म चुपरथव,
पर तुमन यूसुफ के बरबादी बर दुखी नइं होवव।
7एकरसेति तुमन सबले पहिली बंधुवई म जाहू;
तुम्हर भोज खवई अऊ मऊज करई ह बंद हो जाही।
यहोवा ह इसरायल के घमंड ले घिन करथे
8परमपरधान यहोवा ह अपनेच कसम खाय हवय—यहोवा सर्वसक्तिमान परमेसर ह घोसना करत हे:
“मेंह याकूब के घमंड ले घिन करथंव
अऊ ओकर किलामन ले घलो घिन करथंव;
मेंह सहर अऊ ओमा के जम्मो चीज ला
बईरी के हांथ म कर दूहूं।”
9कहूं एक घर म दस मनखे घलो बांचे रहिहीं, त ओमन घलो मर जाहीं। 10कहूं कोनो रिस्तेदार ह ओमन के देहें ला जराय खातिर घर ले बाहिर ले जाय बर आथे अऊ उहां कोनो लुकाय मनखे ले पुछथे, “इहां तोर संग म कोनो अऊ हवंय?” अऊ ओह कहिथे, “नइं,” तब ओह ये कहिही, “चुपे रह! हमन ला यहोवा के नांव नइं लेना हवय।”
11काबरकि यहोवा ह हुकूम देय हवय,
अऊ ओह बड़े घर ला फोरके कुटा-कुटा
अऊ छोटे घर ला चूर-चूर कर दीही।
12का घोड़ामन ठाढ़ चट्टान म दऊड़थें?
का कोनो मनखे बईलामन ले समुंदर म नांगर जोतथे?
पर तुमन नियाय ला जहर म
अऊ धरमीपन के फर ला करूवाहट म बदल दे हवव—
13तुमन, जेमन लो-देबार#6:13 लो-देबार के मतलब होथे कुछू घलो नइं ला अपन बस म करके आनंदित होथव
अऊ कहिथव, “हमन का अपन बल म करनेम#6:13 करनेम के मतलब होथे सींग जऊन ह इहां ताकत के प्रतीक के रूप म आय हवय ला नइं जीत ले हन?”
14काबरकि यहोवा सर्वसक्तिमान परमेसर ह घोसना करत हे,
“हे इसरायल, मेंह तोर बिरूध म एक जाति ला भड़काहूं,
जऊन ह तुम्हर ऊपर लेबो-हमात ले लेके
अराबा के घाटी तक अतियाचार करही।”
Currently Selected:
आमोस 6: एस सी ए
Highlight
Share
Copy
Want to have your highlights saved across all your devices? Sign up or sign in
पबितर बाईबल, समकालीन छत्तीसगढ़ी अनुवाद™ एस सी ए™
कापीराईट © 2012, 2016, 2021, 2024 Biblica, Inc.
Biblica, Inc. के अनुमति के दुवारा उपयोग। पूरा संसार म जम्मो अधिकार सुरछित।
Holy Bible, Chhattisgarhi Contemporary Version™ SCA™
Copyright © 2012, 2016, 2021, 2024 by Biblica, Inc.
Used by permission of Biblica, Inc. All rights reserved worldwide.
