HEBREOS 8

An Jesús xa'ay tukan kisacerdotejk'an

1Yucha aniya an yu tukancha lhilakchiwint'awnaw: an xa'ay tukan kisacerdotejk'an sa'cha wilhchalhi an lakt'iyan tan lhi'oxi la ixpa'xti an tan wilh ixputawlan an Dios yu puch'alhkatnan. 2Yucha la'ts'ilhi'an an tan xasawalh ixtajtan Dios, yu yucha an Dios la'oxilh yu jantu wa lapanakcha la'oxilh. 3Mu ixchuxk'an an xalaj'ajin sacerdotejnin jalhka'ulakani li katama'ninilhi jatapakxat an Dios chi li kataja'ulananilh, pus an Jesucristo wachu task'iniya li tu'u kama'axta'lhi. 4Li ani lakaat'uni kax'aklatsukulh yucha jantu kaxjunlhi sacerdote, mu ani ta'alincha sacerdotejnin yu tama'axt'a'a lha'ulan tacha lhinajun an ixlamap'a'sin Moisés. 5Ani sacerdotejnin yu'uncha wa yucha an ixma'stele'k'an yu lak'alinachalh sawalh anu lakt'iyani taputapatsay, tacha an junikalh an Moisés akxni mala'oxinikalh an tabernáculo tan ixchin an ix'alhp'asninti Dios, akxni junkan: “Oxi k'alhak'ap'up'i, chux an tanlhun ch'unch'a k'a'ilht'u, t'ach'a an masunik'a an a'stitawk'a.” 6Pero an xa'ay tukan kisacerdotejk'an, yu la'a'ita ixpusacerdote yu palay oxi, yucha yu palay oxi lakchiwinti kintaput'atamakawnan, mu yu palay laj'oxi tanlhun yu akintaxta'nikanani pupastakchalh.

7Li an yu p'ulhnaj lakchiwinti yu kintaput'atamakawkan jantu inta kaxlits'an'alh, pus jantucha tu'u kaxlitask'inilh li kax'alimpalh yu ixlipu'a't'uycha xakintaput'atamakawkan. 8Pero an Dios la'cha'alhi tan jantu oxi ixtat'ajun an lapanakni chi nawlh:

An Jamach'alhkat Dios najun:

kamina wilhchan akxni tumpaj ajkat'atamakawcho'oya an ixlapanakni an Israel chi an ixlapanakni Judá.

9Ani lakchiwinti yu ajkaput'atamakawcho'oya jantu yu tacha an ik'ilhtulh ali an yu t'a ixjalhila'ts'inat'it,

akxni ijkala'ma'ch'apachalh para li ajkamaxtuchalh Egipto.

Chi mu yu'uncha jantu tamuktaxtulhi tacha an ijkajunilh,

kit'in ijkamakawlh, najuni an Jamach'alhkat.

10An lakchiwinti yu ajkaput'atamakawna an ixlapanakni Israel ixli'astan

yucha ani, najuni an Jamach'alhkat:

An la ixjatapast'ak'atk'ani ak'ilhtuya

li katalhitsukulh an kilhamap'a'sin

chi la ixjalhunutk'ani ajkats'o'muk'aniya'.

Kit'ini ixDiosk'an ajkuna chi yu'uncha kilapanakni katajuna'.

11Chi jantucha xamati katit'alamasunilh ixt'alapanak,

chi kamasunilh xamati ixt'ala'ajun, kajunilh,

k'amisp'at'icha an Jamach'alhkat.

Mu ixchuxk'ani akintamispaya',

sta yu wa lakt'ikt'in chi yu laj'ajin.

12Ajkamala'mixiniya tanlhun yu jantu oxi ta'ilhtuta,

chi jantucha a'tam aktijapastaknilhi ixtala'alhink'an.

13Li lhichiwiniya an Dios yu sast'icha chiwinti putamakawcho'okan, an yu p'ulhnaj at'ilhcha ilhtulh, chi yu at'ilhcha chi yu jantucha xa'a'ikan wa k'ischa ts'an'aniy li kala'mixacha.

Currently Selected:

HEBREOS 8: tpp

Highlight

Copy

Compare