2 Tiq mod ser liq 1

Awg chawd haq duhd nuhd che tawd

1-2Yer suq Khreq haq te lehq co ha gha teq che yaog lehd koz che kar tiq tawd khuhd awg lawn koz mar vid tug, Ghig sa ve a lor cawd che haq te lehq Yer suq Khreq ve cuh yad#1:1 cuh yad Yer suq lez yug lehq cuh peha che chaw. Mk 6:30, 1K 1:1 phehq che ngag Pawd loq awr lehr, ngag haq che yad#1:1 ngag haq che yad Pawd loq bon mar vid lehq Khreq yad phehaq lar che te lehq che kheh koz che yaog. Tiq mod ser haq liq che buhq fea che yaog. Awr pa Ghig sa he lehq a nig ved Jawd mawd Yer suq Khreq ve awg bon awg sinx, har kax vix che ted ceng he lehq duhd sa gad sa che ted ceng nawg geh cawg vid-oq.

Yer suq awg pun sax khiz khanr tug mad yaq taw

3Bon lawg che awg khuhn ngag nawg haq khar thad liz duhd nuhd lehq Ghig sa haq ngag chid muh che yaog. Ngag ved a pux a pi teq pa heh te lehq, daq che kehg che sir vix che ni ma cawg che awg khuhn yawd awg pun ngag liz kanx te che yaog. 4Nawg ved mehz ghig yaq che haq ngag duhd nuhd che te yand, ni gha hax gha lia ngag nawg haq mawg gad chehd che yaog. Nawg haq gha mawg ver, ngag ha lehg che cawg mad-ag tug yaog. 5Nawg ni ma awg tawg kha gag yonr che ted ceng haq ngag duhd nuhd che yaog. Nawg yonr che awr lehr, awg kawd thad nawg ved a pi Lawd iz he lehq nawg ved awr ye#1:5 nawg ved awr ye Tiq mod ser ve awr ye awr lehr Yud daq chaw phehq che yaog. Cy 16:1 Ud niq awg khuhn cawg lehq, a meha nawg awg khuhn lo liz cawg che haq ngag kha nehax sir che yaog. 6Ta lend mehr. A mir toq tuag che heh, ngag nawg thang huh laq kuhr tar cheaq te lehq nawg cawg lar che Ghig sa ve laq sawnr haq nawg khar thad liz yehd don chehd-oq. 7Awg lawn ghod ver, Ghig sa awr lehr a nig haq kuhz vix che ni ma pehar che ma hez. Kheh ma khuhd, kand pax cawg che ni ma, haq pehnd che ni ma he lehq a sug yawd awg ton haq ghad vix che ni ma yawd a nig haq pehar che yaog.

8Kheh te lehq, a nig ved Jawd mawd Yer suq awg pun sax khiz khanr tug tad yaq taw. Yawd awg pun thawnr khuhn gha chehd che ngag haq te lehq liz tad yaq taw. Ghig sa ve kand pax haq yehd lehq, ha lehg che bon khuhd#1:8 ha lehg che bon khuhd Yer suq haq yonr ver thaer khuhq che haq gha che haq koz che yaog. awg pun gha tuq gha khanr che teq pa haq ngag geh teq geha khanr-oq. 9Ghig sa awr lehr, a mig thad lo mig gig haq maq te phanr ser thad loar, yawd duhd lar che heh phehaq vid tug, yawd ved awg bon haq te lehq a nig haq thaer khuhq ax lehq,#1:9 thaer khuhq ax lehq Ned haeg ve kand pax awg huhx lo pong ax che haq koz che yaog. daq kehg che haq te tug awg pun a nig haq kug yug lar che yaog. A nig kanx te che haq te lehq yawd pehar che ma hez. Yawd ved awg bon u ve awr lehr, Yer suq Khreq haq te lehq a nig haq pehar lar lehq, 10A nig ved Thaer khuhq par Yer suq Khreq tuhaz che haq te lehq, a meha awg bon u ve haq a nig kha sehax gha mawg che yaog. Yawd awr lehr, suh che ted ceng haq te lug lehq, co ha teq che ted ceng he lehq mad lug ma sez vix che ted ceng haq, ha lehg che bon khuhd awg khuhn lo kha sehax tuhaz vid lar peg che yaog.

11Ha lehg che bon khuhd che awg pun bon mar par, cuh yad he lehq sar lar te tug, Ghig sa ngag haq lez yug ax che yaog. 12Kheh te cheaq te lehq, ngag che kheh gha tuq gha khanr che yaog. Kheh ma khuhd, ngag mad yaq taw. Awg lawn ghod ver, ngag yonr chehd che awg sehr phad haq ngag sir chehd che yaog. Ngag yawd haq kha chid aq vid lar che#1:12 kha chid aq vid lar che Pawd loq ve awg ton, co ha, yawd te lar che kanx he lehq yawd mar gha lar che chaw teq pa haq koz che yaog. teq pa, awg ni u ve teq ni kha gag#1:12 u ve teq ni kha gag Suhx jehg che awg ni haq koz che yaog. yawd haq sax lar gha che yaog lehz ngag kha nehax sir chehd che yaog. 13Yer suq Khreq haq caz daq che yonr che he lehq haq che ted ceng khuhn, nawg awr lehr, ngag geh gha kad lar che daq jad cawd jad che tawd khuhd teq pa haq kha nehax na yug lehq te kae-o. 14A nig awg khuhn chehd chehd che Daq che kehg che Awg ha phu haq cud lehq nawg haq chid aq ax peg che#1:14 chid aq ax peg che Bon khuhd mar che kanx haq koz che yaog. 1Ti 6:20 daq jad che awg ceng haq kha nehax haq sax laor.

15Ar siq muhd mig#1:15 Ar siq muhd mig A meha Tu ra ki muhd mig haq koz che yaog. khuhn chehd che chaw awg gha lia ngag haq chid bag lar haz vehr che lehz nawg sir che yaog. I hehd awg khuhn, Phur ger luz he lehq Her rar mod genr liz chehd che yaog. 16Awd ner sir phawd#1:16 Awd ner sir phawd Pawd loq bon ca tod mar thad yawd ved yehg awg khuhn jehd lehq mar che yaog. Liq che haq buhq chehd thad huh yawd suh vehr che haq sur che yaog. 1:18 ted yehg haq Jawd mawd Yer suq har kax che ted ceng cawg vid-oq. Awg lawn ghod ver, yawd ngag haq laex pawz duhd sa tug tea che yaog. Ngag son caz pheh lar che haq yawd mad yaq taw. 17Yawd Rod maq med lo lag gag che te yand, ngag haq mawg thad kha gag hax ceh nux ca che yaog. 18Yawd awr lehr, suhx jehg suhx taz che awg ni teq ni khuhn Jawd mawd Yer suq geh har kax che ted ceng haq gha tug, Jawd mawd Yer suq yawd haq har kax vid-oq. Ed fed suq med khuhn liz, yawd ngag haq khawd-ehg taw maq ga lar peg che awg lawn haq nawg kha nehax sir chehd che yaog.

Currently Selected:

2 Tiq mod ser liq 1: lhiNT

Highlight

Copy

Compare