Ezekẹlu 31

Oshi sida, nọ l'úbvú úbvú Lébanọnu

1O be l'apha k'iri lẹ nanụ lẹ mbọku, ọnwa k'ẹto fụru; Chipfu bya epfuru opfu yeru mu sụ: 2“Nwa ndiphe; sụ Fero, bụ eze ndu Ijiputu yẹe igwe ọha iya lẹ-a:

“ ‘?Bụ onye bẹ aa-tụkporu

ngu yeru lẹ g'i gude

habe shii?

3Lewarọ Asiriya ono,

shi bụru oshi sida

nọdu l'úbvú úbvú

Lébanọnu ono;

O shi nwegbaarụ ẹkali,

amakọta ntụmatu;

ọ jaa kpuru kẹ yẹketee;

sọ-kputekọta ọswa,

ọ nọ.

O vua; haa l'eli;

mkpakpọnu iya ẹphe

l'akpaminigwe je

anmaa ẹka l'imeli.

4Mini, nọkota l'ẹka ono

mee iya;

ọ nọdu abya kẹ

kpukakpuka.

Mini, shigbaa l'ime alị

anwụshi mee ya;

o vua ha ogologo.

Mini, shigbaa lẹ nggele

ọgba ono nọdu

asọ-phekọta upfu

iya mgburugburu;

Ọ bụru ẹka ono bẹ mini

ono eshije sọwaruro

dzuru oshi nọkota

l'ọswa ono.

5No iya; o vua; kakọta iphe,

bụ oshi,

nọ l'ọswa ono l'eli.

Ọ kabaa ajakashị ajakashị;

tẹme ẹkali iya tsechaa

ogologo ogologo.

Ọ jakashịru ẹgube ono;

kẹle mini dụ l'ẹka

ono ọkpobe adụdu.

6Iphe, bụkpoo ẹnu,

ephe l'eli kpashịkota

ẹpfune l'ẹkali iya.

Iphe, bụ anụ-ẹgbudu

bụru lẹ mkpula iya

bẹ ẹphe azụshi ụnwu.

Iphe, bụ ọhamoha,

hagbaa shii lwakọtaru

lẹ mkpula ibvu iya.

7Iphe, oshi ono ama bẹ

dụ biribiri;

ọ jakashịru nọdu kẹ

kpuchii;

kẹle ọgbarabvu iya

nọchaa je agẹbe l'ẹka

mini dụ ọkpobe

adụdu.

8O to nwedu oshi sida,

nọgbaa lẹ mgbabu

Chileke dụru ọphu

atụru iya nụ.

Ọphu oshi payịnu

atụduru ẹkali iya.

Mbụ ọphu oshi mmanụ

ta ajakashị-beduru

g'ẹkali iya jakashịru.

Ọphu ọ tọ dụdu oshi,

nọgbaa lẹ mgbabu

Chileke dụru ọphu

mapfuru iya lẹ mma.

9Ọo mbẹdua meru iya;

ọ nọdu ama mma;

jakashịa ẹkali

igwerigwe ẹgube ono;

Mbụ k'ọphu bụ l'iphe,

bụ oshi,

nọkota lẹ mgbabu

Édẹnu,

bụ mgbabu Chileke

ono ejikọtaru iya

ẹnya.

10“ ‘Ọo ya bụ lẹ-a; Wakwa iphe, Nnajịuphu, bụ Chipfu epfu baa: Eshi ọphu o vuliru imeli imeli; mbụ vughatakọta iphe, bụ ẹpfukala; tẹmanu ọ nọdu eku onwiya; kẹle ọ ha l'eli 11bẹ mu nwuwaru iya nụ onye bụ ishi ọhamoha; g'ọ pfụa ya ụgwo g'ẹjo-iphe oome gbaru; mbụ lẹ mu nwutawaru iya nwucha. 12Ndu ọhozo; mbụ ndu ọha, bụ phẹ kakọta ẹjo ọkpoma bẹ butawaru iya tụa; ngeghata. Ẹkali iya dakachaaru l'úbvú úbvú; mẹkpoo lẹ nsụda nsụda. Ụnwu ẹkali iya nyakwoshihuwaru dabyicharu lẹ nggele alị ono. Iphe, bụ mkpụkpu, nọkota lẹ mgboko, bụ ndu shi nọdukota iya lẹ mkpula bẹ lụfutakotawaru nụ; gbado iya. 13Iphe, bụ ẹnu, ephe l'eli; bya anyịnwua oshi ono, daru adada ono. Anụ-ẹgbudu l'ophu bya anọdugbaa l'ẹkali-oshi ono. 14Ọo ya bụ; g'o to nwehẹru oshi ọzo, nọgbaa l'agụga mini, byaru evutabaa kuahaa onwiya; kẹle ọle ọ ha l'eli; mbụ kẹ g'o vuta g'ẹphe l'akpaminigwe je anmaa ẹka l'imeli. Mbụ l'o to nwedu oshi, amịtakpo mini amịta l'alị, byaru a-habaa l'eli ẹgube ono; kẹle e mewaru phẹ g'ọ bụru anwụshihu bẹ ẹphe a-nwụshihu; laa l'ime alị; mbụ je anọdu ẹphe lẹ ndiphe, nwụshihuwaru kpoda l'ilu.

15“ ‘Wakwa iphe, Nnajịuphu, bụ Chipfu epfu baa: Mbọku ono, ọ larụ l'alị-maa bẹ mu meru g'aphụ kpukposhi mgboko. Mu gude mini-ime-alị woru iya byẹ-mia; bya emee; nggele nọgbanu tabushihu ẹbo; ẹnyimu sọ-buhu asọso. Ọ bụru opfu ẹhu iya bẹ mu gude mee g'úbvú úbvú Lébanọnu nọdu l'aphụ. Iphe, bụ oshi, nọkota l'ẹgbudu nwụlwashihukota anwụlwashihu. 16Mu meru g'ọhamoha nmakọta jiijiijii l'ọda, ọ daru teke mu nwuru iya chie l'alị-maa g'ọ lapfu ndu ọphu kpolahụhawaru l'ilu; tẹme oshi, shi pfụgbakwaarupho lẹ mgbabu Édẹnu; mbụ oshi ndu ọphu shi kakọta ree; bya ahacha okporokpo l'úbvú úbvú Lébanọnu, bụ iya bụ oshi, mini shi dụkota l'ẹka ẹphe nọ rengurengu bẹ obu byaru ejizeta l'ime alị ẹka ẹphe nọ; teke ono ọ daru ono. 17Iphe, bụ ndu shi nọdu l'ibvu iya, bụ ndu shi bụru agbarike iya bẹ yẹe ya tụkoakwarupho lakọta l'alị-maa; lapfu ndu ọphu e gude ogu-echi gbushia.

18“ ‘?Bụkpoo oshi ole lẹ Édẹnu atụkporu ngu l'úbvú, ị dụ; yẹe g'i gude paa ẹka apaa? Obenu l'aa-tụko unu l'oshi Édẹnu; nwuru chie l'ime alị. Unu lẹ ndu te ebuduru úbvù; waa ndu e gude ogu-echi gbushia bẹ a-tụko zẹ l'ẹka lanụ. Noo g'ọo-dụru Fero yẹe igwe ọha iya bụ ono. Nokwa iphe, Nnajịuphu, bụ Chipfu epfu.’ ”

Currently Selected:

Ezekẹlu 31: Izii

Highlight

Copy

Compare