Ozhi ndu ishi-ozhi 15

Ndzuko lẹ Jerúsalẹmu

1O nweru ndu shi lẹ Judíya bya bya awata ozhi ụnwunna ono sụ: “A ta adzọfutakwa unu m'ọ -bụ-zhidua l'unu buru ugvu lẹge Mósisu sụru t'e buje iya.” 2Whẹ lẹ Pọlu whẹ tụkfuta ẹgo. Pọlu yẹle Bánabasu kfuderu whẹ l'iwhe whẹ l'ekfu bụ whẹ ejire. A nọnyaa, a bya achịa idzu sụ lẹ Pọlu, mẹe Bánabasu, mẹe ndu nke Kuráyisutu, harụ nọdu lẹ Ántiyọku l'e-je Jerúsalẹmu je ekfuru ndụ-ishi-ozhi, mẹe ndu e meru ọgurenya chọchi iwhe ono.

3Chọchi byanụ ezhi whẹ, whẹ jeshia. Gẹ whẹ l'eje ono bẹ whẹ shitaru Finíshiya lụfuta lẹ Samériya, shia ẹka ono jeshia. Iwhe whẹ shi ishi lanụ akọ l'ẹka lile, bụlewho lẹge ndu l'ẹte abụa ndu Ju gude ghachi bya ekweta l'ọo Jisọsu bụ Onye-Nwe-Ọha. Ụnwunna nụa iwhe ono; ẹhu tsọkota whẹ ụtso shii. 4Pọlu whẹ rwua Jerúsalẹmu; ndu chọchi mẹe ndụ-ishi-ozhi mẹe ndu e meru ọgurenya chọchi gbobe ẹka labọ nata whẹ. Whẹ bya akọkotaru whẹ iwhe Chileke gude whẹ mee.

5Ndu gba l'ọgbo ndu Fárisii, harụ bụwaru ndu nke Kuráyisutu gbalihu sụ: “Ndu ono, l'ẹte abụa ndu Ju, wowaru onwowhe ye Jisọsu l'ẹka bẹ bufutaje ugvu, t'e zhia lẹ whẹ mefutajekwa iwhe Mósisu kfuru l'iwu t'e mejee.”

6Ndụ-ishi-ozhi mẹe ndu e meru ọgurenya chọchi bya anọkobe tẹ whẹ lerwua ẹnya l'okfu ono. 7E kfunyazhiawho okfu ono; dzọkashinyaa ya; Pyita gbalihu sụ: “Ụnwunna mu, unu marụ-a l'o nweru nteke Chileke họtajeru mu t'ọ bụru l'ọnu mu bẹ ndu l'ẹte abụa ndu Ju l'e-shi nụa ozhi-ọma-a, kweta l'ọo Jisọsu bụ Onye-nwe-whẹ-nụ. 8Chileke, onye bụ iya marụ obu madzụ bya egoshi anyi lẹ ya natakwarụ whẹ nkele ọ nụru whẹ Ume-Dụ-Nsọ lẹge ọ nụru iya anyịbedua. 9Ọo iwhe anyi bụ bẹ whẹ bụ l'iwhu Chileke, o noo nkele ọ safụkotawaru whẹ iwhe-dụ-ẹji, whẹ metagbaberu. Iwhe meru ọ safụ whẹ iya bụ lẹ whẹ woru onwowhe ye iya l'ẹka. 10Sụa ?unu kwoberu gụnu eme t'unu data Chileke sụ l'ọo tẹ ndu ono, bụwaa nke Kuráyisutu ono meje iwhe iwu kfuru? A -bya ekfua ya nno bụkwa ivu-ẹrwa bẹ unu l'ebo whẹ, mbụ ivu-ẹrwa, anyi l'adụa ike vua, nna anyi ochee whẹ ta adụ ike vua ya. 11Awakwa-o! Anyi kwetaru lẹ Onye-Nwe-Ọha, bụ Jisọsu bẹ l'e-gude nke eze-iwhe-ọma ono, l'ọonoje eme dzọo anyi, ọ bụkwaruwho nno bụ gẹ l'ọo-dzọ whẹ.”

12Igwe-ọha ono kwee nọ-kirishia ngabẹ nchị. Pọlu yẹle Bánabasu kọlahaaru whẹ iwhe-awhụrulenya, dụ-gee biribiri, Chileke gude whẹ meeru ndu l'ẹte abụa ndu Ju. 13Whẹ kọ-gele iya whọ, Jémusu gbalihu sụ: “Ụnwunna mu, unu ngabẹ nchị l'iwhe-e, mu bya l'ekfu. 14Lẹ Sáyịmonu Pyita kọwaru anyi gẹ Chileke meru nteke o beberu họtalahaa ndu l'ẹte abụa ndu Ju tẹ whẹ bụru ndu nkiya. 15Iwhe ndu l'ekfuchiru Chileke kfuru mẹe okfu ono, Pyita kfuru je adagba, bụleruwho iwhe lanụ, bụkwanu iya bụ g'e deru iya l'ẹkwo okfu Chileke sụ:

16“ ‘E megelewho bẹ mu l'a-dawhu azụ

bya edokwaa ụlo Dévidi, zeshihuru ezeshihu.

Ọo ụlo iya ono, zeshihuru ezeshihu

bẹ mu l'a-tuwhu azụ ọdo.

17Ọo ya bụkwanu nke ọwhu ndu ọdo gẹ whẹ hakọta

l'a-watakwanụ ọcho ụzo nke mbẹdua,

bụ Onye-Nwe-Ọha,

bụ iya bụ iwhe bụ mba lile,

mu kuru tẹ whẹ bya abụru ndu nkemu.

O noo iwhe Onye-Nwe-Ọha l'ekfu,

mbụ onye mekotaru iwhe ono g'ọ ha

18a marụ nteke teru ẹnya.’

19“Sụa, l'ọnu ọwhu mbẹdua l'eye bụ t'anyi be ejekwa ome iwhe l'atsụ ndu l'ẹte abụa ndu Ju ono, wowaru onwowhe ye Jisọsu l'ẹka ono, mbụ nke t'anyi sụ l'ọo tẹ whẹ tụkota iwhe iwu kfuru mekotaje. 20T'anyi dechiaru whẹ ẹkwo sụ whẹ tẹ whẹ be erikwa iwhe a gbarụ ẹja, o noo l'e merwuwaru iya emerwu, tọ dụhunu onye l'e-jekfu nwanyị, l'ẹte abụa nyee ya. Whẹ ta atajẹ anụ, a swị-gburu aswị-gbu, whẹ ta atajẹ mmee iwhe. 21O noo l'iwu Mósisu b'e shiwaa nteke teru ẹnya gụta l'ụlo-ndzuko. O to nwedu iwhe bụ mbọku ọtuta-ume ndu Ju, l'ẹte agụje iya. L'aaryakwa iya whọ arya lẹ mkpụkpu gẹ mkpụkpu ha.”

Ẹkwo, l'eede anụ ndu Kuráyisutu, l'ẹte abụa ndu Ju

22Ọo ya bu, ndụ-ishi-ozhi mẹe ndu e meru ọgurenya chọchi mẹwaro ndu chọchi l'owhu bya achịa idzu, họta madzụ yeru Pọlu yẹle Bánabasu tẹ whẹ jeshia Ántiyọku. Ndu whẹ họtaru bụ: Júdasu, onye l'eekuje Basábasu, họtakwawho Sáyilasu. Ụmadzu labọ ono bẹ tụkoru lịru l'ụnwunna bụ ndu bụ ishi lẹ chọchi. 23A bya edee ẹkwo nụ whẹ. Iwhe e deru l'ẹkwo ono bụ:

Anyịbe ndụ-ishi-ozhi, mẹe ndu e meru ọgurenya chọchi, bụ ụnwunna unu l'ekelekota unubẹ ụnwunna ono, l'ẹte abụa ndu Ju, bu lẹ Ántiyọku, mẹe lẹ Siriya, mẹe lẹ Silísiya.

24Anyi nụwaru l'o nweru ndu shi l'ọgbo anyi-a bya egude okfu-ọnu; kpakashịa unu obu mee: obu ta adụhe unu l'ọrwu iya. Ọ tọ kwa anyi zhiru whẹ tẹ whẹ bya emee iwhe dụ nno-o. 25O noo g'o gude obu bụru anyi nnanụ, anyi chịa ya idzu sụ l'anyi l'a-harụ madzụ họta, zhi whẹ tẹ whẹ byakwa bya ekfuru iya unu. Ndu ono, anyi zhiru nno bẹ whẹ l'ọnya anyi whẹ, anyi yeru obu, bụ Bánabasu yẹle Pọlu lịkwa. 26Bánabasu yẹle Pọlu bẹ bụ ndu ono, kwobewaru okfu ẹhu Onye-Nwe-Ọha, bụ Jisọsu Kuráyisutu lọo ishi whẹ alọ. 27Anyi zhiru Júdasu yẹle Sáyilasu tẹ whẹ bya l'onwowhe bya egudewaro ọnu whẹ kfuwaruro unu iwhe-e, anyi deru edede-e. 28O noo lẹ Ume-Dụ-Nsọ bẹ anyi l'iya tụkoru chịa idzu sụ l'anyi te ebodu unu ivu, gbahalẹwho ishi okfu-a bụ iya bụ: 29T'unu be erikwa iwhe a gbarụ ẹja, unu ta ata mmee iwhe, unu ta ata anụ, a swị-gburu aswị-gbu, tọ dụ onye l'e-jekfu nwanyị, l'ẹte abụa nyee ya. Unu -mewaa iwhe lile ono bẹ nke ọma l'e-mekwaru unu.

Unu buru guu.

30A sụ ndu e zhiru ozhi ono tẹ whẹ jeshia. Whẹ rwua Ántiyọku, bya ekukobe ndu chọchi ono; bya eworu ẹkwo ono nụ whẹ. 31Ndu chọchi ono gụ-gelewho ẹkwo ono, ẹhu tsọo whẹ ụtso lẹ nke ozhi ono, meru whẹ zhia ume. 32Júdasu yẹle Sáyilasu, tụkokwaruwho bụru ndu nkfuchiru Chileke l'onwowhe kfuaru ụnwunna ono okfu nọo ọdu, agbẹe whẹ ọkpu-ike, emekwawho tẹ obu shihu whẹ ike. Whẹ mekwaawho tẹ ekwekwe, whẹ kweru nke Kuráyisutu kabaa oshihu ike. 33-34Whẹ nọnyaa l'ẹka ono, ụnwunna ono kwakọberu whẹ sụ whẹ tẹ whẹ laa guu. Whẹ dawhushia azụ, lakfu ndu zhiru whẹ nụ lẹ Jerúsalẹmu.#15:33-34 Ọle Sáyilasu bẹ kpeburu l'iya l'a-nọdu l'ẹka ono.

35Pọlu yẹle Bánabasu je anọta lẹ Ántiyọku. Whẹ lẹ ndu ọdo tụko ezhi okfu Onye-Nwe-Ọha ezhi; arya iya arya.

Pọlu yẹle Bánabasu lịkahuru

36A bya anọkwaa ujiku olemole, o be ujiku lanụ, Pọlu sụ Bánabasu: “T'anyi dawhugezhia azụ l'ẹka lile, bụkota mkpụkpu, anyi mewaru t'a marụ okfu Onye-Nwe-Ọha, je agbawhegezhia ụnwunna nggẹ anyi amawarụro gẹ whẹ l'eme eshi.” 37Bánabasu sụ tẹ whẹ duta Jọnu Makụ tẹ whẹ l'iya lịru. 38Pọlu sụkwanu l'ọ ka ree tẹ whẹ be edukwawho ẹgube onye ono, gbaghahawaru whẹ gẹ whẹ nọ lẹ Pamfíliya, to tsohe whẹ jefu ozhi ono l'ishi. 39Whẹ tụ-tabe iya ẹgo nke ọwhu a nọnyaaru, whẹ shia iche iche. Bánabasu duta Makụ, whẹ jeshia Sáyipurọsu. 40Pọlu duta Sáyilasu tụgbua. Ụnwunna woru whẹ ye l'ẹka Chileke tẹ Chileke mejeeru whẹ eze-iwhe-ọma. 41Pọlu jekota Siriya mẹe Silísiya, je emee t'obu shihu ndu chọchi, nọ-gee l'ibiya ono ike.

Currently Selected:

Ozhi ndu ishi-ozhi 15: Ezaa

Highlight

Copy

Compare