Malakayi 4
4
Mbọku ikpe Nchileke
1Ojejoje, bụ Ọkaribe-Kakọta-Ike sụru: “Unu lekwaa. Lẹ mbọku ọbu abyaakwa. Mbọku ono a-nọdu enwu kfukfukfu l'ọ bụ ọku-ụzu. Ndu eku onwẹphe ekuku; mẹ ndu eme ẹjo iphe l'ẹphe ha; bẹ ọku ono e-ke l'ọ bụ oshi; kekota ẹkali ẹphe; mbụ kee kee ẹphe l'ọ́gbaragba. 2A bya l'unubẹ ndu atsụ yẹbe Ojejoje egvu; ọ bụ unu; bẹ odobe ẹka ndoo kẹ yẹbe Ojejoje a-haru l'ọ bụ l'ẹnyanwu. Ọo-nọdu egbu nwịinwii l'ọ bụ ẹnyanwu l'ẹhu unu; mee t'ẹhu dụ unu mma. Unu a-lụfuta bulahaa nggada l'ọ bụ nweswi, a tụfutaru l'ọka. 3Ono teke unu a-dzọpyabe ndu eme iphe dụ ẹji ọkpa; gude ọkpa futoo ẹphe; ẹphe abụru ntụ mbọku ono, ya e-me iphe ono. Ono iphe Ojejoje, bụ Ọkaribe-Kakọta-Ike ekfu ndono.
4“Unu nyatakwa ekemu ono, ya tụru nụ nwozi iya; mbụ Mósisu; mbụ ekemu; mẹ ome-l'alị ono, ya koshiru iya lẹ Ugvu Sáyịnayi t'o je ezia ụnwu Ízurẹlu l'ẹphe ha ono.
5“Unu lekwaa; lẹ ya e-ziodukwa onye nkfuchiru iya, bụ Elayija t'ọ bya; tẹmanu oke mbọku ono, bụ Eswe kẹ yẹbe Ojejoje ono erua. 6Ọ bụ iya e-me ndu, bụ nna t'obu ẹphe nọdu l'ẹke ụnwu ẹphe nọ; bya emee t'obu ụnwegirima nọdukwaphu l'ẹke nna ẹphe nọ. Ọdumeka; bẹ kwa ọnu; bẹ ya a-tụ alị unu teke ya byaru.”
Currently Selected:
Malakayi 4: Ikwo
Highlight
Share
Copy
Want to have your highlights saved across all your devices? Sign up or sign in
© 2014 Wycliffe Bible Translators, Inc. in cooperation with Abakaliki Literacy and Translation Trust