Roma 12

Sangal de ha jam yaga mwât fwôm Dagwi

1Ano kwong, à begwa, yaga Dagwi a ga tosho reyɔm mot sizɔng, ma sé shonong e ra yin wɔgɔ, yin a nára bato min sede nɔrɔ̂ yas de be yɛt vɔk na Dagwi jeng de yin a rɔngɔl beken. Nára hin bato min, na yin a ra a yɛ fwom, na yin a pɛngɛ a yɛ yey. Gwong a gwomo de gwa sé tyɛng na yin a re a Dagwi fongol e ji gwɛ. 2Yin to re nuyel na tɛ́sɛ bato min e de raà negwɔn jey yemo wɛt. Ko tik na Dagwi a sege neyey min yi na sege báre min, na he tɛ́ ɛ pas. Yi ano, yin a rɔda tɔk pyɛ de Dagwi e simo. Pyɛ mo ya sé ryat, ye pɛngɛ a yɛ yey, ko ya to sé gyat arɔng.

3Yaga nɔrɔ de Dagwi a ga nɔng me yi na nerat mɛ, ma sé ha a kawɛ e ji min há hemo ngan: Yin pyɛ min yin bare wɛt wɔgɔ, yin a sé berey yin a dal pyɛ de yin a sé. Ko gyéng in bato min, na yin a mara bato min tyɛng na nepyak sêy tsak o de Dagwi a nɔng in. 4Kawɛ mwat a vɔk rebek rining de ra vɔk nedem pyak, ko nedem o na vɔk tom mɛn detidetu. 5A sé tyɛng ano arɔng na wot. Mwa ano de wot a sé pyak, ko wot a wuna hot na wot a tɛ́ ot rebek rining, yaga wot a sé sangal e ji nesa na Kristi. Ko kawɛ e ji mot a sé dem hê mwa bwang vane de ba ga wuna hɛn ano. 6Wot a vɔk nenɔrɔ detidetu tyɛng na nerat de Dagwi a dura a wot. Ka sede ba nɔ̂ng mwat hwak nɔrɔ̂ zarap, ko tik na a ra fwom na hɛ tyɛng na pyɛ́ de wot a sey tsak o na yɛ̄. 7Ka sede ba nɔng ɛ nɔrɔ̂ râ fwôm sɛlɛ̂ bemat-raa, ko tik na a ra fwom o. Ka sede ha sé hê bása, ko tik na a basa. 8Ka sede ha sé na a gwɛsɛ a bemat gap, ko tik na a gwɛsɛ a yɛn gap. Mwat de a vɔk pyɛ́ na a sɛlɛ mɛ̀ vemo de ba bidɛ, tik na a nɔng yɛ̄ gǎn. Mwat de a sé mwât nuyel, tik na a ye ngyɛ́k e de râ fwom o. Ko mwat de e sɛlɛ vê reyɔm, tik na a sɛlɛ hɛn na yey pyɛng.

9Tik na yin a tɛ̀ yey na bemat e gwong de gwa sé mwin. Bɛrɛng hin pyɛ́ de ya sé vyes fus. Ko wuna hin gak na pyɛ́ de ya sé ryat. 10Tɛ̀ in yey na bemín sede begwa. Nɔng în bemín nerey de na dal nemo de yin e simo pyɛ min. 11Yē in ngyɛ́k e ji fwom min, ko yin sè beriri wɛt. Rá in a Darwey fwom na yey rining yi na Gabik Dagwi. 12Vɔk in yey pyɛng, yaga yin a sɛt yey min e ra Dagwi. Niri hin jeng de yin e sɔ reyɔm. Rá in won kayɛ jeng. 13Gás in pyɛ́ de yin a vɔk na bemât Dagwi de ba bidɛ. Tɔ́k in e de bɛrɛng bemat naka e nelɔ min.

14Rá in won na Dagwi, na a tɛ̀ nerat e ra vemo de be tak a yin reyɔm. Ey, rá in won na a tɛ̀ nerat e ra yɛn, ko yin dùsa hɛn wɛt. 15Vɔk in yey pyɛng tanga vemo de ba vɔk yey pyɛng; tosho hin tanga vemo de be tosho. 16Sangal hin tyang na bemín. Yin dak kaa wɛt, ko yin simo na yin a wuna bato min na vemo de ba sé pyɛ cak wɛt. Yin tɛ̀ bato min wɛt wɔgɔ, yin a vɔk tɔ́k.

17Ka sede mwat hwak a ra a yin pyɛ vyes, yin to tala hɛ na neves wɛt. Yē in ngyɛ́k, na yin a ra pyɛ de ya sé ryat e bayîs kawɛ mwat. 18Rá in kayɛ pyɛ de yin ê tɔk ra e bak o mwin, na yin a bin sangal tyang na bemât mwa. 19À besâ yey hom, yin toyo a bemat na neves de yɛn a ra a yin wɛt. Ko tík in pyɛ yane na Dagwi, na yɛ a bin dura shom mɛ e ra yɛn. Yaga Dagwi à ye e Bwok-basa mɛ wɔgɔ, “E me de mê toyo a bemat na neves mɛn, ko ma rɔda ra ano mwin.” 20Ko di, rá in pyɛ de bà jɛk wɔgɔ, “Ka sede mwât repugu mō a vɔk vyong, ko nɔng ɛ pyɛ̂ re. Ka sede a wok yêy hwɔshɔ, ko nɔng ɛ pyɛ cak na a sɔ. Yaga, ka sede hwà rá ano, ko hwà rɔda tɛ̀ ɛ a vo rekyen.” 21Hwo tik pyɛ́ vyes ye di wɛng e ra hwo wɛt, ko di wɛng e ra pyɛ́ vyes yi na râ pyɛ́ ryat.

Currently Selected:

Roma 12: bomBI

Highlight

Copy