Matayus 6
6
Bása e ra nɔngɔ̂s vemo de ba bidɛ
1“Tē in naka, yin kwon ra tomong min — yerê vemo de yin e ra, yaga yin e raa Dagwi — e bayîs bemat wɛt, yaga na yɛn a bin di pyɛ de yin e ra. Ka sede yin e ra ano, ko yin ê sɛ̀ pyɔlɔ min wɛt yi na Da min de a sé e ji lagwi.
2“Ano kwong, jeng de hwà sé nɔ̂ng mwat de a bidɛ pyɛ cak, hwo tɛ̀ bemat be gbɔ na be dura pyɛ de hwà sé ra wɛt, sede remo de bemât nenu-neba be ragas e beduk re fongol tanga e nehyok. Yɛn e ra ano, yaga na bemat be nɔng ɛn nerey. Mwin me ha a yin: Yɛn a ga kana sey pyɔlɔ mɛn. 3Ko jeng de hwó nɔ̂ng mwat de a bidɛ pyɛ cak, nɔng ɛ e gwong de vwɔ mwɛlɛng mō gwô tɔk pyɛ de vwɔ yege mō gwa sé ra wɛt. 4Yi ano, pyɛ de hwà ra ya sé e lɛrɛ. Ko Da mō de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”
Bása e ra râ won
(Luk 11:2-4; Mar 11:25-26)
5“Jeng de yin a sé ra won, yin sè sede bemât nenu-neba wɛt! Yɛn e dal na simo be tumal e beduk re fongol tanga e tê nehyok na be ra won, yaga na kawɛ mwat a bin di ɛn. Mwin me ha a yin: Yɛn a ga kana sey pyɔlɔ mɛn. 6Ko jeng de hwó ra won, kyè wɔ̀ yel e duk mō, bang rwi mō, ko rá a Da mō, de be tɔk di ɛ wɛt, won. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.
7“Jeng de yin a sé ra won, yin kwon kyě ha neha nining o de na sé kpɛɛ zɔng, sede bemat de ba tɔk Dagwi wɛt be ra. Yɛn e bare, Dagwi a rɔda wok won mɛn yaga nepyak neha mɛn o. 8Yin kwon sè sede yɛn wɛt, yaga Da min a tɔk pyɛ de yin e simo gyam na yin a rangal hɛ. 9Ano kwong, rá in won sede ngan:
“ ‘À Da mot de hwà sé e lagwi,
tik na be nɔ̂ng reza mō re jɛrɛ nerey;
10tik na jeng de hwô re negwɔm ye vey;
tik na be ra pyɛ́ de hwó simo e jey,
sede remo de be ra e lagwi.
11Nɔng ot pyɛ̂ re de wot e simo yunung.
12Hàla a wot buru de wot a ga ra,
sede remo de wot arɔng wot a ga hàla a vemo de ba ga buru a wot.
13Hwo kwon tik wot wɔ́ e kwɔ̂n setɔgɔs wɛt,
ko sey ot yi na Shetan, wo neves.’
14“Ka sede yin e hàla a bemat buru de ba ga ra a yin, ko Da min de a sé e lagwi a rɔda hàla a yin arɔng. 15Ko ka sede yin e hàla a bemat buru mɛn wɛt, ko Da min a rɔda hàla a yin wɛt arɔng.”
Bása e ra tik rê pyɛ́
16“Ko jeng de yin e tik rê pyɛ́, yin kwon lashe bayis min, sede bemât nenu-neba be ra. Yɛn e bomos bayis, yaga na kawɛ mwat a bin di, yɛn a sé wusal hal. Mwin me ha a yin: Yɛn a ga kana sey pyɔlɔ mɛn. 17Ko di, jeng de hwó tik rê pyɛ́, mɔmɔ rato mō na něy, na hwo kus bayis mō, 18yaga na bemat be tɔk di, hwà sé tik rê pyɛ́. Ko e Da mō zɔng, de be tɔk di ɛ wɛt, de a tɔk. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”
Báng in yas min e lagwi
(Luk 12:33-34)
19“Yin kwon bang a bato min yas e jey wɛt, yaga e ngamo mo bekǔt na sénge be re yɛ, ko begbik arɔng be kulu na be shigi yɛ. 20Ko báng in a bato min yas e lagwi. E hwomo, bekǔt na sénge be re yas o wɛt, ko begbik arɔng be tɔk kulu na be shigi yɛ wɛt. 21Yaga yey mō ya rɔda sè e kwɔn de hwà bang ɛ̀ yas mō.”
Negbêy rebek
(Luk 11:34-36)
22“Bayis ba sé sede kywa-kya wo rebek. Ka sede bayis mō ba sé barat, ko mwa rebek mō rê vɔk negbey; 23ko ka sede bayis mō ba lashe hɛn, ko mwa rebek mō rê sè e lwīl. Yaga ano, ka sede negbey de na sé e ji mō na sé lwīl, ko lwīl gwane gwa rɔda sè mwangalang sedesi!”
Bása e ra rá a Dagwi kɛ yas fwom
(Luk 16:13; 12:22-31)
24“Vit a mwat de ê tɔk ra a beda beba fwom. Kɛ ê bɛrɛng womo ves na a simo woro, kɛ ê tɛ̀ nehywɛ mɛ e ra hâ womo na a byɛs woro. Yin ê tɔk ra a Dagwi tanga yas fwom e jeng jining wɛt.
25“Yaga ano, ma sé ha a yin, yin sap wɛt e ra pyɛ de yin ê re kɛ sɔ na yin a sangal mɛ̀ beken, kɛ e ra berugu de yin a rɔda tɛ̀. Neken na dal pyɛ̂ re wɛt a? Ko rebek arɔng ra dal berugu wɛt arɛt? 26Bɛrɛng hin benon de be kyě tele e lagwi: Be tus pyɛ cak wɛt, be yɛt bwal arɔng wɛt, ko be bang pyɛ́ e begban wɛt. Ko mwa ano, Da min de a sé e ji lagwi e nɔngɔ̂s vɛ pyɛ̂ re! Yin a dal benon o ding-ding wɛt a? 27E wɛ̌ mwat e ji min de e tɔk gwɛ̌ pɔlɔ hining e jey, yaga e sap neken mɛ ɛ?
28“Yaga sɛ́ de yin e sap e ra rehâ berugu ɛ? Bɛrɛng hin gwong de bejamûk hey be ras: Be ra fwom, kɛ be lɔk berugu yaga batô vɛ wɛt. 29Ko ma sé ha a yin, mwa ano de yɔ̀m Gbɔng Gwɔ̀m Sɔlɔmɔn yà sè ryat sizɔng, ko nerât yɛ na ka vey ne gwining e ji bejamuk vane wɛt. 30Ka sede Dagwi e tɛ̀sɛ sɔng gwo sè rwat ano, gwomo de gwa sé kwen yunung ko nahwol vit a gwɛ, ba ga kyé pyɛ́ na gwɛ, tàga yin arɛt? À yin de yin e tɛ̀ gap min mwa e ra me wɛt!
31“Yaga ano, yin hwo sap wɛt, na yin a tē, ‘Wot ê re sɛ́ ɛ?’ kɛ ‘Wot ê sɔ sɛ́ ɛ?’ kɛ ‘Wot ê tɛ̀ sɛ́ arɛt?’ 32Yaga a sé e bemat de ba tɔk Dagwi wɛt de ba sê búm ɛn e de jāmâ pyɛ́ yemo mwa, ko Da min de a sé e lagwi a tɔk, yin e simo mwa pyɛ́ yemo. 33Nduga yin tānga jāma pyɛ́ de ya sé yê Segwɔm Dagwi, na yin a ra pyɛ́ de Dagwi e simo, ko a rɔda gwɛ̌ a yin ɛ̀ pyɛ́ mo mwa arɔng. 34Ano kwong, yin sap e ra nahwol wɛt, yaga pyɛ́ de yin ê sap e ra yɛ̄ nahwol ya sɛ́. Kahɛ tuk ha vɔk reyɔm de ra vey a hɛ.”
Currently Selected:
Matayus 6: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
Matayus 6
6
Bása e ra nɔngɔ̂s vemo de ba bidɛ
1“Tē in naka, yin kwon ra tomong min — yerê vemo de yin e ra, yaga yin e raa Dagwi — e bayîs bemat wɛt, yaga na yɛn a bin di pyɛ de yin e ra. Ka sede yin e ra ano, ko yin ê sɛ̀ pyɔlɔ min wɛt yi na Da min de a sé e ji lagwi.
2“Ano kwong, jeng de hwà sé nɔ̂ng mwat de a bidɛ pyɛ cak, hwo tɛ̀ bemat be gbɔ na be dura pyɛ de hwà sé ra wɛt, sede remo de bemât nenu-neba be ragas e beduk re fongol tanga e nehyok. Yɛn e ra ano, yaga na bemat be nɔng ɛn nerey. Mwin me ha a yin: Yɛn a ga kana sey pyɔlɔ mɛn. 3Ko jeng de hwó nɔ̂ng mwat de a bidɛ pyɛ cak, nɔng ɛ e gwong de vwɔ mwɛlɛng mō gwô tɔk pyɛ de vwɔ yege mō gwa sé ra wɛt. 4Yi ano, pyɛ de hwà ra ya sé e lɛrɛ. Ko Da mō de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”
Bása e ra râ won
(Luk 11:2-4; Mar 11:25-26)
5“Jeng de yin a sé ra won, yin sè sede bemât nenu-neba wɛt! Yɛn e dal na simo be tumal e beduk re fongol tanga e tê nehyok na be ra won, yaga na kawɛ mwat a bin di ɛn. Mwin me ha a yin: Yɛn a ga kana sey pyɔlɔ mɛn. 6Ko jeng de hwó ra won, kyè wɔ̀ yel e duk mō, bang rwi mō, ko rá a Da mō, de be tɔk di ɛ wɛt, won. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.
7“Jeng de yin a sé ra won, yin kwon kyě ha neha nining o de na sé kpɛɛ zɔng, sede bemat de ba tɔk Dagwi wɛt be ra. Yɛn e bare, Dagwi a rɔda wok won mɛn yaga nepyak neha mɛn o. 8Yin kwon sè sede yɛn wɛt, yaga Da min a tɔk pyɛ de yin e simo gyam na yin a rangal hɛ. 9Ano kwong, rá in won sede ngan:
“ ‘À Da mot de hwà sé e lagwi,
tik na be nɔ̂ng reza mō re jɛrɛ nerey;
10tik na jeng de hwô re negwɔm ye vey;
tik na be ra pyɛ́ de hwó simo e jey,
sede remo de be ra e lagwi.
11Nɔng ot pyɛ̂ re de wot e simo yunung.
12Hàla a wot buru de wot a ga ra,
sede remo de wot arɔng wot a ga hàla a vemo de ba ga buru a wot.
13Hwo kwon tik wot wɔ́ e kwɔ̂n setɔgɔs wɛt,
ko sey ot yi na Shetan, wo neves.’
14“Ka sede yin e hàla a bemat buru de ba ga ra a yin, ko Da min de a sé e lagwi a rɔda hàla a yin arɔng. 15Ko ka sede yin e hàla a bemat buru mɛn wɛt, ko Da min a rɔda hàla a yin wɛt arɔng.”
Bása e ra tik rê pyɛ́
16“Ko jeng de yin e tik rê pyɛ́, yin kwon lashe bayis min, sede bemât nenu-neba be ra. Yɛn e bomos bayis, yaga na kawɛ mwat a bin di, yɛn a sé wusal hal. Mwin me ha a yin: Yɛn a ga kana sey pyɔlɔ mɛn. 17Ko di, jeng de hwó tik rê pyɛ́, mɔmɔ rato mō na něy, na hwo kus bayis mō, 18yaga na bemat be tɔk di, hwà sé tik rê pyɛ́. Ko e Da mō zɔng, de be tɔk di ɛ wɛt, de a tɔk. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”
Báng in yas min e lagwi
(Luk 12:33-34)
19“Yin kwon bang a bato min yas e jey wɛt, yaga e ngamo mo bekǔt na sénge be re yɛ, ko begbik arɔng be kulu na be shigi yɛ. 20Ko báng in a bato min yas e lagwi. E hwomo, bekǔt na sénge be re yas o wɛt, ko begbik arɔng be tɔk kulu na be shigi yɛ wɛt. 21Yaga yey mō ya rɔda sè e kwɔn de hwà bang ɛ̀ yas mō.”
Negbêy rebek
(Luk 11:34-36)
22“Bayis ba sé sede kywa-kya wo rebek. Ka sede bayis mō ba sé barat, ko mwa rebek mō rê vɔk negbey; 23ko ka sede bayis mō ba lashe hɛn, ko mwa rebek mō rê sè e lwīl. Yaga ano, ka sede negbey de na sé e ji mō na sé lwīl, ko lwīl gwane gwa rɔda sè mwangalang sedesi!”
Bása e ra rá a Dagwi kɛ yas fwom
(Luk 16:13; 12:22-31)
24“Vit a mwat de ê tɔk ra a beda beba fwom. Kɛ ê bɛrɛng womo ves na a simo woro, kɛ ê tɛ̀ nehywɛ mɛ e ra hâ womo na a byɛs woro. Yin ê tɔk ra a Dagwi tanga yas fwom e jeng jining wɛt.
25“Yaga ano, ma sé ha a yin, yin sap wɛt e ra pyɛ de yin ê re kɛ sɔ na yin a sangal mɛ̀ beken, kɛ e ra berugu de yin a rɔda tɛ̀. Neken na dal pyɛ̂ re wɛt a? Ko rebek arɔng ra dal berugu wɛt arɛt? 26Bɛrɛng hin benon de be kyě tele e lagwi: Be tus pyɛ cak wɛt, be yɛt bwal arɔng wɛt, ko be bang pyɛ́ e begban wɛt. Ko mwa ano, Da min de a sé e ji lagwi e nɔngɔ̂s vɛ pyɛ̂ re! Yin a dal benon o ding-ding wɛt a? 27E wɛ̌ mwat e ji min de e tɔk gwɛ̌ pɔlɔ hining e jey, yaga e sap neken mɛ ɛ?
28“Yaga sɛ́ de yin e sap e ra rehâ berugu ɛ? Bɛrɛng hin gwong de bejamûk hey be ras: Be ra fwom, kɛ be lɔk berugu yaga batô vɛ wɛt. 29Ko ma sé ha a yin, mwa ano de yɔ̀m Gbɔng Gwɔ̀m Sɔlɔmɔn yà sè ryat sizɔng, ko nerât yɛ na ka vey ne gwining e ji bejamuk vane wɛt. 30Ka sede Dagwi e tɛ̀sɛ sɔng gwo sè rwat ano, gwomo de gwa sé kwen yunung ko nahwol vit a gwɛ, ba ga kyé pyɛ́ na gwɛ, tàga yin arɛt? À yin de yin e tɛ̀ gap min mwa e ra me wɛt!
31“Yaga ano, yin hwo sap wɛt, na yin a tē, ‘Wot ê re sɛ́ ɛ?’ kɛ ‘Wot ê sɔ sɛ́ ɛ?’ kɛ ‘Wot ê tɛ̀ sɛ́ arɛt?’ 32Yaga a sé e bemat de ba tɔk Dagwi wɛt de ba sê búm ɛn e de jāmâ pyɛ́ yemo mwa, ko Da min de a sé e lagwi a tɔk, yin e simo mwa pyɛ́ yemo. 33Nduga yin tānga jāma pyɛ́ de ya sé yê Segwɔm Dagwi, na yin a ra pyɛ́ de Dagwi e simo, ko a rɔda gwɛ̌ a yin ɛ̀ pyɛ́ mo mwa arɔng. 34Ano kwong, yin sap e ra nahwol wɛt, yaga pyɛ́ de yin ê sap e ra yɛ̄ nahwol ya sɛ́. Kahɛ tuk ha vɔk reyɔm de ra vey a hɛ.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust