Matayus 17

Bemât Yɛsu betat ba di gbɔng nerat mɛ

(Mar 9:2-13; Luk 9:28-36)

1E bamâ nepɔlɔ netyiimin, Yɛsu a jut Bitrus, na Yakɔp, tanga gwa mɛ Yohana, a vɔk na yɛn e gbɔng raku hwak, ko yɛn a sé e hwomo nju mɛn. 2Ko e bɛrɛng mɛn, ba hwo sege hɛ. Bwang bayis mɛ gwa hwo nɛp sede gwi, ko berugu mɛ ba pɛngɛ pes sede negbey. 3E ji jeng o, bemât masâ fwom mɛ vane betat ba di Mose na Eliya, ba sé ha na Yɛsu. 4Ko Bitrus a hwo tɛ̀ nu mɛ, a yâng Yɛsu, “À Darwey, a sé naka de wot a sé e ngamo! Ka sede hwô simo, mê yong buk tat e ngamo: Gwining yaga hwo, gwining yaga Mose, ko gwining o yaga Eliya arɔng.”

5Jeng de a sé rɔɔ ha, rele de ra nɛp ra yi, ra tɛ̀ necam e ra yɛn. Ko fwɔ gwa hwo yi e ji rele mo, gwa ye, “Hwêy yey hom a hemo, yey hom ya pɛngɛ na hɛ sizɔng! Wok in hâ hɛ!”

6Sede bemât masâ fwôm Yɛsu ba wok fwɔ mo, yɛn a wok bengyip sizɔng, ko yɛn a gaba gup e vwel. 7Ko Yɛsu a vey na yɛn, a ra ɛn, ko a yang ɛn, “Sogo hin! Yin wok bengyip wɛt.” 8Ko jeng de yɛn a yâng bato mɛn cik, yɛn a to di mwat hwak wɛt sɛ̌ Yɛsu nju mɛ.

9Sede yɛn a sé gyirik yi e raku, Yɛsu a nɔng ɛn nu, a yang ɛn, “Yin ha a mwat hwak pyɛ de yin a ga di wɛt sɛ̌ bama de ba ga tānga sene Me de ma tɛ́ me mwat yi e reku.”

10Bemât masâ fwom mɛ mo ba rangal hɛ, “Yaga sɛ́ de bemât basâ Badu ba ye, a sé gbing-gbing na Eliya a tānga vey e ngyen arɛt?”

11A toyo a yɛn, a yang ɛn, “Mwin, Eliya ê vey e ngyen, na a ba yong pyɛ̂ mwa. 12Ko ma sé ha a yin, Eliya à ga kana vey, ko bemat bà tɔk ɛ wɛt, ko yɛn à ga ra a yɛ pyɛ́ de yɛn à simo. Ano arɔng, Me de ma tɛ́ me mwat ma rɔda sɔ reyɔm e vɔ mɛn.”

13E bama mo kwong, yɛn a de tɔk, a sé ha a yɛn e ra Yohana wo batisma.

Yɛsu a tɛ̀ hwey de ha vɔk ceng tyang

(Mar 9:14-29; Luk 9:37-43a)

14Sede yɛn a wɔ̀ sɛ̀ regyɛng bemat, mwat hwak a kyè vey na Yɛsu, a ye guduruk e nuyel mɛ, 15a yang ɛ, “À Da, tosho reyɔ̂m hwey hom. He kushu cushu, ko he re mɛ̀ yɔ́m tyɔng wɛt. Ha ga gabsa e ji kya kɛ e ji nshi zang pyak. 16Ma ga vey na hɛ na bemât masâ fwom mō, ko yɛn a tɔk tɛ̀ hɛ tyang wɛt.”

17Yɛsu a hanat, a yang ɛn, “À yin bemât jeng yemo de yin a tɛ̀ gap min e ra Dagwi wɛt, ko neyey min na sé gbarak! Mê sangal tanga yin vɔk e yɛ̌ jeng arɛt? Vey in a me na hwey o e ngamo.” 18Ko Yɛsu a gyong cēng o, ko ya nusu yi e ji hwey o. Remo-remo, hwey o ha tɛ̀ tyang.

19E bama mo, bemât masâ fwom mɛ ba wɔ́ na Yɛsu zɔgɔ̂ hɛn, ba rangal hɛ, ba ye, “Yaga sɛ́ de wot a tɔk pat cēng o wɛt arɛt?”

20Yɛsu a yang ɛn, “Yaga yin a tɛ̀ gap min mwa e ra Dagwi wɛt, sede remo de a sé naka na yin a ra. Mwin me ha a yin: Ka sede nepyak tɛ̂ gap min e ra Dagwi na sé sede keyenêng mastat zɔng, ko yin ê tɔk yâng raku womo, ‘Sogo yi e ngamo vɔk e hworo’, ko wa rɔda sogo. Pyɛ cak yê dal in wɛt. [ 21Sɛ̌ be ra won na be tik rê pyɛ́, na be de tɔk pat ceng yerê yemo zɔng.]”

Yɛsu a to ha e ra reku mɛ

(Mar 9:30-32; Luk 9:43b-45)

22Jeng de mwa bemât masâ fwôm Yɛsu ba wɔ̀ man e sevwêl Galili, Yɛsu a yang ɛn, “Ba rɔda nára Me de ma tɛ́ me mwat e vɔ bemat 23de yɛn ê mɔrɔ me. Ko e tuk hê tat, ba rɔda sene me yi e reku.”

Ko bemât masâ fwom mɛ ba lashe yey mɛn sizɔng.

Talsa dyâm Gbɔng Duk Re Fongol

24E bama de Yɛsu na bemât masâ fwom mɛ ba wul Kafarnahum, bemât seres dyām de ba tɛ̀ yaga Gbɔng Duk Re Fongol ba wɔ́ na Bitrus, ko yɛn a rangal hɛ, “Mwat Basa min e talsa dyâm Gbɔng Duk Re Fongol wɛt arɛt?”

25Bitrus a yang ɛn, “E talsa.”

Jeng de Bitrus a yel e ji lɔ, Yɛsu a tānga hanat na yɛ, a ye, “À Simɔn, hwó bare ala arɛt? E beva de be talsa a begbɔng begwɔ̀m jey dyâm yeles na pyɛ́ tanga dyâm vwel arɛt? A sé e nèy vwel o kɛ e bemat beduk arɛt?”

26Bitrus a toyo a yɛ, a yang ɛ, “E bemat beduk.”

Yɛsu a yang ɛ, “Ka sede a sé ano, ko sɛ̌ nèy vwel o nê tala pyɛ cak wɛt. 27Ko wot e simo na bemat vemo be wok shom na wot wɛt. Yaga ano, ci vɔk e gworep, na hwo nára guk mō e ji nshi mo. Pat tɔk de hwô tānga vo. Wunta nû wɛ, ko e ji mo, hwô sɛ̀ dyam de yê vey, na hwo tala hɛn mɛ̀ dyâm Gbɔng Duk o yaga me tanga hwo.”

Currently Selected:

Matayus 17: bomBI

Highlight

Copy