Luka 13
13
Doyo hin yi e banɛn na yin wey wɛt
1E jeng o, bemat behak bá sè e hwomo, ko ba ha a Yɛsu rehâ bemât Galili de Pilatus á kana tɛ̀ ba mɔbɔs hɛn. Hemo há té jeng de yɛn á sè nára nenɔrɔ̂ yas de be yɛt vɔk na Dagwi, ko nemi mɛn ná wuna hɛ na ne yas de bá yɛt o. 2Ko Yɛsu a hanat, a yang ɛn, “A sé a yin sede pyɛ vyes yemo ya té a bemat vane, yaga yɛn a dal bwang bemât Galili na ragâs banɛn arɛt? 3Ma sé ha a yin: Wey! Ko ka sede yin a doyo yi e banɛn min wɛt, yin mwa yin a rɔda wey tyɛng sede yɛn. 4Ala rehâ bemat kuru na vɛ rwit yi e Silowam de gbɔng duk bɛrɛng nekanang wa gaba e ra yɛn, ko wa mɔrɔ hɛn arɛt? A sé a yin sede bemat vane ba dal bwang bemât Yɛrusalɛm na neves arɛt? 5Ma sé ha a yin: Wey! Ko ka sede yin a doyo yi e banɛn min wɛt, yin mwa yin a rɔda wey tyɛng sede yɛn arɔng.”
Retîn regwi de ra tɔs wɛt
6E bama mo, Yɛsu a ha a yɛn gwɔrɔ-há hemo, a yang ɛn, “Mwat hwak a vɔk retîn regwi e ji bwî anap mɛ. Jeng de a wɔ́ na a wɔ̀ jāma nèy cɔgɔt o, a sɛ̀ pyɛ cak wɛt. 7A hwo yâng mwât bɛrɛng bwi mo, ‘Di, shey hê tat a hemo de ma sé vɛ̀sɛ e ngamo na me ba di, kɛ gyeng tîn regwi hemo ha ga tɔs arɛt, ko ma sɛ̀ pyɛ cak wɛt. Tow hɛ! Yaga sɛ́ de he lashe fongol zɔng arɛt?’ 8Ko mwât bɛrɛng o a yang ɛ, ‘À da, niri na hwo to tik hɛ e shey hemo zɔng, ko ma rɔda bugut tin o na me tɛ̀ a hɛ yǔk. 9Ka sede ha ba tɔs nák, ey ko wɛng; ko ka sede ha ba tɔs wɛt, ko hwo ba tow gwomǎ.’ ”
Yɛsu a tɛ̀ hwā de a ye gup tyang
10Tuk Shábat hak, Yɛsu á sè basa e duk re fongol hwak. 11Hwā hwak á sè e hwomo, de á vɔk ceng de ya tɛ̀ a yɛ serɔ neshey kuru na nɛ rwit, a ye gup, vit a tɔk ye cik wɛt. 12Jeng de Yɛsu a di hwā mo, a yila hɛ, a yang ɛ, “À delɔ, ba ga hàla hwo yi e serɔ mo!” 13A tɛ̀ vɔ mɛ e ra yɛ, ko remo-remo, rebek mɛ ra ye cik, ko a nɔ̂ng Dagwi nerey.
14Mwât nuyêl duk re fongol o a wok shom, yaga Yɛsu a tɛ̀ mwat tyang Tuk Shábat, ko a hwo yâng bemat o, “Nepɔlɔ de be ra fwom na sé netyiimin. Vey in e ji negasi nane na be tɛ̀ in tyang, ko yin vey Tuk Shábat wɛt!”
15Darwey a toyo a yɛ, a ye, “À yin bemât nenu-neba! Kawɛ mwat e ji min e viri hywàrak mɛ kɛ madung mɛ yi e ji duk, na a wɔ̀ nɔ̂ng wɛ nshi Tuk Shábat. 16Ko di, hwā womo a sé yere Abraham de Shetan a ga rɔgɔs hɛ neshey kuru na nɛ rwit; ko sɛ̌ a jam na be viri hɛ Tuk Shábat wɛt arɛt?” 17Sede Yɛsu a ha ano, mwa bemât repugu mɛ ba wok rekyen, ko bwang bemât mwa ba vɔk yey pyɛng na gbɔng pyɛ̂ langât mwa de a ra.
Gwɔrɔ-há e ra keyenêng mastat
(Mat 13:31-32; Mar 4:30-32)
18Ko Yɛsu a rangal hɛn, a ye, “Segwɔm Dagwi sa sé sede sɛ́ arɛt? Ma rɔda tyɛngrɛ sɛ na sɛ́ ɛ? 19Sa sé sede ngan: Mwat hwak a jut keyenêng mastat, ko a tus e ji bwi mɛ. Ka ras, ka tɛ́ ɛ retîn cɔgɔt, ko benon ba lɔkɔs ɛ̀ barɛngɛ mɛn e nelang o.”
Gwɔrɔ-há e ra géy-sing
(Mat 13:33)
20Yɛsu a to rangal hɛn, a ye, “Ma rɔda tyɛngrɛ Segwɔm Dagwi na sɛ́ arɛt? 21Sa sé sede ngan: Hwā hwak a jut géy-sing, ko a wuna wɛ na shǐ tat hê nemuk, sɛ̌ regat o mwa ra tɛ́ ɛ fugum.”
Rwi duk de gwa sé ngyɔgɔdɔk
(Mat 7:13-14, 21-23)
22Yɛsu a kaba gwong mɛ vɔk e Yɛrusalɛm, ko a kweres e bapomo na bemajey, a kyě basa. 23Ko mwat hwak a hwo rangal hɛ, a yang ɛ, “À Da, ê sè bemat hyet zɔng de be ba sey neken arɛt?”
Yɛsu a hanat, a yang ɛn, 24“Yē in ngyɛ́k na yin a yel e rwi duk de gwa sé ngyɔgɔdɔk, yaga ma sé ha a yin, bemat pyak ba rɔda ba ye ngyɛ́k na yɛn a yel ɛ̀, ko yɛn a rɔda ba tɔk wɛt. 25Yaga jeng de dalɔ mo a ga sogo, a man rwi duk o, ko yin kwong, yin ê ba sè e jey. Yin a rɔda ba kwɔgɔt gwɛ, yin ê ba ye, ‘À da, wunta a wot rwi duk o!’ Ko ê ba yang in, ‘Ma tɔk kwɔn de yin a yi ɛ̀ wɛt.’ 26Ko yin a rɔda ba ye, ‘Wot á re, ko wot á sɔ tanga hwo; ko hwá basa e ji nehyok bapomo mot!’ 27Ko a rɔda to ba yang in, ‘Ma sé ha a yin, ma tɔk kwɔn de yin a yi ɛ̀ wɛt. Kyè in yi e ngamo, à mwa hin bemât ragâs banɛn!’ 28Jeng de yin a rɔda ba di Abraham, na Yishak, na Yakɔp, tanga mwa bezarap Dagwi e ji Segwɔm Dagwi, yin a rɔda ba tosho na yin a roros yìn, yaga ba ga bang in e jey. 29Bemat ba rɔda ba yi e rwa rak na e rwa tā, yi e rwa batin na e rwa bato, na be sangal e de rê pyɛ́ e ji Segwɔm Dagwi. 30Ko di in, vemo de ba sé vê bama a remo ba rɔda ba tɛ́ ɛn vê yel; ko vemo de ba sé vê yel a remo ba rɔda ba tɛ́ ɛn vê bama.”
Yɛsu a tɛ̀ yey na bemât Yɛrusalɛm
(Mat 23:37-39)
31E jeng yane, BeFarisi behak ba vey na Yɛsu, ba yang ɛ, “A sé naka na hwo nusu yi e ngamo na hwo kyè vɔk e dem hak, yaga Herodes e simo na a mɔrɔ hwo.”
32Yɛsu a hanat, a yang ɛn, “Ci wɔ̀ yang in kevu-hey kane ngan: ‘Yunung ma sé paa cēng, ko ma sé tɛ̀sɛ bemat tyang, nahwol ano arɔng, ko e pɔlɔ hê tat ma rɔda tala fwom hom.’ 33Ko mwa ano, a sé gbing-gbing na me re nuyel na kwɛngɛl hom yunung, na nahwol na gwaane. Yaga a sé tyɛng na be mɔrɔ zarap Dagwi e kwɔn hak wɛt sɛ̌ e Yɛrusalɛm!
34“Káa! À bemât Yɛrusalɛm! Káa! À bemât Yɛrusalɛm! Yin e mɔbɔs bezarap Dagwi, yin e tó vemo de Dagwi a tomsal a yin mɛ̀ na beta, na yin a mɔbɔs hɛn arɔng! Zang ala de ma simo na me gunung hin sede congot ye gunung nèy mɛ arɛt? Ko yin a simo a me wɛt. 35Di in, lɔ min ha rɔda tɛ́ ɛ rin o. Ko ma sé ha a yin, yin a rɔda to di me wɛt sɛ̌ jeng de yin e ba ye, ‘Tik na Dagwi a tɛ̀ nerat e ra womo de e kyè vey e ji rezâ Darwey!’ ”
Currently Selected:
Luka 13: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust