Hosheya 2
2
1Yaga ano, tang in begwa min BeIsrayɛl à,
Bemat-Hom tanga Tɛ̂-Yey!
Dagwi Darwey ê tabak Israyɛl, devwes
2À nèy hom, gyong in neng-gwɔ min,
mwa ano de a to sé hwā hom wɛt,
ko ma to sé rwas mɛ wɛt arɔng.
Gyong in hɛ na a tik tɔrɔ hɛ hê ragas nejwang tanga nedeneves.
3Ka a kyɛ́ ɛ gbir,
mê hywɛrɛm hɛ me tik ɛ kpimit sede tuk de bá tɔ̀ ɛ.
Mê tɛ̀ ɛ́ a sè sede vwêl gbingiring vit à nshi,
ko ê ku na yêy hwɔshɔ.
4Mê tosho reyɔ̂m nèy mɛ wɛt,
yaga ba tɔs ɛn e nejwang,
5neng mɛn a sé devwes,
yɛ de a tɔ ɛn a ga ra pyɛ̂ rekyen.
A ye, “Mê raa berâs yey hom,
de be nɔngɔs me re na sɔ,
na wuulu, na linen tanga něy na nshî anap.”
6Yaga ano mê gwɔrɔ hɛ na yép,
ko mê lɔk jwa na me bang mɛ gwong de ê kwey ɛ.
7Ê kyě tele e raa berâs yey mɛ mo,
ko ê wul na yɛn wɛt.
Ê kyě jama hɛn, ko ê sɛ̀ ɛn wɛt.
E yɛnɛ mo, ê ye,
“Mê to me vɔk na rwas hom,
sangal hom hê raane ha dal hê remo”.
8E me de ma kana nɔng ɛ pyɛ̂ yeneng, na nshî anap,
na něy pwat, na dyam pyɛng tanga dyam shinang shɛrɛk
de á ra mɛ fwôm re a Baal fongol,
ko a tɔk ya yi na me wɛt.
9Yaga ano, ma sé kyè wɔ sey ɛ pyɛ̂ yeneng nahywɛp,
na nshî anap e jeng nɛ,
ko mê tik nà nɔng ɛ wuulu na linen
de ma kana nɔngɔs hɛ yaga lɔ̂k berugû bangas hɛ.
10Mê hywɛrɛm hɛ kpimit e nuyêl berâs yey mɛ mo,
ko vit à mwat de ê kyɛm a sey ɛ́ yi e vwɔ hom.
11Mê tɛ̀ ɛ a tik mwa nzem —
nzem kahɛ shey, na ne pwɛl pwas,
ne Tuk Shábat — na mwa netula.
12Mê wey na batîn cɔ́gɔt anap mɛ,
mwa na vê regwi de a ye,
“Berâs yey hom ba nɔng me.”
Mê tɛ̀ bě batin cɔ́gɔt mɛ be tɛ́ ɛn rehwot,
ko ngyāma ye re vɛ.
13Mê tabak hɛ yaga mwa negasi
de á ragas nzem ci Baal,
de á nása a yɛ nɔrɔ̂ pyɛ̂ nesang hyɔɔlɔl,
jeng de á tɔrɔ hɛ na yɔbɔ tanga pyɛ̂ dyéngere ryat,
na a wɔ̀ kyě raa mɛ berâs yey mɛ na a ye bam à me.
Me Dagwi Darwey ma ha ano.
Dagwi Darwey ê doyo yêy devwes o
14Yaga ano, mê kyè na yɛ vɔk e hey,
mê mɛlɛm hɛ na neha ne dyɛng yey.
15Mê nɔng ɛ bě anap,
ko mê doyo Nɛk Reyɔm wo tɛ́ ɛ gwông sɛ̂t yey.
E hwomo ê to toyo a me na ha rat
sede e jeng nehwong mɛ,
sede e jeng de á nusu yi e Misra.
16Me Dagwi Darwey ma ye, “E jeng o, hwô yila me à rwas mo, ko hwô to yila me à Baal mo wɛt. 17Yaga mê pat bazâ Baal yi e nu mɛ, ko bê to ba yila baza mɛn wɛt. 18E jeng o, mê wuna hin na sira na mwa ngyāma na benon, tanga pyɛ̂ gabaga. Mê pat gbang, na wal, na como yi e vwel o, na yin a sangal tyang.
19“Mê hwono hwo neshey gbak-gbak.
Mê hwono hwo na necik tanga gâs badu e tē.
Mê hwono hwo na tsak tɛ̂ yey tanga nemwishish.
20Mê hwono hwo na tsak o mwin,
ko hwô tɔk me Dagwi Darwey.”
21Dagwi Darwey a ye,
“E jeng o mê toyo a lagwi na wôn wɛ,
ko wô toyo a jey na wôn yɛ,
22ko yê toyo a pyɛ̂ yeneng, na nshî anap tanga něy na won mɛn,
ko pyɛ́ mo yê toyo a bemat hom#2:22 bemat hom: E lem BeIbrani ba jɛk Yɛzrɛɛl. na won mɛn arɔng.
23E jeng o mê tus BeIsrayɛl sede yére.
Mê tɛ̀ yey e ra Nevît-Tɛ̂-Yey.
Mê yâng Bemat-Hom-Wɛt, à Bemat-Hom.
Ko yɛn arɔng bê yang me à Dagwi Mot.”
Currently Selected:
Hosheya 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
