Hagai 1
1
Ba ha na bemat, na be to lɔk Gbɔng Duk Re Fongol
1E shey he neba hê Dariyus, Da vwel Pɛrsya, e tuk hê mɛsɛng hê pwɛl gwô netyiimin, Dagwi Darwey a ha yi e nû Hagai, zarap mɛ. Ha mo ha sé yaga gwɔmna sevwêl Yuda, Zɛrubabɛl hwêy Sheyaltiyel, tanga darwêy bepiris, Yɔshuwa hwêy Yɛhɔzadak.
2-3Neha de Hagai a yi mɛ yi na Dagwi Darwey a nemo: Dagwi Darwey Wo Jey Mwa a ye: “Bemat vemo be tē: ‘Jeng ya ga vey wɛt de bê to lɔk a me Gbɔng Duk Re Fongol.’ 4Ko sɛ̌ jeng a yemo de yin ê sangal e nelɔ min de yin a kyɔrɔk nɛ na cɔ́gɔt ryat, ko yin a hala Gbɔng Duk Re Fongol e barin a? 5Ko bare hin pyɛ́ de ya té na yin. 6Yin a tus pyɛ́ pyak, ko yin a yɛt bwal o hyet zɔng. Yin e re, ko yin e siris wɛt. Yin e sɔ nshî anap, ko ne vey a yin wɛt. Yin e tɛ̀ berugu, ko yin e wok nemɔɔ wɛt. Yin e seres dyâm fwom, ko a sé sede yin e tɛ̀sɛ yɛ e berabak de ba vɔk bavɔng.”
7Pyɛ ma yemo de ya tɛ̀ Dagwi Wo Jey Mwa a ye, “Bare hin pyɛ́ de ye té na yin. 8Ci in e beraku, na yin wɔ̀ vey na babîm cɔ́gɔt, na yin vey lɔk mɛ Gbɔng Duk Re Fongol o. Ko mê vɔk yey pyɛng na wɛ. Yi ano yin a rɔda nɔng me nerey. 9Yin a tɛ̀ e yey, yin ê sɛ̀ pyɛ́ pyak e hiri min, ko di, yin a sɛsɛm yɛ tyɔng zɔng. Pyɛ́ de yin a vey mɛ e lɔ, ma waram yɛ e jey. Yaga sɛ́ de ma ra ano ɛ? Ma ra ano, yaga lɔ hom de yin a hala hɛ barin, ko kawɛ e ji min a sé tē ngyɛ́k e de yông lɔ mo mɛ. 10Yaga ano, lagwi wa kyɛ́ ɛ nà nɔng in mwɛngɛ, ko vwel ha nɔng pyɛ̂ hiri min wɛt. 11Ma tɛ̀ nehwogot ne hwo e ra hiri min, e ra berahwol, e ra pyɛ̂ yéneng min, e ra batîn anap na vê pat, na e ra kayɛ pyɛ de yin e sɛsɛm yi e vwel. Bemat na berɔndɔng ba rɔda sɔ reyɔm, ko mwa pyɛ́ de yin e ra ya rɔda sè ryat wɛt.”
12E bama mo, Zɛrubabɛl, na Yɔshuwa tanga vemo de ba toyo yi e de sesam ba simo hâ Dagwi Darwey, Dagwi mɛn. Yɛn a sap ɛ, ko yɛn a gyɛng ha de a ha a yɛn yi na Hagai de a tomo hɛ. 13Ko Dagwi Darwey a tɛ̀ Hagai, tom mɛ, a yang ɛn, “Me, Dagwi Darwey, ma sé tanga yin.” 14Ano Dagwi a nɔ̂ng Zɛrubabɛl, gwɔmna Yuda, na Yɔshuwa, darwêy bepiris, tanga bwang bemat o mwa yêy hwosho lɔ̂k Gbɔng Duk Re Fongol. Ano, yɛn a hwo lɔk Gbɔng Duk Dagwi mɛn o, yɛ Dagwi Darwey, Wo Jey Mwa, 15e tuk hê kuru baba na hɛ naas (24) hê pwɛl gwane mo.
Currently Selected:
Hagai 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
