Danyɛl 9
9
Danyɛl a ra won, a kulu banɛn mɛn
1-2Dariyus, hwêy Ahasɛrus WoMedya a tɛ́ ɛ Da vwel Babilɔn. E shey mɛsɛ̂ng negwɔm mɛ, me Danyɛl ma ngyɛgɛt bebok-basa ve bezarap Dagwi ko ma de tɔk cap-hâ pyɛ́ de Dagwi Darwey a kana ha a Yirmiya. Pyɛ́ mo ya sé e ra neshey kuru bataama de Yɛrusalɛm wô nàra barin. 3-4Yaga ano, ma pɛrɛ tik rê pyɛ́, ma tɛ̀ rugû sesin, ma sangal e fongôl kya. Ma kulu banɛn hom, ko ma ye zip e râ won na Dagwi Darwey, Dagwi hom, ma ye:
“À Darwey, hwà sé Dagwi wo nerey, hwà sé pyɛ bengyip. Hwó gyenges wuna-na-sira mō, ko hwà tɛ̀ yey mō na vemo de ba tɛ̀ yey na hwo, be gyenges badu mō arɔng. 5Ko wot a ga ra banɛn, wot a ga buru, wot a ga ra pyɛ́ de ya sé vyes, wot a ga sogo nehywɛ, wot a ga gyili badu mō, wot a ga hala basa mō. 6Wot a ga wet betong na neha bezarap mō de bà há a begbɔng begwɔ̀m mot, na bemât nuyel mot, na bedabeda mot tanga bwang bemat o mwa wɛt.
7“Hwo à Darwey, hwó ra pyɛ́ de ya sé tyɛng kayɛ jeng, ko wot a wok rekyen e nuyel mō. Ey, vey e yunung bemat de ba sé sangal e Yɛrusalɛm na e vwêl Yuda, wɔ sɛ̀ mɛ BeIsrayɛl mwa de ba sé bagat, na vê yikyik wot a sé e ji rekyen. Pyak e ji mot ba sé e bavwel de hwà ga ro ɛn, yaga wot a raa hwo na tsak o wɛt. 8Ey, à Dagwi Darwey, wot na begbɔng begwɔ̀m mot, na bemât nuyel mot tanga bedabeda mot, wot a wok rekyen, yaga wot a ga ra a hwo banɛn. 9À Darwey Dagwi mot, hwà sé wo nemwishish, hwó halsa a wot banɛn, mwa ano de wot a ga sogo nehywɛ mō. 10Hwà ga ha a wot, wot gyeng badu mō vemo de hwà nɔng ot yi na bezarap mō, ko wot a wet betong wɛt.
11“BeIsrayɛl mwa ba ga gyili badu mō, ba kyɛ́ ɛn nà wok basa mō. Wot a ga ra a hwo banɛn. Yaga ano, hwà tɛ̀, hâ kyini de ba jɛk e ji badu Mose, mwât fwom mō, ha ga sɛ̀ ot. 12Hwà ga sila ha de hwà ha e ra wot na e ra bemât nuyel mot. Hwà ga tomo a wot na gbɔng rezot e Yɛrusalɛm. Vit a mwat de a ga sang di yere rezot remo e kwɔn hak e jey. 13Rezot o mwa ra sɛ̀ ot, sede remo de ba jɛk e ji Bwok-basa Badu Mose. Ko wot a ka doyo na wot dak a hwo, à Dagwi Darwey, Dagwi mot gabɔk wɛt, wot a tik ragas neves mot wɛt, wot a tɛ̀ nehywɛ mot e ra tsak ha mo wɛt. 14Pyɛ ma yemo de ya tɛ̀, hwà tik gbɔng rezot remo ra hwo e ra wot. Mwin, à Dagwi Darwey, Dagwi mot hwó ra tyɛng e kayɛ pyɛ, ko wot a wet betong na hwo wɛt.
15“À Darwey Dagwi mot, hwà nusu na bemat mō yi e vwêl Misra na gbɔng reto mō. Yi ano, hwà sɛ a to mō reza vey e yunung. Ko wot a ga ra banɛn, wot a ga ra pyɛ́ vyes. 16À Darwey, hwà dura a wot nerat mō kayɛ jeng. Yaga ano a remo, wot e ra won, hwo ye ros a shom mō pyep e ra repomo mō Yɛrusalɛm de ba lɔk e ra raku mō wo jɛrɛ. A sé yaga banɛn mot na pyɛ́ vyês bedabeda mot de bemat mwa de ba gwɔrɔ hot, be byɛs Yɛrusalɛm tanga bemat mō.
17“À Dagwi mot, wok won hom na dâk gabɔk hom. Bɛrɛng kwɔ̂n jɛrɛ mo de ha ga tɛ́ ɛ barin na nerat. Ra ano, na be nɔng o mɛ nerey. 18À Dagwi hom, wet betong na hwo wok me! Wunta bayis mō na hwo di repomo mot de ba wey mɛ, repomo remo de hwà kasa. Jeng de wot a sé ra won na hwo, wot e ra, yaga wot a vey wɛt, ko a sé yaga nemwishish de hwà vɔk pyak. 19À Darwey, wok ot! Hala a wot! Vey e tē mot! Ra pyɛ cak ziri yaga repomo mō tanga bemat mō de hwà kasa zɔng wɛt, ko yaga na be nɔng o mɛ nerey!”
Gabriyɛl a misang a Danyɛl cap-hâ besati kuru bataama
20Ma sé rɔɔ ra won, ko ma sé kulu banɛn hom na vê bemat hom BeIsrayɛl, ma to sé tosho e nuyêl Dagwi Darwey, Dagwi hom yaga raku mɛ wo jɛrɛ. 21Jeng de ma sé ra ano, Gabriyɛl, mwat de ma kana di e negwi-ywey, a pere tele vey na me sede gwonon. Jeng o ya sè jeng narâ nɔrɔ̂ he nahywegelek. 22A hwo misang a me, a ye, À Danyɛl, ma vey, yaga na me sɛlɛ hwo, na hwo tɔk cap-hâ pyɛ́ de zarap Dagwi a ha. 23Ras de hwà pɛrɛ râ won, Dagwi a nɔng me hanat vey na hwo, yaga a jut o na nerat sizɔng. Ma sé e ngamo, na me ha a hwo hɛ. Tɛ̀ nehywɛ mō, na hwo tɔk negwi-ywey o.
24Ba ga yɛrɛ a bemat mō na repomo rê jɛrɛ besati kuru bataama. Jeng yemo yê sè sɛ̌ sogô nehywɛ, ko ragâs banɛn hê gwɛ̌ kat, sɛ̌ ba hala banɛn na be talâ-nɛn arɔng. E jeng o, Dagwi ê tɛ̀ pyɛ́ mwa ye se tyɛng gbak-gbak. Ê sila pyɛ̂ negwi-ywey tanga neha de bezarap mɛ ba yi mɛ, ko bê to tik Gbɔng Duk Re Fongol jaram.
25Tɛ̀ nehywɛ mō na hwo bin tɔk, e tuhak bà nɔng nu wɔgɔ, be to lɔk repomô Yɛrusalɛm. Yi e tuk hane e jeng de mwât nuyel de Dagwi a kasa a vey, jeng o yê wul besati betaama. E bama mo, wɔ̀ sɛ̀ besati kuru batyiimin na vɛ beba, Yɛrusalɛm wô nàra repomo de ba ga to lɔk, de ba ga gwɔrɔ na jwâ-pomo arɔng. Ko jeng yemo yê se jeng reyɔm. 26E bamâ jeng yane mo, bê wey na yɛ mwât nuyel de Dagwi a kasa, ko vit a mwat de ê dul ɛ. Mwât nuyel dūk ê vey na bemât como mɛ, ko bê wey na gbɔng repomo tanga Gbɔng Duk Re Fongol, sede tɛmɛ-nshi de wo rùnus nedem. Como na wêy nedem o bê re nuyel vɔk e yɛnɛ mo, sede remo de Dagwi a ga yong ɛ. 27Yɛ mwât nuyel dūk o ê wuna sira na gap tanga bemat pyak vɔk e sati gwining. E tê sati mo, ê ro mɛ na nása nenɔrɔ̂ yas, na ne pyɛ̂ re e Gbɔng Duk Re Fongol. Ê tɛ̀ pyɛ sekwit de yê tɛ̀ kwɔn o byɛm-byɛm. Yɛ̂ sè e hwomo sɛ̌ jeng de Dagwi a ga yong ɛ, na a wey na mwât neves o.
Currently Selected:
Danyɛl 9: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
