Дуулал 90
90
ДӨРӨВДҮГЭЭР НОМ
(Дуулал 90–106)
Бурхан үүрд, хүмүүн зуурд
Бурханы хүн Мосегийн залбирал.
1Аяа Эзэн, Та үеийн үед бидний
Орших газар байсан билээ.
2Уулс бий болохоос ч өмнө,
Таныг дэлхий ба ертөнцийг төрүүлэхээс ч өмнө,
Үүрдээс үүрд мөнх хүртэл
Та Бурхан.
3Та хүнийг тоос шороонд нь буцаан
Айлдахдаа “Хүний хүүхдүүд ээ, буцагтун” хэмээнэ.
4Учир нь Таны мэлмийд мянган жил бол
Өнгөрөн одож буй өчигдөр мэт эсвэл
Шөнийн манаа адил буюу.#2Пт 3:8
5Та тэднийг үерийн ус шиг хамсан бөгөөд
Тэд нойронд автжээ
Өглөөд тэд шинээр соёолон буй өвс мэт болой.
6Өглөө тэр нь цэцэглэж, соёолно.
Үдэш нь тэр хагдран хатна.
7Учир нь бид Таны хилэнгээр шатаагдаж,
Таны ууранд бид мэгдэн сандарсан.
8Та хилэнцийг маань өмнөө,
Нууцыг маань оршихуйнхаа гэрэлд байрлуулсан.
9Учир нь хамаг өдрүүд маань
Таны хилэнгийн дунд өнгөрсөн
Бид санаа алдах мэт он жилүүдээ дуусгасан.
10Амьдралын маань өдөр хоногууд далан жил юм.
Хүч чадалтай байх аваас наян жил боловч
Тэдгээрийн оргил нь зүдүүр, уй гашууд өнгөрдөг.
Учир нь энэ нь ч өнгөрч,
Бид нисэн оддог.
11Таны уурын хүч чадлыг болон
Танаас эмээх хэр хэмжээгээр
Таны хилэнг хэн ойлгодог вэ?
12Иймээс бид мэргэн зүрх олж авахын тулд
Өдрүүдээ тоолохыг бидэнд зааж өгөөч!
13Аяа ЭЗЭН, буцаж ирээч
Хэдий болтол вэ?
Зарц нараа өрөвдөөч!
14Өглөөд биднийг хайр энэрлээрээ хангаач!
Бид баясгалантайгаар дуулж,
Бүхий л өдрүүддээ баярлана.
15Биднийг зүдрээсэн өдрийнхөө тоогоор,
Муугаа үзсэн жилүүдийн маань тоогоор
Биднийг баярлуулаач!
16Өөрийнхөө үйлсийг зарц нартаа,
Сүр жавхлангаа хүүхдүүдэд нь үзүүлээч!
17Бурхан Эзэний маань ивээл
Бидэн дээр байх болтугай!
Бидний гарын үйлсийг
Бидний төлөө бат тогтоогооч!
Тийм ээ, гарын маань үйлсийг
бат тогтоогооч!
Currently Selected:
Дуулал 90: АБ2013
Highlight
Share
Copy
Want to have your highlights saved across all your devices? Sign up or sign in
Ariun Bible © Mongolian Union Bible Society 2013.