Rom 2

Oyerebet Awaji ìre unen oyerebet

1Eya orọ, owu ogwu òkifieek ofifi ene ikọ, kpunu inu geege obokọt itumu isa inyan̄a lek kwun̄. Mije, mgbọ geelek ofieekbe ene ikọ, mè ikirọ si inu ya osabe ifieek ene ikọ, owu òkitip lek kwun̄ oyerebet. 2Eji mîriọọn̄ ibe ke oyerebet Awaji ofieekbe inyi ebi ìkirọ ojelek ijo inu chi ìre unen oyerebet, mè ire si oyerebet atikọ. 3Mgbọ owu ogwu ebilene ikike okifieek oyerebet inyi ebi ofifi ife, mè ikirọ si ojelek ijo inu ife cha ekirọ, ìre owu òkikeek ibe ke owu mônwọnọ oyerebet Awaji? 4Sà ìre owu òkikpọ Awaji isiki chieen̄, mije îkaan̄be ikpele ata ejit, mè ujọn̄ọ ukarajit, mè ikime inu ebilene ekirọ? Ìre owu òkariọọn̄ ibe ke Awaji ìkikaan̄ ata ejit me lek kwun̄, inyi owu ògwu òkom òsibi me emen ijo kwun̄?

5Ire, owu òkpọkpọ itet ejit inye, òkachieek inwenwene. Sa me ikeyi, owu gwa òkititiin̄ unaan̄-ejit Awaji ikeme me ibot kwun̄ iban mgbọ Awaji môjeen̄be òjot òjot unaan̄-ejit kan̄, me usen ìbosibi oyerebet me ibot ebilene. Oyerebet kan̄ ìre unen oyerebet. 6Awaji ìbokpe ene geelek mkpukpe igọọk me lek ikwaan̄ ene ya osibe.#2:6 Itọn̄ 62:12; Urọk 24:12 7Ebi ìkpọkpọ itet lek inye ikirọ ata inu ikisa iweek itọn̄ mè umin ònan̄a me ubọk Awaji, mè ikiweek si inyi ema ekakwaan̄, Awaji mônyi ema ugwem ikakaan̄ge itata. 8Ire, ebi geelek ìkiweek inu inyi lek kiban̄ gaalek, mè ikijit atikọ eyi Awaji, mè ikirọ ijo inu geelek, Awaji mônaan̄ ejit enenen inyi ema, mè irọ ema inu me lek uyọt uyọt. 9Ufialek mè ujat môkup inyi otutuuk ebi geelek ìkirọ ijo inu. Uyọrọlek yi môdasi ibene me lek ebi Ju, sabum ònore lek ebi kpere ebi Ju. 10Ire, ebi geelek ìkirọ ata inu, Awaji mônyi ema umin, mè itọn̄, mè esuuk. Ìbodasi ibene me lek ebi Ju, sabum ònore lek ebi kpere ebi Ju. 11Mije, Awaji ìkakilibi ene chieen̄.

12Ebi geelek ekakaan̄ge Ikan kè Mosis, ire ema irọ ijo inu, ema mêkwaan̄ mije ijo kiban̄. Awaji ìkposa Ikan kè Mosis itip ema oyerebet. Ire, ebi geelek ìkakaan̄ Ikan kè Mosis, mè ikirọ ijo inu, Awaji ìbosa Ikan kè Mosis itip ema oyerebet. 13Mije, ìkare ebi ìnọnọ Ikan ya gaalek ere ebi ata irọrọ me isi Awaji. Îre ebi ìnọnọ Ikan ya, mè ikirọ inu Ikan ya otumube ke Awaji omọnọ kubọk ebi ata irọrọ. 14(Me atikọ, ebi kpere ebi Ju kpekaan̄ Ikan kè Mosis. Ire, mgbọ geelek ema esabe me ifuk-ibot kiban̄ ikirọ inu òlilibi itat me lek Ikan ya, ema ekijeen̄ ibe ke ema mîkaan̄ ikan me emen kiban̄, ubọk geelek ema kpekaan̄ Ikan kè Mosis. 15Ugwem kiban̄ ìkijeen̄ ibe ke mîge inu geelek Ikan kè Mosis otumube me ejit kiban̄. Mije, ejit kiban̄ îkifieek ema ikọ mgbọ geelek ema ekirọ inu òlọlọ, mè ikirọ ema inye mgbọ geelek ema ekirọ inu òtatat.) 16Eya orọ, me Usen Oyerebet ya, Awaji môsa me ubọk kè Jisọs Karais isibi oyerebet me ibot ebilene igọọk me lek nlelet inu geelek òkup ema me emen ejit. Ikeyi ke ata etip eyi nkilook okitumu.

Inu Ikan kè Mosis otumube ofolek ebi Ju

17Mgbọ keyi, owu òkigwen lek kwun̄ ogwu Ju, mè ikisa Ikan kè Mosis itoon̄ ejit, mè ikigugo lek ibe ke owu melek Awaji ìre òma; 18owu oriọọn̄ inu geelek Awaji okiweek, mè isa me lek Ikan eyi ejeen̄be owu iriọọn̄ inu echi ònwọnwọn ichit, mè ikilibi igọọk echa; 19owu oriọọn̄ ijaan̄ lek ibe ke îre owu okijeen̄ ebi ǹnàan̄ oniin̄, mè ire utoon̄ inyi ebi ìkup me emen udun, ebi kperiọọn̄ Awaji, 20mè ire si ogwu nteme inyi ebi ekakaan̄ge iriọọn̄-inu, mè ire ogwu ijejeen̄ inyi asasa nsabọn. Me emen Ikan kè Mosis, enyi mîkaan̄ òjot òjot ifuk-ibot, mè òjot òjot atikọ. 21Ire ikeya, me mgbọ keyi, owu ogwu òkijeen̄ ebi ofifi ife inu, ìre keke orọ owu òkakijeen̄ lek kwun̄ inu? Ǹdo owu nu! Owu ogwu òkitumu ikọ Awaji ibe mè ebi ene ekachiin̄ inọ, ìre owu òkakichiin̄ inọ? 22Owu ogwu òkitumu ibe mè ekakirọ ugan-nwa, ìre owu òkakirọ ugan-nwa? Owu ogwu òchacha mkpọmfaka, ìre owu òkachiin̄ inu me isi mkpọmfaka? 23Owu ogwu òkisa Ikan kè Mosis igugo lek, ìre owu òkakirọn̄ Ikan ya, mè ìsa esip ìjet Awaji? 24Îre mije keyi ke ege me emen Ikpa Mbuban ibe, “Mije kinyi ebi Ju ke ebi ekarege ebi Ju ekitumu erieen̄ Awaji ifiat.”#2:24 Asaya 52:5; Ijik 36:22

25Ire owu okisun̄ Ikan kè Mosis, ifefieek afi eyi ofieekbe îkaan̄ oruru. Ire, ire owu òkakisun̄ Ikan ya, ifefieek afi eyi owu ofieekbe ìkakaan̄ oruru, owu òyaka inikup kubọk ogwu ikafieekge afi. 26Ire ebi ekafieekge afi irọ inu Ikan kè Mosis obe erọ, mêmọnọ ema kubọk ebi ìfefieek afi. 27Me atikọ, ebi ekafieekge afi ebi ìrọrọ inu Ikan kè Mosis obe erọ, mêkeke ata-ikọ ikeme enyi ebi ìfefieek afi, mè ikaan̄ si Ikan kè Mosis eyi egege isibi, mije enyi ekifiat Ikan cha.

28Ata ogwu Ju ìkare ogwu òrere ogwu Ju me akpalek gaalek. Ikeya si, ata ifefieek afi ìkare inu eyi akpalek, eyi ebilene ekimun̄ gaalek. 29Ire, ata ogwu Ju ìre ogwu òrere ogwu Ju ire emen ejit kan̄. Ikeya si, ata ifefieek afi ìre inu eyi Ekwukwu Mbuban okirọ me emen ejit ene. Ìkare Ikan egege isibi okifieek ene ojelek afi keya. Mije keyi, Awaji me lek kan̄ ore ogwu òbotọn̄ ojelek ogwu òkup ikeya, ìkare ebilene ebetọn̄.

Currently Selected:

Rom 2: Obolo

Highlight

Copy