Mat 4
4
Ntọ-mkpọ kè Jisọs
(Mak 1:12-13; Luk 4:1-13)
1Ekwukwu Awaji onenisa Jisọs ije isi emen èwê, inyi Yọk itọ ọmọ ikpọ. 2Mgbọ Jisọs okupbe me ere ya ijin otu akọp usen ini, uraafiọọn̄ onenitaka ọmọ. 3Yọk onunu initọ ọmọ ikpọ, mè ibe ọmọ, “Ire owu ore Gwun̄ Awaji me atikọ, tumu ikọ nyi ewuuk chi, mè ikana inorie inyi owu.”
4Jisọs ofọfọọk ọmọ ibe, “Ege me Ikpa Mbuban ibe,
“ ‘Ìkare inorie gaalek ke ene okisa iluk ugwem.
Ire, ene ìkisa ikọ geelek ònan̄a me otu Awaji isibi iluk ugwem.’#4:4 Ikan 8:3”
5Yọk onenisa Jisọs isi itoon̄ me ere òbebene ichit me inyọn̄ Uwu Mbuban me Jeruselem, 6mè itumu inyi ọmọ ibe, “Ire owu ore Gwun̄ Awaji me atikọ, nan̄a me ere yi wulu keke me ijọn̄, mije, ege me Ikpa Mbuban ibe,
“ ‘Awaji mônyi ebi osat kan̄ ikan ofolek kwun̄.
Ema mêben owu ikaan̄ me ubọk kiban̄,
inyi owu okatọbọ ukot me lek ewuuk.’#4:6 Itọn̄ 91:11,12 ”
7Jisọs ofọfọọk ọmọ ibe, “Ege si me Ikpa Mbuban ibe,
“ ‘Katọ Okumugwem Awaji kwun̄ ìkpọ.’#4:7 Ikan 6:16 ”
8Yọk okpọkpọk isa Jisọs isi inyọn̄ ogoon̄ òbebene ichit, mè isa ọmọ ijeen̄ otutuuk ama ubọọn̄ geelek eyi linyọn̄ keyi, mè otutuuk uja mè òrirọ ama ubọọn̄ cha, 9mè itumu inyi ọmọ ibe, “Emi mânyi owu otutuuk inu chi geelek, ire owu ogwook akpatukot me ijọn̄, mè itọbọ ebum inyi emi.”
10Jisọs ogagana inyi Yọk ibe, “Je nan̄a emi me isi, Setan, mije, ege me Ikpa Mbuban ibe,
“ ‘Tọbọ ebum nyi Okumugwem Awaji kwun̄ gaalek,
mè kisi ikwaan̄ si nyi ọmọ gaalek.’#4:10 Ikan 6:13 ”
11Yọk otetele ọmọ. Ebi osat Awaji enunu inisi ikwaan̄ inyi ọmọ.
Jisọs îbene ikitumu ikọ Awaji
(Mak 1:14-15; Luk 4:14-15)
12Jisọs oneninọ ibe ke mîtet Jọn ògwook mun̄ itap me mkpọn, mè igwu ikom ika inu ama Najeret me Galili. 13Sọnja mgbọ iraraka, inanan̄a me Najeret isi iluk me ama Kapanọm me agba okwaan̄ oyô Galili, me agan̄ ijọn̄ ebi otoko kè Jebulọn mè Nafitali elukbe. 14Eyi onenirọ iso ikọ Awaji otumube inan̄a me otu ogwu nriran Asaya ibe,
15“Ebi ìluk me inyọn̄ ijọn̄ otoko kè Jebulọn,
mè otoko kè Nafitali,
mè inyọn̄ ijọn̄ òkup ifo agan̄ okwaan̄ ile,
mè ebi ìluk me usaba agan̄ okwaan̄ Jodan,
mè ido Galili agan̄ ebi ofifi ido elukbe;
16ife chi, ìrere ebi ìluk me emen udun,
mîmun̄ ikpele utoon̄.
Utoon̄ îtoon̄ ire lek ebi ìluk me
inyọn̄ ijọn̄ ere udun eyi mkpa okupbe.”#4:16 Asaya ibot 9:1-2.
17Bene me mgbọ ya, Jisọs obebene ikitumu ikọ Awaji inyi ebi ene ibe, “Ìgwu ìkom, mije, mkpulu eyi Awaji îkup mgbet.”
Jisọs îgwen adasi ebi udun̄ kan̄
(Mak 1:16-20; Luk 5:1-11)
18Usen ge, mgbọ Jisọs okije me agba okwaan̄ oyô Galili, inenimun̄ ngwan̄ ebirieen̄ iba, Saimọn ogwu ekigwen si Pita melek Anduru ogwu ngwan̄. Ema ekitọp njin me okwaan̄ oyô ya mgbọ Jisọs omun̄be ema, mije, ema ìre ebi mbọm irin̄. 19Jisọs onenigwen ema ibe, “Ìna ìnigọọk emi, ke mârọ inyi enyi ekana ebi ìkibọm mbọm itet-ene.” 20Mgbọ yaage, ema etetele njin kiban̄, mè igọọk ọmọ ije.
21Mgbọ înan̄abe me ere ya ije ifo isi sọnja, ikpọkpọk imun̄ ofifi ngwan̄ ebirieen̄ iba, Jemis mè Jọn, bọn kè Jebidi, melek nte kiban̄ ekupbe me emen uji ikinama njin kiban̄. Igwegwen ema si. 22Mgbọ yaage, ema etetele nte kiban̄ melek uji kiban̄, mè inan̄a igọọk ọmọ.
Jisọs îgwa ebi orukan̄
(Luk 6:17-19)
23Jisọs onenikijijen̄e ikana me Galili, mè ikijeen̄ inu me uwu ntitiin̄ ebi Ju, mè ikilook ata etip eyi mkpulu Awaji, mè ikigwa esese chieen̄ orukan̄ mè ufiak me lek ebi ene. 24Etip kan̄ okekitaan̄ ikana otutuuk ido Siria. Ebi ene ekekikpulu otutuuk ebi chieen̄ orukan̄ geelek okifiak, mè ebi lek okinaan̄, mè ebi ijo erumun̄ okisisaak, mè ebi mkpikpi, mè ebi ngọm, isa ijet Jisọs ibe igwa. Igwagwa otutuuk kiban̄. 25Mije keya, ogbogbo ebi ene ìnan̄a me Galili, mè ebi ìnan̄a me Akọp Ama, mè Jeruselem, mè agan̄ Judia, mè ebi ìnan̄a me usaba agan̄ okwaan̄ Jodan ekekigbuku igọọk ọmọ.
Currently Selected:
Mat 4: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.