Luk 6
6
Jisọs ore Ogwukaan̄ Usen Mbuban
(Mat 12:1-8; Mak 2:23-28)
1Me Usen Mbuban ge, mgbọ Jisọs mè ebi udun̄ kan̄ ekije itibi uko akpa ge, ebi udun̄ kan̄ ekekifan̄a sọnja akpa me uko ya inwaan̄ itap me akajit ubọk, mè ikichọk mfufe isan̄a me lek, mè ikitaka. 2Usini ebi Farisi ekukup imun̄ ema, mè inido ema ibe, “Ìre keke orọ enyi ekirọ inu Ikan kè Mosis obe ekarọ me Usen Mbuban?”
3Jisọs obebe ema, “Ìre enyi kperarak ifuk-nu inu Debit orọbe mgbọ uraafiọọn̄ otakabe ọmọ mè ebi melek kan̄?#6:3 I Sam 21:1-6 4Debit ìjeje inin̄ uwu Awaji, mè imọnọ fituru esabe igwa ngwugwa inyi Awaji itaka, mè iche si inyi ebi melek kan̄. Me ubọk Ikan kiji okupbe, îre ebi ngwugwa gaalek ekitaka fituru ya òkup me mbuban.” 5Jisọs onenitumu inyi ema ibe, “Gwun̄ Ebilene ore Ogwukaan̄ Usen Mbuban.”
6Me ofifi Usen Mbuban, Jisọs ojeje inin̄ uwu ntitiin̄, mè ikijeen̄ inu. Ogwu enerieen̄ ge ubọk agan̄ ulom okwube òwa si me emen uwu ya. 7Usini ebi ìjeen̄ Ikan mè ebi Farisi ekekiweek ikan ema ebesa itet Jisọs. Eya orọ, ema ekekigwuun̄ chieen̄ ikpọ mè ìre Jisọs môgwa ene me Usen Mbuban ya. 8Jisọs orọriọọn̄ inu ema ekikeek, mè itumu inyi ogwu enerieen̄ ubọk ge okwube ya ibe, “Nan̄a keke, mè sibi na keke me isi otutuuk ene.” Ogwu enerieen̄ ya onanan̄a ikeke, mè ije inikeke me isi otutuuk ene.
9Jisọs onenitumu inyi ebi ife cha ibe, “Ǹdo enyi nu, ìre keke ke Ikan kè Mosis onyi irek ibe erọ me Usen Mbuban? Ìre ìnyi irek ibe erọ ata inu, sà ìre ijo inu? Ìre ìnyi irek ibe enyan̄a ugwem ene? Sà ìre ìnyi irek ibe efiat ugwem ene?”
10Mgbọ îdobe ikọ ya isan̄a, iraraan̄ chieen̄ ikana ikikpọ emen isi ife cha me ge me ge, mè itumu inyi ogwu enerieen̄ ya ibe, “Nyana ubọk kwun̄.” Ogwu enerieen̄ ya onyanyana ubọk, orukan̄ ya otata isan̄a kpai. 11Ejit onanaan̄ ebi ife cha enenen, mije inu ya òrọrọ. Ema ebebene ikitọt me etete kiban̄ inu ema eberọ Jisọs.
Jisọs îgobo akọp mè ebi otuchieen̄ iba kan̄
(Mat 10:1-4; Mak 3:13-19)
12Usen ge me emen mgbọ ya, Jisọs onenije inene inyọn̄ ogoon̄ ge isi ikup ikiriaak Awaji, mè ikup me uriaak otutuuk eririeen̄ ya. 13Egwe iwewele, igwegwen otutuuk ebi ìkigọọk ọmọ me udun̄ iriaak me lek kan̄, mè inigobo akọp mè ene iba isibi me etete kiban̄, mè igwen ema ebi otuchieen̄ kan̄. 14Erieen̄ ebi otuchieen̄ cha ìre Saimọn ogwu îgwenbe si Pita, mè Anduru ogwu ngwan̄, mè Jemis, mè Jọn, mè Filip, mè Batolomi, 15mè Matiyu, mè Tọmọs, mè Jemis gwun̄ kè Alifiọs, mè Saimọn ogwu ulọk ama ominbe me ejit, 16mè Judas gwun̄ kè Jemis, mè Judas Isikariọt ogwu ònenileke Jisọs inyi ekpan̄.
Jisọs îjeen̄ inu mè igwa ene
(Mat 4:23-25)
17Jisọs oneninan̄a me inyọn̄ ogoon̄ ya isibi, mè inikeke me ere ijọn̄ olaakbe, ọmọ mè akọp mè ebi otuchieen̄ iba kan̄ cha. Owuwa ebi ìkigọọk ọmọ me udun̄, mè ogbogbo ebi ìnan̄a me agan̄ Judia, mè ama Jeruselem, mè ebi ìnan̄a me ama Taya mè Sidọn me agba awaji, enunu inijot me ere ya, 18ikiweek inọnọ ikọ kè Jisọs, mè ikiweek si ibe Jisọs igwa orukan̄ kiban̄. Ebi geelek ìkakaan̄ ijo erumun̄ me emen, Jisọs orerieen̄ ijo erumun̄ cha isibi me emen kiban̄. 19Mije unye okinan̄a me lek kan̄ isibi, mè ikigwa ene, owuwa ebi ene ekekiweek ichachak ọmọ ubọk me lek, inyi lek kiban̄ inye.
Ugbana mè ufieek-otu
(Mat 5:1-12)
20Jisọs onenibene chieen̄ ikpọ ebi udun̄ kan̄, mè itumu ibe,
“Uga ubelejit okup inyi enyi ebi ugbọọn̄,
mije, mkpulu eyi Awaji ìkup inyi enyi.
21Uga ubelejit okup inyi enyi ebi ìkiran̄ ọfiọọn̄ mgbọ keyi,
mije, owot kinyi môjot.
Uga ubelejit okup inyi enyi ebi ìkito ito mgbọ keyi,
mije, enyi mêchak imọm.
22Uga ubelejit okup inyi enyi mgbọ
ebi ene mêchabe enyi mije erieen̄ Gwun̄ Ebilene,
mè isa si mije erieen̄ ya irieen̄ enyi isibi me etete kiban̄,
mè irọ enyi inu unyechieen̄,
mè ijit erieen̄ kinyi kubọk enyi ìre ebi ijo ife.
23“Ebi ene isikirọ enyi inu chi, ìkibele ejit, mè ìjop okwa unwọọn̄, mije, Awaji îsun̄ mkpukpe òmimin enenen inyi enyi me emen inyọn̄. Ikafieek owot, mije, ikeya si ke ebi nte nte kiban̄ esisaak ebi nriran me ukot ikaan̄.
24“Ire, môfieek inyi enyi ebi ìbọbọọn̄ ubọọn̄ mgbọ keyi,
mije, enyi mîra ibọkọ otutuuk
mkpukpe kinyi isan̄a me ugwem keyi.
25Môfieek inyi enyi ebi owot ojotbe mgbọ keyi,
mije, enyi mêran̄ ọfiọọn̄.
Môfieek si inyi enyi ebi ìkichak imọm mgbọ keyi,
mije, enyi mêfieek ejit, mè ito ito.
26Môfieek inyi enyi mgbọ ebi ene
isikitumu ata ikọ ibak enyi mgbọ geelek,
mije, ikeya ke ebi nte nte kiban̄
erọ me lek ebi nriran ataak me ukot kiban̄.”
Ijejeen̄ ofolek imama ebi ochicha
(Mat 5:38-48; 7:12)
27Jisọs onenitumu si ibe, “Enyi ebi ìkigban̄ ikọ n̄a mgbọ keyi, m̀be enyi, ìma ebi ochicha kinyi, mè ìkirọ ata inu ìnyi ebi geelek ìchacha enyi. 28Ìgbana ebi geelek ìgbogbo enyi, mè ìriaak uriaak me ibot ebi geelek ìrọrọ ikeme enyi. 29Ire ikaan̄ ogwu isulu owu ada me agba isi ge, kana agan̄ keyilọ nyi ene ya isulu si. Ire ene ibọkọ owu àwurukù inyọn̄ kwun̄, kakput ene ya, tele mè ibọkọ àwurukù irak kwun̄ si igbaalek. 30Ikaan̄ ogwu ibeek owu inu, nyi. Ikaan̄ ogwu imọnọ inu kwun̄, kasi ìdo ibe iyaka inyi owu. 31Ikaan̄ inu oweekbe ibe ene irọ inyi owu, rọ si ikeya nyi ene.
32“Ire enyi ima ebi ìmama enyi gaalek, ìre kpasi oruru ke enyi ekaan̄? Ebi ìkirọ ijo inu si ekima ebi ìmama ema. 33Ire enyi irọ ata inu inyi ebi ìkirọ ata inu inyi enyi gaalek, ìre kpasi oruru ke enyi ekaan̄? Ìre ìkare inu yaage si ke ebi ìkirọ ijo inu ekirọ? 34Ire enyi ikifọọk inu inyi ebi enyi eriọọn̄be ibe ke mêkọt iyaka inu ya ikpe enyi gaalek, ìre kpasi oruru ke enyi ebekaan̄ mije keya? Ebi ìkirọ ijo inu me lek kiban̄ ekifọọk si inu inyi ebi ijo inu ogbo kiban̄ ebi ema eriọọn̄be ibe ke mêkọt iyaka otutuuk inu cha ikpe ema. 35Ire, emi m̀be enyi, ìma ebi ochicha kinyi, mè ìkirọ ata inu ìnyi ema. Ìkifọọk inu ìnyi ene, mè ikakpọ chieen̄ iyayaka ibọkọ useen̄. Mgbọ enyi isikirọ ikeya, mkpukpe kinyi mômin enenen. Enyi mêre bọn Awaji Ogwu Òbebene Ichit. Mije, Awaji îkirọ ata inu inyi ebi ikpak, mè ebi ata inu geelek erọbe inyi ìkakinin̄ chieen̄. 36Eya orọ, ìkirọ ene nsan ike Nte kinyi okirọ ene nsan.
Ijejeen̄ ofolek ifefieek ene ikọ
(Mat 7:1-5)
37“Ikakifieek ene ikọ, inyi Awaji ikafieek enyi ikọ si. Ikakitip ene oyerebet, inyi Awaji ikatip enyi oyerebet si. Ikaan̄ ebi irọ enyi ijo inu, ìtele ìnyi ife cha, ke Awaji si môtele ijo kinyi inyi enyi. 38Ìkiche inu ìnyi ene, ke Awaji môkiche inu inyi enyi si. Awaji isiboche inu inyi enyi, ìbotọtọ ijot, mè ikeme itap, mè isisik, inyi inin̄ inwaan̄, mè ikpọk itap si, inyi ijot ibene, mè ifiin̄, sabum ìboniben igwook itap enyi me ubọk. Mije, inu enyi esabe itọ inyi ene ke Awaji obosa itọ si inyi enyi.”
39Jisọs onenito urọk inyi ema ibe, “Ìre ogwu ǹnàan̄ môkọt isa ogwu ǹnàan̄ ijeen̄ oniin̄? Ìre ema ene iba kpebegbaan̄ irọn̄ inin̄ emen udọn̄? 40Ofifi si, ogwu òkikween̄ inu ìkakimin ìgak ogwu òkijeen̄ ọmọ inu. Ire, mgbọ ogwu ekijeen̄ inu ya isikween̄ isan̄a, ìbokup kubọk ogwu òjejeen̄ ọmọ inu.
41“Ìre keke orọ owu okiruk chieen̄ ikpọ sọntiik nsiseen̄ uti òkup me chieen̄ ngwan̄ kwun̄, mè isan̄a chieen̄ me lek ikpele uwot òkup me chieen̄ kwun̄? 42Ìre owu òbojeje itumu inyi ngwan̄ kwun̄ ibe inu inyi owu òsan̄a nsiseen̄ uti me chieen̄ kan̄, me ere owu me lek kwun̄ okakọtge ìmun̄ ikpele uwot eyi òkup me chieen̄ kwun̄? Owu ogwu isi iba keyi! Dasi jene ikpele uwot òkup me chieen̄ kwun̄ san̄a, inyi owu òkọt òmọọn̄ inu òsan̄a sọntiik nsiseen̄ uti eyi òkup ngwan̄ kwun̄ me chieen̄.
Ijejeen̄ ofolek uti mè mfut kan̄
(Mat 7:16-20; 12:33-35)
43“Ata uti ìkakito ijo mfut. Ikeya si, ijo uti ìkakito ata mfut. 44Ekisa mfut uti iriọọn̄ lek uti. Kpekigbeme mfut figi me lek ukpak. Kpekigbeme si mfut gerep me lek uti abọm egbe. 45Ikeya si, ata ene ìkirọ ata inu inan̄a me lek ata ekiket eyi òkup me emen ejit kan̄. Ogwu ijo ene ìkirọ ijo inu inan̄a me lek ijo ekiket eyi òkup me emen ejit kan̄. Eya orọ, ene ìkitumu ikọ igọọk me lek inu òjojot ọmọ me ejit.”
Ijejeen̄ ofolek ogwu òriọọn̄ inu mè ogwu burubut
(Mat 7:24-27)
46Jisọs onenido ema ibe, “Ìre keke orọ enyi ekpọkpọ ikigwen emi Okaan̄-ene, Okaan̄-ene, ire, enyi kpekirọ inu nkitumu? 47Mâjeen̄ enyi inu ge nu. Ene geelek ònunu me lek n̄a, mè inọ ikọ n̄a, mè irọ inu nkitumu, 48ene ya ìkup kubọk ogwu òbonama uwu, mè irọkọ ijọn̄ idọk, mè igwook ewuuk irak ijọn̄ uwu ya itoon̄ me inyọn̄ ewuuk me emen ijọn̄. Mgbọ mun̄ ile obaakbe inu, mè isa unye agbugbuk inibieen̄ uwu ya, uwu ya ìkasisik, mije, mînama inye. 49Ire, ene geelek ònọnọ ikọ n̄a, mè ijit irọrọ inu nkitumu, ene ya ìkup kubọk ogwu ònanama uwu kan̄ me inyọn̄ achiaan̄, ìkatap ewuuk irak ijọn̄. Mgbọ yaage mun̄ ile obaakbe inu, mè isa unye agbugbuk inibieen̄ uwu ya, uwu ya ogbugbugbọ igwook, mè igwak isan̄a kpai.”
Currently Selected:
Luk 6: ANNa
Highlight
Share
Copy
Want to have your highlights saved across all your devices? Sign up or sign in
© The Nigeria Bible Translation Trust, 2013