Roma 3

Wawaineŋo Kaisale Wane Don Maine Mi Makesiyake

1Pakimo Yuda ŋei eŋe qelaŋ ŋei daleo yuwanongei? Me solao kibi kita kitat yewao ŋine onokaka maine mane wakon okanmaike? 2O, Yuda ŋei eŋe qelaŋ ŋei yuwan onmami. Kine kine numaine numaine zok manerop wakon okanmaike! Lewine alakane Kaisale eŋe eŋine donine Yuda ŋei ware kakeiwane sunonge. 3Yuda ŋei natne eŋe don yewa mi detluke magekoiwo yemo daleo? Eŋe yale okangoiwo yemo yewaŋo Kaisale wane ra togole ra togole donine yewa ma kesiyake me? 4I Midakaka! Kaisale eŋe don welekatne ra okanmaike, ŋo ŋei korop eŋe isi okanmami, eya wane Kaisale wane ekapko iwa yale ramaike,

“Ge dongo biraganbi, ge don raraŋone eyaŋo bile okangi, ge maine don yuwangene.”

5Ŋo ŋenane masi tanik borikine oka okanze yewaŋo siluŋ Kaisale wane tanik manik koboine oka okanine eya didiwo qe wakon maikeo yemo daleo okaniyake? Ŋene daleo maine raikene Kaisale eŋe ma koboeŋon okanmaike yewa eŋe sot okanmaike me? (Na don iwa ŋei edo okan okanmami eya wane rokop ramaile.) 6I Midakaka! Kaisale eŋe koboine mida ra yemo eŋe daleo kepe baŋem ŋei ŋerep kineze maine ma wakongirap?

7Ŋo siluŋ nat paromine yemo naŋane isi donne ŋo Kaisale wane kibi qelaŋan qesiŋka more maki eŋane don wele eya wiye manerop didiwo suwa ariyakeo, yemo daleo okaniyake? Pakimo na siluŋ onoka wane borikine mane nora more turuŋine nin okanmaike? 8Pakimo ŋene onoka wane iwa yale mi ramaine. “Ŋene borikine maŋem ma tanik manik maine sarikep?” Na don mide iwa ramaile eya wane ŋei natne eŋe welekatne naŋane ramami, oŋo yale ramaike rau paki naŋane detpi boriki sigine qemami! ŋei iwa eŋe baŋ turuŋine wikile eboniyake yemo menageyake.

Ŋei Maneŋo Koboboine Mi Gemaike

9Eso maine, ŋene Yuda ŋeiŋo qelaŋ ŋei yuwan one more rokop mane gemaine me dale? Weneŋ Midakakamde! Na mo mikepka sikan-ŋunile, yemo Yuda ŋei so qelaŋ ŋei eŋe kine-ene wekuka, eŋe korop borikinane bano waket more qelitine qeokanmami. 10Eya wane Kaisale wane ekapko iwa yale ramaike,

“Ŋei maneŋo koboboine mi gemaike, 11Ŋei maneŋo dereret korop mi gemaike, me maneŋo Kaisale kayakane mi zuwaŋka okanmaike. 12Ŋei korop eŋe Kaisale qeliŋka qeyau ariwarekoi, eŋe korop borikine okan warekoi, weku maneŋo maine mi okanmaike. 13Eŋane aŋaene yemo deŋesere mumuine borikine okoramaike, eya yale, isi borikineŋo belakamene wali walip pisemaike, so don seuseuinerop, koma wane ŋet dokune borikine yale, pieno ŋine saket okanmaike, 14Ŋei borikine yewa eŋe naso baŋem aŋaeno ŋine sowa tabaine don mi raraine eya koto so wet derereteno watke pa more aŋaenoka saket kimkope-ene qom umat ma wakone ebon okanmaike. 15So eŋe naso baŋem kine kine qokoine eya ma wakongei wane simile dere qomene wiyeki naso natko kawali weneŋ ziwem ma okanmami, ŋo naso natne eŋe enguwi weneŋ seuk-okanmami, 16so eŋe ŋei borikine yaline okangei me mau paki kima natne eŋe okan-one more mau gege-ene manerop zok umat wakongi qom borik so qom umat ma wakone ebon-okanmami. 17So eŋano don dereret mane bile wet maep me wet menaŋ me qom pesek eya mane yemo mane mi pa ebonmaike, 18eŋe enŋe-nane detpi zok manerop waki matali qetali ma okanmami wane baŋ Kaisaleŋo ŋei yaline eŋe onokaka don edaniyake, yemo eŋe oŋom detmaike, wane mo ŋei yaline eŋe siluŋ Waom wane kaet detpi rap.”

19Ŋene mo detmaine, don korop ra rokop dongo ra waremaike, yemo ŋeiwa ra rokop don wane bano gemami, eŋane ramaike, eya yemo ŋei wet eya ma wongeyakane, so kepe baŋem ŋei ŋerep korop waraŋongi sari, Kaisale wane kine tile tilek eya wane bango waket warekei. 20Ŋei maneŋo ra rokop don teweke ge mage more, Kaisale wane kaitko koboine mi okorayake, ra rokop don yemo eŋe ŋei sot okange yewa sikankaki, ka detkayake, eya wane.

Kaisaleŋo Ŋei Ebu More Eŋino Koboine Biraonge

21Ŋo iwa yemo Kaisaleŋo ŋei eŋino koboine biraongi gekei wane, numa mo tingo Yesu wane kutko ma wakonge, ŋo yewa eŋe ra rokop donka mogare, gege numa yewao, Midakaka, ra rokop don so propet eŋe numa koboboine eya wane don kisiine ra qelaŋangoi. 22Kaisaleŋo ŋei eŋe Yesu Kristo detlukkau paki malipkakei, eya wane ŋei koboboine edorayake. Kaisale eŋe masi iwa yemo ŋeiwa korop diyawa edo Kristo malipka gemami, eŋe okanoniyake, onoka wane kineine etkeka mi pamaike, Midakaka. 23Ŋei korop borikine ma warekoi paki, Kaisale wane ebu ebu kibi qelaŋanine yewa kakale rau paki, eri abaran ari warekoi. 24Ŋo siluŋ Kaisale qomine rarainane seseone more, wet menaŋine yewa lewine midaine, yaup eŋe korop ebu more, Kristo Yesuŋo borikino ŋine siwot ongane, eŋane raki paki, eŋino koboine biraonge. 25Kaisaleŋo seukeyakane ra mangane, eŋe gegeine qaisik kaki, weŋemineŋo ŋei korop eŋe detlukakei, eŋane borikine-enane turuŋ ma more seuke more saukki mo siukke. Kaisale eŋe masi yewa okangi paki, tanik manik koboboine eya wane kine ma wakonge. Mo alakan yemo eŋe loloŋone more, ŋei eŋane borikineene yewa qeliŋgi pake. 26Wane naso iwao yemo, eŋe ŋei eŋane borikineene eya ka modare eŋine masi tanik koboboine eya wane kine ma wakonge. Eŋe numa yaleoken okangi paki, Kaisale oŋom koboboine gemaike, eya wane kine sikanonge paki, eŋe ŋei natne Yesu malip kamami eya ebuki koboboine okanmami.

27Pakimo maine ŋene eya wane mawa nagukene? Midakaka, eso iwa wane kine yemo dalino? Ŋene ra rokop don tewekmaine, kine eya me? Mida, kine yemo ŋene detluke malip kamaine yewaŋo okanmaike. 28Ŋene ramaine, yemo ŋei eŋe mali malipinane weku ra more, koboboine Kaisale wano biraka okanmaike, eso ra rokop donŋo raki teweke okanmaike, eya wane mida. 29Me eŋe Kaisale weku Yuda ŋei eŋane Kaisaleka mane? Eŋe qelaŋ ŋei eŋane Kaisale yaleka mida mi mane gemaike? O, eŋe eŋane Kaisale weneŋ gemaike. 30Kaisale eŋe wekuku, wane eŋe baŋ Yuda ŋei mali malipenane raki paki, eŋinerop koboine biraoniyake, so qelaŋ ŋei eŋe yaleka mali malipenane raki paki, eŋino koboine biraoniyake. 31Ŋene iwa okangi kamaine, eyamo mali malipŋo ra rokop don rasi qokki ketmaike, yale okanmaike me? Midakaka, yale mida, eya wane turuŋine ŋene ra rokop don maŋem wiye okorakep!

Currently Selected:

Roma 3: onsNT

Highlight

Copy