Roma 1

Pauloŋo Aposolo Urata Mamainane Kine Rake

1Paulo, na Kristo Yesu wane urata ŋei, so aposolo, Kaisaleŋo eŋine kisi maep kine eya ra qelaŋani-kalane ra wakon nange.

2Don Maine eya mokaka Kaisaleŋo ŋenane biŋek qeke, eya eŋine propet-koune edangi, eŋe Ekap Kobekine yewao qekoi, 3Eya yemo eŋine Gipole, ŋenane Waomze Yesu Kristo, eŋe eŋine ŋei ŋene yale kepe solarop wako wakon yemo Dawit wane qerakineŋo wakonge. 4So eŋine koto qelaŋan maratka more Asurop gege yewaŋo Kaisale wane Gipole gemaike, eya wane kine seuseuwo ŋine ma wirikkaki wiyeke, yewao wakonge. 5Eŋane raki paki, Kaisaleŋo wet menaŋ okannane more, aposolo urata ninge. Kristo wane eŋet biŋekine ra suwawe paki, kepe baŋem ŋei ŋerep korop iwen onbe, done dere malipkau paki, aŋa tewekkei wane. 6Yewa Roma kepeo gemami, ŋine yaleka tego yewao takotkemami, ŋine Kaisaleŋo Yesu Kristo wane biŋek okanikei wane ŋidora waraŋ ŋunge.

7Eso eya wane Roma matko ŋei ŋerep korop gemami, ŋine Kaisaleŋo wet maep okan ŋunmaike, so eŋine ŋei ŋerep magu okangei wane ŋidora waraŋ ŋunge, ŋinane kibi iwa qemaile.

Kaisale Magaze so Waom Yesu Kristoŋo wet pesek so peyam maine ma wakone ŋibongep.

Bakom Kito Kito Meŋe Meŋen

8Mikepka, na ŋinane korop rawe paki, Yesu Kristo wane eŋetko Kaisalene bakomine kitomaile, yemo onoka wane mida, kepe baŋem ŋei ŋerep korop eŋe ŋinane mali malip ŋinane don kisiine detmami, eya wane. 9Kaisaleŋo kine maine ma wakoniyake, na don iwa ramaile, yemo welekatne. Na asuneŋo korop Kaisale wane urata mamaile, yemo Gipolane Don kisi Maine eya ra edanmaile. Kaisaleŋo detmaike, na naso baŋem ŋinane eŋetŋine ŋidora meŋenka okanmaile. 10Naso baŋem na meŋenka okanmaile, yemo na olatpe, Kaisaleŋo detki menaŋgi ŋado numa lotkeki, na maine iwa ŋinano sari ŋunikale. 11Na zok ŋine ŋunikalane nanmaike, yemo umore koto ŋinane don mosop mane ŋibonbe ma togoleŋungi togolekei. 12Na ramaile, yemo ŋine so na weneŋ naso wekuwoka qesiŋ nagukene, naŋane mali malipneŋo ŋine qesiŋ ŋuniyake, ŋo ŋinane mali malipŋo na qesiŋ naniyake.

13Kima kopne, ŋine yewa detlukkei, atakine atakine ŋinano sari ŋunikalane wetke maŋkole, ŋo siluŋ kine kine natneŋo luknangi, mi sari ŋun maŋkole. Na uratanane welene ŋinane keuŋino wakoniyakane nanmaike, ŋei natne eŋano mawe wakon okanmaike, yale. 14Na sotane ŋei ŋerep korop eŋano pamaike, Grik ŋei so ŋei natne, ŋei dereret korop so ŋei qelaŋ. 15Eso eya wane na Don Kisi Maine eya Roma kepeo gemami, ŋinano yalewaka ra ŋidanikalane qomne ewekmaike.

Mali Malip Wane Ra More Gege Maratkakene

16Na kisi maep Don Maine eya wane detpe, gamu gamuinerop mi okanmaike, onoka wane, eyamo Kaisale wane zonom, ŋei korop eŋe detluke malipkau, rokop ebuki menaŋgei, lewine yemo Yuda ŋei so Grik ŋei yaleka. 17Kisi Maep Don Maine yewaŋo Kaisaleŋo ŋei eŋino koboine biraon okanmaike, eya wane kine ma wakon okanmaike, eyamo mali malipko ŋine kiyeke wakone ariki, kutno qoeyake. Kaisale wane ekapko iwa yale ramaike, eya wane rokop, “Ŋei mane eŋe Kaisalerop koboboine mali malipinerop geyake, eŋe gege togon marat kayake.”

Ŋei Eŋe Kaisale Ŋadekkau Paki Panaman Koto Ketkoi

18Kaisale wane sot osi osiine yemo didiwo qeliwo ŋine ket more, ŋei eŋe borikine korop mau paki, sot korop okanbi, gegeene bori worine yewaŋo don wele yewa desikei wane mogatki ari okanmaike. 19Kaisaleŋo makoboe on okanmaike, yemo onoka wane, ŋei eŋe Kaisale wane kineine eya maine detmami, eya yemo Kaisale eŋe oŋomka wetene malotkeki detkoi. 20Mokaka Kaisaleŋo kepe ma wakonge, eŋine kineine mi kakaine, gege togon zonomine so eŋine wetine weneŋ ma wakongi eŋe didiwo kakoi. Eya wane ŋei eŋe Kaisaleŋo yeye kine kine ma wakonge, eya wane kine maine mi ŋaŋaekei! 21Eŋe Kaisale detkamami, ŋo siluŋ eŋe Kaisale ewine mi kitomami, eya yemo eŋane biŋek, me bakomine mi kitomami. Yale okangei wane, turuŋine yemo eŋane derereteneŋo zok qelaŋine okange, so wet dereretene yemo korop panamanŋo watkewareke. 22Eŋe ramami, eŋe dereretenerop, ŋo siluŋ eŋe qelaŋ qemami. 23Kaisale gege wane welaine mi meŋen kakei wane, turuŋine yemo eŋe lopio ŋei oŋa meteŋo mamaine, me naŋi oŋaine me osom berek, me koma eŋane oŋa oŋaene eya meŋenon okangoi.

Ŋei Eŋe Kaisale Qeliŋkau Paki Kine Kine Madoŋ Madoŋine Okangoi

24Onoka wane ŋei eŋe yale okangoi wane, Kaisale eŋe one ŋadekongi, weteneŋo borikine madoŋ madoŋine yau yaup mau paki, koto solaene korop matali kawarekoi. So ŋei eŋe borikine kine kine gamuinerop makoi, ŋeiŋo ŋei yewa turuŋine turuŋine okan nagukoi. 25Ŋei ŋerep eŋe yale okane more Kaisale welekatne welaine ŋadekkau paki, isi don, wele midaine eya qom kakoi. So eŋe Kaisale aŋaineŋo Waom isisine natne raki wakongoi, eya eŋe meŋen-ongoi so qelitene qekoi. Eŋe yale okanbi paki Ma Wakon Ma Wakonze eŋine ewine mi kitokoi. Kaisale eŋe weku yemo bakom mawa mawa okankakei, ukude so naso baŋem naso baŋem. I, weleka.

26Onoka wane ŋei eŋe masi tanik iwa okangoi, eya wane Kaisaleŋo qikongi, eŋe masi tanik gamuinerop eyaŋo kuteno wake. Ŋerep eŋe yaleka ŋao ŋanom gege eya wane numa Kaisaleŋo ra motke, yewa qeyau more solaene mi oka okane yewa okangoi, ŋerepŋo ŋerep kimaine maki masi borikine ma okanmami. 27Numa yewaka ŋei eŋe ŋao ŋanom gege yewa waluke qeligeu paki, kotoeneŋo borikinane gerep suwaine zeki, eŋe edomka borikine kine mane mi oka okane, eya ma wakongoi. Ŋei eŋe masi tanik gamuinerop yewa eŋe edomka okan nagukoi. Eso eŋe masi tanik borikine yaline okangoi, eya wane turuŋine eŋe edomka koto so sola matali matali eya marat kakoi.

28Onoka wane ŋei eŋe Kaisaleŋo eŋine dereret wele yewa leweteno more ma gekei wane ebonge, eya walukkoi, eya wane eŋe qeliŋongi enŋene dereretene borikine yewa mogare gekoi, paki eŋe masi tanik borikine mi oka okane, yewa okangoi. 29Eŋane kotoeno yemo borikine kine kine qotkoine yewaŋo korop watke wareke. Masitanik qotkoine, wetŋo bailalaŋ, kaŋ bak suwa so ŋaba ŋaba, sori sorinŋo kotoeno watwale, ŋei engu matali onbi seuseuk, kawali qeqe, isi bela so ŋei matali. 30Eŋe sigi qeu paki, don borikine edomka au au, eŋe Kaisale ŋabaka ŋabaka, don suwaine rara, wawaine so sola mawa mawa, eŋe borikine koso manerop makeiwane numa ma wakon ma wakon, nabok magak eŋane aŋa bira wira. 31Eŋe wet dereretene midaine, eŋe don ra okanmami, eya mi tewek okanmami, so eŋe ŋei natne wet pesek me wet borikene eya mi sikanon okanmami. 32Eŋe Kaisale wane ra rokop donŋo ramaike, ŋei ŋerep numa yaline gekei, eŋe seuseu marat kaikei, eya mo detmami, ŋo siluŋ eŋe masi tanik yewaka takotke okanmami, eŋe ŋei natneŋo tanik yewa okanbi, eŋe siluŋ kito qesiŋ okanon okanmami.

Currently Selected:

Roma 1: onsNT

Highlight

Copy