Luka 24
24
Yesu Eŋe Koso Wisikae Wiyeke
1Kepe qaeki, Sodao ŋerep eŋe kelok qounerop mo maulukkoi, eya ma more deŋesereo arikoi. 2Eŋe ari pore kau, wesi suwaine kezem aŋaino metke, eya mo rodigeu saket arike. 3Eŋe kezemgo waket pore, Waomene Yesu wane pareŋine mi kakoi. 4Daleo wakonge, eya eŋe mi detluke okorau, so ikopka ŋei etke laplap libekaropŋo ŋerep eŋane osoeno okorakoik. 5Ŋerep eŋe kaet suwaine ongi, so kepo ket rasu pau, so ŋei etke ere edangoik, “Ŋine onoka wane ŋei wisikaune deŋesereo seuseune eŋano ziyaŋkamami? 6Eŋe iwa mi metmaike, Kaisaleŋo eŋe maki wisikae wiyeke. Detsorokeu, eŋe iwa mi pamaike, sogino Yesu eŋe Galili ge more, iwa yale edange, 7‘Ŋei maneŋo ŋei sotenerop eŋane meteeno, Ŋei Wawainane Gipole birakaikei. Ŋei sotenerop eŋane ra, kibego qeu seukeyake, ŋo kaiwe karewe pa more, kutno eŋe koso wisikae wiyeyake.’ ”
8Pakiso, ŋerep eŋe Yesu wane don detsoroke more, 9kezemgo ŋine zinge ari, dokoine elewen (11) so ŋei ŋerep magukopene maratongoi, ŋei etke eŋe ŋerep edangoik, eya korop ŋerep eŋe medep enŋene so magukopene edangoi. 10Ŋerep eya Mariya, Magdalena matko ŋine, so Yoana, so Mariya, Yakop wane nagaine. Ŋerep eya so ŋerep natne eŋe Yesu wane qelit ŋei, aposolo, don kisi edangoi. 11Ŋo aposolo eŋe detkoi, ŋerep eŋe don weleka zok mi ra okanmami, eŋe don yau yaup ra okanmami, eya wane eŋane don mi malipkakoi. 12Ŋo Petoro eŋe wiye biririke ket deŋesereo ari potki waketki kaki, kezem koto eya mo laplapŋoka pake, eŋe yale ka more, oŋaine qaeki, koso matko zinge welepke more, kine kine wakonge, eya wane zok manerop dereret urata ma arike.
Yesu Eŋe Dokoine Eŋanoŋine Etke Maratotke
13Soda yewao Yesu wane dokoine etke Emaus matko arikeik wane arikoik. Mat eya wane duma kilomita 11 Yerusalem ŋine. 14Kine kine Yerusalem matko wakonge, eya eŋe don auwik so, 15Yesu oŋom erano maratotki, ererop weneŋ arikoi. 16Ere ka more so mi det-lukkakoik. 17Pakiso Yesu eŋe qesonore rake, “Dalino aumamik?” Ere doŋ mane okora more qom borik zok otke. 18Ŋei mane, eŋetine Kelopas eŋe Yesu qesonka rake, “Ge Yerusalemgo kulit gemaine? Kine kine soda iwao wakonge, eya ge mi detmaine?”
19Yesu eŋe qesonka rake, “Onokaka wakonge?”
Ŋei etke ere mainge olatkoik, “Yesu, Nasaret ŋine eŋano kine kine eya wakonge, ŋei eya eŋe Kaisale wane qelit ŋei mane, eŋe don zonominerop ŋei ŋerep kito edange, so masi togole ŋei ŋerep so Kaisale kaiteno make. 20Ŋenane Mosop ŋei Suwaine ŋetne, so ŋei ŋetne natne eŋe Pailat wane meteo birakakoi. Pakimo Pailatŋo kawali ŋei eŋane meto rakoke ebongi, kibego qeu seukke. 21Mo sogino qei bano Kaisaleŋo rake, eŋe ŋei mane baŋ Israel ŋei ŋerep qesiŋ-ŋoniyakane bira-kayake, so naso eyao ŋene Yesu wane yale rakone, eŋe baŋ Yuda ŋei mapik ŋoniyake ra more urata eya mayakane detkone, ŋo eŋe seukke, mo iwa kaiwe mama karewe qoemaike. 22Kepe qae qaewo ŋerep natne, ŋenane magu keuwo ŋine, eŋe kezemgo ari more, 23Yesu wane pareŋine mi maratka more, ŋenano zinge sari iwa yale ŋedanmami, ‘Ŋene aŋelo otŋem mo rakoik, “Yesu eŋe mo wisikae wiyemaike”.’ 24Eya wane oŋaze qaeki, ŋei natne ŋenane magu keuwo ŋine, eŋe ari kezemgo ka more, Yesu mi kamami. Ŋerep eŋe kine kine korop remi, eya korop welekatneka.”
25Pakiso Yesu eŋe etange, “Ŋine dereretŋine midaine, sogino Kaisale wane qelit ŋei eŋe kine kine qekoi, ŋine don eya ikop mi malip kamami. 26Kaisaleŋo rake, Mesiya eŋe wikile suwaine desiyake, pakimo Mesiya eŋe qeliwo qelaŋinerop wayake.” 27Yesu eŋe dokoine eŋano ŋino etke erano Kaisale wane ekapko don korop pamaike, eya ra qelaŋange, Yesu eŋe Mose wane kibi eya ŋine kiyeke more, ari mage Kaisale qelit ŋeikoune eŋe kibi korop Mesiya wane ra more qekoi, eya ra qelaŋan-otwareke.
28Pakiso eŋe Emaus osino lotkeu paki, Yesu eŋe mat maneo bira ore ariyakane okange. 29Ŋo ere Yesu ma waulukka more rakoik, “Ruwo keremaike, ruwo keremaike, ge ŋererop mesikene.” Yale raukso, eŋe yewa metke. 30Eŋe ererop ŋara neyakane metke, eŋe kasap ma mosopka more, mapoke ere eponge. 31Pakiso erane dereretetne qelaŋangi so eŋane kine detlukkakoik, ŋo Yesu eŋe siukki, so ere mi kakoik. 32Arikiso, ere don iwa yale aukoik, “Dumao, ŋene sarine, eyao eŋe Kaisale wane ekapko ŋerano ra qelaŋanike, naso eyao qomso zok kitike.”
33Au more qoeki, ikopka eŋe wiye more, Yerusalem zinge ari more, dokoine 11, so ŋei ŋerep natne maratonbik lewaŋgoi. 34Ŋei ŋerep magu eŋe edanbik rakoi, “Waomze welekatne wisikae wiyeke, eŋe Saimon mo wakonkeke!”
35Ŋei etke ere kine kine dumao wakonge, eya korop ra qelaŋangoik, Yesu eŋe dalino kasap mapokke, eya wane ere eŋane kine detlukkakoik, eya korop ra edangoik.
Yesu Eŋe Dokoine Eŋano Lotkeke
36Ŋei etke ere don kisi eya edanbik, mi qoeke, naso yewaoka Yesu eŋe eŋane keuweno wakone okora more edange, “Peyamŋo ŋinano pawayake!”
37Eŋe Yesu ka more oŋaoŋa kamaine ra manerop zok kaetonge. 38Ŋo Yesuŋo edange, “Ŋine misuk kaet ŋungep! Nine dere mezet mi okanikei! 39Ŋine naŋane kiye metene kau, noŋom sarimaile ŋine solane uwanane kau. Oŋa oŋa eŋe bikumine so setine mida. Na bikumne so setnerop.”
40Yale ra more eŋe kiye metine eya kawali ŋei edo kiruŋaŋo qekoi lopot eya korop sikanonge. 41Eŋe bakom zok suwaine manerop kitokoi, ŋo eŋe weteneŋo yemo mi malipkakoi. Eŋe dere qeka okane ŋaŋaekakoi. Pakiso Yesu eŋe qesonone rake, “Ŋara natne pamaike me?” 42Eŋe zawon zezine nat manbi, 43ma more, eŋane kaitko neke. Neki qoeki edange,
44“Sogino na ŋinerop gekole, naso eya na kine kine ŋidankole, eya korop mo wakonge. Mose wane ra rokop don so Kaisale qelit ŋeikoune eŋane ekapko so Bakom Eŋet ekapko, kine kine korop ekapko eya wane kotino pamaike, eyamo naŋane ra more wakonge.”
45Pakiso qesiŋone more ra qelaŋane edangi, dokoine eŋe Kaisale wane kine ekapko pamaike, eya detlukkoi. 46So Yesu eŋe dokoine edange, “Kaisale wane ekapko pamaike, Mesiya eŋe wikile dere more seuke kaiwe mama karewe pa more koso wisikae wiyeyake. 47Ŋine ari ŋei ŋerep kepe baŋem kepe baŋem naŋane kisi maep don ra qelaŋanbi, wetene maingekei. So ŋine urata eyamo Yerusalem mat kotino kiyeke more ra qelaŋanikei. Pakimo ŋei ŋerep eŋe kimakopene eŋane sot turuŋene eya ŋadekkaikei, eya wane rokop Kaisaleŋo yale waka eŋane sot turuŋene eya qeliŋgi nigetkayake. Ŋine don eya ra qelaŋangei. 48Ŋine kine kine wakongi, deŋineŋo kakoi so ketŋineŋo detkoi, eya ŋei ŋerep kito edane more ra qelaŋan onikei. 49So ŋine koso detpi sogino, Magakŋo kine kine ra togole ŋibonge, eyamo koso noŋo ŋibonikale. So ŋine Yerusalem matko toma metpi, zonomne eya qeliwo ŋine ŋinano kesiyake.”
Yesu Eŋe Qeliwo Wake
50Pakiso, Yesu eŋe dokoine Yerusalem ŋine iwenon ari more, Betani lotkekoi, yewao Yesuŋo meteene ma more mosoponge. 51Mosop eya mi qoeki, Kaisaleŋo Yesu qeliwo maki wake. 52Dokoine eŋe Yesu eŋetine bukeu waki koso Yerusalem matko zinge arikoi, Yesu eŋine magu koropŋo bakom suwaine kito more, 53so eŋe naso baŋem Kaisale wane Bakom Urumgo ari yewao Kaisale eŋetine takorakot ora bukeu waki meŋenka ge-wamaŋkoi.
Currently Selected:
Luka 24: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.