YouVersion Logo
Search Icon

Aposolo 26

26
Paulo Eŋe Agripa Wano Don Rake
1Pakiso, Agripa eŋe Paulo olatke, “Ge maine geŋone donŋone rakene.” Paki Paulo eŋe metine ma wiye more donine iwa yale rake,
2“Ŋei Waom Agripa, na detpe, wekumane okanmaike, na maine kinene geŋane kaitko ra wakonikale, Yuda edo qesat don solano qe ramami, eya wane turuŋine main gekale. 3Iwa weku yemo welekatne, onoka wane ge Yuda ŋenane tanik manik so qeso qeson kine kineze mo korop detlukmaine. Eya wane ge tikŋane mere naŋane don desikenane na golatmaile.
4“Na qaluwitno daleo ge sarikole, eya wane kine Yuda eŋe mo korop det waremami, na gegene korop daleo gekole, nae kepe matko so Yerusalem matko, eŋe mo qei kino ŋine detpi sari qoe waremami. 5Eŋe mo naso baŋem detmaŋkoi, eŋe raikei wane onmaikeo, maine ra wakonikei, yemo na ŋenze maguzane numa togon, eya wane kopko mikepka mogare, Parisi numa tanik manik gekole, numa eya zok urata suwaine, eyaŋo ŋenane kisi maep wane masi tanik natne eya yuwan kamaike. 6So na ukude iwa okoramaile, kinene mawakonikei wane, dongo bira nanmami, so kine yemo iwa yale, na Kaisaleŋo aso ŋabokopze yeye kine kine baŋ ma wakon wareyakane mo edange, eya malipka more tomaka gemaile, eya wane. 7Donine iwa mo ra edange, eya wane ŋenane Israel esep milop magu 12, eŋe eya maikei wane malipka tomaka ge more, Kaisale meŋen kamami, kaiwe so ruwo, yemo onoka wane na yaleka iwa malipka more toma kamaile. O ŋei waom, kine iwa wane Yuda eŋe naŋane solao don qekoi! 8Onoka wane ŋei natne ŋine wetkemami, Kaisale eŋe koso baŋ ŋei seuseune ma wirik oniyake, eya ŋene misuk malip kaikene yale wetkemami?
9“Na noŋom alakan masi kine kine korop loutne ma more, Yesu Nazaret ŋine, eŋane eŋetine maine mawe kesiyakane wetke more ŋabakakole, 10na Yerusalem matko yalewa okangole, na mosop ŋei Pris ŋetne eŋano ŋine ŋei ŋerep ebu lukonikalane zonom togole makole, paki Kaisale wane ŋei ŋerep loutne zok mulap urumgo bira ongole. So eŋe enguwi seukmaŋkoi, yewao na yaleka ebene bonepke more maine ramaŋkole. 11So na naso baŋem Yuda lewa lewaŋ urumgo korop engu matali ongole, so ŋei ŋerep eŋe Kaisale ma baikka more, mali malip, eya isi raikei wane, na masi yale makole. So na eŋane wet gerep zok manerop okangole, eya wane na lobo kepeo matne matne yaleka engu matali onikalane arikole.
Paulo Eŋe Doku Tau Tau Maguwo Takotkeke Eya wane Don Kisi Edange
12“Kine iwa yale wane na mosop ŋei, Pris Suwaine magu eŋano ŋine kibi mawe, eŋe qebin nanbi, na Damaskus arikole. 13Kepe oŋa bango, 12 kilok okangi, O ŋei waom, numa kebago na kawe kiwa mane qeliwo ŋine ketke, qelaŋane zok manerop so togogole, eyamo kepe deinane qelaŋan yale midakaka, eŋe kepe deine yuwankamaike, eyaŋo ket qelaŋaneŋo motki qezazakke, na so ŋeiwa narop arikone eyamo qelaŋaneŋo lolikŋonge, 14Ŋene korop kepo ket rasu pa warekone. Na papaset pa detpe, mo don mane Hibru dongoka nolale rake, ‘Saulo, Saulo, ge onoka wane neku matali nanmaine? Ge kine kine ŋetne teine, eya kitonom, eyaŋo zinge geŋone wikile ginmaike.’ 15Pakiso noŋo qesonka rakole, ‘Ge maŋo, Waom?’ Rawe so Waomŋo rake, ‘Na Yesu, ge na neku matali nanmaine, 16Ŋo ge wiyenom paki, kiyeŋone kutno gesoke okoranom, naŋane qelit ŋei okanikenane, na ge wakongane more ma wakon ganmaile, ge kine kine onoka ukude naŋano ŋine ka waremaine, so onokaka na baŋ ŋado sikan ganikale, eya ŋei ŋerep natne rawakone edangene. 17Na baŋ Israel ŋei ŋerep magu so qelaŋ magu, eŋane meto ŋine geukale, na eŋano baŋ bira ganbe arikene, 18ge deene matokkenane, so panamango ŋine ebu main onnom, qelaŋango sari wet maingekei, paki eŋe maine Ŋei Borikinane zonom eya ŋadekkau, goŋo Kaisale wano bira onikene, eso eŋe mali malipene naŋano payake, eya wane ra more, eŋane borikineene baŋ ebu makale paki, eŋe Kaisaleŋo ŋei ŋerep magukoune ma wesakonge, wane ŋei ŋerep eŋe na malip nane more, eŋe maine ŋei ŋerep eŋane keuweno naŋane biŋek okane numaene ma more gekei.’ ”
Paulo Eŋe Kisi Maep Urata Make Eya Wane Agripa Olatke
19Paulo eŋe koso rake, “Eso ŋei waom Agripa, na qeliwo ŋine kine kine eya kawe paki, eŋane don eya mi birakole, 20mikepka yemo Damaskus matko ra qelaŋane edangole, so Yerusalem matko so Yuda eŋane kepe matko korop so qelaŋ eŋane keuweno rawakone edangole, so iwa yale ra edangole, ‘Ŋine zingeu paki, wetŋine Kaisale wano motpi arikep, so ŋine yeye kine kine maikei, ŋo wet maingemami, so Waom qomka more, qelaŋanmami, eya wane wetŋine motpi, eya wane numa oken ariyake.’ 21Na don yaline ra qelaŋanbe, kine yewa wane na Bakom Urum koto gewe, Yuda ŋei eŋe neu malip nangoi paki, nekukei wane okangoi, 22Ŋo siluŋ kaiwe nasomde yewao Kaisaleŋo qesiŋ nange, paki yewa ŋine gesari mage ukude okanmaike, eso eya wane na iwa okora mo, nae don kisi ŋine korop ra wakone ŋibonmaile, ŋei ŋerep ketkele so wawaine weneŋ. Na don ramaile, eyamo don mane mida, don wekuka, propet so Mose eŋe mo wakoniyakane rakoi. 23Eŋe iwa yale rakoi, ŋeiwa yewa Mesiya, eŋe wikile kaukeyake, so borikino ŋine ebu main oniyake, paki oŋo lewine seuseuwo ŋine wisikae wiye more, mena menaŋ wane kiwa qelaŋane, eya wane don rawakone, Yuda ŋei ŋerep so qelaŋ ŋei edaniyake.”
Agripa Eŋe Malipkayakane Paulo Ŋo Rake
24Paulo eŋe eŋine donine qesiŋ nagu don numaine yale raki, Pestusŋo kuroŋka rake, “Ge qelaŋ qemaine, Paulo! Ge kibi urumgo ge more dereret suwaine makone, eyaŋo qebingangi qelaŋ qemaine.”
25Pauloŋo mainge rake, “Na qelaŋ mi qemaile, geŋone maine, na don korop ra waremaile, eya wele so welekatne, 26Ŋei Waom Agripa, na maine korop kaet midaine ge golat warekale, onoka wane ge kine kine iwa wane kine mo det waremaine. Na detmaile, yemo ge don iwa korop mo det waremaine, mane mi yuwan kakone, kine kine iwa siuke ari qekatno mi wakonge. 27Ŋei Waom Agripa, ge propet eŋane don det lukmaine? Na detmaile, yemo ge det lukmaine!”
28Raki Agripaŋo Paulo olale rake, “Ge nasomde bamgo iwa wane kotinoka baŋ neunom, na doku tau tau mane okanikale, yale wetkemaine?”
29Raki Pauloŋo olatke, “Naso bamgo me naso kiroine, eya maineka, naŋane meŋe meŋenne Kaisale wano motmaile, yemo ge so ŋei natne korop ŋine naŋane don iwa detmami, ukude maine na yale okanbi rap, wekumde, yemo sein iwaŋo ŋinano misuk mesiyake!”
30Paulo eŋe don raki qoeki, ŋei waom eŋe wiyeki, ware ware, Bernais so ŋei natne korop wiye warekoi. 31Eŋe urum qelige ketpi paki, ŋado maneŋo mane au rakoi, “Ŋei iwa eŋe sot kine kine mane maki seukeyakane kop me mulap urumgo birakakei wane kop maine mi okange.” 32Pakiso Agripaŋo Pestus olatke, “Ŋei iwa eŋe Sisaŋo done mi desiyakane ra more eŋano mi wakonge ra, yemo maine birakanom arikirap.”

Currently Selected:

Aposolo 26: onsNT

Highlight

Share

Copy

None

Want to have your highlights saved across all your devices? Sign up or sign in