2 Korinti 12

Pauloŋo Kine Kine Kuneŋine Ka Detka Okange

1Na mawa mawa don rawe mi menaŋ okanmaike, ŋo siluŋ raikale, yemo Waomŋo wetne malot-keke so wetne maingeke, eya wane donkisi rawe. 2Na Kristo wane ŋeimane detkamaile, eŋe kine kine mane ka more gemageki, koma mo 14 okanmaike, ŋei yewa eŋe Kaisaleŋo qeli naduŋ kareweo (3) mawake, na mi detmaile, eŋe solarop okange me sola midaine deineŋo mane zingeki kake, Kaisaleŋoka weku detmaike. 3So na detmaile, ŋei yewa eŋe qeliwo mawake, eŋe kepe solarop okange me kepe sola midaine okange, eyamo mi detmaile, Kaisaleŋo detmaike. 4So eŋe yewao don ŋei aŋaŋo mi raraine so kepeo mi ra wakon ra wakone yewa detke. 5Eso na ŋei yewa mawa kaikale, ŋo nae yemo mi mawa nagukale, weku ketkele gemaile, eya wane maine raikale. 6Na mawa mawa don rawerap, eyamo mi borikirap, eya rawe wele okangi rap, ŋo siluŋ ŋei natneŋo naŋane detpi zok wawaine okaniyake na eya mi okanikale. Na kine kine ma okanmaile, so don rawe det okanmami, yewaŋoka payake, na eya wetkemaile so ramaile.

Sitman Wakele Yaleŋo Paulo Wane Solaino Qelotke Okorake

7So kine kine de kune ŋine Waomŋo sikannangi kakole, eya wane na nae wane detpe wawaine mi okaniyakane, Kaisaleŋo sola bikumne kotino sitman wakele yale mane motke, eya wane detpe, Ŋei Borikinane qelit medep maneŋo mete tabeŋo neku gemaike, yaleokan okanmaike. Eyaŋo neku more neu ket biranangi kotonane detpe wawaine mi okaniyakane kine kine yewa more ninge. 8Na atak karewe eya wane ra more Waom meŋen kakole, olatpe kine kine yewa ma biraki ariyakane. 9Ŋo oŋo iwa yale nolatke, “Mauluk maulukneŋo rokop gan okanmaike, so naŋane zonomŋo ŋei set pelek okan okanmami, yewao suwa more ebuki qesiŋ okanmami.” Eya wane, na zonomne midaine rawe paki, qomne mi umareyake. Midaka! Na okole weneŋ gemaile, wet pesekk manerop eya wane dere more set pelekne mawa kaikalane, pakimo Kristo wane zonomŋo naŋano maine payake. 10Na Kristo wane ra more zonomne midaine gekale, wikile so wet borik desikale, me neku kito okanikei, me umat kine kineŋo neuyake, me matali qetali okannanikei, me qeka maka wakonnaniyake, yewao na wet menaŋ det okanmaile. Na zonomne midaine naso yewaoka, wikile so wet boriko na togole okanmaile.

Pauloŋo Aposolo Uratainane Kine Ra Wakonge

11Na don yewa rele yemo, ma sirak don rele, ŋido qebin-nanbi siluŋ rele, ŋine ŋidom solane mawa kaurap yemo menaŋgirap. Na ŋei yauwine gemaile, eyamo det okanmaile, so na aposolo kopŋine wawaine eŋane baneno ketkele gege yemomi ge okanmaile. 12Na ŋinano sorin borin okane urata mawe, masi so kine kine de kune ŋine so kine kine zonominerop wakone more yewaŋo na aposolo gemaile, eya wane kine ma wakonge. 13Pakimo, ŋine eya wane doku tau tau magu kepe mat natno ŋine eŋane ketkele mi gemami? Yaup kine kine omakŋune ne yewa weku yemo mi okan ŋungole. Sot yemo wekumde mane okan ŋungole, pakimo eya wane siluŋ turuŋne qeliŋgei.

Paulo Eŋe Korinti Ŋei Ŋerep Eŋane Wetne Suwaine Pake

14Iwa yemo, na u ŋunbe, atak karewe okaniyakane eweke gemaile. U more alakan okangole yale okane more kine kine ŋibuma ne i mi okanikale. Na wesi aboŋ ŋinane midaka. Ŋinŋinane zok nanmaike. Ŋerep medep eŋe naga maga kopene eŋane urata ma more yeye kine kine mi teba okanmami. Midaka! Naga maga edo yemo ŋerep medewekopene qesiŋ-onikei wane urataine ma more yeye kine kine teba okanmami. 15Na baŋ wet pesekko ŋinane oŋa oŋa ŋine menageyakane rawe paki, wesi aboŋneka mida, nae gegene weneŋ qikka more qesiŋ ŋunikale. Naŋane wetneŋo ŋinane zok manerop pamaike, pakimo ŋinane wet ŋineŋo daleo naŋaneka nigatne pakep me?

16Pakimo, ŋei natneŋo naŋane iwa yale ra okanmami. “Welekatne eŋe ŋenane yeye kine kineze didiwo ŋebu ma ŋebu ma, yemo mi okange. Ŋo sanka ŋei isione more yeye kine kineene ebu ma ebu ma, eya yemo okange mane.” 17Pakimo daleo? Na ŋeikopne natne ŋinano biraonbe ukoi, eŋe taleonbe edo ŋinano ŋine kine kine mane ŋibuma ne okangoi me? 18So na Titus ŋinano uyakane qebin kakole, so doku tau tau kimane mane weneŋ birakawe eŋerop weneŋ ukoik. Pakimo, Titusŋo u more ŋinano ŋine kine kine mane ŋibuma nema okanŋunge me? Eŋe so na ŋere Asu wekumi pa ŋeponmaike me? So ŋere numase weku ka mi gesoke ge maiteme?

Ŋei Natneŋo Wetene Maingekei Wane Pauloŋo Girem Edange

19Ŋine korop wetke ramami, ŋene ŋedomka ŋinane deŋino yaup qesiŋ nagumaine, yale okanmaike me? Yale midaka. Ŋene Kristorop ge more Kaisale wane kaitko don ra okanmaine, so kima maepkopne, eya wane me eya wane mida, ŋine menaŋgei wane done ra okanmaine. 20Na kaet so dere mezet nigatne okanmaile, yemo na ŋinano u more naŋane wetko pamaike, eya mi ka more ŋunbe kine mane okanbi, detpe mi menageyake, me ŋine nanbi na kine mane okanbe, detpi mi menageyake. Na kaet nanmaike, yemo na baŋ ŋunbe tanik kine kine iwa yale ŋinano payake, sori sorin, dere worik, busu, wawaine, ewe mabaik, sigi qeqe, don qeqe, matali qetali. Na kine kine yaline ŋinano paki ukalane dere mezet okanmaile. 21Na ŋinano koso ukale naso yewao naŋane Kaisaleŋo baŋ ŋinane kait ŋino gamu ningi paki, neuket bira-naniyake. Pakimo na baŋ ŋei ŋerep loutne ŋo alakan borikine diinerop makoi, yewa mi rapoke ŋadek-kakoi, wenip, so bailalaŋ, eya wane eŋane aroke qom borik makalane dere mezet okanmaile.

Currently Selected:

2 Korinti 12: onsNT

Highlight

Copy