Roma 9

Ubahodunggoc kefec

1Ni Kristogoc kpeketahema yoac fora deduae, ikoc mi anduae. Nga Tiri Asungo here negen negenna midiu imocngo hepucna anu yofi deduae. 2Ni nasosoc arengfocna yeneac amma ubahodungtoa nga ubaebicgoc kecduae. 3#Mke 32:32Nga neng yeneac do mema sowecac bageau kecma Kristoaru agac kecbadeac negenduae. Neni kisicnina mocgu. 4#Mke 4:22; Sese 1–10; Myeg 147:19; Rom 15:8; Heb 9:5Nga yeni Isracel areng, yeni manggacac medacyombong kuc nga kibikperaginginagoc kecdae. Yeni dzadzahac nga dedeseriyoacgoc kecma Anutuac womong garenggekecdae. Amma Anutungo wiac yemmeudeac deseriyemmeec, imoc yenearu fedengoc. 5Nga yeni kisicbangecfocngina negendae, yeneac fingecsaheunac Kristongo ngicsiric amma fingerec. Ye Anutunoc, wiac sasawaac engena. Yearu dedengerec nga dedengerec fekengkecbeso, imoc fora.

Anutuac nambaracfora

6Anutu yoara kuha made, ngeni ifi mi negembisia. Imoc yofi, Israengicngac Isracel fingecsaheunac, yenearunac goa Isracel yombong mi andae. 7Imocac siriha yofi, Abrahanggac bangecfora goa yeni Sara kimearunac. Imocac yofi oho ohoya fede,

“Isakaac fingecsahengo geac bangecfocga yombong debesandae.” (Fing 21:12)

8 # Gar 4:23 Sebiac arennu fingecdae, yeni Anutuac nambaracfora, ifi mi dede. Dedzegeac bageau fingecandae, yeni Abrahanggac bangecfora yombong andae. 9Ye Abrahang nga Sara yerigoc yoac yofi dedzege anec,

“Ni naso deduamoc imohai habare Sarango medac mong mema kefude.” (Fing 18:10, 14)

Songea arennu meisinnunuude

10Nga imocsac kpac, Bangecnina Isaka ye Rebekagoc feu yeng fora tombosonga kpenangyuruec. 11-12Nga medac yeri mi fingecma kecmaecngoc yereac angammemengira gombunga me mangana mong mi femanu Anutungo yereac Rebeka yofi bic edeec,

“Darango muneaac kingang kpebesande.” (Fing 25:23)

Anutungo mong uayaac amma mi meisinggeude, ye songoya nga negen negengaac amma ngicngac kpacyunuande, imoc seria nanudeac ye ifi anec. 13Imocac yofi oho ohoya fede,

“Ni Yakobo heresongogoc hoanggema Esau ine ubanango ukuai.” (Mkai 1:2-3)

14Ifiac amma yofi denide. Anutungo sing mi segeude. Ye yoara gombunga angande. 15Yeng Mose yofi edeec,

“Ni mong wosoefac ammibadeac negemma ye wosoefac ammibade. Nga monggac ubamangang ammibeso negenduae, ye ubamangang ammibade.” (Mke 33:19)

16 # Efs 2:8 Ifi anu Anutungo yengena wosoefahaac amma ngic meisinggeude nga ngic ye yengenaocngoc songo meficgeecac me uatoa meecac amma ifi mi fingerude. 17Mitikibiu yoac oho ohoya fede, imocngo Farao yofi edeec,

“Ni gearu kucna bangeha bangeha edzacyunubade nga kpacna dekperagigec kenu negendacgecdeac amma miacguai.” (Mke 9:16)

18Imoc yofi, Anutungo mong wosoefac ammibesonga negendeu, imoc ammiude. Amma monggac herea dzegebesonga negendeu, imoc dzegeude.

Enangmemengic

19Ge yoacna imoc negemma yofi denade gedang, “Anutuac songo nga negen negeng kpeudeac sing mi fede. Nga sing kpekpe mi febac dede yeng ni kopocsicnagoc naric mi debac.” 20Bangecngic ge negenna, ge ngicsac, ifi dema Anutuac yoac turunga mi merembesena. Marikibi minginango wiac mong meu wiac maringo memea, imocngo mingina naric mi kpesimiude,

“Ge nocac ni ifia menunec?” (Yes 29:16; 45:9)

21 # Yer 18:6 Enangmemengic ye songeaac arennu ua naric meude, ye gbaki mema imocngo enang mong uaya engena meude nga enang mong uaya mamea naric meude.

22-23Enang goa yeni kuc kperaginginagoc anggecdeac Anutungo warac wosocefac ayemmema mengereyunuec. Ngicngac yeni yeac kuc kibikperagiagoc henggecde, songoya ifi anec. Ye desi desiac fakaya ngicngac edzacyunuudeac nga yeni kuha negenggecdeac enang goa yeni kpedzac kpedzameaac arennu bic faifaia nandae, yeneac amma modzotitia kpac nasoherec tomaingina kecande, ye songea naric modacma ifinoc anude. 24Imocac nenannoc kpacnunuec. Imoc Yuda arengsac kpac, ye bangec monnunac ngicngac momoc kpacyunuec. 25Ye profete Hoseaac kibiu ifingoc yofi dede,

“Ngicngacareng mong warac neac ngicngac mi kecgec, yeni neac ngicngac, ifi kpacyunubade. Nga ngac mong heresongogoc mi hoanggeai, ye neac songongac, yeac kpara ifi kpacbesandua.” (Hos 2:23)

26Nga bangec monnunac ngicngac Anutungo yeneac yofi deec,

“Ngeni neac ngicngac kpac.” Amma bangec imohaingoc yofi kpacyunubesandae, “Yeni Anutu kekehagoc yeac medacfora.” (Hos 1:10)

27Yesaiango ine Isracel yeneac negemma yofi kpacma dede,

“Isracel ngicngac yeni kpetengina kuneng, imoc kondunggac sangi isoc anudeu ni sifu yenearunac noboha efeanecsac onggongyunuba komoc kpegecde. 28Kebungo bangecfu ngicngac yoacngina bicbic isinggema desiyunuma uaya mesibesande.” (Yes 10:22-23)

29Nga Yesaiango kpefingyoac yofi bic deec,

“Kebu Kuctoa Mingina, yeng bangecfocnina noboha goa mi onggongyunuu komoc kpebau debac Sodong nga Gomora yeni isoc ambing.” (Yes 1:9)

Negen negensingngina wagec

30Ni yofi torokpema deduae, bangec monnunac ngicngac, yeneng dindingac kecgecdeac seseriua mong mi mekecma kekec dindingac eng meficgegec. Yeni negensinggegec, imocac amma Anutungo dindingac kpacyunuec. 31Nga Isracel ngicngac yeni ine dedeseriyoacngo kekec dindingacfu faiyunuudeac seseriua mekecgec. Mekecma dedeseriyoacfusing dindingac kekec mi meficgegec. 32#Yes 8:14Yeni faka nga angammemenginaac negensima negen negensing fora imoc ine wagec. Yeni hocfu kpondzong heima mayunuec. 33#1Pe 2:6Imocac yofi oho ohoya fede,

“Negendae, ni Sionnu hoc mong faiba imohai yeni kpondzong heigecde nga peperandziu tifainggema negemmangang meficgegecde. Nga mongngo ye negensinggeudeu ye game kpekpeu mi embesande.” (Yes 8:14; 28:16)

Currently Selected:

Roma 9: Ded

Highlight

Compare

Copy