Roma 11

Ngicfocna segereyunuba

1 # 1Sm 12:22; Myeg 94:14; Frp 3:5 Imocac amma yofi negemma kpesiduae, Anutungo ngicngacfora bic wayunuec me? Imoc kpac! Neannaoc Israengic Benyaminggac arennunac nga kisicna Abrahang. 2Anutungo ngicngacfora bic meisingyunuma mi wayunuec, kpac. Nga Eria ye hereebiha Anutuac kicfu dekperagima israengicngac yeneac yofi dema numuec, imoc mitikibiu oho ohoya fede, 3#1Ngt 19:10, 14“Kebu, yeni geac profetefocga yunuhomegec nga geac arataga kpembarackegec. Nga ni mocgungosac kecbare kekecna meickegecdeac negendae.” 4Ye ifi numuu Anutungo ine turunga yofi meremmiec,

“Ni ngicfocna 7 tauseng bic segereyunuba kecdae. Nga yeni nemu Baari yearu fafoc mong mi heimigec.” Ngeni imoc negembisia. (1Ngt 19:10, 14, 18)

5Ifi isocngoc Anutungo yofinenggac yenearunac tosea meisingyunuma wosoefaha ayemmeu yengena habubisic mong amma kecdae. 6#Gar 3:18Yeng meisingyunuma danggunuha yemmeec, imoc yenang angammemengina gombungaac amma mi meisingyunuec, kpac. Ye angammemengina gombungaac amma meisingyunubac dede wosoefaha imoc wosoefac fora mi ambac.

7Imocac amma yofi fede, Isracel yeni wiac megecdeac uatoa mekecma imocac fora mong mi meficgegecde. Nga Anutungo ngicngac yeneac botucfunac meisingyunuec, yeneng ine wiac imoc meficgegecde. Anu Isracel noboha yeni ubaseri nga ubafong amma kecdae. 8Imoc yeneac yoac mong yofi oho ohoya fede,

“Anutungo faka meu yeni ongaasungina dzingfong anec. Amma kicnginango wiac mong mi hemma kedzacnginango wiac mong mi negenggec. Yeni ifia keceregecngo yaguc kecdaengoc.” (Dser 29:4; Yes 29:10)

9Imocac Dawidingo yofi deec,

“Yakaneneac fakangina angandae, imocngo subabanggeng nga ufic isoc meyunuu kopocsicnginaac turunga ambeso. 10Wiac mong mi henggecdeac yeni kicngina kundung kpebeso. Ge nasoya kpac ngadehokuc meyununa kecbisia.” (Myeg 69:22-23)

11 # Aps 13:46 Ni yofi torokpema kpesiba, Isracel yeni mayunuudeac kpondzong heigec me, imoc kpac. Yeni Anutuac yoac ferahegecac amma Anutungo bangec monnunac ngicngac, yeni kopocsicac ebicfunac mesiyunuu komoc kpegecde. Isracel yeneng yenemma keracmangang anggecdeac ifi anec. 12Nga Isracel yeni Anutuac yoac ferahegec, faka imocngo Anutuac wosoefactoa heficgeu bangeha bangeha yenearu kendarec. Amma Isracel yeni Anutuac sinnu makpegec, imocngo bangec monnunac ngicngac wiac gombunga homac yombong meficgeyemmeec. Kecma Isracel ngicngac sasawango negensinggegecde, naso imohai wiac engena yombong fingerude.

Bangec monnunac ngicngac

13-14Anu bangec monnunac ngicngac kecdae, ngeneac yofi deduae, neanna arengfocna yeneng ngeneac keracmangang anggecde. Amma yeni sing imohai ngeni isoc kopocsicac dzuac dzuac mema komoc kpegecde. Ifi fingerudeac negemma neng ngeneac aposoro anai. Amma ua mekecduae, imocac negemba engena yombong ande. 15Anutungo Isracel ngadehema waec, imocac bangec monnunac ngicngac ngeni Anutugoc uba mocgu amma ruae meficgegec. Ifi fedeu Anutungo monggoc Isracel hoangyunuude, imocngo heficgeu homemea yeneng gborima kekec meficgegecde.

Oliwa ic

16Ngeni yaka buma heima waraima Anutu migecdeu yaka sasawa imoc kpetiac anude.#11:16 Ye ic sogonggac dede. Imocac yoac Bangec kisiu 15:17-21. Yaka buma heima Anutuac sese faibesonga imocac yoac yomohai fede: Makekeng 23:19; 34:22; Sesememe 2:12, 14; 23:10, 17, 20; Bangec kisiu 18:12; 28:26 Dedeseriyoac 26:2, 10 Amma ic godea kpetiac andeu fawa sasawa ifingoc kpetiac anude.

17 # Efs 2:11-19 Anutungo oliwa fora imocac fawa goa metackema meickema, imocac tatahau, ge kate oliwafawa yombong, kapia mong kperecgeguma oliwa forau torokpeguec. Nga geng fawa fora yenigoc kecnec isoc yofi anude, ge ic godeagoc torokpema kecma kerecga ihacnac taima kecnade. 18Ifi andeac, ge sebiengeng amma fawa noboha yeneac yofi mi negembesena, “Neng feracyunuduae.” Ge ine sebiengeng annadeu yofi negembesena, ge ic fawasac, geng ic godea mi nanggenec nga ic godeango ine ge nanggeguma kecde. 19Ifi deba geng yofi denade gedang, “Yeni ninoc icfu torokpenugecdeac fawa goa metackegec.” 20Denec isoc, yeni mi negensinggegecac amma metacyunuec. Nga geng negensinggenecac amma seria nangkecnecngoc. Imocac negen negenggau sebiengenga kpac amma kengecgoc kecbesena. 21Anutungo yengena fawa mi onggongyunuecfu ge ifingoc naric mi onggongguude.

22 # Yoh 15:2, 4 Ge Anutuac faka yumea nga demetinga seria fede, momoc hentegecbesena. Ye ngic mayunuec, yeni demetinga seria ayemmeec nga ge ine faka yumeau anggenec. Ge yeac faka yumeaac bageau mi kecnadeu ge ifingoc herecgeguude. 23Nga fawa tosea negen negensingngina kpac, yeneng meremma negen negensinggoc anggecdeu ye icfu monggoc torokpeyunuude. Nga Anutungo icfu torokpeyunuudeac naric mi obohoude. 24Ge kateac oliwaac fawa kapia, imoc herecgeguma oliwa ic fora mong geac areng mi ande, imocgoc torokpeguudeac mi ebiriudeu, oliwa ic fora yengena fawa monggoc toro torokpe ua imocngo wiac efea yombong anude.#11:24 Ic nenea gbomegoc didimang yeneng sing ifia metorokpeandae.

Komoc kpegecde

25Tosofocna, ngeni ngenanggac negenggec engena ambacac amma yoac mong yomoc sufu sufuya fede, imoc negenggecdeac negenduae. Imoc yofi, Isracel noboha yeneac uba negen negengngina imoc fonggoma femanungoc bangec monnunac ngicngac, ngeni erema hakecma kpetenginaac sirihau hafoangoc ambeso. Kpetengina hafoangoc anuguc Isracel areng tosea ifingoc erema torokpegecde. 26#Yes 59:20-21Ifi anu Kebungo Isracel hafoangoc kopocsicac ebicfunac mesiyunuu komoc kpegecde. Imocac yoac yofi oho ohoya fede,

“Memengerec ngic ye Sionnunac hau Anutu ngadeheandae, yeneac faka mangana imoc sasawa Yakoboac arennunac meickeude.” 27“Nga kopocsicngina meickebade, imocngo naso imohai dzadzahacngina febesande.” (Yes 27:9; Yer 31:33-34)

28Siduc gombung hau Isracel yeni imoc ngadehema Anutugoc ngaba angkecma ngeneac sing meefaigec. Anutungo ine Abrahanggac bangecfora meisingyunuma kisicfocnginaac amma hoangyunukecde. 29Anutungo ngicngac kpacyunuu wosoefacfu kuc yemmema negen negenga ngade meremma monggoc wangecyunubac, faka imoc mi femide, kpac. 30Amma bangec monnunac ngicngac, ngeni warac Anutuac yoac kpekpe kecgec nga yofinenggac Isracel yeneng yeac yoac kpekpe kecgecac amma Anutuac wosoefac ngenearu fingerude. 31Yeni hanahema Anutuac yoac kpegecac ngeni Anutuac wosoefac megec. Nga Anutungo yofi faiec, ngeni wosoefac imoc megecguc yeni imoc ifingoc megecde.

32Anutungo ngade ngicngac sasawa wosoefac ayemmeude. Ye imocac hanahema ngicngac yoackpekpenginaac amma witicfu faiyunudarec.

Anutuac kpac dengerebesonga

33 # Yes 55:8-9 O, Anutuac semeng dzohongagoc fede nga negen negenga imoc kuneng nga kpeukeme kemea. Anu yeac desi desiac hania nga fakaya amma angammemea, imoc negen negennina feraheude. 34#1Kor 2:16Imoc yofiac,

yeac negen negennu wiac fede, imoc ngic mongngo naric mi negenude. Nga mongngo ye negen negeng naric mi meficgemiude. (Yes 40:13)

35Amma ngic mongngo hanahema Anutu wiac mong miecfu ye imocac turunga kpoumiude, imoc kpac yombong. (Yop 41:11)

36 # 1Kor 8:6 Anutu ye yengenaoc wiac sasawa meficgedarec. Imoc yengena kucfu fedacde amma yengena songo fingerudeac faifaia. Yearu dedengerec nga dedengerec fekengkecbeso, imoc fora.

Currently Selected:

Roma 11: Ded

Highlight

Compare

Copy