Bangec kisiu 25
25
Isracel yeni nemuonga fafoc heimigec
1Isracel yeni Sittim imohai kecma ngic yeni hanahema Mocaw yeneac naroangfocngina yenigoc serofaka angkecgec. 2Angkecgec naroang yeni anutunginaac sesegerecac nasou Isracelngicngac yenearu heitaiyunugec kemma yaka nema anutunginaac kicfu ngonducnema eweheimigec. 3Isracel yeni ifi amma Bacal Pecor#25:3 Bacal Pecor imoc kenacanngic yeneac nemuonga mong. yearu torokpegec. Anu Kebu ye yeneac herea buyombonggeec.
4Nga ye Mose yofi edeec, “Isracel ngenearu herebuna gerec isoc dzede, imoc kpac anudeac ge ngicngacareng yeneac enarafocngina sasawa meyunuma Kebu neac kicfu wenacfu gbedicyununa nanggec.”
5Ifi deu Mose ye Isracel yeneac desi desingicfocngina yofi edeyunuec, “Ngeni tembuc tembuc sasawango ngicfocngina botucnginaunac Bacal Pecor yearu torokpegecmoc sasawa homecfu faiyunubisia.”
Dzimiringo midyanngac wangecma heac
6Ifi demanu Mose nga Isracelkpebung hafoangoc yeni Kebugoc ewacemeemeac kporucamaac naguu kiacma nammagec isracelngic mongngo yeneac kicfu midyanngac mong dacmunafora yenearu wangecma haec. 7Hau womonggareng Aharon medaha Elecadzar yeac medac Pinehas, ye ifi hemma ngichabu yeneac botucfu yacma sangara enaragoc mariau mema 8ngadengirau modacyuruma isracelngic imocac kporucamau emma yerahafoc wosongirau nesarima nebucyuruec. Ye ifi anu Isracelngicngac yenearu hafei homectoayagoc imoc kpac anec, 9nga hafei homectoayagoc imocngo meyunuu ngicngac 24,000 homegec.
Pinehasac yoac
10Anu Kebungo Mose yofi edeec, 11“Womonggareng Aharon medaha Elecadzar yeac medac Pinehas, yeng ni isoc yeneac keracmangang amma Isracel yeneac botucfunac herebutoana kuha maudeac ua medac. Ifi anu ni keracmangang amma Isracelngicngac mi meicyunudua nga tosea yeni yaguc kecdaengoc. 12Imocac yofi edebesena, ‘Ni yegoc ruaeac dzadzahacna mebade. 13Ye Anutuya neac amma keracmangang amma Isracel yeneac ngaba meic meicke ua meec, imocac ye nga yeac gboricfora yeac ngadeau fingecgecde, yeni dzadzahac imocac manau kecma womonggareng ua nasoya nasoya mekengkecbesandae.’ ”
14Nga isracelngic midyanngac yegoc nebucyuruyuruya ye Salu medaha Dzimiri, ye Simeconggac amaarenghabu mong yeneac ngicenara. 15Nga midyanngac nebucgeec yeac kpara Kodzebi. Ye Midyan amaarenghabu mong yeneac ngicenara kpara Tsur, yeac naroanga.
Midyanngicngac tobangyunuma ikocfu wangecyunugec
16Anu Kebungo Mose yofi edeec, 17“Midyanngicngac yeni sufu sufuu tobangngunuma ikocfu wangecngunugecac ngeni midyanngic yenigoc dzikac kpema ewema yunudacbisia. 18Imoc yofiac, yeni Pecorac fakau tobangngunuma ngenigoc dzikac isoc kpema kecdae. Imohai naingngina Midyanggac ngicenaraac naroanga Kodzebi, yearu faka fingerec. Pecorac amma hafei homectoayagoc fingerec, wenac imohai Kodzebi kpebucgegec.”
Currently Selected:
Bangec kisiu 25: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
